ಸೆ.30ರೊಳಗೆ ಆಧಾರ್-ಪಾನ್ ಜೋಡಣೆ ಮಾಡದಿದ್ದರೆ ಏನಾಗುತ್ತದೆ?

ಸೆ.30ರೊಳಗೆ ನೀವು ನಿಮ್ಮ ಪಾನ್ ಅನ್ನು ಆಧಾರ್‌ನೊಂದಿಗೆ ಜೋಡಣೆಗೊಳಿಸದಿದ್ದರೆ ಅ.1ರಿಂದ ಪಾನ್ ನಿಷ್ಕ್ರಿಯಗೊಳ್ಳುತ್ತದೆ. ಈ ಮೊದಲಿನ ನಿಯಮದಂತೆ ನಿಗದಿತ ದಿನಾಂಕದೊಳಗೆ ಪಾನ್-ಆಧಾರ್ ಜೋಡಣೆ ಮಾಡದಿದ್ದರೆ ಪಾನ್ ಸಿಂಧುತ್ವವನ್ನು ಕಳೆದುಕೊಳ್ಳುತ್ತಿತ್ತು.

  ಅಸಿಂಧು ಪಾನ್ ಎಂದರೆ ನೀವು ಪಾನ್ ಹೊಂದಿಲ್ಲವೆಂದೇ ಅರ್ಥ. ಸರಳವಾಗಿ ಹೇಳಬೇಕೆಂದರೆ ಪಾನ್ ರದ್ದಾಗುತ್ತಿತ್ತು. ಇನ್ನೊಂದೆಡೆ ನಿಷ್ಕ್ರಿಯ ಪಾನ್ ಎಂದರೆ ನೀವು ಅದನ್ನು ಆಧಾರ್‌ನೊಂದಿಗೆ ಜೋಡಣೆ ಮಾಡುವವರೆಗೆ ಪಾನ್ ಬಳಸಿ ಯಾವುದೇ ಹಣಕಾಸು ವಹಿವಾಟುಗಳನ್ನು ನಡೆಸಲು ನಿಮಗೆ ಸಾಧ್ಯವಾಗಲಿಕ್ಕಿಲ್ಲ. ಆದರೆ ‘ನಿಷ್ಕ್ರಿಯ’ ಶಬ್ದವನ್ನು ಸರಕಾರವು ಇನ್ನೂ ಅಧಿಕೃತವಾಗಿ ವ್ಯಾಖ್ಯಾನಿಸಿಲ್ಲ.

    2019,ಜುಲೈನಲ್ಲಿ ಮಂಡಿಸಲಾದ ಮುಂಗಡಪತ್ರವು ಪಾನ್-ಆಧಾರ್ ಜೋಡಣೆ ನಿಯಮದಲ್ಲಿ ಬದಲಾವಣೆಯನ್ನು ಮಾಡಿತ್ತು. 2019,ಮಾ.31ರಂದು ಆದಾಯ ತೆರಿಗೆ ಇಲಾಖೆಯು ಹೊರಡಿಸಿದ್ದ ಅಧಿಸೂಚನೆಯಲ್ಲಿ ಪಾನ್-ಆಧಾರ್ ಜೋಡಣೆಗೆ ಸೆ.30ನ್ನು ಅಂತಿಮ ದಿನಾಂಕವೆಂದು ನಿಗದಿಪಡಿಸಲಾಗಿತ್ತು. ಆದರೆ ನೂತನ ನಿಯಮದಂತೆ ಪಾನ್-ಆಧಾರ್ ಜೋಡಣೆಯಾಗದಿದ್ದರೆ ಅ.1ರಿಂದ ಪಾನ್ ರದ್ದಾಗುವ ಬದಲು ನಿಷ್ಕ್ರಿಯಗೊಳ್ಳುತ್ತದೆ. ವ್ಯಕ್ತಿಯು ಪಾನ್ ಬಳಸಿ ನಡೆಸಿದ್ದ ಹಿಂದಿನ ವಹಿವಾಟುಗಳ ಸಿಂಧುತ್ವವನ್ನು ರಕ್ಷಿಸುವ ಉದ್ದೇಶದಿಂದ ಅದನ್ನು ರದ್ದುಗೊಳಿಸುವ ಬದಲು ನಿಷ್ಕ್ರಿಯಗೊಳಿಸಲು ತಿದ್ದುಪಡಿಯನ್ನು ಮಾಡಲಾಗಿದ್ದು,ಪಾನ್-ಆಧಾರ್ ಜೋಡಣೆಗೆ ನೂತನ ನಿಯಮವು ಸೆ.1ರಿಂದ ಅಸ್ತಿತ್ವಕ್ಕೆ ಬಂದಿದೆ.

ಸೆ.30ರೊಳಗೆ ಆಧಾರ್-ಪಾನ್ ಜೋಡಣೆಯನ್ನು ಪೂರ್ಣಗೊಳಿಸದಿದ್ದರೆ ಏನಾಗುತ್ತದೆ ಎನ್ನುವುದರ ಬಗೆ ಸ್ಪಷ್ಟತೆಯಿಲ್ಲ ಎನ್ನುತ್ತಾರೆ ತಜ್ಞರು. ಅಂತಿಮ ಗಡುವಿನ ಬಳಿಕ ಪಾನ್ ಅನ್ನು ಆಧಾರ್‌ನೊಂದಿಗೆ ಜೋಡಣೆ ಮಾಡಿದ ಬಳಿಕ ನಿಷ್ಕ್ರಿಯ ಪಾನ್ ಕ್ರಿಯಾಶೀಲಗೊಳ್ಳುವುದೇ ಎನ್ನುವುದನ್ನು ಸರಕಾರವು ಇನ್ನೂ ಸ್ಪಷ್ಟಪಡಿಸಬೇಕಿದೆ.

ಪಾನ್ ನಿಷ್ಕ್ರಿಯಗೊಂಡರೆ ಅದು ಇದ್ದೂ ಇಲ್ಲದಂತಾಗುತ್ತದೆ ಮತ್ತು ಅಂತಹ ಸಂದರ್ಭದಲ್ಲಿ ಪಾನ್ ಉಲ್ಲೇಖ ಕಡ್ಡಾಯವಾಗಿರುವ ಯಾವುದೇ ನಿರ್ದಿಷ್ಟ ಹಣಕಾಸು ವಹಿವಾಟನ್ನು ನಡೆಸಲು ಸಾಧ್ಯವಿಲ್ಲ. ನಿಷ್ಕ್ರಿಯ ಪಾನ್ ಅನ್ನು ಹೇಗೆ ಕ್ರಿಯಾಶೀಲಗೊಳಿಸಲಾಗುತ್ತದೆ ಎನ್ನುವುದನ್ನು ಕೇಂದ್ರೀಯ ನೇರ ತೆರಿಗೆಗಳ ಮಂಡಳಿಯು ಇನ್ನೂ ಸ್ಪಷ್ಟಪಡಿಸಿಲ್ಲ ಎನ್ನುತ್ತಾರೆ ತಜ್ಞರು.

  ಪಾನ್-ಆಧಾರ್ ಜೋಡಣೆಗೆ ಸೆ.30ರ ಗಡುವನ್ನು ಇನ್ನಷ್ಟು ವಿಸ್ತರಿಸುವ ಸಾಧ್ಯತೆಗಳು ಕಂಡು ಬರುತ್ತಿಲ್ಲ. ಆದಾಯ ತೆರಿಗೆ ಕಾಯ್ದೆ,1961ಕ್ಕೆ ಹೊಸ ಕಲಂ 139 ಎಎ ಅನ್ನು ಸೇರಿಸುವ ಮೂಲಕ 2017,ಜುಲೈ 1ರಿಂದ ಆಧಾರ್‌ನ್ನು ಪಾನ್ ಜೊತೆಗೆ ಜೋಡಣೆಗೊಳಿಸುವುದನ್ನು ಕಡ್ಡಾಯ ಮಾಡಲಾಗಿತ್ತು. ಆದರೆ ನಂತರ ಹಲವಾರು ಬಾರಿ ಈ ಗಡುವನ್ನು ವಿಸ್ತರಿಸಲಾಗಿತ್ತು.

  ಗಡುವು ಇನ್ನಷ್ಟು ವಿಸ್ತರಣೆಗೊಳ್ಳುವ ಸಾಧ್ಯತೆ ಕಡಿಮೆ,ಹೀಗಾಗಿ ಪಾನ್ ಹೊಂದಿರುವವರು ಸೆ.30ರೊಳಗೆ ಅದನ್ನು ಆಧಾರ ಜೊತೆಗೆ ಜೋಡಣೆಗೊಳಿಸಬೇಕು. ಇದನ್ನು ಎಸ್‌ಎಂಎಸ್ ರವಾನೆ ಅಥವಾ ಇ-ಫೈಲಿಂಗ್ ವೆಬ್‌ಸೈಟ್ ಅಥವಾ ನಿಯೋಜಿತ ಪಾನ್ ಸೇವಾ ಕೇಂದ್ರಕ್ಕೆ ಭೇಟಿ,ಹೀಗೆ ಮೂರು ವಿಧಾನಗಳಲ್ಲಿ ಮಾಡಬಹುದು.