ಐಎಎಎಫ್ ಪ್ರಶಸ್ತಿ ಸ್ವೀಕರಿಸಿದ ಪಿ.ಟಿ.ಉಷಾ
ಹೊಸದಿಲ್ಲಿ, ಸೆ.25: ಭಾರತದ ಮಾಜಿ ಅಥ್ಲೀಟ್ ಹಾಗೂ ಒಲಿಂಪಿಯನ್ ಪಿ.ಟಿ. ಉಷಾಗೆ ಪ್ರತಿಷ್ಠಿತ ಇಂಟರ್ನ್ಯಾಶನಲ್ ಅಸೋಸಿಯೇಶನ್ ಆಫ್ ಅಥ್ಲೆಟಿಕ್ಸ್ ಫೆಡರೇಶನ್(ಐಎಎಎಫ್)ವೆಟರನ್ ಪಿನ್ ಅವಾರ್ಡ್ ನೀಡಿ ಗೌರವಿಸಲಾಗಿದೆ. ದೋಹಾದಲ್ಲಿ ನಡೆದ ಐಎಎಎಫ್ನ 52ನೇ ಸಮ್ಮೇಳನದಲ್ಲಿ ಉಷಾ ಪ್ರಶಸ್ತಿ ಸ್ವೀಕರಿಸಿದರು.
‘‘ದೋಹಾದಲ್ಲಿ ನಡೆದ 52ನೇ ಐಎಎಎಫ್ ಸಮ್ಮೇಳನದಲ್ಲಿ ವೆಟರನ್ ಪಿನ್ ಪ್ರಶಸ್ತಿ ನೀಡಿರುವ ಐಎಎಎಫ್ ಹಾಗೂ ಅಧ್ಯಕ್ಷ ಸೆಬಾಸ್ಟಿಯನ್ ಕೊ ಅವರಿಗೆ ನನ್ನ ತುಂಬು ಹೃದಯದ ಕೃತಜ್ಞತೆಗಳು. ನಮ್ಮ ದೇಶದಲ್ಲಿ ಅಥ್ಲೆಟಿಕ್ಸ್ ಬೆಳವಣಿಗೆಗೆ ನಿರಂತರವಾಗಿ ಕೊಡುಗೆ ನೀಡಲು ನಾನು ಎದುರು ನೋಡುತ್ತಿರುವೆ’’ ಎಂದು ಉಷಾ ಬುಧವಾರ ಟ್ವೀಟ್ ಮಾಡಿದ್ದಾರೆ.
ಉಷಾ 1984ರ ಲಾಸ್ ಏಂಜಲಿಸ್ನ ಒಲಿಂಪಿಕ್ಸ್ನಲ್ಲಿ ನೀಡಿದ ಅತ್ಯುತ್ತಮ ಪ್ರದರ್ಶನದಿಂದ ಖ್ಯಾತಿ ಪಡೆದಿದ್ದರು. ಆಗ ಅವರು 400 ಮೀಟರ್ ಹರ್ಡಲ್ಸ್ ಫೈನಲ್ನಲ್ಲಿ 1/100 ಸೆಕೆಂಡ್ನಲ್ಲಿ ಕಂಚಿನ ಪದಕದಿಂದ ವಂಚಿತರಾಗಿದ್ದರು. ‘ಪಯ್ಯ್ಳಿ ಎಕ್ಸ್ಪ್ರೆಸ್’ ಖ್ಯಾತಿಯ ಉಷಾಗೆ 1983ರಲ್ಲಿ ಪ್ರತಿಷ್ಠಿತ ಅರ್ಜುನ ಪ್ರಶಸ್ತಿ ಹಾಗೂ ಎರಡು ವರ್ಷಗಳ ಬಳಿಕ 1985ರಲ್ಲಿ ಪದ್ಮಶ್ರೀ ಪ್ರಶಸ್ತಿ ಲಭಿಸಿತ್ತು.
