ಈ ರಾಜ್ಯದ ವಿಸ್ತೀರ್ಣದ ಮೂರು ಪಟ್ಟು ಅರಣ್ಯ ಒತ್ತುವರಿ !

ಹೊಸದಿಲ್ಲಿ: ದೇಶದಲ್ಲಿ 13 ಲಕ್ಷ ಹೆಕ್ಟೇರ್ ಅರಣ್ಯಭೂಮಿ ಒತ್ತುವರಿಯಾಗಿದ್ದು, ಇದು ಗೋವಾ ರಾಜ್ಯದ ಒಟ್ಟು ವಿಸ್ತೀರ್ಣದ ಮೂರು ಪಟ್ಟು.

ಅತ್ಯಧಿಕ ಅಂದರೆ ಒಟ್ಟು ಒತ್ತುವರಿಯ ಶೇಕಡ 41ರಷ್ಟು ಒತ್ತುವರಿ ಮಧ್ಯಪ್ರದೇಶದಲ್ಲಿ ಆಗಿದೆ. ಕಳೆದ ಎಂಟು ವರ್ಷಗಳಲ್ಲಿ ಈ ರಾಜ್ಯದಲ್ಲಿ ಅರಣ್ಯ ಒತ್ತುವರಿ 66 ಪಟ್ಟು ಹೆಚ್ಚಾಗಿದೆ. 2011ರಲ್ಲಿ ರಾಜ್ಯದಲ್ಲಿ 8077 ಹೆಕ್ಟೇರ್ ಅರಣ್ಯ ಒತ್ತುವರಿಯಾಗಿತ್ತು. ಆದರೆ 2019ರ ವೇಳೆಗೆ ಮಧ್ಯಪ್ರದೇಶದಲ್ಲಿ ಒಟ್ಟು ಒತ್ತುವರಿಯಾಗಿರುವ ಅರಣ್ಯ 5.34 ಲಕ್ಷ ಹೆಕ್ಟೇರ್. ರಾಜ್ಯದಲ್ಲಿ ನಿರಾತಂಕವಾಗಿ ಒತ್ತುವರಿ ನಡೆಯುತ್ತಿದ್ದು, ಅರಣ್ಯ ಹಕ್ಕು ಕಾಯ್ದೆಯಡಿ ಹಕ್ಕು ಪ್ರತಿಪಾದನೆ ಹೆಚ್ಚಿರುವುದು ಗೊಂದಲಕ್ಕೆ ಕಾರಣವಾಗಿದೆ.

ದೇಶದಲ್ಲಿ ಅರಣ್ಯ ಒತ್ತುವರಿ ಬಗೆಗಿನ ಅಂಕಿ ಅಂಶಗಳನ್ನು ಕೇಂದ್ರ ಪರಸರ ಸಚಿವಾಲಯ ಇತ್ತೀಚೆಗೆ ಮಾಹಿತಿ ಹಕ್ಕು ಕಾಯ್ದೆಯಡಿ ಕೇಳಲಾದ ಪ್ರಶ್ನೆಯೊಂದಕ್ಕೆ ಉತ್ತರವಾಗಿ ನೀಡಿದೆ. ಒಟ್ಟು ಒತ್ತುವರಿಯಲ್ಲಿ ಶೇಕಡ 82ರಷ್ಟು ಅರಣ್ಯ ಒತ್ತುವರಿ ಕೇವಲ ಐದು ರಾಜ್ಯಗಳಲ್ಲಿ ಆಗಿದೆ ಎನ್ನುವುದು ಅಂಕಿ ಅಂಶಗಳಿಂದ ತಿಳಿದುಬರುತ್ತದೆ.

ದೆಹಲಿ ಮೂಲದ ವಕೀಲ ಹಾಗೂ ಪರಿಸರವಾದಿ ಆಕಾಶ್ ವಸಿಷ್ಠ ಮಾಹಿತಿ ಹಕ್ಕು ಕಾಯ್ದೆಯಡಿ ಪ್ರಶ್ನೆ ಕೇಳಿದ್ದರು. ಇದಕ್ಕೆ ರಾಜ್ಯವಾರು ಅಂಕಿ ಅಂಶಗಳ ವಿವರ ನೀಡಿರುವ ಸಚಿವಾಲಯ, ಅರಣ್ಯಗಳ ಸಂರಕ್ಷಣೆ ಜವಾಬ್ದಾರಿ ರಾಜ್ಯ/ ಕೇಂದ್ರಾಡಳಿತ ಪ್ರದೇಶಗಳ ಸರ್ಕಾರದ್ದು ಎಂದು ಉತ್ತರ ನೀಡಿದೆ. ಯಾವ ಸ್ವರೂಪದ ಒತ್ತುವರಿಯಾಗಿದೆ ಎಂಬ ಪ್ರಶ್ನೆಗೂ ಸಚಿವಾಲಯ ಉತ್ತರಿಸಿಲ್ಲ.

ಒತ್ತುವರಿಗೆ ಹೊಣೆಯಾದವರನ್ನು ಪತ್ತೆ ಮಾಡಿ ಶಿಕ್ಷೆ ವಿಧಿಸುವ ಹೊಣೆ ಕೂಡಾ ರಾಜ್ಯ ಸರ್ಕಾರಗಳದ್ದು ಎಂದು ಸ್ಪಷ್ಟಪಡಿಸಲಾಗಿದೆ.
2010-11ರ ಅಂಕಿ ಅಂಶಗಳಿಗೆ ಹೋಲಿಸಿದರೆ ಮಧ್ಯಪ್ರದೇಶದಲ್ಲಿ ಭಾರಿ ಪ್ರಮಾಣದಲ್ಲಿ ಒತ್ತುವರಿ ಹೆಚ್ಚಿದ್ದು, ಗುಜರಾತ್ ಹಾಗೂ ಒಡಿಶಾದಲ್ಲಿ ಅದೇ ಪ್ರಮಾಣದಲ್ಲಿದೆ. ಛತ್ತೀಸ್‌ಗಢ, ಮಹಾರಾಷ್ಟ್ರ ಮತ್ತು ಕರ್ನಾಟಕದಲ್ಲಿ ಒತ್ತುವರಿ ಪ್ರಮಾಣ ಕಡಿಮೆಯಾಗಿದೆ.