ಕಳ್ಳ ಪೊಲೀಸ್

ಇದೊಂದು ರಸ ಪ್ರಶ್ನೋತ್ತರಗಳ ವೇದಿಕೆ. ನೀವು ಯಾವುದೇ ರಾಜಕೀಯ, ವರ್ತಮಾನ, ಬದುಕು, ಸಂಸಾರ, ಪ್ರೇಮಗಳಿಗೆ ಸಂಬಂಧಿಸಿದ ತುಂಟ ಪ್ರಶ್ನೆಗಳನ್ನು ಕೇಳಬಹುದು. ‘ಟೋಪಿವಾಲಾ’ ನಿಮ್ಮ ಪ್ರಶ್ನೆಗಳಿಗೆ ಅಷ್ಟೇ ವಿಡಂಬನಾತ್ಮಕವಾಗಿ ಉತ್ತರಿಸಲಿದ್ದಾನೆ. ಲವಲವಿಕೆಯ, ಅಶ್ಲೀಲತೆಯಿಲ್ಲದ, ಯಾರನ್ನೂ ಉದ್ದೇಶಪೂರ್ವಕವಾಗಿ ನೋಯಿಸದ ತುಂಟ ಪ್ರಶ್ನೆಗಳಿಗಷ್ಟೇ ಅವಕಾಶ.

ಆಸಕ್ತರು ಕೆಳಗಿನ ಇಮೇಲ್‌ಗೆ ತಮ್ಮ ಪ್ರಶ್ನೆಗಳನ್ನು ಕಳುಹಿಸಬಹುದು. kallapolice12@gmail.com
 

ಪೆಟ್ರೋಲ್ ಬೆಲೆ ಏರಿಕೆಯಾಗಿದೆ ಎಂದು ಇಲ್ಲೊಬ್ಬ ಮೋದಿ ಭಕ್ತ ಬಹಿರಂಗವಾಗಿ ಗೊಣಗುತ್ತಿದ್ದಾನೆ. ಅವನನ್ನು ಹೇಗೆ ಸಮಾಧಾನ ಪಡಿಸಲಿ?

-ಬಿ. ರಾಜೇಶ್ವರಿ, ಬೆಂಗಳೂರು

► ಮೋದಿಯ ಭಾಷಣದಲ್ಲಿರುವ ಪೊಸಿಟಿವ್ ಎನರ್ಜಿಯನ್ನು ಬಳಸಿ ಗಾಡಿ ಓಡಿಸಲಿ.

******************************

ಇಲ್ಲೊಬ್ಬ ಹುಡುಗಿ ಕೆಲವು ದಿನಗಳಿಂದ ನನ್ನನ್ನು ಚುಡಾಯಿಸುತ್ತಿದ್ದಾಳೆ. ಇವಳ ಕಾಟದಿಂದ ತಪ್ಪಿಸಿಕೊಳ್ಳುವುದು ಹೇಗೆ?

- ಖಲಂದರ್ ಶಾಫಿ, ಉಪ್ಪಿನಂಗಡಿ,

► ಬಹುಶಃ ಕೈಯಲ್ಲಿ ರಾಖಿ ಹಿಡಿದು ಚುಡಾಯಿಸುತ್ತಿರಬೇಕು. ಅದಕ್ಕೇ ಈ ದುಃಖ.

******************************

ನಾನು ಗಂಡು ಎನ್ನುವುದನ್ನು ಸಾಬೀತು ಮಾಡಬೇಕಾದರೆ ಏನು ಮಾಡಬೇಕು?

- ನಚಿಕೇತ್ ಆಚಾರ್ಯ, ಉಡುಪಿ

► ಹೆಣ್ಣಿಗೆ ಗೌರವ ನೀಡುವುದನ್ನು ಕಲಿಯಬೇಕು.

******************************

ಕವಿಯಾಗಬೇಕೆಂದಿದ್ದೇನೆ. ನಿಮ್ಮ ಸಲಹೆಯೇನು?

- ರಾಘವೇಂದ್ರ ಆರ್ಜೆ, ಮೈಸೂರು

► ಮೊದಲು ಒಳ್ಳೆಯ ಕವಿತೆಗಳಿಗೆ ಕಿವಿಯಾಗಿ.

******************************

ಇಲ್ಲೊಂದು ಬ್ರಾಹ್ಮಣರ ಸಂಘ, ಬ್ರಾಹ್ಮಣ ಧರ್ಮ ಸ್ವತಂತ್ರವಾಗಬೇಕು ಎಂದು ಸಂಘಟಿತರಾಗುತ್ತಿದ್ದಾರಲ್ಲ?

- ಎ. ಪಿ. ಪ್ರಭು, ಯೆಯ್ಯಡಿ

► ಹೌದು, ಹಾಗೆ ಸ್ವತಂತ್ರವಾದರೆ ಮಾತ್ರ ಅವರ ದೇವಸ್ಥಾನ, ಅವರ ಆಚರಣೆ, ಮಡಿ, ಮೈಲಿಗೆ, ಆಹಾರ ಪದ್ಧತಿಗಳ ಮೇಲೆ ಇತರ ಜಾತಿಗಳು ನಡೆಸುತ್ತಿರುವ ದಾಳಿಗಳು ನಿಲ್ಲಬಹುದು.