ಕರ್ನಾಟಕ, ಛತ್ತೀಸ್‌ಗಡ, ತಮಿಳುನಾಡಿಗೆ ಜಯ

► ವಿಜಯ್ ಹಝಾರೆ ಟ್ರೋಫಿ

ಬೆಂಗಳೂರು, ಸೆ.28: ವಿಜಯ್ ಹಝಾರೆ ಟ್ರೋಫಿ ಕ್ರಿಕೆಟ್ ಟೂರ್ನಮೆಂಟ್‌ನಲ್ಲಿ ಮುಂಬೈಗೆ ಇಂದು ಛತ್ತೀಸ್‌ಗಢ ಆಘಾತ ನೀಡಿದೆ. ಲೋಕೇಶ್ ರಾಹುಲ್ ಶತಕದ ನೆರವಿನಲ್ಲಿ ಕೇರಳ ವಿರುದ್ಧ ಕರ್ನಾಟಕ 60 ರನ್‌ಗಳ ಜಯ ಗಳಿಸಿದೆ.

  ಆಲೂರು ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಮುಂಬೈ ತಂಡ ಛತ್ತೀಸ್‌ಗಢ ವಿರುದ್ಧ ನಿಗದಿತ 50 ಓವರ್‌ಗಳಲ್ಲಿ 5 ವಿಕೆಟ್ ನಷ್ಟದಲ್ಲಿ 317 ರನ್ ಗಳಿಸಿತ್ತು. 318 ರನ್‌ಗಳ ಕಠಿಣ ಸವಾಲನ್ನು ಪಡೆದ ಛತ್ತೀಸ್‌ಗಢ ತಂಡ ಮಧ್ಯಮ ಸರದಿಯ ದಾಂಡಿಗ ಅಮನ್‌ದೀಪ ಖರೆ ಔಟಾಗದೆ 117 ರನ್ ಗಳಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಛತ್ತೀಸ್‌ಗಢ ತಂಡ ಇನ್ನೂ 1 ಎಸೆತ ಬಾಕಿ ಉಳಿಸಿ ಗೆಲುವಿನ ನಗೆ ಬೀರಿತು. ಟಾಸ್ ಸೋತು ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಮುಂಬೈ ತಂಡದ ಆದಿತ್ಯ ತಾರೆ 107 ಎಸೆತಗಳಲ್ಲಿ 90 ರನ್ ದಾಖಲಿಸಿ ತಂಡದ ಮೊತ್ತವನ್ನು ಉಬ್ಬಿಸಿದರು. ಜಯ ಬಿಸ್ತಾ (34) ಬೇಗನೆ ನಿರ್ಗಮಿಸಿದ ಬಳಿಕ ತಾರೆ ಮತ್ತು ಯಶಸ್ವಿ ಜೈಸ್ವಾಲ್ (44) ಇನಿಂಗ್ಸ್ ಕಟ್ಟಿದರು. ನಾಯಕ ಶ್ರೇಯಸ್ ಅಯ್ಯರ್ 50 ಎಸೆತಗಳಲ್ಲಿ 46 ರನ್ ಸಿಡಿಸಿದರು.

ಅಯ್ಯರ್ ನಿರ್ಗಮನದ ಹೊತ್ತಿಗೆ ಮುಂಬೈ 45 ಓವರ್‌ಗಳಲ್ಲಿ 4 ವಿಕೆಟ್ ನಷ್ಟದಲ್ಲಿ 238 ರನ್ ಗಳಿಸಿತ್ತು. ಸೂರ್ಯ ಕುಮಾರ್ ಯಾದವ್ 31 ಎಸೆತಗಳಲ್ಲಿ 8 ಬೌಂಡರಿ ಮತ್ತು 6 ಸಿಕ್ಸರ್ ಇರುವ 81 ರನ್ ದಾಖಲಿಸಿದರು. ಸೂರ್ಯಕುಮಾರ್ ಅವರ ಸ್ಪೋಟಕ ಬ್ಯಾಟಿಂಗ್ ನೆರವಿನಲ್ಲಿ ಮುಂಬೈ ತಂಡದ ಸ್ಕೋರ್ 300ರ ಗಡಿ ದಾಟಿತ್ತು.

  ಛತ್ತೀಸ್‌ಗಢ ತಂಡದ ಇನಿಂಗ್ಸ್ ಉತ್ತಮವಾಗಿರಲಿಲ್ಲ.ಆರಂಭಿಕ ದಾಂಡಿಗ ಶಶಾಂಕ್ ಚಂದ್ರಶೇಖರ್ (5) ಬೇಗನೆ ಪೆವಿಲಿಯನ್ ಸೇರಿದರು. ಜೀವನ್‌ಜ್ಯೋತ್ ಸಿಂಗ್ (44), ಮತ್ತು ಅಶುತೋಷ್ ಸಿಂಗ್(35) ಮುಂಬೈ ತಂಡವನ್ನು ಆಧರಿಸಲು ಯತ್ನಿಸಿದರು. ಜೀವನ್‌ಜ್ಯೋತ್ ಅವರನ್ನು ಶಮ್ಸ್ ಮುಲಾನಿ ಪೆವಿಲಿಯನ್‌ಗೆ ಅಟ್ಟಿದರು. 82ಕ್ಕೆ 2 ವಿಕೆಟ್ ಕಳೆದುಕೊಂಡ ಛತ್ತೀಸ್‌ಗಢ ತಂಡ ಈ ಮೊತ್ತಕ್ಕೆ 13 ರನ್ ಸೇರಿಸುವಷ್ಟರಲ್ಲಿ ಇನ್ನೊಂದು ಆಘಾತ ಅನುಭವಿಸಿತು. ಬಳಿಕ ಅಮನ್‌ದೀಪ್ ಖರೆ 94 ಎಸೆತಗಳಲ್ಲಿ 8 ಬವಂಡರಿ ಮತ್ತು 4 ಸಿಕ್ಸರ್ ಸಹಾಯದಿಂದ 117 ರನ್ ಗಳಿಸಿ ತಂಡದ ಗೆಲುವಿಗೆ ಸಹಾಯ ಮಾಡಿದರು. ಮೊದಲು ಅಮನ್‌ದೀಪ್ ಅವರು ಶಶಾಂಕ್ ಸಿಂಗ್(40) ನೆರವು ಪಡೆದರು. ಬಳಿಕ ಅಜಯ್ ಮಂಡಲ್ (ಔಟಾಗದೆ 39) ಮತ್ತು ಅಮನ್‌ದೀಪ್ ಮುರಿಯದ ಜೊತೆಯಾಟದಲ್ಲಿ 96 ರನ್ ಜಮೆ ಮಾಡಿದರು.

ಮುಂಬೈ ತಂಡದ ಪರ ಶಮ್ಸ್ ಮುಲಾನಿ (33ಕ್ಕೆ 3), ಧವಲ್ ಕುಲಕರ್ಣಿ 66ಕ್ಕೆ 1 ವಿಕೆಟ್ ಪಡೆದರು.

► ಕೇರಳಕ್ಕೆ ಸೋಲುಣಿಸಿದ ಕರ್ನಾಟಕ: ಇಲ್ಲಿನ ಎಂ,ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಇನ್ನೊಂದು ಪಂದ್ಯದಲ್ಲಿ ಕೇರಳ ವಿರುದ್ಧ ಕರ್ನಾಟಕ ತಂಡ 60 ರನ್‌ಜಯ ಗಳಿಸಿದೆ. ಟೀಮ್ ಇಂಡಿಯಾದ ಟೆಸ್ಟ್ ತಂಡದಲ್ಲಿ ಅವಕಾಶ ಕಳೆದುಕೊಂಡಿರುವ ಲೋಕೇಶ್ ರಾಹುಲ್ ಅವರು 122 ಎಸೆತಗಳಲ್ಲಿ 10 ಬೌಂಡರಿ ಮತ್ತು ಸಿಕ್ಸರ್ ನೆರವಿನಲ್ಲಿ 131 ಜಮೆ ಮಾಡಿದರು. ನಾಯಕ ಮನೀಷ್ ಪಾಂಡೆ 51 ಎಸೆತಗಳಲ್ಲಿ 50 ರನ್ ಗಳಿಸಿದರು. ಕೇರಳದ ಬೌಲರ್‌ಗಳು ಕರ್ನಾಟಕವನ್ನು 294ಕ್ಕೆ ನಿಯಂತ್ರಿಸಿದರು. ಕೇರಳದ ಬ್ಯಾಟಿಂಗ್ ಆರಂಭದಲ್ಲಿ ಚೆನ್ನಾಗಿತ್ತು. ಆರಂಭಿಕ ಬ್ಯಾಟ್ಸ್ ಮನ್ ವಿಷ್ಣು ವಿನೋದ್ ಶತಕ (104) ದಾಖಲಿಸಿದರೂ ತಂಡ ಗೆಲುವಿನ ದಡ ಸೇರಲಿಲ್ಲ.

ಆಲೂರ್ ಕ್ರಿಕೆಟ್ ಸ್ಟೇಡಿಯಂ -2ರಲ್ಲಿ ನಡೆದ ಇನ್ನೊಂದು ಪಂದ್ಯದಲ್ಲಿ ಸೌರಾಷ್ಟ್ರ ವಿರುದ್ಧ ಹೈದರಾಬಾದ್ 121 ರನ್‌ಗಳ ಭರ್ಜರಿ ಜಯ ಗಳಿಸಿದೆ. ಬಿಹಾರದ ವಿರುದ್ಧ ತಮಿಳುನಾಡು ತಂಡ ಜಯ ಸಾಧಿಸಿದೆ. ಬಿಹಾರ 50 ಓವರ್‌ಗಳಲ್ಲಿ 7 ವಿಕೆಟ್ ನಷ್ಟದಲ್ಲಿ 217 ರನ್ ಗಳಿಸಿತ್ತು. ವಿಜಯ್ ಶಂಕರ ಔಟಾಗದೆ 91 ಮತ್ತು ಬಿ. ಅಪರಾಜಿತ್ 52 ರನ್ ನೆರವಿನಲ್ಲಿ ತಮಿಳುನಾಡು 46.5 ಓವರ್‌ಗಳಲ್ಲಿ 3 ವಿಕೆಟ್ ನಷ್ಟದಲ್ಲಿ 218 ರನ ಗಳಿಸಿತು.

ಗುಜರಾತ್ ವಿರುದ್ಧ ಮಧ್ಯಪ್ರದೇಶ , ಸರ್ವಿಸಸ್ ವಿರುದ್ಧ ಪಶ್ಚಿಮ ಬಂಗಾಳ ಗೆಲುವು ದಾಖಲಿಸಿದೆ.