ಹರಿಣ ಪಡೆ ಭಾರತದ ನೆಲದಲ್ಲಿ ಗೆದ್ದಿರುವುದು ಒಂದೇ ಸರಣಿ!

ಹೊಸದಿಲ್ಲಿ, ಸೆ.30: ಭಾರತ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳ ನಡುವೆ 3 ಪಂದ್ಯಗಳ ಟೆಸ್ಟ್ ಸರಣಿಯ ಮೊದಲ ಪಂದ್ಯ ಬುಧವಾರ ವಿಶಾಖಪಟ್ಟಣದಲ್ಲಿ ಆರಂಭಗೊಳ್ಳಲಿದೆ. ಉಭಯ ತಂಡಗಳ ನಡುವೆ ಭಾರತದಲ್ಲಿ ಕಳೆದ 27 ವರ್ಷಗಳಲ್ಲಿ ಆರು ಟೆಸ್ಟ್ ಸರಣಿಗಳು ನಡೆದಿವೆ. ಈ ಪೈಕಿ ಒಂದು ಬಾರಿ ಮಾತ್ರ ದಕ್ಷಿಣ ಆಫ್ರಿಕಾ ತಂಡ ಭಾರತದ ನೆಲದಲ್ಲಿ ಸರಣಿ ಜಯಿಸಿದೆ.

1999-2000ರಲ್ಲಿ ನಡೆದ ಟೆಸ್ಟ್ ಸರಣಿಯಲ್ಲಿ ದಕ್ಷಿಣ ಆಫ್ರಿಕಾ 2-0 ಅಂತರದಲ್ಲಿ ಸರಣಿ ಜಯಿಸಿದೆ. 2007-08 ಮತ್ತು 2009-10ರಲ್ಲಿ ಸರಣಿ ಡ್ರಾದಲ್ಲಿ ಕೊನೆಗೊಂಡಿವೆ. ಭಾರತ 1996-97, 2004-05, 2015-16ರಲ್ಲಿ ಸರಣಿ ಜಯಿಸಿದೆ.

ಭಾರತ -ದಕ್ಷಿಣ ಆಫ್ರಿಕಾ ನಡುವೆ ಇತ್ತೀಚೆಗೆ ನಡೆದ 3 ಪಂದ್ಯಗಳ ಟ್ವೆಂಟಿ-20 ಸರಣಿಯಲ್ಲಿ ಉಭಯ ತಂಡಗಳು ತಲಾ 1 ಪಂದ್ಯಗಳಲ್ಲಿ ಜಯ ಗಳಿಸಿದ್ದು, ಒಂದು ಪಂದ್ಯ ಮಳೆಯಿಂದ ರದ್ದಾಗಿದೆ. ಸರಣಿ 1-1 ಸಮಬಲ ಸಾಧಿಸಿದೆ.

► ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ಆಫ್ರಿಕಾ ತಂಡಕ್ಕೆ ಮೊದಲ ಸವಾಲು

ದಕ್ಷಿಣ ಆಫ್ರಿಕಾ ತಂಡ ಭಾರತ ವಿರುದ್ಧ ಟೆಸ್ಟ್ ಸರಣಿ ಆಡುವುದರೊಂದಿಗೆ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ತನ್ನ ಅಭಿಯಾನ ಆರಂಭಿಸಲಿದೆ. ಅನುಭವಿ ಆಟಗಾರರಾದ ಹಾಶಿಮ್ ಅಮ್ಲ ಮತ್ತು ಡೇಲ್ ಸ್ಟೇಯ್ನ್ ಅವರ ನಿವೃತ್ತಿಯ ನಂತರ ಆಫ್ರಿಕ ತಂಡದ ಮೊದಲ ಪ್ರವಾಸ ಸರಣಿಯಾಗಿದೆ. ಕಳೆದ ಆಗಸ್ಟ್‌ನಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಭಾರತ ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ಆಡಿದ ಮೊದಲ ಸರಣಿಯಲ್ಲಿ 2-0 ಅಂತರದಲ್ಲಿ ಜಯ ಗಳಿಸಿ 2 ಪಂದ್ಯಗಳ ಸರಣಿಯಲ್ಲಿ ಕ್ಲೀನ್ ಸ್ವೀಪ್ ಸಾಧಿಸಿತ್ತು.

► ಭಾರತ ಮತ್ತು ದಕ್ಷಿಣ ಆಫ್ರಿಕಾ ಸರಣಿಯ ಅಂಕಿ-ಅಂಶ

ಉಭಯ ತಂಡಗಳ ನಡುವೆ 13 ದ್ವಿಪಕ್ಷೀಯ ಸರಣಿಯ 36 ಟೆಸ್ಟ್ ಪಂದ್ಯಗಳಲ್ಲಿ ಭಾರತ 11ರಲ್ಲಿ ಮತ್ತು ಆಫ್ರಿಕಾ 15ರಲ್ಲಿ ಜಯ ಗಳಿಸಿದೆ. 10 ಪಂದ್ಯ ಡ್ರಾನಲ್ಲಿ ಕೊನೆಗೊಂಡಿವೆ. ಭಾರತ ಮತ್ತು ದಕ್ಷಿಣ ಆಫ್ರಿಕಾ ನಡುವೆ ಭಾರತದಲ್ಲಿ ಆರು ಸರಣಿಗಳು ನಡೆದಿವೆ. ಭಾರತವು ಮೂರು ಸರಣಿ ಜಯಿಸಿದೆ. 1996-97ರಲ್ಲಿ (2-1), 2004-05ರಲ್ಲಿ (1-0) ಮತ್ತು 2015-16ರಲ್ಲಿ (3-0) ಭಾರತ ಸರಣಿ ಜಯಿಸಿದೆ. 1999-2000ರಲ್ಲಿ (2-0 )ಆಫ್ರಿಕಾ ಸರಣಿ ಗೆದ್ದುಕೊಂಡಿದೆ. 2007-08 ಮತ್ತು 2009-10ರಲ್ಲಿ ನಡೆದ ಎರಡೂ ಸರಣಿಗಳು 1-1 ಅಂತರದಲ್ಲಿ ಡ್ರಾದಲ್ಲಿ ಕೊನೆಗೊಂಡಿದೆ. 2015-16ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 4 ಟೆಸ್ಟ್‌ಗಳ ಸರಣಿಯಲ್ಲಿ ಭಾರತ ಮೂರು ಟೆಸ್ಟ್ ಪಂದ್ಯಗಳನ್ನು ಗೆದ್ದಿದೆ. 2015-16ರಲ್ಲಿ ದಿಲ್ಲಿಯಲ್ಲಿ ನಡೆದ ಟೆಸ್ಟ್ ಸರಣಿಯಲ್ಲಿ ಭಾರತವು ತನ್ನ ಎರಡನೇ ಇನಿಂಗ್ಸ್‌ನಲ್ಲಿ ಗೆಲುವಿಗೆ 481 ರನ್‌ಗಳ ಸವಾಲು ವಿಧಿಸಿತ್ತು. ಇದು ದಕ್ಷಿಣ ಆಫ್ರಿಕಾ ವಿರುದ್ಧ ಭಾರತ ಟೆಸ್ಟ್‌ನಲ್ಲಿ ವಿಧಿಸಿದ ಗರಿಷ್ಠ ರನ್‌ಗಳ ಸವಾಲು ಆಗಿದೆ. 1996-97ರ ಕಾನ್ಪುರ ಟೆಸ್ಟ್‌ನಲ್ಲಿ 461 ರನ್‌ಗಳ ಸವಾಲು ವಿಧಿಸಿತ್ತು. ಇದು ಹಿಂದೆ ವಿಧಿಸಿದ್ದ ಗರಿಷ್ಠ ಸವಾಲು ಆಗಿತ್ತು. ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್ ಪಂದ್ಯದ ಪ್ರತಿ ಇನ್ನಿಂಗ್ಸ್ ನಲ್ಲೂ ಶತಕ ಗಳಿಸಿದ ಭಾರತದ ಏಕೈಕ ಬ್ಯಾಟ್ಸ್‌ಮನ್ ಅಜಿಂಕ್ಯ ರಹಾನೆ. 2015 ರ ಡಿಸೆಂಬರ್‌ನಲ್ಲಿ ದಿಲ್ಲಿಯ ಫಿರೋಜ್ ಷಾ ಕೋಟ್ಲಾದಲ್ಲಿ 127 ಮತ್ತು ಔಟಾಗದೆ 100 ರನ್ ಗಳಿಸಿದ್ದರು. ಈ ಟೆಸ್ಟ್‌ನಲ್ಲಿ ರಹಾನೆ ಏಳು ಸಿಕ್ಸರ್‌ಗಳನ್ನು (ಮೊದಲ ಇನ್ನಿಂಗ್ಸ್‌ನಲ್ಲಿ ನಾಲ್ಕು ಮತ್ತು 2ನೇ ಇನಿಂಗ್ಸ್‌ನಲ್ಲಿ ಮೂರು) ಸಿಡಿಸಿದ್ದರು. ಇದು ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್‌ನಲ್ಲಿ ಭಾರತದ ಆಟಗಾರನ ಒಂದು ದಾಖಲೆಯಾಗಿದೆ. 1994 ರ ಜನವರಿಯಲ್ಲಿ ಲಕ್ನೋದಲ್ಲಿ ನಡೆದ ಶ್ರೀಲಂಕಾ ವಿರುದ್ಧ ಟೆಸ್ಟ್‌ನಲ್ಲಿ ಭಾರತದ ನವಜೋತ್ ಸಿಂಗ್ ಸಿಧು ಗಳಿಸಿದ 124 ರನ್‌ನಲ್ಲಿ ಎಂಟು ಸಿಕ್ಸರ್‌ಗಳು ಒಳಗೊಂಡಿದ್ದವು. 2017-18ರ ಜೋಹಾನ್ಸ್‌ಬರ್ಗ್ ಟೆಸ್ಟ್‌ನಲ್ಲಿ ಮುಹಮ್ಮದ್ ಶಮಿ 28 ರನ್‌ಗಳಿಗೆ 5 ವಿಕೆಟ್ ಪಡೆದಿದ್ದರು. ಇದು ಭಾರತದ ಬೌಲರ್ ನಿರ್ಮಿಸಿದ ದಾಖಲೆಯಾಗಿದೆ. ಭಾರತ ಈ ಟೆಸ್ಟ್‌ನಲ್ಲಿ ಜಯ ಗಳಿಸಿತ್ತು.

 2007-08ರ ಚೆನ್ನೈ ಟೆಸ್ಟ್‌ನಲ್ಲಿ ವೀರೇಂದ್ರ ಸೆಹ್ವಾಗ್ ಅವರ ತ್ರಿಶತಕ (304 ಎಸೆತಗಳಲ್ಲಿ 319) ಭಾರತ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳ ನಡುವಿನ ಟೆಸ್ಟ್‌ನಲ್ಲಿ ಏಕೈಕ ತ್ರಿಶತಕದ ದಾಖಲೆಯಾಗಿದೆ. ಈ ಇನ್ನಿಂಗ್ಸ್ ಸೆಹ್ವಾಗ್ ವೃತ್ತಿಜೀವನದ ಅತ್ಯುತ್ತಮ ಸ್ಕೋರ್ ಆಗಿ ಉಳಿದಿದೆ. ಇದಕ್ಕೂ ಮೊದಲು 2003-04ರಲ್ಲಿ ಮುಲ್ತಾನ್‌ನಲ್ಲಿ ಪಾಕಿಸ್ತಾನ ವಿರುದ್ಧ 309 ರನ್ ಗಳಿಸಿ ದಾಖಲೆ ಬರೆದಿದ್ದರು. ಸೆಹ್ವಾಗ್ 26 ಇನಿಂಗ್ಸ್ ಗಳಲ್ಲಿ 17 ಸಿಕ್ಸರ್‌ಗಳನ್ನು ಗಳಿಸಿದ್ದು ಭಾರತ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳನ್ನು ಒಳಗೊಂಡ ಟೆಸ್ಟ್ ಪಂದ್ಯಗಳಲ್ಲಿ ಇದು ದಾಖಲೆಯಾಗಿದೆ.

ದಕ್ಷಿಣ ಆಫ್ರಿಕಾ ಪರ 2009-10ರ ನಾಗ್ಪುರ ಟೆಸ್ಟ್‌ನಲ್ಲಿ ಹಾಶಿಮ್ ಅಮ್ಲ 253 ರನ್ ಗಳಿಸಿರುವುದು ಆಫ್ರಿಕಾ ಆಟಗಾರನ ಶ್ರೇಷ್ಠ ಪ್ರದರ್ಶನ.

ಜಾಕ್ ಕಾಲಿಸ್ (31 ಇನಿಂಗ್ಸ್‌ಗಳಲ್ಲಿ 7) ಮತ್ತು ಸಚಿನ್ ತೆಂಡುಲ್ಕರ್ (45 ಇನಿಂಗ್ಸ್‌ಗಳಲ್ಲಿ 7) ಜಂಟಿಯಾಗಿ ಭಾರತ ಮತ್ತು ದಕ್ಷಿಣ ಆಫ್ರಿಕಾ ಪರ ಗರಿಷ್ಠ ಶತಕ ದಾಖಲಿಸಿದ ದಾಂಡಿಗರು. ಸಚಿನ್ ತೆಂಡುಲ್ಕರ್ (42.46 ಸರಾಸರಿಯಲ್ಲಿ 1,741) ಮತ್ತು ಜಾಕಸ್ ಕಾಲಿಸ್ (69.36 ಸರಾಸರಿಯಲ್ಲಿ 1,734) ಭಾರತ ಮತ್ತು ದಕ್ಷಿಣ ಆಫ್ರಿಕಾ ಸರಣಿಯಲ್ಲಿ ಗರಿಷ್ಠ ರನ್ ದಾಖಲಿಸಿದ್ದಾರೆ.

ಭಾರತದ ಅನಿಲ್ ಕುಂಬ್ಳೆ 21 ಪಂದ್ಯಗಳಲ್ಲಿ 84 ವಿಕೆಟ್ ಗಳಿಸಿದರೆ ದಕ್ಷಿಣ ಆಫ್ರಿಕಾದ ಡೇಲ್ ಸ್ಟೇಯ್ನಿ 14 ಟೆಸ್ಟ್ ಪಂದ್ಯಗಳಲ್ಲಿ 65 ವಿಕೆಟ್ ಗಳಿಸಿದ್ದಾರೆ.

2017-18ರಲ್ಲಿ ಮೂರು ಟೆಸ್ಟ್‌ಗಳ ಸರಣಿಯಲ್ಲಿ ಕ್ವಿಂಟನ್ ಡಿ ಕಾಕ್ 17 ಕ್ಯಾಚ್ ಪಡೆದಿದ್ದರು. ಉಭಯ ದೇಶಗಳ ನಡುವಿನ ಸರಣಿಯಲ್ಲಿ ವಿಕೆಟ್ ಕೀಪರ್ ಮಾಡಿರುವ ಉತ್ತಮ ದಾಖಲೆ ಇದಾಗಿದೆ. ಭಾರತದ ವೆಂಕಟೇಶ್ ಪ್ರಸಾದ್ ಮತ್ತು ರವಿಚಂದ್ರನ್ ಅಶ್ವಿನ್, ಆಫ್ರಿಕಾದ ಶಾನ್ ಪೊಲಾಕ್, ಅಲನ್ ಡೊನಾಲ್ಡ್ ಮತ್ತು ಡೇಲ್ ಸ್ಟೇಯ್ನ್ ಅವರು ಭಾರತ ಮತ್ತು ದಕ್ಷಿಣ ಆಫ್ರಿಕಾ ಟೆಸ್ಟ್ ಪಂದ್ಯವೊಂದರಲ್ಲಿ 10 ವಿಕೆಟ್ ಅಥವಾ ಅದಕ್ಕಿಂತ ಹೆಚ್ಚಿನ ವಿಕೆಟ್ ಗಳಿಸಿದ್ದಾರೆ.

ಎಬಿ ಡಿವಿಲಿಯರ್ಸ್ 20 ಪಂದ್ಯಗಳಲ್ಲಿ 25 ಕ್ಯಾಚ್‌ಗಳನ್ನು ಪಡೆದಿದ್ದಾರೆ. ಭಾರತ ಮತ್ತು ದಕ್ಷಿಣ ಆಫ್ರಿಕಾವನ್ನು ಒಳಗೊಂಡ ಟೆಸ್ಟ್ ಪಂದ್ಯಗಳಲ್ಲಿ ಫೀಲ್ಡರ್‌ನ ಪ್ರಮುಖ ಸಾಧನೆ ಇದಾಗಿದೆ. ಮಾಜಿ ನಾಯಕ ಗ್ರೇಮ್ ಸ್ಮಿತ್ ನಾಯಕತ್ವದಲ್ಲಿ ಭಾರತದ ವಿರುದ್ಧ ದಕ್ಷಿಣ ಆಫ್ರಿಕಾ ಆಡಿದ 15 ಪಂದ್ಯಗಳಲ್ಲಿ 6ರಲ್ಲಿ ಜಯಿಸಿದೆ. ಐದು ಪಂದ್ಯಗಳನ್ನು ಕಳೆದುಕೊಂಡಿದೆ. 4 ಟೆಸ್ಟ್ ಡ್ರಾನಲ್ಲಿ ಕೊನೆಗೊಂಡಿದೆ. ವಿರಾಟ್ ಕೊಹ್ಲಿ ನಾಯಕರಾಗಿ ನಾಲ್ಕು ಪಂದ್ಯಗಳಲ್ಲಿ ಜಯ ಗಳಿಸಿದ್ದಾರೆ, ಎರಡನ್ನು ಕಳೆದುಕೊಂಡಿದ್ದಾರೆ ಮತ್ತು ಉಳಿದ ಏಳು ಪಂದ್ಯಗಳು ಡ್ರಾದಲ್ಲಿ ಕೊನೆಗೊಂಡಿದೆ. 2017-18ರ ಕೇಪ್‌ಟೌನ್ ಟೆಸ್ಟ್‌ನಲ್ಲಿ ಭಾರತದ ವಿಕೆಟ್ ಕೀಪರ್ ವೃದ್ಧಿಮಾನ್ ಸಹಾ 10 ಕ್ಯಾಚ್ ಪಡೆದಿದ್ದರು. ಇದು ದಕ್ಷಿಣ ಆಫ್ರಿಕಾ ವಿರುದ್ಧ ಭಾರತದ ವಿಕೆಟ್ ಕೀಪರ್ ಮಾಡಿದ್ದ ದೊಡ್ಡ ಸಾಧನೆ.

ಉಭಯ ದೇಶಗಳ ಪರ ಮುಖಾಮುಖಿಯಲ್ಲಿ ಸಚಿನ್ ತೆಂಡುಲ್ಕರ್ 25 ಪಂದ್ಯಗಳಲ್ಲಿ, ಅನಿಲ್ ಕುಂಬ್ಳೆ, ರಾಹುಲ್ ದ್ರಾವಿಡ್ ಮತ್ತು ಹಾಶಿಮ್ ಅಮ್ಲ ತಲಾ 21 ಪಂದ್ಯಗಳಲ್ಲಿ ಆಡಿದ್ದಾರೆ.

► ಇನಿಂಗ್ಸ್ ಗೆಲುವು: ಭಾರತವನ್ನು ದಕ್ಷಿಣ ಆಫ್ರಿಕಾ ನಾಲ್ಕು ಬಾರಿ ಇನಿಂಗ್ಸ್ ಅಂತರದಿಂದ ಸೋಲಿಸಿದೆ. 2008 ರ ಎಪ್ರಿಲ್‌ನಲ್ಲಿ ಅಹ್ಮದಾಬಾದ್‌ನಲ್ಲಿ ಇನಿಂಗ್ಸ್ ಮತ್ತು 90 ರನ್, ಮಾರ್ಚ್ 2000 ರಲ್ಲಿ ಬೆಂಗಳೂರಿನಲ್ಲಿ ಇನಿಂಗ್ಸ್ 71 ರನ್, ಡಿಸೆಂಬರ್ 2010 ರಲ್ಲಿ ಸೆಂಚುರಿಯನ್‌ನಲ್ಲಿ ಇನಿಂಗ್ಸ್ ಮತ್ತು 25ರನ್ ಮತ್ತು ಫೆಬ್ರವರಿ 2010ರಲ್ಲಿ ನಾಗ್ಪುರದಲ್ಲಿ ಇನಿಂಗ್ಸ್ ಮತ್ತು 6 ರನ್ ಅಂತರದಲ್ಲಿ ಭಾರತದ ವಿರುದ್ಧ ಜಯ ಗಳಿಸಿತ್ತು. ಫೆಬ್ರವರಿ 2010 ರಲ್ಲಿ ಕೋಲ್ಕತ್ತಾದಲ್ಲಿ ಇನಿಂಗ್ಸ್ ಮತ್ತು 57 ರನ್ ಅಂತರದಲ್ಲಿ ಭಾರತದ ಗಳಿಸಿರುವುದು ಭಾರತದ ಏಕೈಕ ಗೆಲುವು ಆಗಿದೆ.

► ವಿಶಾಖಪಟ್ಟಣದ ಕ್ರೀಡಾಂಗಣದ ಬಗ್ಗೆ ಒಂದಿಷ್ಟು     

2016ರ ನವೆಂಬರ್‌ನಲ್ಲಿ ವಿಶಾಖಪಟ್ಟಣದಲ್ಲಿ ಡಾ.ವೈ.ಎಸ್.ರಾಜಶೇಖರ ರೆಡ್ಡಿ ಎಸಿಎ-ವಿಡಿಸಿಎ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಆಡಿದ ಏಕೈಕ ಟೆಸ್ಟ್‌ನಲ್ಲಿ ಇಂಗ್ಲೆಂಡ್ (255 ಮತ್ತು 158) ವಿರುದ್ಧ ಭಾರತ (455 ಮತ್ತು 204) 246 ರನ್‌ಗಳ ಭರ್ಜರಿ ಜಯ ಗಳಿಸಿತ್ತು. ಈ ಟೆಸ್ಟ್‌ನಲ್ಲಿ ನಾಯಕ ವಿರಾಟ್ ಕೊಹ್ಲಿ (167) ಮತ್ತು ಚೇತೇಶ್ವರ ಪೂಜಾರ (119) ಮೊದಲ ಇನಿಂಗ್ಸ್‌ನಲ್ಲಿ ಶತಕಗಳನ್ನು ದಾಖಲಿಸಿದ್ದರು. ವಿರಾಟ್ ಕೊಹ್ಲಿ 167 ಮತ್ತು 81 ರನ್ ಗಳಿಸಿ ಎರಡೂ ಇನಿಂಗ್ಸ್ ಗಳಲ್ಲಿ ಅಗ್ರ ಸ್ಕೋರರ್ ಎನಿಸಿಕೊಂಡಿದ್ದರು. ಅವರು ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾಗಿದ್ದರು. ವಿಶಾಖಪಟ್ಟಣದಲ್ಲಿ 2016-17ರಲ್ಲಿ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್‌ನಲ್ಲಿ ರವಿಚಂದ್ರನ್ ಅಶ್ವಿನ್ 119 ರನ್ ,8 ವಿಕೆಟ್ ( 67ಕ್ಕೆ 5 ಮತ್ತು 52ಕ್ಕೆ 3 )ಕಬಳಿಸುವ ಮೂಲಕ ಆಲ್‌ರೌಂಡ್ ಪ್ರದರ್ಶನ ನೀಡಿದ್ದರು. ಇದು ಇಲ್ಲಿ ಭಾರತದ ಬೌಲರ್‌ನ ಅತ್ಯುತ್ತಮ ಸಾಧನೆಯಾಗಿದೆ.