ಚಿಕ್ಕಮಗಳೂರು: ಅನಧಿಕೃತ ಹೋಂ ಸ್ಟೇ, ಕಟ್ಟಡಗಳ ತೆರವಿಗೆ ಸಿಡಿಎ ಸಭೆಯಲ್ಲಿ ನಿರ್ಣಯ
![ಚಿಕ್ಕಮಗಳೂರು: ಅನಧಿಕೃತ ಹೋಂ ಸ್ಟೇ, ಕಟ್ಟಡಗಳ ತೆರವಿಗೆ ಸಿಡಿಎ ಸಭೆಯಲ್ಲಿ ನಿರ್ಣಯ ಚಿಕ್ಕಮಗಳೂರು: ಅನಧಿಕೃತ ಹೋಂ ಸ್ಟೇ, ಕಟ್ಟಡಗಳ ತೆರವಿಗೆ ಸಿಡಿಎ ಸಭೆಯಲ್ಲಿ ನಿರ್ಣಯ](https://www.varthabharati.in/sites/default/files/images/articles/2019/10/5/213507-1570298455.jpg)
ಚಿಕ್ಕಮಗಳೂರು, ಅ.5: ನಗರದ ವಿವಿಧೆಡೆ ಕೃಷಿ ಭೂಮಿಯನ್ನು ಪರಿವರ್ತಿಸದೆ, ನಗರಾಭಿವೃದ್ದಿ ಪ್ರಾಧಿಕಾರ, ನಗರಸಭೆಯ ಯಾವುದೇ ಪರವಾನಿಗೆ ಪಡೆಯದೆ ಅನಧೀಕೃತವಾಗಿ ನಿರ್ಮಿಸಿರುವ ವಾಣಿಜ್ಯ ಕಟ್ಟಡ ಹಾಗೂ ಸರಕಾರಿ ಭೂಮಿಯಲ್ಲಿ ನಿರ್ಮಿಸಿರುವ ಕಟ್ಟಡಗಳನ್ನು ಪೋಲೀಸ್ ರಕ್ಷಣೆ ಪಡೆದು ನಿರ್ದಾಕ್ಷಿಣ್ಯವಾಗಿ ತೆರವುಗೊಳಿಸಲು ಜಿಲ್ಲಾಧಿಕಾರಿಗಳ ಕಚೇರಿಯಲ್ಲಿ ಶನಿವಾರ ನಡೆದ ನಗರಾಭಿವೃದ್ಧಿ ಪ್ರಾಧಿಕಾರದ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ನಿರ್ಣಯ ಕೈಗೊಳ್ಳಲಾಯಿತು.
ನಗರದ ಇಂದಾವರ, ಗರಡಿಹಳ್ಳಿ ಕಾವಲ್ ಹಾಗೂ ಹೌಸಿಂಗ್ಬೋರ್ಡ್ ಬಡಾವಣೆ ಸೇರಿದಂತೆ ವಿವಿಧೆಡೆ ಅನಧೀಕೃತವಾಗಿ ಅನ್ಯಕ್ರಾಂತವಾಗದ ಕೃಷಿ ಜಮೀನುಗಳಲ್ಲಿ ರೆಸಾರ್ಟ್ ಮತ್ತು ಹೋಂಸ್ಟೆಗಳ ನಿರ್ಮಾಣ, ನಗರಸಭೆ ವ್ಯಾಪ್ತಿಯ ಪಾರ್ಕ್ನ ಸ್ಥಳ ಮತ್ತು ರಾಜಕಾಲುವೆಗಳನ್ನು ಒತ್ತುವರಿ ಮಾಡಿ ಬಹು ಮಹಡಿಯ ಕಟ್ಟಡಗಳನ್ನು ನಿರ್ಮಿಸಲಾಗಿದೆ. ಆದರೆ ಅಧಿಕಾರಿಗಳು ಜಾಣ ಮೌನ ವಹಿಸಿರುವುದು ಸರಿಯಲ್ಲ ಎಂದು ಸಚಿವ ಸಿ.ಟಿ.ರವಿ ಅಸಮಾಧಾನ ವ್ಯಕ್ತಪಡಿಸಿದರು.
ಅಲ್ಲಂಪುರ ಗ್ರಾಪಂ ವ್ಯಾಪ್ತಿಯಲ್ಲಿ ಐಬಿಸಿ ಸಂಸ್ತೆಯವರು ಎರಡು ಅಕ್ರಮ ರೆಸಾರ್ಟ್ಗಳನ್ನು ನಿರ್ಮಿಸಿದ್ದಾರೆ. ಈ ಪೈಕಿ ಒಂದನ್ನು ನಾನೇ ಉದ್ಘಾಟಿಸಿದ್ದೇನೆ. ಈ ರೆಸಾರ್ಟ್ನ ಜಾಗ ಅನ್ಯಕ್ರಾಂತಗೊಳ್ಳದಿರುವುದು, ಪರವಾನಿಗೆ ಪಡೆಯದಿರುವುದರ ಬಗ್ಗೆ ತನಗೆ ಮೊದಲು ಮಾಹಿತಿ ಇರಲಿಲ್ಲ, ನಂತರ ತಿಳಿಯಿತು. ಮೊದಲೇ ಗೊತ್ತಿದ್ದರೆ ನಾನು ಕಾರ್ಯಕ್ರಮಕ್ಕೆ ಹೋಗುತ್ತಿರಲಿಲ್ಲ. ರೆಸಾರ್ಟ್ ಮಾಲಕರು ಕಾನೂನಿನ ಅರಿವಿದ್ದರೂ ಅಕ್ರಮವಾಗಿ ಕಟ್ಟಡ ನಿರ್ಮಿಸಿದ್ದಾರೆ. ಈ ರೆಸಾರ್ಟ್ಗಳ ದಾಖಲೆಗಳನ್ನು ಪರಿಶೀಲಿಸಿ, ಅಕ್ರಮ ಎಸಗಿದ್ದರೆ ಅಧಿಕಾರಿಗಳು ಮುಲಾಜಿಲ್ಲದೇ ಪೊಲೀಸರ ರಕ್ಷಣೆ ಪಡೆದು ಕಟ್ಟಡಗಳನ್ನು ತೆರವುಗೊಳಿಸಬೇಕು. ಕೈಮರ, ಅಲ್ಲಂಪುರ, ಅತ್ತಿಗುಂಡಿ ಗ್ರಾಮಗಳಲ್ಲಿ ಅಕ್ರಮ ರೆಸಾರ್ಟ್ಗಳು ತಲೆ ಎತ್ತಿವೆ. ಇವುಗಳನ್ನು ಪರಿಶೀಲಿಸಿ ಕಾನೂನು ಕ್ರಮ ಜರಗಿಸಬೇಕೆಂದು ಅಧಿಕಾರಿಗಳಿಗೆ ಸೂಚಿಸಿದರು. ಮಧ್ಯಪ್ರವೇಶಿಸಿ ಮಾತನಾಡಿದ ಜಿಲ್ಲಾಧಿಕಾರಿ ಡಾ.ಬಗಾದಿ ಗೌತಮ್ ನಿಯಮಾನುಸವಿಲ್ಲದ ಎಲ್ಲ ರೆಸಾರ್ಟ್ಗಳ ವಿರುದ್ಧವೂ ಕಟ್ಟುನಿಟ್ಟಿನಿ ಕ್ರಮ ವಹಿಸಬೇಕೆಂದು ಸೂಚಿಸಿದರು.
ವಿಧಾನಪರಿಷತ್ ಶಾಸಕ ಎಸ್.ಎಲ್.ಭೋಜೇಗೌಡ, ಕಳೆದ 14 ತಿಂಗಳುಗಳಿಂದ ಅಧಿಕಾರಿಗಳುಪ್ರಗತಿಪರಿಶೀಲನಾ ಸಭೆಗಳನ್ನು ನಡೆಸಿಯೇ ಇಲ್ಲ. ಈ ಅವದಿಯಲ್ಲಿ ನಗರದಾದ್ಯಂತ ಸಾಕಷ್ಟು ಅಕ್ರಮ ಕಟ್ಟಡಗಳು ತಲೆ ಎತ್ತುವಂತಾಗಿದೆ. ಪ್ರಭಾವಿಗಳು ಸರಕಾರಿ ಜಾಗವನ್ನು ಒತ್ತುವರಿ ಮಾಡಿ ಕಟ್ಟಡೆಗಳನ್ನು ನಿರ್ಮಿಸಿದ್ದಾರೆ. ಇದು ಅಧಿಕಾರಿಗಳಿಗೆ ಗೊತ್ತಿದ್ದರೂ ಯಾವುದೇ ಕ್ರಮಕೈಗೊಳ್ಳದೇ ಸುಮ್ಮನಿದ್ದಾರೆ. ಇಂತಹ ರೆಸಾರ್ಟ್ಗಳ ಅಕ್ರಮಗಳು ಬೆಳಕಿಗೆ ಬಂದಾಗ ಕೇವಲ ನೋಟಿಸ್ ನೀಡಿ ಸುಮ್ಮನಾಗಲು ಇಲಾಖೆ ಏಕೆ ಬೇಕು ಎಂದು ನಗರಾಭಿವೃದ್ದಿ ಪ್ರಾಧಿಕಾರದ ಅಧಿಕಾರಿಗಳನ್ನು ತರಾಟೆಗೆ ಪಡೆದರು.
ಕೃಷಿ ಭೂಮಿಗಳನ್ನು ತುಂಡು ತುಂಡುಗಳಾಗಿ ಪರಿವರ್ತಿಸಿ ನಗರಾಭಿವೃದ್ದಿ ಪ್ರಾಧಿಕಾರ ಮತ್ತು ನಗರಸಭೆಗೆ ವಂಚಿಸುತ್ತಿರುವ ಬಗ್ಗೆ ದೂರುಗಳಿದ್ದು, ಆ ಬಗ್ಗೆ ಅಧಿಕಾರಿ ವರ್ಗ ಎಚ್ಚರಗೊಳ್ಳುವ ಅಗತ್ಯವಿದೆ ಇಲ್ಲದಿದ್ದರೆ ನಗರ ಸರಿಯಾದ ಯೋಜನೆಗಳನ್ನು ರೂಪಿಸದ ಅವ್ಯವಸ್ಥೆಯ ಅಗರವಾಗುವ ಸಂಭವವಿದೆ ಎಂದು ಅಧಿಕಾರಿಗಳಿಗೆ ಸೂಚಿಸಿದ ಸಚಿವ ರವಿ, ನಗರವನ್ನು ಸ್ಲಮ್ ಮಾಡಲು ನಾನು ಸಿದ್ಧವಿಲ್ಲ. ಈಗಾಗಲೇ ಮನೆಗಳ ನಿರ್ಮಾಣವಾಗಿರುವ ಲೇಔಟ್ಗಳಲ್ಲಿ ಮಾತ್ರ ಸಿಂಗಲ್ ಸೈಟ್ಗಳಿಗೆ ಅಪ್ರೂವಲ್ ನೀಡಿ, ಆದರೆ ಹೊಸ ಬಡಾವಣೆಗಳಲ್ಲಿ ನೀಡಬೇಡಿ ಎಂದು ಅಧಿಕಾರಿಗಳಿಗೆ ಸೂಚಿಸಿದರು.
ನಗರದ ಸುತ್ತಮುತ್ತಲು ನಾಯಿಕೊಡೆಗಳಂತೆ ತಲೆ ಎತ್ತುತ್ತಿರುವ ಅನಧಿಕೃತ ಕಟ್ಟಡಗಳಿಗೆ ಕಡಿವಾಣ ಹಾಕಲು ನಗರಸಭೆ ಮತ್ತು ನಗರಾಭಿವೃದ್ಧಿ ಪ್ರಾಧಿಕಾರ ಜಂಟಿ ಕಾರ್ಯಾಚರಣೆ ನಡೆಸಬೇಕೆಂದ ಸಿ.ಟಿ. ರವಿ, ಅನಧೀಕೃತವಾಗಿ ಸರಕಾರಿ ಜಮೀನುಗಳಲ್ಲಿ ನಿರ್ಮಿಸಿರುವ ಕಟ್ಟಡವನ್ನು ತೆರವುಗೊಳಿಸಿ ಶೀಘ್ರ ವರದಿ ನೀಡಬೇಕು. ಪರವಾನಿಗೆ ಪಡೆಯದೆ 5-6 ಅಂತಸ್ತುಗಳ ಕಟ್ಟಡಗಳನ್ನು ನಿರ್ಮಿಸಿದ ಮಾಲಕರಿಗೆ ಶೋಕಾಸ್ ನೋಟಿಸ್ ನೀಡಿ ಕಟ್ಟಡ ತೆರವು ಮಾಡಿ, ಕಟ್ಟಡ ತೆರವು ಮಾಡಲು ಹೆದರಿಕೆ ಇದ್ದಲ್ಲಿ ಮಿಲಿಟರಿ ಭದ್ರತೆ ಪಡೆಯಿರಿ ಎಂದರು.
ನಗರದ ಸರಕಾರಿ ಪದವಿ ಪೂರ್ವ ಕಾಲೇಜಿನಲ್ಲಿ ಅತೀ ಹೆಚ್ಚು ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದ ವಿದ್ಯಾರ್ಥಿಗಳು ವಿದ್ಯಾಭ್ಯಾಸ ಮಾಡುತ್ತಿದ್ದು, ಕಾಲೇಜಿನ ಕಾಂಪೌಂಡ್ ನಿರ್ಮಾಣ ಆಗಬೇಕಿದೆ. ಇದಕ್ಕೆ ಎಸ್.ಇ.ಪಿ.ಟಿ.ಎಸ್.ಪಿ ಯೋಜನೆಯಡಿ ಕಟ್ಟಡದ ಸುತ್ತಲೂ ಕಾಂಪೌಂಡ್ ನಿರ್ಮಿಸಲು ಸಾಧ್ಯವಿದೆ. ಅಧಿಕಾರಿಗಳು ಅಗತ್ಯಕ್ರಮವಹಿಸಬೇಕು. ಹಿರೇಮಗಳೂರು ಬಡಾವಣೆಯ ಕಲ್ಯಾಣ ನಗರದಲ್ಲಿ ಇತ್ತೀಚೆಗೆ ನಿರ್ಮಿಸಿದ ರಸ್ತೆಗಳು ಗುಂಡಿಬಿದ್ದಿವೆ. ಕಳಪೆ ಕಾಮಗಾರಿಯಿಂದಾಗಿ ರಸ್ತೆಗಳು ಹಾಳಾಗಿದ್ದು, ಗುತ್ತಿಗೆದಾರನನ್ನು ಕಪ್ಪುಪಟ್ಟಿಗೆ ಸೇರಿಸಿ ಎಂದು ಸಿಟಿ ರವಿ ಇದೆ ವೇಳೆ ಅಧಿಕಾರಿಗಳಿಗೆ ಸೂಚಿಸಿದರು.
ಈ ಸಭೆಯಲ್ಲಿ ಹೆಚ್ಚುವರಿ ಪೋಲೀಸ್ ವರಿಷ್ಠಾಧಿಕಾರಿ ಕುಮಾರಿ ಶೃತಿ, ನಗರಾಭಿವೃದ್ದಿ ಪ್ರಾಧಿಕಾರದ ಆಯುಕ್ತ ಭೀಮನಿಧಿ, ನಗರಸಭೆ ಪೌರಾಯುಕ್ತ ಪರಮೇಶಿ ಮತ್ತಿತರರ ಉಪಸ್ಥಿತರಿದ್ದರು.