ತನ್ನ ಅಂತ್ಯಸಂಸ್ಕಾರದ ವೇಳೆ ಕುಟುಂಬಸ್ಥರನ್ನು ನಗೆಗಡಲಲ್ಲಿ ತೇಲಿಸಿದ ಅಜ್ಜ!

ಡಬ್ಲಿನ್ (ಐರ್‌ಲ್ಯಾಂಡ್), ಅ. 16: ಕ್ಯಾನ್ಸರ್‌ನಿಂದಾಗಿ ನಿಧನ ಹೊಂದಿದ ಅಜ್ಜರೊಬ್ಬರನ್ನು ಸ್ಮಶಾನದಲ್ಲಿ ಸಮಾಧಿ ಮಾಡಿದ ಬಳಿಕ, ‘‘ನನ್ನನ್ನು ಹೊರಗೆ ತೆಗೆಯಿರಿ’’ ಎಂದು ಹೇಳಿರುವ ಘಟನೆಯೊಂದು ಐರ್‌ಲ್ಯಾಂಡ್‌ನಿಂದ ವರದಿಯಾಗಿದೆ.

ಅಜ್ಜ ಶಾಯ್ ಬ್ರಾಡ್ಲೇ ಅಕ್ಟೋಬರ್ 8 ರಂದು ಮೂರು ವರ್ಷಗಳ ಕಾಲ ಕ್ಯಾನ್ಸರ್ ವಿರುದ್ಧ ಹೋರಾಡಿ ನಿಧನ ಹೊಂದಿದರು. ಅಕ್ಟೋಬರ್ 12ರಂದು ಕಿಲ್ಕೇನಿ ಎಂಬ ನಗರದ ಕಿಲ್ಮಾನಾ ಎಂಬಲ್ಲಿನ ಸ್ಮಶಾನದಲ್ಲಿ ಅವರ ಪಾರ್ಥಿವ ಶರೀರದ ದಫನ ಕಾರ್ಯ ನಡೆಯಿತು.

ಮೃತದೇಹವನ್ನು ಗುಂಡಿಯೊಳಗೆ ಇಳಿಸಿ ಮಣ್ಣು ತುಂಬಿಸಿ ನೆರೆದಿದ್ದ ಜನರು ಅಲ್ಲಿಂದ ತೆರಳಲು ಅಣಿಯಾದಾಗ, ‘‘ನನ್ನನ್ನು ಹೊರಗೆ ತೆಗೆಯಿರಿ’’ ಎಂದು ಮೃತ ಅಜ್ಜ ಹೇಳುವುದು ಕೇಳಿಸಿತು! ಅಲ್ಲಿ ನೆರೆದಿದ್ದವರು ಆತಂಕದಿಂದ ಪರಸ್ಪರರನ್ನು ನೋಡಿಕೊಂಡರು.

‘‘ಹಲೋ.. ಹಲೋ... ಹಲೋ... ನನ್ನನ್ನು ಹೊರಗೆ ತೆಗೆಯಿರಿ... ನನ್ನನ್ನು ಹೊರಗೆ ತೆಗೆಯಿರಿ.. ಧರ್ಮಗುರುಗಳು ಮಾತನಾಡುತ್ತಿರುವುದು ನನಗೆ ಕೇಳಿಸುತ್ತಿದೆ.. ನಾನು ಶಾಯ್.. ನಾನು ಶವಪೆಟ್ಟಿಗೆಯ ಒಳಗಿದ್ದೇನೆ’’ ಎಂಬ ಮಾತುಗಳು ಕೇಳಿಬಂದವು ಎಂದು ‘ಐರಿಶ್ ಮಿರರ್’ ಪತ್ರಿಕೆ ವರದಿ ಮಾಡಿದೆ.

ತುಂಬಾ ತಮಾಷೆ ಪ್ರವೃತ್ತಿಯವರಾಗಿದ್ದ ಶಾಯ್ ಈ ಮಾತುಗಳನ್ನು ಸಾಯುವ ಒಂದು ವರ್ಷ ಮೊದಲೇ ರೆಕಾರ್ಡ್ ಮಾಡಿದ್ದರು ಹಾಗೂ ಅದನ್ನು ಹಿರಿಯ ಮಗನಿಗೆ ಕೊಟ್ಟು ಅಂತ್ಯಸಂಸ್ಕಾರದ ವೇಳೆ ಅದನ್ನು ಹಾಕುವಂತೆ ಹೇಳಿದ್ದರು ಎನ್ನುವುದು ನಂತರ ಗೊತ್ತಾಗಿದೆ!

Dublin man Shay Bradley made his loved ones laugh one last time. This video from his funeral is just wonderful. pic.twitter.com/68cXibVgaJ

— Darren Cleary (@RadioCleary) October 14, 2019