ವಿಶ್ವ ಬ್ಯಾಂಕಿನ ರ್ಯಾಂಕಿಂಗ್ ಪಡೆಯಲು ಶ್ರಮಿಸಿ: ಡಾ.ಗುರುಪ್ರಸಾದ್ ಮೊಹಪಾತ್ರ

ಬೆಂಗಳೂರು, ಅ. 17: 2020ರಲ್ಲಿ ವಿಶ್ವ ಬ್ಯಾಂಕಿನ ಈಸ್ ಆಫ್ ಡೂಯಿಂಗ್ ಬಿಸಿನೆಸ್ ಸಮೀಕ್ಷೆಯಲ್ಲಿ ಭಾರತವು ಪ್ರಮುಖ 50ರ ರ್ಯಾಂಕಿಂಗ್ ಪಟ್ಟಿಯಲ್ಲಿ ಸ್ಥಾನ ಪಡೆದುಕೊಳ್ಳುವ ನಿಟ್ಟಿನಲ್ಲಿ ಶ್ರಮಿಸಬೇಕಿದೆ ಎಂದು ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಇಲಾಖೆ ಕಾರ್ಯದರ್ಶಿ ಡಾ.ಗುರುಪ್ರಸಾದ್ ಮೊಹಪಾತ್ರ ಹೇಳಿದ್ದಾರೆ.

ಗುರುವಾರ ವಿಕಾಸಸೌಧದಲ್ಲಿ ಪ್ರಮೋಷನ್ ಆಫ್ ಇಂಡಸ್ಟ್ರೀ ಆಂಡ್ ಇಂಟರ್ನಲ್ ಟ್ರೇಡ್ ಇಲಾಖೆ ಹಾಗೂ ಕರ್ನಾಟಕ ವಾಣಿಜ್ಯ ಮತ್ತು ಕೈಗಾರಿಕಾ ಇಲಾಖೆ ಸಹಯೋಗದಲ್ಲಿ ಹಮ್ಮಿಕೊಂಡಿದ್ದ ವರ್ಲ್ಡ್ ಬ್ಯಾಂಕ್ಸ್ ಡೂಯಿಂಗ್ ಬಿಸಿನೆಸ್-2021 ರ್ಯಾಂಕಿಂಗ್ ಇನ್‌ಕ್ಲೂಜನ್ ಕಾರ್ಯಾಗಾರದಲ್ಲಿ ಪಾಲ್ಗೊಂಡು ಮಾತನಾಡಿದರು.

ವಿದೇಶಿ ಹೂಡಿಕೆದಾರರು ಹೂಡಿಕೆ ಮಾಡುವ ಪ್ರಾರಂಭದಲ್ಲಿ ಮೊದಲು ನೋಡುವುದೇ ವಿಶ್ವ ಬ್ಯಾಂಕಿನ ರ್ಯಾಂಕಿಂಗ್ ಸ್ಥಾನವನ್ನು. ಭಾರತ ಕಳೆದ ಸಾಲಿನಲ್ಲಿ 77ನೆ ಶ್ರೇಯಾಂಕ ಪಡೆದುಕೊಂಡು ವಿಶ್ವದೆಲ್ಲೆಡೆ ತನ್ನ ಗುರುತನ್ನು ಬಲಪಡಿಸಿದೆ ಎಂದು ಹೇಳಿದರು.

ಈ ಸಾಲಿನ ಶ್ರೇಯಾಂಕವು ಅಕ್ಟೋಬರ್ ಅಂತ್ಯದೊಳಗೆ ಘೋಷಣೆಯಾಗುವ ನಿರೀಕ್ಷೆ ಇದೆ. 2020ರ ವೇಳೆಗೆ ವಿಶ್ವ ಬ್ಯಾಂಕ್‌ನ ಈಸ್ ಆಫ್ ಡೂಯಿಂಗ್ ಬಿಸಿನೆಸ್‌ನ ಸಮೀಕ್ಷೆಯಲ್ಲಿ ಮೊದಲ 50ನೆ ರ್ಯಾಂಕಿಂಗ್ ಪಟ್ಟಿಯಲ್ಲಿ ಭಾರತವೂ ಸೇರ್ಪಡೆಗೊಳ್ಳಬೇಕು. 2024ರ ವೇಳೆಗೆ ಈ ರ್ಯಾಂಕಿಂಗ್ ಪ್ರಮುಖ 25ರ ಪಟ್ಟಿಯಲ್ಲಿ ಬರುವಂತೆ ಶ್ರಮಿಸಬೇಕಿದೆ ಎಂದು ಕರೆ ನೀಡಿದರು.
ಇತರೆ ದೇಶಗಳು ಈಸ್ ಆಫ್ ಡೂಯಿಂಗ್ ಬಿಸಿನೆಸ್‌ನಲ್ಲಿ ಗಮನಾರ್ಹ ರೀತಿಯಲ್ಲಿ ನೀತಿ ನಿಯಮಗಳನ್ನು ಹೊಂದಿವೆ. ಭಾರತದ ಶ್ರೇಯಾಂಕವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಕೋಲ್ಕತ್ತಾ, ದಿಲ್ಲಿ, ಮುಂಬೈ ಹಾಗೂ ಬೆಂಗಳೂರು ನಗರಗಳ ಪಾತ್ರ ದೊಡ್ಡದಿದೆ ಎಂದರು.

ದಿಲ್ಲಿ ಹಾಗೂ ಮುಂಬೈಗೆ ಹೋಲಿಸಿದರೆ ಬೆಂಗಳೂರು ಹಾಗೂ ಕೋಲ್ಕತ್ತಾ ಈಸ್ ಆಫ್ ಡೂಯಿಂಗ್ ಬಿಸಿನೆಸ್‌ನಲ್ಲಿ ಹೆಚ್ಚು ಕೊಡುಗೆ ನೀಡುತ್ತಿವೆ. ಇನ್ನೂ ಹೆಚ್ಚು ಗುರಿ ತಲುಪುವ ಮೂಲಕ ಮುಂದಿನ ಸಾಲಿನಲ್ಲಿ ಶ್ರೇಯಾಂಕವನ್ನು ಹೆಚ್ಚಿಸಬೇಕಿದೆ ಎಂದರು.
ರಾಜ್ಯ ಸರಕಾರದ ಮುಖ್ಯಕಾರ್ಯದರ್ಶಿ ಟಿ.ಎಂ.ವಿಜಯ ಭಾಸ್ಕರ್ ಮಾತನಾಡಿ, ವಿಶ್ವ ಬ್ಯಾಂಕ್ ಸಮೀಕ್ಷೆಯ ಶ್ರೇಯಾಂಕ ಘೋಷಣೆಯ ನಾಲ್ಕು ಸಿಟಿಗಳ ಪೈಕಿ ಬೆಂಗಳೂರು ಸೇರ್ಪಡೆಗೊಂಡಿರುವುದು ಶ್ಲಾಘನಾರ್ಹ ಎಂದು ಇದೇ ವೇಳೆ ಮೆಚ್ಚುಗೆ ವ್ಯಕ್ತಪಡಿಸಿದರು.

ಸಿಟಿಜನ್ ಸರ್ವಿಸ್ ಆಕ್ಟ್ ಅನ್ವಯ 500ಕ್ಕೂ ಹೆಚ್ಚು ಸೇವೆಗಳನ್ನು 2020ರ ಮಾರ್ಚ್ ಒಳಗಾಗಿ ಆನ್‌ಲೈನ್ ವ್ಯಾಪ್ತಿಗೆ ತರಲಾಗುವುದು. ಪ್ರಸ್ತುತ 300ಸೇವೆಗಳು ಆನ್‌ಲೈನ್ ವ್ಯಾಪ್ತಿಯಲ್ಲಿವೆ. ಈಸ್ ಆಫ್ ಡೂಯಿಂಗ್ ಬಿಸಿನೆಸ್ ಸಂಬಂಧಿಸಿದ ಸೇವೆಗಳೂ ಆನ್‌ಲೈನ್ ವ್ಯಾಪ್ತಿಗೆ ಬರಲಿವೆ ಎಂದು ಅವರು ಹೇಳಿದರು.

ಜೊತೆಗೆ ಈಸ್ ಆಫ್ ಡೂಯಿಂಗ್ ಬಿಸಿನೆಸ್‌ಗೆ ಬೆಂಬಲಿತವಾಗಿ ನಿಲ್ಲಲು ಬಿಸಿನೆಸ್ ಫೆಸಿಲಿಟೇಷನ್ ಆಕ್ಟ್‌ನನ್ನು ಇನ್ನಷ್ಟು ಚುರುಕುಗೊಳಿಸಲಾಗುವುದು ಎಂದು ವಿಜಯ್ ಭಾಸ್ಕರ್ ಮಾಹಿತಿ ನೀಡಿದರು.