ಟೆಲಿಕಾಂ ಸಂಸ್ಥೆಗಳಿಂದ 1.3 ಲಕ್ಷ ಕೋಟಿ ವಸೂಲಾತಿ: ಕೇಂದ್ರ ಸರಕಾರಕ್ಕೆ ಸುಪ್ರೀಂ ಅನುಮತಿ

ಹೊಸದಿಲ್ಲಿ, ಅ.24: ಭಾರ್ತಿ ಏರ್‌ಟೆಲ್, ರಿಲಯನ್ಸ್ ಕಮ್ಯುನಿಕೇಶನ್(ಆರ್‌ಕಾಮ್) ಮತ್ತು ವೊಡಾಫೋನ್ ಐಡಿಯಾ ಟೆಲಿಕಾಂ ಸಂಸ್ಥೆಗಳಿಂದ ಬರಬೇಕಿರುವ 1.3 ಲಕ್ಷ ಕೋಟಿ ರೂ. ವಸೂಲು ಮಾಡಲು ಕೇಂದ್ರ ಸರಕಾರಕ್ಕೆ ಸುಪ್ರೀಂಕೋರ್ಟ್ ಅನುಮತಿ ನೀಡಿದೆ.

ಅಲ್ಲದೆ , ಒಟ್ಟು ಆದಾಯ ಹೊಂದಾಣಿಕೆ (ಎಜಸ್ಟೆಡ್ ಗ್ರಾಸ್ ರೆವೆನ್ಯೂ) ಕುರಿತ ಸರಕಾರದ ವ್ಯಾಖ್ಯಾನವನ್ನು ಪ್ರಶ್ನಿಸಿ ಈ ಸಂಸ್ಥೆಗಳು ಸಲ್ಲಿಸಿದ್ದ ಮೇಲ್ಮನವಿಯನ್ನು ತಿರಸ್ಕರಿಸಿದೆ. ಈ ಮೊತ್ತವನ್ನು ಪಾವತಿಸಲು 6 ತಿಂಗಳ ಅವಕಾಶ ಕೊಡಬೇಕು ಎಂದು ಟೆಲಿಕಾಂ ಸಂಸ್ಥೆಗಳು ಕೋರಿವೆ.

ಒಟ್ಟು ಆದಾಯ ಹೊಂದಾಣಿಕೆ ವಿಭಾಗದಲ್ಲಿ ಲೈಸೆನ್ಸ್ ಶುಲ್ಕದ ಜೊತೆ ಇತರ ವಿಷಯಗಳೂ ಸೇರುತ್ತವೆ. ಆದರೆ ಬಂಡವಾಳ ಆಸ್ತಿ ಮತ್ತು ಟೆಲಿಕಾಂ ಸಂಸ್ಥೆಗಳ ವಿಮಾ ಕ್ಲೇಮ್‌ಗಳು ಇದರಲ್ಲಿ ಸೇರುವುದಿಲ್ಲ ಎಂದು ಸುಪ್ರೀಂಕೋರ್ಟ್ ಸ್ಪಷ್ಟಪಡಿಸಿದೆ. ಟೆಲಿಕಾಂ ಕ್ಷೇತ್ರದಲ್ಲಿರುವ ತೀವ್ರ ಸ್ಪರ್ಧೆ ಹಾಗೂ ಭಾರೀ ಸಾಲದ ಹೊರೆಯಿಂದ ಸಮಸ್ಯೆ ಎದುರಿಸುತ್ತಿರುವ ಟೆಲಿಕಾಂ ಸಂಸ್ಥೆಗಳಿಗೆ ಈ ತೀರ್ಪು ಭಾರೀ ಆಘಾತ ನೀಡಿದೆ.

ಬಾಡಿಗೆ, ಇಂಟರ್‌ನೆಟ್ ಆದಾಯ ಹಾಗೂ ಡಿವಿಡೆಂಡ್ ಆದಾಯವನ್ನು ಒಟ್ಟು ಆದಾಯ ಹೊಂದಾಣಿಕೆಯಿಂದ ಹೊರಗಿಡಬೇಕು ಎಂಬುದು ಟೆಲಿಕಾಂ ಸಂಸ್ಥೆಗಳ ವಾದವಾಗಿದೆ. ಸುಪ್ರೀಂಕೋರ್ಟ್‌ನ ತೀರ್ಪಿನಿಂದ ನಿರಾಸೆಯಾಗಿದೆ. ಒಟ್ಟು ಆದಾಯ ಹೊಂದಾಣಿಕೆ ವಿಷಯ 2005ರಿಂದಲೂ ದೂರಸಂಪರ್ಕ ಇಲಾಖೆ ಹಾಗೂ ಟೆಲಿಕಾಂ ಸೇವೆ ಒದಗಿಸುವ ಸಂಸ್ಥೆ(ಟಿಎಸ್‌ಪಿ)ಗಳ ಮಧ್ಯೆ ವಿವಾದಕ್ಕೆ ಕಾರಣವಾಗಿತ್ತು ಎಂದು ಭಾರ್ತಿ ಏರ್‌ಟೆಲ್‌ನ ವಕ್ತಾರರು ಪ್ರತ್ರಿಕ್ರಿಯಿಸಿದ್ದಾರೆ.

ಟೆಲಿಕಾಂ ಕ್ಷೇತ್ರದ ಅಭಿವೃದ್ಧಿಗೆ ಮತ್ತು ಗ್ರಾಹಕರಿಗೆ ವಿಶ್ವದರ್ಜೆಯ ಸೇವೆ ಒದಗಿಸಲು ಟಿಎಸ್‌ಪಿಗಳು ಕೋಟ್ಯಾಂತರ ಹಣ ಹೂಡಿಕೆ ಮಾಡಿದೆ. ಮೊದಲೇ ಆರ್ಥಿಕ ಒತ್ತಡ ಎದುರಿಸುತ್ತಿರುವ ಟಿಎಸ್‌ಪಿಗಳಿಗೆ ಈ ತೀರ್ಪು ಗಾಯದ ಮೇಲೆ ಬರೆ ಎಳೆದಂತಾಗಿದೆ. ಈ ಆದೇಶ ಅನ್ವಯಿಸುವ 15 ಹಳೆಯ ಟೆಲಿಕಾಂ ಸಂಸ್ಥೆಗಳಲ್ಲಿ ಈಗ ಕೇವಲ 2 ಸಂಸ್ಥೆಗಳು ಮಾತ್ರ ಕಾರ್ಯ ನಿರ್ವಹಿಸುತ್ತಿವೆ. ಆದ್ದರಿಂದ ಸರಕಾರ ನ್ಯಾಯಾಲಯದ ತೀರ್ಪಿನಿಂದ ಆಗುವ ಪರಿಣಾಮಗಳನ್ನು ಪರಿಶೀಲಿಸಿ, ಟಿಎಸ್‌ಪಿಗಳ ಮೇಲಿನ ಆರ್ಥಿಕ ಒತ್ತಡವನ್ನು ಕಡಿಮೆಗೊಳಿಸಲು ಕ್ರಮ ಕೈಗೊಳ್ಳಬೇಕು ಎಂದವರು ಒತ್ತಾಯಿಸಿದ್ದಾರೆ.

ಸುಪ್ರೀಂಕೋರ್ಟ್‌ನ ತೀರ್ಪು ಹೊರಬೀಳುತ್ತಿದ್ದಂತೆಯೇ ವೊಡಾಫೋನ್ ಐಡಿಯಾ ಸಂಸ್ಥೆಯ ಶೇರಿನ ಮೌಲ್ಯ ಶೇ.19ರಷ್ಟು ಏರಿಕೆಯಾದರೆ, ಭಾರ್ತಿ ಏರ್‌ಟೆಲ್‌ನ ಶೇರು ಮೌಲ್ಯ ಶೇ.5ರಷ್ಟು ಇಳಿದಿದೆ.

ಭಾರ್ತಿ ಏರ್‌ಟೆಲ್, ವೊಡಫೋನ್ ಐಡಿಯಾ ಮತ್ತು ರಿಲಯನ್ಸ್ ಕಮ್ಯುನಿಕೇಷನ್ಸ್‌ನಿಂದ ಸುಮಾರು 92000 ಕೋಟಿ ರೂ. ಲೈಸೆನ್ಸ್ ಶುಲ್ಕ, ತರಂಗ ಬಳಕೆ ಶುಲ್ಕವಾಗಿ 41,000 ಕೋಟಿ ರೂ. ಮೊತ್ತ ಬರಬೇಕಿದೆ ಎಂದು ದೂರಸಂಪರ್ಕ ಇಲಾಖೆ ಸುಪ್ರೀಂಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಿತ್ತು.

ಈ ವಿವಾದದ ಬಗ್ಗೆ ಟೆಲಿಕಾಂ ವಿವಾದಗಳ ಇತ್ಯರ್ಥ ಮತ್ತು ಮೇಲ್ಮನವಿ ನ್ಯಾಯಮಂಡಳಿ 2006ರಲ್ಲಿ ಟೆಲಿಕಾಂ ಸಂಸ್ಥೆಗಳ ಪರ ತೀರ್ಪು ನೀಡಿತ್ತು.