ಕಾರವಾರದಲ್ಲಿ ಇ-ಟಿಕೇಟ್ ಅಕ್ರಮ ದಂಧೆ ಪತ್ತೆ ಹಚ್ಚಿದ ಆರ್ಪಿಎಫ್
ಉಡುಪಿ, ನ.4: ಕೊಂಕಣ ರೈಲ್ವೆಯ ಪೊಲೀಸ್ ರಕ್ಷಣಾ ಪಡೆಯ (ಆರ್ಪಿಎಫ್) ತಂಡವೊಂದು ಇತ್ತೀಚೆಗೆ ಕಾರವಾರದ ಟ್ರಾವೆಲ್ ಎಜೆನ್ಸಿಯೊಂದರ ಮೇಲೆ ಹಠಾತ್ ದಾಳಿ ನಡೆಸಿ ಅಲ್ಲಿ ರೈಲ್ವೆ ಇ-ಟಿಕೇಟ್ನಲ್ಲಿ ನಡೆಯುತಿದ್ದ ಅಕ್ರಮವನ್ನು ಪತ್ತೆ ಹಚ್ಚಿತಲ್ಲದೇ 20,524ರೂ. ಮೌಲ್ಯದ ಅಕ್ರಮ ಟಿಕೇಟ್ಗಳನ್ನು ವಶಪಡಿಸಿಕೊಂಡಿದೆ.
ಆರ್ಪಿಎಫ್ನ ಸಹಾಯಕ ಭದ್ರತಾ ಅಧೀಕ್ಷಕರ ಮಾರ್ಗದರ್ಶನದಲ್ಲಿ ಆರ್ಪಿಎಫ್ ಇನ್ಸ್ಪೆಕ್ಟರ್ ನೇತೃತ್ವದ ಸಬ್ ಇನ್ಸ್ಪೆಕ್ಟರ್ ಹಾಗೂ ಇತರ ಸಿಬ್ಬಂದಿ ಗಳನ್ನ ಒಳಗೊಂಡ ತಂಡ ಅ.28ರಂದು ಕಾರವಾರದ ‘ವಾನ್ ಫಾಸ್ಟ್ ಟ್ರಾವಲ್ಸ್’ಗೆ ಹಠಾತ್ ದಾಳಿ ನಡೆಸಿ 20,524ರೂ. ವೌಲ್ಯದ 20 ಮುಂದಿನ ದಿನಗಳ ಇ-ಟಿಕೇಟ್ಗಳನ್ನು ಹಾಗೂ 10,675ರೂ. ವೌಲ್ಯದ 13 ಹಿಂದಿನ ದಿನಗಳ ಇ-ಟಿಕೇಟ್ಗಳನ್ನು ಅಂಗಡಿಯ ಮಾಲಕರಾದ ಅಬ್ದುಲ್ ನಝೀರ್ ಇಬ್ರಾಹಿಂ ಶೇಖ್ ಅವರಿಂದ ವಶಪಡಿಸಿಕೊಂಡಿತು.
ಆರೋಪಿಗೆ ಇಂಥ ಟಿಕೇಟ್ಗಳನ್ನು ನೀಡುವ ಅಧಿಕಾರವೇ ಇದ್ದಿರಲ್ಲಿಲ್ಲ ಎಂಬುದು ವಿಚಾರಣೆಯ ವೇಳೆ ತಿಳಿದುಬಂತು. ಆರೋಪಿಯನ್ನು ವಶಕ್ಕೆ ಪಡೆದ ಆರ್ಪಿಎಫ್ ಪೊಲೀಸರು ಅವರಿಂದ ವಶಪಡಿಸಿಕೊಂಡ ಕಂಪ್ಯೂಟರ್, ಪ್ರಿಂಟರ್, ಡೊಂಗಲ್ ಹಾಗೂ ಇತರ ವಸ್ತುಗಳೊಂದಿಗೆ ಅವರನ್ನು ಕಾರವಾರದ ನ್ಯಾಯಾಲಯದ ಮುಂದೆ ಹಾಜರುಪಡಿಸಿದರು. ನ್ಯಾಯಾಲಯ ಆರೋಪಿಗೆ 5000ರೂ. ದಂಡವಿಧಿಸಿತು. ಅಲ್ಲದೇ ಆ ಟ್ರಾವೆಲ್ ಏಜೆನ್ಸಿಯಿಂದ ಈಗಾಗಲೇ ಗ್ರಾಹಕರಿಗೆ ನೀಡಲಾದ ಮುಂದಿನ ದಿನಾಂಕಗಳ 20 ಟಿಕೇಟ್ಗಳನ್ನು ರದ್ದು ಪಡಿಸಲಾಯಿತು ಎಂದು ಕೊಂಕಣ ರೈಲ್ವೆಯ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಕೊಂಕಣ ರೈಲ್ವೆಯ ಆರ್ಪಿಎಫ್ ಗುಪ್ತಚರ ವಿಭಾಗವು ರೈಲ್ವೆ ಟಿಕೇಟ್ಗಳನ್ನು ಅಕ್ರಮವಾಗಿ ಮಾರುವ ದಂಧೆಯ ಕುರಿತಂತೆ ತೀವ್ರ ನಿಗಾ ಇರಿಸಿದ್ದು, ಅಕ್ರಮ ರೈಲ್ವೆ ಟಿಕೇಟ್ಗಳನ್ನು ವಿತರಿಸುವ ಕಾರವಾರ, ಭಟ್ಕಳ, ಉಡುಪಿ, ಗೋಕರ್ಣ, ಕುಮಟಾ, ಮುರುಡೇಶ್ವರ ಮುಂತಾದ ಕಡೆಗಳಲ್ಲಿ ಕಾರ್ಯಾಚರಿಸುತ್ತಿರುವ ಅನಧಿಕೃತ ಟ್ರಾವೆಲ್ಸ್ ಏಜೆನ್ಸಿಗಳ ವಿರುದ್ಧ ಕಾರ್ಯಾಚರಣೆ ನಡೆಸಲಿದೆ ಎಂದು ಪ್ರಕಟಣೆಯಲ್ಲಿ ವಿವರಿಸಲಾಗಿದೆ.
