ಓ ಮೆಣಸೇ ...

  ಮುಂದಿನ ನೂರು ದಿನಗಳಲ್ಲಿ ರಾಜ್ಯದ ಚಿತ್ರಣವನ್ನೇ ಬದಲಿಸುತ್ತೇನೆ -ಯಡಿಯೂರಪ್ಪ, ಮುಖ್ಯಮಂತ್ರಿ
  ಜನರ ಸ್ಥಿತಿ ಚಿತ್ರಾನ್ನವಾಗಲಿದೆಯೇ?

---------------------
  ವಿಪಕ್ಷ ನಾಯಕ ಸಿದ್ದರಾಮಯ್ಯ ಕಾಂಗ್ರೆಸ್ ಪಕ್ಷಕ್ಕೆ ಶನಿ ಇದ್ದಂತೆ-
  ಜನಾರ್ದನ ಪೂಜಾರಿ, ಕಾಂಗ್ರೆಸ್ ನಾಯಕ
ಕಾಂಗ್ರೆಸ್ ಪಾಲಿನ ದಕ್ಷಿಣ ಕನ್ನಡದ ಶನಿಯಿಂದ ಹೇಳಿಕೆ.

--------------------

ರಾಜ್ಯ ಬಿಜೆಪಿ ಸರಕಾರ ಬೀಳಿಸುವ ಗಡಿಬಿಡಿ ನಮಗಿಲ್ಲ - ಎಚ್.ಡಿ. ದೇವೇಗೌಡ, ಮಾಜಿ ಪ್ರಧಾನಿ
ಅದೇನಿದ್ದರೂ, ಉಳಿದವರು ಬೀಳಿಸುವಾಗ ಬಾಚಿಕೊಳ್ಳುವುದರ ಬಗ್ಗೆ ಮಾತ್ರ ಆಸಕ್ತಿ.

---------------------
  ಆಡಿಯೊ ಮಾಡಿಸುವುದರಲ್ಲಿ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ನಿಸ್ಸೀಮರು - ಲಕ್ಷ್ಮಣ ಸವದಿ, ಉಪಮುಖ್ಯಮಂತ್ರಿ
 ಅದರ ಪ್ರಸಾರದ ಹೊಣೆಯನ್ನು ಬಿಜೆಪಿ ಹೊತ್ತುಕೊಂಡಿರುವಂತಿದೆ.

---------------------
  ವಿದೇಶಿ ಗೋವುಗಳು ಮಾತೆಯಲ್ಲ, ಅವು ನಮ್ಮ ಆಂಟಿಯರಿಗೆ ಸಮಾನ - ದಿಲೀಪ್ ಘೋಷ್, ಪ.ಬಂ. ಬಿಜೆಪಿ ನಾಯಕ
 ಸ್ವದೇಶದಿಂದ ಮಾಂಸಕ್ಕಾಗಿ ವಿದೇಶಕ್ಕೆ ಕಳುಹಿಸಿದ ಗೋವುಗಳನ್ನು ಏನೆಂದು ಕರೆಯೋಣ?
---------------------
  ಸರಕಾರಕ್ಕೆ ಜೆಡಿಎಸ್ ಬೆಂಬಲ ನೀಡಿದರೆ ಬೇಡ ಎನ್ನುವುದಿಲ್ಲ - ಕೆ.ಎಸ್. ಈಶ್ವರಪ್ಪ, ಸಚಿವ
  ಆದರೆ ಅವರು ಮುಖ್ಯಮಂತ್ರಿ ಸ್ಥಾನ ಬೇಕು ಎಂದರೆ?
---------------------
  ರಾಜ್ಯದಲ್ಲಿನ ಎಲ್ಲಾ ಮದ್ಯ ಮಾರಾಟ ಕೇಂದ್ರಗಳಿಂದ ದೇವರ ಹೆಸರು ಮುಕ್ತಗೊಳಿಸಲು ಶೀಘ್ರದಲ್ಲೇ ಸುತ್ತೋಲೆ ಹೊರಡಿಸಲಾಗುವುದು - ಕೋಟ ಶ್ರೀನಿವಾಸ ಪೂಜಾರಿ, ಸಚಿವ
ದೇವರ ಹೆಸರಿರುವವರಿಗೆ ಮದ್ಯ ನೀಡುವುದನ್ನೂ ನಿಷೇಧಿಸಬೇಕು.

---------------------
  ರಾಜಕೀಯದಲ್ಲಿ ಯಾರೂ ಶಾಶ್ವತ ಶತ್ರುಗಳೂ ಅಲ್ಲ, ಮಿತ್ರರೂ ಅಲ್ಲ - ಎಚ್.ಡಿ. ದೇವೇಗೌಡ, ಮಾಜಿ ಪ್ರಧಾನಿ
  
ಈಗ ಯಾರನ್ನು ಮಿತ್ರರನ್ನಾಗಿಸಲು ಹೊರಟಿದ್ದೀರಿ,ಅದನ್ನಾದರೂ ಹೇಳಿ.

---------------------
  ಮೆಕಾಲೆ ಇಂಗ್ಲಿಷ್ ಶಿಕ್ಷಣವು ವಿದ್ಯಾರ್ಥಿಗಳಲ್ಲಿ ಕೀಳರಿಮೆ ಮತ್ತು ಗುಲಾಮಿತನವನ್ನು ಸೃಷ್ಟಿಸುತ್ತಿದೆ - ಡಾ. ಚಂದ್ರಶೇಖರ ಕಂಬಾರ, ಸಾಹಿತಿ
 ಹಿಂದಿನಂತೆ ಗುರುಕುಲ ಪದ್ಧತಿ ವ್ಯವಸ್ಥೆ ಮಾಡಿ, ದಲಿತರು, ಶೂದ್ರರನ್ನು ಶಿಕ್ಷಣದಿಂದ ಹೊರಗಿಡೋಣವೇ?

---------------------
  ದೇಶ, ಪ್ರಜಾಪ್ರಭುತ್ವ ಮತ್ತು ಸಂವಿಧಾನದ ರಕ್ಷಣೆ ಕಾಂಗ್ರೆಸ್‌ನಿಂದ ಮಾತ್ರ ಸಾಧ್ಯ - ಸಿದ್ದರಾಮಯ್ಯ, ಮಾಜಿ ಮುಖ್ಯಮಂತ್ರಿ
 ಅಧಿಕಾರದಲ್ಲಿದ್ದಾಗ ಅದರ ರಕ್ಷಣೆಯಲ್ಲಿ ವಿಫಲರಾದುದು ಯಾಕೆ?

---------------------
  ಸಂವಿಧಾನದಲ್ಲಿ ಹೇಳಿರುವ ಪ್ರತಿಯೊಂದು ವಿಚಾರಗಳೂ ಮಹಾಭಾರತದಲ್ಲಿ ನಾಲ್ಕು ಸಾವಿರ ವರ್ಷಗಳ ಹಿಂದೆಯೇ ಹೇಳಲಾಗಿದೆ - ತೇಜಸ್ವಿ ಸೂರ್ಯ, ಸಂಸದ
  ಅಂದರೆ ಸಂವಿಧಾನದ ಬದಲು ಮಹಾಭಾರತವನ್ನೇ ಸಂವಿಧಾನ ಮಾಡಬೇಕೇ?

---------------------
  ನಮ್ಮ ಸರಕಾರಕ್ಕೆ ಎಚ್.ಡಿ. ದೇವೇಗೌಡರ ಮಾರ್ಗದರ್ಶನ ಅಗತ್ಯವಿದೆ - ಕೋಟ ಶ್ರೀನಿವಾಸ ಪೂಜಾರಿ, ಸಚಿವ
 ಬೆಂಬಲ ಎಂದು ನಾಚಿಕೆ ಬಿಟ್ಟು ಸ್ಪಷ್ಟವಾಗಿ ಕೇಳಬಾರದೇ?

---------------------
  ನಾವು ಮುಳ್ಳನ್ನು ಮುಳ್ಳಿನಿಂದಲೇ ತೆಗೆಯುವ ರಾಜಕಾರಣ ಮಾಡುತ್ತೇವೆ - ಸಿ.ಟಿ. ರವಿ, ಸಚಿವ
  ಅದಕ್ಕೆ ನಿಮ್ಮ ಪಕ್ಷದಲ್ಲಿ ಮುಳ್ಳುಗಳ ಸಂಖ್ಯೆ ಹೆಚ್ಚಿವೆ.

---------------------
  ಅನರ್ಹ ಶಾಸಕರಿಗೆ ಉಪ ಚುನಾವಣೆಯಲ್ಲಿ ಬಿಜೆಪಿ ಟಿಕೆಟ್ ನೀಡುತ್ತೇವೆ ಎಂದು ಸಿಎಂ ಎಲ್ಲಿಯೂ ಹೇಳಿಲ್ಲ - ಜಗದೀಶ್ ಶೆಟ್ಟರ್, ಸಚಿವ
  
ಅವರವರ ಊರಿನ ಬಸ್ ಟಿಕೆಟ್ ಕೊಡುತ್ತೇವೆ ಎಂದು ಹೇಳಿರಬೇಕು.

---------------------
 ಲೈಂಗಿಕ ಶೋಷಣೆಗೆ ಸಂಬಂಧಿಸಿದಂತೆ ನ್ಯಾಯಾಂಗದ ಪರಿಭಾಷೆ ಬದಲಾಗಬೇಕು - ಶೃತಿಹರಿಹರನ್, ನಟಿ
ಲೈಂಗಿಕ ಶೋಷಣೆ ನಡೆಸಿದ ಆರೋಪಿಗಳೇ ನ್ಯಾಯಾಧೀಶ ಸ್ಥಾನದಲ್ಲಿ ಕುಳಿತ ಮೇಲೆ ಭಾಷೆ ಬದಲಾದರೂ ತೀರ್ಪು ಬದಲಾಗದು.

---------------------
  ಯಶಸ್ವಿ ರಾಜಕಾರಣಿಯಾಗಲು ಧರ್ಮ ಮತ್ತು ದೇವರಿಗೆ ಅಂಜುವ ಅಗತ್ಯವಿಲ್ಲ - ವಿಶ್ವೇಶ ತೀರ್ಥ ಸ್ವಾಮೀಜಿ, ಪೇಜಾವರ ಮಠ
 
ಯಶಸ್ವಿ ಸ್ವಾಮೀಜಿಯಾಗಬೇಕಾದರೂ ಅದನ್ನೇಪಾಲಿಸಬೇಕಂತೆ.

---------------------
  2025 ರೊಳಗಾಗಿ ದೇಶದ ಅರ್ಥ ವ್ಯವಸ್ಥೆಯನ್ನು 5 ಲಕ್ಷ ಕೋಟಿ ಡಾಲರ್‌ಗೆ ಏರಿಸುವಲ್ಲಿ ಪ್ರತಿರಾಜ್ಯ, ಜಿಲ್ಲೆಯ ಪಾತ್ರವಿದೆ - ನರೇಂದ್ರ ಮೋದಿ, ಪ್ರಧಾನಿ
  
ತಮ್ಮ ಪಾತ್ರದ ಬಗ್ಗೆ ಸ್ವಲ್ಪ ಹೇಳಿ.

---------------------
  ನನಗೂ ಚಕ್ರ ತಿರುಗಿಸೋದು ಗೊತ್ತು, ಸಮಯ ಬಂದಾಗ ತಿರುಗಿಸುವೆ - ಡಿ.ಕೆ. ಶಿವಕುಮಾರ್, ಶಾಸಕ
  
ಸದ್ಯಕ್ಕೆ ಜೈಲಿನೊಳಗೆ ರಾಟೆ ತಿರುಗಿಸಿ.

---------------------
 ಮಾಜಿ ಪ್ರಧಾನಿ ದೇವೇಗೌಡರಿಗೆ ಯಾವಾಗ ಯಾವ ರೀತಿ ರಾಜಕಾರಣ ಮಾಡಬೇಕು ಎಂದು ಗೊತ್ತಿದೆ - ಶ್ರೀನಿವಾಸ ಪ್ರಸಾದ್, ಸಂಸದ
  
ಅದಕ್ಕೆ ಸಮಯ ಸಾಧಕ ರಾಜಕಾರಣ ಎಂದು ಹೇಳುತ್ತಾರೆ.

---------------------  

 ಮುಂದೆ ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ಡಿ.ಕೆ.ಶಿ. ಮುಖ್ಯಮಂತ್ರಿಯಾಗಬೇಕು - ತನ್ವೀರ್ ಸೇಠ್, ಶಾಸಕ ಅಧಿಕಾರಕ್ಕೆ ಬರದಂತೆ ನಾನು ನೋಡಿಕೊಳ್ಳುತ್ತೇನೆ ಎಂದರಂತೆ ಸಿದ್ದರಾಮಯ್ಯ.

---------------------

ಸಮುದ್ರ ಮಂಥನದ ವೇಳೆ ಹಾಲಾಹಲವನ್ನು ಕುಡಿದು ಶಿವ ವಿಷಕಂಠನಾದ ರೀತಿಯಲ್ಲಿ ನಾವು 17 ಶಾಸಕರು ರಾಜ್ಯವನ್ನು ರಕ್ಷಿಸಲು ವಿಷಕಂಠರಾಗ ಬೇಕಾಯಿತು - ಬಿ.ಸಿ. ಪಾಟೀಲ್, ಅನರ್ಹ ಶಾಸಕ
 
ಇನ್ನು ಸ್ಮಶಾನವೇ ಗತಿ.

---------------------
  ರಾಜಕೀಯ ಎನ್ನುವುದು ತೆರೆದ ಪುಸ್ತಕ - ವಿ. ಸೋಮಣ್ಣ, ಸಚಿವ
ತೆರೆದ ಅಶ್ಲೀಲ ಪುಸ್ತಕ.

---------------------
  ಅಭಿವೃದ್ಧಿಯಲ್ಲಿ ಕುಂಟುತ್ತಾ ಮಲಗಿದ್ದ ರಾಜ್ಯ ಸರಕಾರ ಇದೀಗ ಓಡಲು ಆರಂಭಿಸಿದೆ - ನಳಿನ್ ಕುಮಾರ್ ಕಟೀಲು, 
 ಸಂಸದ ಬಹುಶಃ ನೆರೆ ಸಂತ್ರಸ್ತರನ್ನು ನೋಡಿ ಹೆದರಿರಬೇಕು.