​ಮನೆಗೆ ನುಗ್ಗಿ ನಗ ನಗದು ಕಳವು

ಕುಂದಾಪುರ, ನ.28: ಕೊಂಕಣ ರೈಲ್ವೆ ಕಛೇರಿಯ ಟ್ರಾಕ್‌ಮೆನ್ ಸುಬ್ಬ ದೇವಾಡಿಗ ಎಂಬವರ ಮನೆಗೆ ನ.26ರಂದು ರಾತ್ರಿ ವೇಳೆ ನುಗ್ಗಿದ ಕಳ್ಳರು ನಗ ನಗದು ಕಳವು ಮಾಡಿರುವ ಬಗ್ಗೆ ವರದಿಯಾಗಿದೆ.

ಸುಬ್ಬ ದೇವಾಡಿಗ ಮನೆಗೆ ಬೀಗ ಹಾಕಿ ಪತ್ನಿ ಮನೆಯಾದ ಬೈಂದೂರಿಗೆ ಹೋಗಿದ್ದ ವೇಳೆ ಮನೆಯ ಎದುರಿನ ಬಾಗಿಲಿನ ಕೊಂಡಿ ಮುರಿದು ಒಳನುಗ್ಗಿದ ಕಳ್ಳರು ಕಪಾಟಿನಲ್ಲಿದ್ದ 10500 ರೂ. ನಗದು ಮತ್ತು 3000 ರೂ. ಮೌಲ್ಯದ ಒಂದು ಜೊತೆ ಕಿವಿಯ ಗುಂಡು ಕಳವು ಮಾಡಿದ್ದಾರೆ. ನ.27ರಂದು ಸಂಜೆ 4ಗಂಟೆಗೆ ಇವರ ಮಗಳು ಶಾಲೆ ಬಿಟ್ಟು ಮನೆಗೆ ಬಂದು ನೋಡಿದಾಗ ಈ ಕಳವು ಪ್ರಕರಣ ಬೆಳಕಿಗೆ ಬಂದಿದೆ.

ಈ ಬಗ್ಗೆ ಕುಂದಾಪುರ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.