ಬೆನ್ನುಮೂಳೆ ಚಿಕಿತ್ಸೆಗಾಗಿ ಸ್ಪೈನ್ಯಾಕ್ ತಂತ್ರಜ್ಞಾನ ಬಿಡುಗಡೆ

ಮಣಿಪಾಲ, ನ.30: ಸಂಕೀರ್ಣವಾದ ಬೆನ್ನುಮೂಳೆಗೆ ಸಂಬಂಧಿಸಿದ ರೋಗಗಳ ತಪಾಸಣೆ ಹಾಗೂ ನಿರ್ವಹಣೆಗಾಗಿ ಮಣಿಪಾಲದ ಎಂಐಟಿ, ಕೆಎಂಸಿ ಹಾಗೂ ಇತರ ಸಂಸ್ಥೆಗಳು ಅಭಿವೃದ್ಧಿ ಪಡಿಸಿದ ‘ಸ್ಪೈನ್ಯಾಕ್’ ತಂತ್ರಜ್ಞಾನವನ್ನು ಮಣಿಪಾಲ ಅಕಾಡೆಮಿ ಆಫ್ ಹೈಯರ್ ಎಜ್ಯುಕೇಷನ್ (ಮಾಹೆ) ಪ್ರೊ ಚಾನ್ಸಲರ್ ಡಾ.ಎಚ್.ಎಸ್.ಬಲ್ಲಾಳ್ ಬಿಡುಗಡೆ ಗೊಳಿಸಿದರು.

ಸ್ಪೈನ್ಯಾಕ್ ತಂತ್ರಜ್ಞಾನವನ್ನು ಮಣಿಪಾಲ ಎಂಯುಟಿಬಿಐ ಇನ್‌ಕ್ಯುಬೇಟರ್ ಸಹಕಾರದಲ್ಲಿ ಕುಮುದಾ ಹೆಲ್ತ್‌ಟೆಕ್ ಪ್ರೈವೆಟ್ ಲಿ., ಎಂಐಟಿ ಮಣಿಪಾಲ ಹಾಗೂ ಮಣಿಪಾಲ ಕೆಎಂಸಿಯ ಮೂಳೆ ವಿಭಾಗ (ಅಥೋಪೆಡಿಕ್ಸ್)ಗಳು ಸಂಯುಕ್ತವಾಗಿ ಅಭಿವೃದ್ಧಿ ಪಡಿಸಿವೆ. 3ಡಿ ತಂತ್ರಜ್ಞಾನದ ಇದು ಅತೀ ಕಡಿಮೆ ವೆಚ್ಚದಲ್ಲಿ ಬೆನ್ನುಮೂಳೆಗೆ ಸಂಬಂಧಿಸಿದ ವಿವಿಧ ರೋಗಿಗಳಿಗೆ ಲಭ್ಯವಾಗುತ್ತದೆ ಎಂದವರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.

ಸ್ಪೈನೆಕ್ಸ್ ತಂತ್ರಜ್ಞಾನ ಅಭಿವೃದ್ಧಿ ಪಡಿಸಿರುವುದರಿಂದ ಇನ್ನು ಮುಂದೆ ಬೆನ್ನುಮೂಳೆ ಚಿಕಿತ್ಸೆ ಅಗತ್ಯವಿರುವ ರೋಗಿಗಳು ಅತಿ ಹೆಚ್ಚು ರೇಡಿಯೇಷನ್‌ನ ಅಪಾಯವಿರುವ ಸಿಟಿ ಸ್ಕಾನ್ ಹಾಗೂ ಅತೀ ವೆಚ್ಚದಾಯಕವಾದ ಎಂಆರ್‌ಐ ಸ್ಕಾನ್‌ನ ಅಗತ್ಯವಿಲ್ಲದೇ ಕೇವಲ ಎಕ್ಸರೇಯಿಂದ ತಪಾಸಣೆಗೊಳಗಾಗಿ, ಹೆಚ್ಚಿನ ವೆಚ್ಚವಿಲ್ಲದೇ ಚಿಕಿತ್ಸೆಯನ್ನೂ ಪಡೆಯಲು ಸಾಧ್ಯ ಎಂದು ಅವರು ಹೇಳಿದರು.

ಬೆನ್ನುಮೂಳೆಗೆ ಸಂಬಂಧಿಸಿದ ರೋಗಗಳಲ್ಲಿ ಸ್ಕೋಲಿಯೋಸಿಸ್ ಕೂಡಾ ಒಂದಾಗಿದ್ದು, ಇದರಲ್ಲಿ ಬೆನ್ನುಮೂಳೆ ತಿರುಚುವಿಕೆ ಕಂಡುಬರುತ್ತದೆ. ಸದ್ಯಕ್ಕೆ ಇದನ್ನು ಎಕ್ಸರೇ ಮೂಲಕ ಇದರ ತಪಾಸಣೆ ನಡೆಯುತಿದ್ದು, ಈ ರೋಗ 3ಡಿಯಲ್ಲಿರುವ ಕಾರಣ, ಎಕ್ಸರೇಯಿಂದ ಪೂರ್ಣಪ್ರಮಾಣದ ತಪಾಸಣೆ ಸಾಧ್ಯ ವಾಗುವುದಿಲ್ಲ. ಸಿಟಿ ಸ್ಕಾನ್ ಹಾಗೂ ಎಂಆರ್‌ಐ ಸ್ಕಾನ್‌ನಿಂದ ಪ್ರತಿಕೂಲ ಪರಿಣಾಮ ಜಾಸ್ತಿ. ಹೀಗಾಗಿ ‘ಸ್ಪೈನ್ಯಾಕ್’ ತಂತ್ರಜ್ಞಾನ ಬಳಸಿದರೆ ಈಗಾಗಲೇ ಬಳಸಿದ ಎಕ್ಸರೇಯನ್ನು ಉಪಯೋಗಿಸಿ ಬೆನ್ನುಮೂಳೆಯ ಮೂರು ಆಯಾಮದ ಚಿತ್ರಣ (3ಡಿ) ಪಡೆಯಬಹುದು. ಇದರಿಂದ ಈಗಿನ ಚಿಕಿತ್ಸೆಯ ಹತ್ತನೇ ಒಂದರಷ್ಟು ಖರ್ಚು ಮಾತ್ರ ಬರುತ್ತದೆ ಎಂದು ಕೆಎಂಸಿಯ ಅಥೋಪೆಡಿಕ್ಸ್ ವಿಭಾಗದ ಮುಖ್ಯಸ್ಥ ಡಾ.ಎನ್.ಶ್ಯಾಮಸುಂದರ್ ಭಟ್ ತಿಳಿಸಿದರು.

ಈ ವಿಶಿಷ್ಟ ತಂತ್ರಜ್ಞಾನವನ್ನು ಎಂಐಟಿ ಇ ಎಂಡ್ ಸಿ ವಿಭಾಗದ ಡಾ.ಸಂಪತ್ ಕುಮಾರ್, ಕಂಪ್ಯೂಟರ್ ಅಪ್ಲಿಕೇಷನ್ ವಿಭಾಗದ ಡಾ.ಹರೀಶ್ ಕೆ.ಎಸ್., ಡಾ. ಶ್ಯಾಮಸುಂದರ್ ಭಟ್ ಅವರು ಅಭಿವೃದ್ಧಿ ಪಡಿಸಿದ್ದಾರೆ. ಡಾ.ಸಂಪತ್‌ಕುಮಾರ್ ಹಾಗೂ ಡಾ.ಹರೀಶ್ ಅವರನ್ನೊಳಗೊಂಡ ಕುಮುದಾ ಹೆಲ್ತ್‌ಟೆಕ್ ಸಂಸ್ಥೆ ಈ ತಂತ್ರಜ್ಞಾನದ ಪೇಟೆಂಟ್ ಹೊಂದಿದೆ. ಮಣಿಪಾಲ ಕೆಎಂಸಿಯಲ್ಲಿ ಈ ಚಿಕಿತ್ಸೆ ಶೇ.50ರಷ್ಟು ರಿಯಾಯಿತಿ ಬೆಲೆಯಲ್ಲಿ ದೊರೆಯಲಿದೆ ಎಂದು ಡಾ.ಸಂಪತ್‌ಕುಮಾರ್ ಹಾಗೂ ಡಾ.ಹರೀಶ್ ತಿಳಿಸಿದರು.

ಮಾಹೆ ರಿಜಿಸ್ಟ್ರಾರ್ ಡಾ.ನಾರಾಯಣ ಸಭಾಹಿತ್, ಪ್ರೊ ವೈಸ್‌ಚಾನ್ಸಲರ್ ಡಾ.ಪಿಎಲ್‌ಎನ್‌ಜಿ ರಾವ್, ಎಂಐಟಿ ನಿರ್ದೇಶಕ ಡಾ.ಶ್ರೀಕಾಂತ್ ರಾವ್ ಸುದ್ದಿಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.