ಪೊಲೀಸ್ ಸರ್ಪಗಾವಲಿನಲ್ಲಿ ನಡೆದ ಶೋಭಾಯಾತ್ರೆ: ಸಂಚಾರಿ ನಿಯಮಗಳಿಗೆ ಕ್ಯಾರೆ ಅನ್ನದ ಕಾರ್ಯಕರ್ತರು

ಚಿಕ್ಕಮಗಳೂರು, ಡಿ.20: ದತ್ತಜಯಂತಿ ಅಂಗವಾಗಿ ವಿಶ್ವಹಿಂದೂ ಪರಿಷದ್, ಬಜರಂಗದಳ ಸಂಘಟನೆಗಳ ವತಿಯಿಂದ ನಗರದಲ್ಲಿ ಬುಧವಾರ ಹಮ್ಮಿಕೊಂಡಿದ್ದ ಶೋಭಾಯಾತ್ರೆ ಪೊಲೀಸರ ಸರ್ಪಗಾವಲಿನಲ್ಲಿ ಶಾಂತಿಯುತವಾಗಿ ನಡೆಯಿತು.

ಬುಧವಾರ ಸಂಜೆ ವೇಳೆ ನಗರದ ಬಸವನಹಳ್ಳಿ ರಸ್ತೆಯಲ್ಲಿನ ಕಾಮಧೇನು ದೇವಾಲಯದ ಆವರಣದಲ್ಲಿ ಸಚಿವ ಸಿ.ಟಿ.ರವಿ, ಜಿಪಂ ಅಧ್ಯಕ್ಷೆ ಸುಜಾತಾ ಕೃಷ್ಣಪ್ಪ, ಸದಸ್ಯರಾದ ಜಸಿಂತಾ, ಸೋಮಶೇಖರ್, ವಿಜಯ್‍ಕುಮಾರ್, ಬಿಜೆಪಿ ಮುಖಂಡರಾದ ತಮ್ಮಯ್ಯ, ಕೋಟೆ ರಂಗನಾಥ್, ಕೋಟೆ ರಂಗನಾಥ್, ಬೆಳವಾಡಿ ರವೀಂದ್ರ, ಮುಖಂಡರಾದ ಪ್ರೇಮ್‍ ಕುಮಾರ್, ವರಸಿದ್ದಿ ವೇಣುಗೋಪಾಲ್ ಸೇರಿದಂತೆ ವಿಎಚ್‍ಪಿ, ಬಜರಂಗದಳದ ನೂರಾರು ಮುಖಂಡರು ಸಾಮೂಹಿಕ ಪೂಜೆ ಸಲ್ಲಿಸುವ ಮೂಲಕ ಶೋಭಾಯಾತ್ರೆಗೆ ಚಾಲನೆ ನೀಡಲಾಯಿತು.

ಈ ವೇಳೆ ದೇವಾಲಯದ ಆವರಣದಿಂದ ಹೊರಟ ದತ್ತಮಾಲಾಧಾರಿಗಳು ಸಂಘಪರಿವಾರದ ಕಾರ್ಯಕರ್ತರು ಡಿಜೆ ಸಂಗೀತ, ಭಜನೆಗೆ ಹೆಜ್ಜೆ ಹಾಕುತ್ತಾ ನಗರದ ಎಂಜಿ ರಸ್ತೆ ಮೂಲಕ ಆಝಾದ್ ಪಾರ್ಕ್ ವೃತ್ತದವರೆಗೆ ಶೋಭಾಯಾತ್ರೆ ನಡೆಸಿದರು. ಶೋಭಾಯಾತ್ರೆಯುದ್ದಕ್ಕೂ ಸಂಘಪರಿವಾರದ ಕಾರ್ಯಕರ್ತರು ಗುರುದತ್ತಾತ್ರೇಯ ಬಾಬಾಬುಡನ್ ಹಿಂದುಗಳಿಗೆ ಸೇರಬೇಕೆಂಬ ಘೋಷಣೆಗಳನ್ನು ಕೂಗಿದರು. ಶೋಭಾಯಾತ್ರೆಯ ಬಳಿಕ ಕಾರ್ಯಕರ್ತರು, ಮುಖಂಡರು ಆಝಾದ್ ಪಾರ್ಕ್ ವೃತ್ತದಲ್ಲಿ ನಡೆದ ಬಹಿರಂಗ ಸಭೆಯಲ್ಲಿ ಪಾಲ್ಗೊಂಡರು.

ಶೋಭಾಯಾತ್ರೆ ಹಿನ್ನೆಲೆಯಲ್ಲಿ ಅಹಿತಕರ ಘಟನೆಗಳನ್ನು ಹತ್ತಿಕುವ ಉದ್ದೇಶದಿಂದ ಇಡೀ ನಗರದಲ್ಲಿ ಖಾಕಿ ಸರ್ಪಗಾವಲನ್ನು ಹಾಕಲಾಗಿತ್ತು. ಐಜಿ ರಸ್ತೆ, ಎಂ.ಜಿ ರಸ್ತೆಗಳ ಉದ್ದಕ್ಕೂ ಎರಡೂ ಬದಿಗಳಲ್ಲಿ ಪೊಲೀಸ್ ಹಾಗೂ ಗೃಹ ರಕ್ಷಕದಳದ ಸಿಬ್ಬಂದಿಯನ್ನು ಭದ್ರತೆಗೆ ನಿಯೋಜಿಸಲಾಗಿತ್ತು. ಪೊಲೀಸರ ಬಿಗಿ ಭದ್ರತೆಯಲ್ಲಿ ಸಂಜೆ 4ಕ್ಕೆ ಆರಂಭವಾದ ಶೋಭಾಯಾತ್ರೆ ಆಝಾದ್ ಪಾರ್ಕ್ ತಲುಪುವಷ್ಟರಲ್ಲಿ 7 ಗಂಟೆಯಾಗಿತ್ತು. ಶೋಭಾಯಾತ್ರೆ ಹಿನ್ನೆಲೆಯಲ್ಲಿ ಎಂಜಿ ರಸ್ತೆಯಲ್ಲಿ ಅಂಗಡಿ ಮುಂಗಟ್ಟುಗಳನ್ನು ಬಂದ್ ಮಾಡಲು ಜಿಲ್ಲಾಧಿಕಾರಿ ಆದೇಶ ನೀಡಿದ್ದ ಹಿನ್ನೆಲೆಯಲ್ಲಿ ಬಹುತೇಕ ಅಂಗಡಿ ಮುಂಗಟ್ಟುಗಳು ಬಂದ್ ಆಗಿದ್ದವು. ಮಧ್ಯಾಹ್ನದ ಬಳಿಕ ಎಂಜಿ ರಸ್ತೆಯಲ್ಲಿ ವಾಹನಗಳ ಪಾರ್ಕಿಂಗ್ ಅನ್ನೂ ನಿಷೇಧಿಸಲಾಗಿತ್ತು. 

ಡಿ.10ರಿಂದ 12ವರೆಗೆ ನಡೆಯುವ ದತ್ತಜಯಂತಿ ಕಾರ್ಯಕ್ರಮಗಳ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತ ಹಾಗೂ ಜಿಲ್ಲಾ ಪೊಲೀಸ್ ಇಲಾಖೆ ಜಿಲ್ಲಾದ್ಯಂತ 5500 ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಿದ್ದು, ಆಯಕಟ್ಟಿನ ಪ್ರದೇಶಗಳಲ್ಲಿ ಚೆಕ್‍ಪೋಸ್ಟ್ ಗಳನ್ನು ನಿರ್ಮಿಸುವ ಮೂಲಕ ಹೊರ ಜಿಲ್ಲೆಗಳಿಂದ ಆಗಮಿಸುವ ವಾಹನಗಳನ್ನು ತಪಾಸಣೆಗೊಳಪಡಿಸುತ್ತಿದ್ದ ದೃಶ್ಯಗಳು ಸಾಮಾನ್ಯವಾಗಿದ್ದವು. ಜಿಲ್ಲೆಯಾದ್ಯಂತ ಎಲ್ಲ ಮಂದಿರ, ಮಸೀದಿ, ದೇವಾಲಯಗಳಿಗೂ ಪೊಲೀಸರ ಭದ್ರತೆಯನ್ನು ಒದಗಿಸಲಾಗಿದ್ದು, ಬಾಬಾ ಬುಡನ್‍ಗಿರಿ ಸೇರಿದಂತೆ ಸುತ್ತಮುತ್ತಲೂ ಪೊಲೀಸರ ಸರ್ಪಗಾವಲು ಹಾಕಲಾಗಿದೆ. ಜಿಲ್ಲಾಡಳಿತದ ಕಟ್ಟುನಿಟ್ಟಿನ ಕ್ರಮದಿಂದಾಗಿ ಮಂಗಳವಾರ ಹಾಗೂ ಬುಧವಾರ ನಡೆದ ಸಂಕೀರ್ತನಾ ಯಾತ್ರೆ, ಶೋಭಾಯಾತ್ರೆಗಳು ಶಾಂತಿಯುತವಾಗಿ ಸಮಾಪ್ತಿಯಾಗಿದ್ದು, ಗುರುವಾರ ಜಿಲ್ಲಾಡಳಿತದ ವತಿಯಿಂದ ಬಾಬಾಬುಡನ್‍ಗಿರಿ ದರ್ಗಾದಲ್ಲಿ ದತ್ತಜಯಂತಿ ಕಾರ್ಯಕ್ರಮ ನಡೆಯಲಿದೆ.

ಸಂಚಾರ ನಿಯಮಗಳಿಗೆ ಕಿಮ್ಮತ್ತು ನೀಡದ ಕಾರ್ಯಕರ್ತರು

ಬುಧವಾರ ನಗರದಲ್ಲಿ ಹಮ್ಮಿಕೊಂಡಿದ್ದ ಶೋಭಾಯಾತ್ರೆಯಲ್ಲಿ ಭಾಗವಹಿಸಲು ಜಿಲ್ಲೆಯ ವಿವಿಧ ಪಟ್ಟಣ, ಗ್ರಾಮಗಳಿಂದ ಬೈಕ್‍ಗಳಲ್ಲಿ ಆಗಮಿಸಿದ್ದ ಪರಿವಾರದ ಕಾರ್ಯಕರ್ತರು ಬುಧವಾರ ಬೆಳಗ್ಗೆಯಿಂದಲೇ ನಗರದ ಪ್ರಮುಖ ರಸ್ತೆಗಳಲ್ಲಿ ಬೈಕ್‍ಗಳಲ್ಲಿ ಹೆಲ್ಮೆಟ್ ಇಲ್ಲದೇ ಅಡ್ಡಾಡಲಾರಂಭಿಸಿದ್ದರು. ಈ ವೇಳೆ ನಗರದಲ್ಲಿ ಹೆಜ್ಜೆ ಹೆಜ್ಜೆಗೂ ಸಂಚಾರ ದಟ್ಟಣೆ ನಿಯಂತ್ರಿಸಲು ನಿಯೋಜನೆಗೊಂಡಿದ್ದ ಸಿಬ್ಬಂದಿ ಸಂಚಾರಿ ನಿಯಮಗಳ ಉಲ್ಲಂಘನೆಯನ್ನು ಕಂಡೂ ಕಾಣದಂತೆ ನೋಡುತ್ತಾ ನಿಂತಿದ್ದ ದೃಶ್ಯಗಳು ಕಂಡು ಬಂತು. ಒಂದೇ ಬೈಕ್‍ನಲ್ಲಿ ಹೆಲ್ಮೆಟ್ ಇಲ್ಲದೇ ಮೂರು, ಮೂರು ಮಂದಿ ಕುಳಿತು ಕರ್ಕಶ ಶಬ್ಧ ಮಾಡುತ್ತಾ ತಿರುಗಾಡುತ್ತಿದ್ದರು. ಇದನ್ನು ಗಮನಿಸಿದ ಕೆಲ ನಾಗರಿಕರು ಬಾಕಿ ದಿನಗಳಲ್ಲಿ ಸುಖಾಸುಮ್ಮನೆ ಹೆಲ್ಮೆಟ್ ಹಾಕಿದ್ದರೂ ಸವಾರರನ್ನು ಅಡ್ಡಹಾಕಿ ಸಂಚಾರಿ ನಿಯಮಗಳ ಉಲ್ಲಂಘನೆ ಎಂದು ದಂಡ ಹಾಕುವ ಪೊಲೀಸರು ಶೋಭಾಯಾತ್ರೆಯಂದು ಯುವಕರು ಎಲ್ಲೆಡೆ ಸಂಚಾರಿ ನಿಯಮಗಳನ್ನು ಉಲ್ಲಂಘಿಸಿದರೂ ಮೌನಕ್ಕೆ ಶರಣಾಗಿರುವ ಉದ್ದೇಶವಾದರೂ ಏನು? ಸಚಿವ ಸಿ.ಟಿ.ರವಿ ಅಥವಾ ಬಿಜೆಪಿ ಸರಕಾರದಿಂದ ಜಿಲ್ಲಾ ಪೊಲೀಸ್ ಇಲಾಖೆಗೆ ಕ್ರಮಕೈಗೊಳ್ಳದಿರುವಂತೆ ಸೂಚನೆ ಬಂದಿತ್ತೆ ಎಂದು ಪ್ರಶ್ನಿಸುತ್ತಾ, ಪೊಲೀಸರ ಕಾರ್ಯವೈಖರಿ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸುತ್ತಿದ್ದುದು ಕೇಳಿ ಬಂತು.

ಜಿಲ್ಲಾಧಿಕಾರಿ ಕಚೇರಿ ಸಿಬ್ಬಂದಿಗೆ ಜಾಲಿ ಟ್ರಿಪ್: 
ನಗರದ ಜಿಲ್ಲಾಧಿಕಾರಿ ಕಚೇರಿಯ ಬಹುತೇಕ ಸಿಬ್ಬಂದಿ ಸರಕಾರದ, ಸಾರ್ವಜನಿಕರ ಕೆಲಸ ಬಿಟ್ಟು, ಕರ್ತವ್ಯಕ್ಕೆ ರಜೆಯನ್ನೂ ಹಾಕದೇ ಬಾಬಾಬುಡನ್‍ಗಿರಿಗೆ ಟ್ರಿಪ್‍ಗೆ ಹೋದ ಘಟನೆ ನಡೆದಿದೆ. ಬುಧವಾರ ಬೆಳಗ್ಗೆ ಜಿಲ್ಲಾಧಿಕಾರಿ ಕಚೇರಿಗೆ ಕರ್ತವ್ಯಕ್ಕೆ ಹಾಜರಾಗಿದ್ದ ಬಹುತೇಕ ಸಿಬ್ಬಂದಿ ಸರಕಾರದ ವಿವಿಧ ಇಲಾಖೆಗಳ ವಾಹನಗಳಲ್ಲಿ ತಂಡೋಪತಂಡವಾಗಿ ಬಾಬಾಬುಡನ್‍ಗಿರಿಗೆ ಟ್ರಿಪ್‍ಗೆ ತೆರಳುತ್ತಿದ್ದ ದೃಶ್ಯ ಕಂಡು ಬಂತು. ಈ ಸಂಬಂಧ ಕಚೇರಿಯ ಸಿಬ್ಬಂದಿಯೊಬ್ಬರನ್ನು ವಿಚಾರಿಸಿದಾಗ ಎಡಿಸಿ ಸೂಚನೆ ಮೇರೆಗೆ ಸಿಬ್ಬಂದಿ ಗಿರಿಗೆ ಹೋಗುತ್ತಿದ್ದಾರೆ. ಜಿಲ್ಲಾಧಿಕಾರಿ ಕಚೇರಿಯಲ್ಲಿದ್ದರೂ ಅನೇಕ ಸಿಬ್ಬಂದಿ ಗಿರಿಯನ್ನು ನೋಡಿಲ್ಲ. ಆದ್ದರಿಂದ ಕೆಲ ಸಿಬ್ಬಂದಿಯನ್ನು ಗಿರಿಗೆ ಕರೆದುಕೊಂಡು ಹೋಗಲು ಎಡಿಸಿ ಸೂಚಿಸಿದ್ದಾರೆಂದು ಮಾಹಿತಿ ನೀಡಿದರು. ಆದರೆ ಜಿಲ್ಲಾಧಿಕಾರಿ ಕಚೇರಿ ಸಿಬ್ಬಂದಿ ಸರಕಾರದ, ಸಾರ್ವಜನಿಕರ ಕೆಲಸ ಕಾರ್ಯ ಬಿಟ್ಟು ಗಿರಿಗೆ ಜಾಲಿ ಟ್ರಿಪ್‍ಗೆ ಹೋಗಿದ್ದನ್ನು ಕೆಲ ಸಾರ್ವಜನಿಕರು ಖಂಡಿಸಿದ್ದು, ಸರಕಾರದ ಕೆಲಸದ ಅವಧಿಯಲ್ಲಿ ಜಿಲ್ಲಾಧಿಕಾರಿ ಕಚೇರಿ ಸಿಬ್ಬಂದಿ ಹೀಗೆ ಕರ್ತವ್ಯ ಮೊಟಕುಗೊಳಿಸಿದ ಟ್ರಿಪ್‍ಗೆ ಹೋಗಲು ಕಾನೂನಿನಲ್ಲಿ ಅವಕಾಶವಿದೆಯೇ? ಗಿರಿಯನ್ನು ನೋಡುವ ಆಸೆ ಇದ್ದವರು ರಜೆ ದಿನಗಳಂದು ಹೋಗಿಬರಲಿ, ಕರ್ತವ್ಯದ ವೇಳೆಯಲ್ಲಿ ಹೋಗಲು ಅವಕಾಶವಿದೆಯೇ ಎಂಬುದನ್ನು ಜಿಲ್ಲಾಧಿಕಾರಿಯೇ ಸ್ಪಷ್ಟಪಡಿಸಬೇಕೆಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.