ಸಂಸ್ಕಾರಯುತ ಶಿಕ್ಷಣದಿಂದ ಮಾತ್ರ ಜೀವನದ ಗುರಿ ಮುಟ್ಟಲು ಸಾಧ್ಯ: ಶ್ರೀ ಧರ್ಮಪಾಲನಾಥ ಸ್ವಾಮೀಜಿ

ಉಪ್ಪಿನಂಗಡಿ: ಶಿಕ್ಷಣವೆನ್ನುವುದು ಮನುಷ್ಯ ಮನುಷ್ಯತ್ವನ್ನು ಅರ್ಥಮಾಡಿಕೊಳ್ಳುವಂತಹ, ಪರಸ್ಪರ ಮನಸ್ಸುಗಳನ್ನು ಬೆಸೆಯು ವಂತಹ ಗುಣಗಳನ್ನು ಕಲಿಸಬೇಕು. ಅಂತಹ ಶಿಕ್ಷಣ ಪಡೆದವ ಮಾತ್ರ ತನ್ನತನವನ್ನು ಉಳಿಸಿಕೊಂಡು ಜೀವನದ ಗುರಿಯನ್ನು ಮುಟ್ಟಲು ಸಾಧ್ಯ ಎಂದು ಶ್ರೀ ಆದಿಚುಂಚನಗಿರಿ ಮಹಾ ಸಂಸ್ಥಾನದ ಮಂಗಳೂರು ಶಾಖಾ ಮಠದ ಶ್ರೀ ಧರ್ಮಪಾಲನಾಥ ಸ್ವಾಮೀಜಿ ತಿಳಿಸಿದರು.

ಶ್ರೀ ಆದಿಚುಂಚನಗಿರಿ ಶಿಕ್ಷಣ ಟ್ರಸ್ಟ್ ನ ಅಧೀನಕ್ಕೊಳಪಟ್ಟ ಉಪ್ಪಿನಂಗಡಿಯ ಪೆರಿಯಡ್ಕದ ಸರ್ವೋದಯ ಪ್ರೌಢಶಾಲೆಯಲ್ಲಿ ಶುಕ್ರವಾರ ರಾತ್ರಿ ನಡೆದ `ಬಿಜಿಎಸ್ ಚುಂಚಾದ್ರಿ ಕಲೋತ್ಸವ- 2019' ಕಾರ್ಯಕ್ರಮದಲ್ಲಿ ಅವರು ಆಶೀರ್ವಚನ ನೀಡುತ್ತಿದ್ದರು.

ಒಡಹುಟ್ಟಿದವರನ್ನು, ಗುರು- ಹಿರಿಯರನ್ನು ಗುರುತಿಸುವ, ಅವರಿಗೆ ಗೌರವ ಕೊಡುವ ಮನೋಭಾವ ನಮ್ಮದಾಗಬೇಕು. ಸಂಸ್ಕಾರಯುತ ಶಿಕ್ಷಣ ದೊರಕಿದಾಗ ಮಾತ್ರ ಇದು ಸಾಧ್ಯ. ಸಂಸ್ಕಾರವಿಲ್ಲದ ಶಿಕ್ಷಣ ಪಡೆದವ ಸಮಾಜದಲ್ಲಿಯೂ ಅಸಂಸ್ಕೃತನಾಗುತ್ತಾನೆ. ಆದ್ದರಿಂದ ತಂದೆ- ತಾಯಿ, ಗುರುಗಳು ಸಂಸ್ಕಾರಯುತ ಮೌಲ್ಯಗಳನ್ನು ಮಕ್ಕಳಿಗೆ ಬೋಧಿಸಬೇಕು. ಆಗ ಮಾತ್ರ ಆತ ಜೀವನದಲ್ಲಿ ಯಶಸ್ಸು ಪಡೆದು, ಸಮಾಜದಲ್ಲಿ ಸತ್ಪ್ರಜೆಯಾಗಲು ಸಾಧ್ಯ ಎಂದರು.

ಶ್ರೀ ಆದಿಚುಂಚನಗಿರಿ ಮಹಾಸಂಸ್ಥಾನದ ಶೃಂಗೇರಿ ಶಾಖಾ ಮಠದ ಶ್ರೀ ಗುಣನಾಥ ಸ್ವಾಮೀಜಿ ಆಶೀರ್ವಚನ ನೀಡಿ, ಶಿಕ್ಷಣವು ಭೌತಿಕ ಸಂಪತ್ತಾಗಬಾರದು. ಅದು ನಮ್ಮಲ್ಲಿ ನೈತಿಕ ಸಂಪತ್ತನ್ನು ಬೆಳೆಸುವಂತಿರಬೇಕು. ಮನುಷ್ಯನೆನ್ನುವುದು ಕಾರ್ಯ ಚೀಲವಿದ್ದಂತೆ ಅದಕ್ಕೆ ಉತ್ತಮ ಅಂಶಗಳನ್ನು ತುಂಬಿದರೆ ಮಾತ್ರ ಆತನೂ ಉತ್ತಮನಾಗಲು ಸಾಧ್ಯ. ಅದರೊಳಗೆ ಕೆಟ್ಟ ಅಂಶ ಗಳನ್ನು ತುಂಬಿಸಿದರೆ ಅಂತಹವನು ಸಮಾಜಘಾತುಕನಾಗುತ್ತಾನೆ. ಆದ್ದರಿಂದ ಶಿಕ್ಷಣದ ಮೂಲಕ ಮಕ್ಕಳ ಮನಸ್ಸಲ್ಲಿ ಉತ್ತಮ ಅಂಶಗಳನ್ನು ತುಂಬಿಸುವ ಕಾರ್ಯವಾಗಬೇಕು. ಸಂಸ್ಕಾರಯುತ ಶಿಕ್ಷಣದ ಮೂಲಕ ಇಂತಹ ಕೆಲಸ ಶ್ರೀ ಆದಿಚುಂಚನಗಿರಿ ಶಿಕ್ಷಣ ಸಂಸ್ಥೆಗಳಲ್ಲಿ ನಡೆಯುತ್ತದೆ ಎಂದರು.

ದ.ಕ. ಜಿಲ್ಲಾ ಸಹಕಾರ ಸಂಘಗಳ ಉಪನಿಬಂಧಕ ಪ್ರವೀಣ್ ಬಿ. ನಾಯಕ್ ಮಾತನಾಡಿ, ಜೀವನದಲ್ಲಿ ಸಾಧನೆ ಮಾಡಲು ಲಕ್‍ಗಿಂತಲೂ ಶ್ರಮ ಮುಖ್ಯ. ನಾವು ಪಡುವ ಪರಿಶ್ರಮವೇ ಜೀವನದ ಯಶಸ್ಸಿನ ಮೆಟ್ಟಿಲುಗಳಾಗುತ್ತದೆ. ಮಾತೃಭಾಷೆಯ ಬಗ್ಗೆ ತಾತ್ಸಾರ ಬೇಡ. ಸಾಧಕರಲ್ಲಿ ಅನೇಕರು ಮಾತೃ ಭಾಷೆಯಲ್ಲಿ ಶಿಕ್ಷಣ ಪಡೆದವರೇ. ನಾವು ಕಾಣುವ ಕನಸು ಯಾವತ್ತೂ ದೊಡ್ಡ ದಿರಬೇಕು. ಶಿಕ್ಷಣದ ಶಕ್ತಿಯನ್ನು ಉತ್ತಮವಾಗಿ ಉಪಯೋಗಿಸಿಕೊಂಡಾಗ ಮಾತ್ರ ನಾವು ಸಮಾಜದ ದೊಡ್ಡ ಸಂಪತ್ತಾಗಲು ಸಾಧ್ಯ ಎಂದರು.

ಮಂಗಳೂರು ಬಿಜಿಎಸ್ ವಿದ್ಯಾಸಂಸ್ಥೆಯ ವ್ಯವಸ್ಥಾಪಕ ಸುಬ್ಬಕಾರಡ್ಕ ಮಾತನಾಡಿ, ಪರಿಸರದ ವಾತಾವರಣಕ್ಕಿಂತ ಮನಸ್ಸಿನ ಸ್ಥಿತಿ ಮುಖ್ಯ. ಉತ್ತಮ ಯೋಚನೆಗಳು ಮಾತ್ರ ನಮ್ಮನ್ನು ಬೆಳೆಸಲು ಸಾಧ್ಯವಿದೆ ಎಂದರು.

ವೇದಿಕೆಯಲ್ಲಿ ಶಾಲಾ ಶಿಕ್ಷಕ- ರಕ್ಷಕ ಸಂಘದ ಅಧ್ಯಕ್ಷ ಮುಕುಂದ ಗೌಡ ಬಜತ್ತೂರು ಉಪಸ್ಥಿತರಿದ್ದರು. ಭೈರವೈಕ್ಯ ಜಗದ್ಗುರು ಶ್ರೀ ಡಾ. ಬಾಲಗಂಗಾಧರನಾಥ ಮಹಾಸ್ವಾಮೀಜಿಗಳವರ ಭಾವಚಿತ್ರಕ್ಕೆ ಆರತಿ ಬೆಳಗಿ ಪುಷ್ಪಾರ್ಚನೆ ಮಾಡುವ ಮೂಲಕ ಕಾರ್ಯ ಕ್ರಮ ಉದ್ಘಾಟಿಸಲಾಯಿತು. `ಉದಯ ರವಿ' ಸಂಚಿಕೆ ಬಿಡುಗಡೆಗೊಳಿಸಲಾಯಿತು. ಕಾರ್ಯಕ್ರಮದಲ್ಲಿ ಸರ್ವೋದಯ ಪ್ರೌಢಶಾಲಾ ಮಾಜಿ ಸಂಚಾಲಕ ಸುಂದರ ಗೌಡ, ಯಕ್ಷಗಾನ ತಂಡದ ಭಾಸ್ಕರ ಗೌಡ, ನಿವೃತ ಶಿಕ್ಷಕ ಶಿವಣ್ಣ ಗೌಡ ಬಿದಿರಾಡಿ, ದೇರಣ್ಣ ಗೌಡ ಅವರನ್ನು ಸನ್ಮಾನಿಸಿ, ಗೌರವಿಸಲಾಯಿತು.

ಕಾರ್ಯಕ್ರಮದಲ್ಲಿ ಪುತ್ತೂರು ಒಕ್ಕಲಿಗ ಗೌಡ ಸೇವಾ ಸಂಘದ ಗೌರವಾಧ್ಯಕ್ಷ ಚಿದಾನಂದ ಬೈಲಾಡಿ, ಒಕ್ಕಲಿಗ ಸ್ವಸಹಾಯ ಟ್ರಸ್ಟ್‍ನ ಮಾಜಿ ಅಧ್ಯಕ್ಷ ಎ.ವಿ. ನಾರಾಯಣ, ದ.ಕ. ಜಿಲ್ಲಾ ಪಂಚಾಯತ್ ಮಾಜಿ ಅಧ್ಯಕ್ಷೆ ಆಶಾ ತಿಮ್ಮಪ್ಪ ಗೌಡ, ತಾ.ಪಂ. ಸದಸ್ಯೆ ತೇಜಸ್ವಿನಿ ಕಟ್ಟಪುಣಿ, ಪ್ರಮುಖರಾದ ಸುರೇಶ್ ಅತ್ರಮಜಲು, ಲಕ್ಷ್ಮಣ ಗೌಡ ನೆಡ್ಚಿಲು, ಕೇಶವ ರಂಗಾಜೆ, ಉದಯ ಅತ್ರಮಜಲು, ಗುಮ್ಮಣ್ಣ ಗೌಡ, ರಾಮಚಂದ್ರ ಮಣಿಯಾಣಿ, ಮಹಾಲಿಂಗೇಶ್ವರ ಭಟ್, ತಮ್ಮಯ್ಯ ಗೌಡ, ಕಾಂತಪ್ಪ ಗೌಡ ಕೊರಂಬಾಡಿ, ರಾಘವ ಗೌಡ ಕೊರಂಬಾಡಿ, ಪುರುಷೋತ್ತಮ ಮುಂಗ್ಲಿಮನೆ, ವಿಶ್ವನಾಥ ಗೌಡ ಪಿಜಕ್ಕಳ ಮತ್ತಿತರರು ಉಪಸ್ಥಿತರಿದ್ದರು.

ಶಾಲಾ ಪರಿವೀಕ್ಷಕ ದುಗ್ಗಪ್ಪ ಗೌಡ ಸ್ವಾಗತಿಸಿದರು. ಮುಖ್ಯೋಪಾಧ್ಯಾಯಿನಿ ಶಕುಂತಳಾ ವರದಿ ವಾಚಿಸಿದರು. ಶಿಕ್ಷಕಿ ರಮ್ಯ ಎ.ಜೆ. ವಂದಿಸಿದರು. ಶಿಕ್ಷಕರಾದ ಲಕ್ಷ್ಮೀರಾಮ್ ಪಿ. ಹಾಗೂ ಇತರರು ಸಹಕರಿಸಿದರು. ವಿದ್ಯಾರ್ಥಿಗಳಾದ ದೀಕ್ಷಿತ್ ಆರ್.ಡಿ., ಹರ್ಷಿತ್ ಬಿ.ಎಸ್. ಕಾರ್ಯಕ್ರಮ ನಿರೂಪಿಸಿದರು.

ವಿದ್ಯಾರ್ಥಿಗಳು `ತುಳುನಾಡ ಐಸಿರಿ' ಕಾರ್ಯಕ್ರಮದಲ್ಲಿ ತುಳುನಾಡಿನ ವೈಭವವನ್ನು ಅನಾವರಣಗೊಳಿಸಿದರು. ನಾಡಿನ ಸಂಸ್ಕøತಿಯನ್ನು ಬಿಂಬಿಸುವ ನೃತ್ಯ ರೂಪಕಗಳು ಹಾಗೂ ಬಾಲ ಕಲಾವಿದರಿಂದ ಯಕ್ಷಗಾನ ನಡೆಯಿತು.