ವಿಮಾ ಕಂಪನಿಗಳ ಕೇಂದ್ರ ಕಚೇರಿಯನ್ನು ಬೆಂಗಳೂರಿನಲ್ಲಿ ಸ್ಥಾಪಿಸಲು ಒತ್ತಾಯ
ಬೆಂಗಳೂರು, ಡಿ.30: ವಿಮಾ ಸಂಸ್ಥೆಗಳಾದ ನ್ಯಾಷನಲ್ ಇನ್ಸೂರೆನ್ಸ್, ಓರಿಯಂಟಲ್, ಯುನೈಟೆಡ್ ಇಂಡಿಯಾ ಇನ್ಸೂರೆನ್ಸ್ ಕಂಪನಿಗಳ ಕೇಂದ್ರ ಕಚೇರಿಯನ್ನು ಬೆಂಗಳೂರಿನಲ್ಲಿ ಸ್ಥಾಪಿಸಬೇಕು ಎಂದು ಪಬ್ಲಿಕ್ ಸೆಕ್ಟರ್ ಜನರಲ್ ಇನ್ಸೂರೆನ್ಸ್ ಆಫೀಸರ್ಸ್, ಎಂಪ್ಲಾಯ್ಸ್, ರಿಟೈರ್ಡ್, ಅಡ್ವೈಸರ್ಸ್ ಫೋರಂ ಒತ್ತಾಯಿಸಿದೆ.
ಸೋಮವಾರ ಪ್ರೆಸ್ಕ್ಲಬ್ನ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಫೋರಂನ ಪ್ರಧಾನ ಕಾರ್ಯದರ್ಶಿ ಎ. ಮುರುಳಿಧರ, ಈಗಾಗಲೇ ಈ ಮೂರು ನಷ್ಟ ಎದುರಿಸುತ್ತಿವೆ. ಹಾಗಾಗಿ ಕೇಂದ್ರ ಸ್ವಾಮ್ಯದ ಸಮಾನ್ಯ ವಿಮಾ ರಂಗದ ಈ ಮೂರು ಕಂಪನಿಗಳನ್ನು ವಿಲೀನಗೊಳಿಸಲು ಕೇಂದ್ರ ಸರಕಾರ ಚಿಂತನೆ ನಡೆಸಿದೆ. ಈ ಮೂರು ಕಂಪನಿಗಳನ್ನು ವಿಲೀನಿಗೊಳಿಸಿ, ಕಾರ್ಪೊರೇಷನ್ ರೂಪದಲ್ಲಿ ಬಲಪಡಿಸುವುದರ ಜೊತೆಗೆ ಇವುಗಳ ಕೇಂದ್ರ ಕಚೇರಿಯನ್ನು ಬೆಂಗಳೂರಿನಲ್ಲಿ ಸ್ಥಾಪಿಸಬೇಕು ಎಂದು ಒತ್ತಾಯಿಸಿದರು.
ಓರಿಯಂಟಲ್ ಇನ್ಸೂರೆನ್ಸ್ ಕಂಪನಿಯು ದೆಹಲಿಯಲ್ಲಿ ಮುಖ್ಯ ಕಚೇರಿಯನ್ನು ಹೊಂದಿದ್ದು, ನ್ಯಾಷನಲ್ ಇನ್ಸೂರೆನ್ಸ್ ಕಂಪನಿಯು ಕೊಲ್ಕತ್ತಾದಲ್ಲಿ ಹಾಗೂ ಯುನೆಟೈಡ್ ಇಂಡಿಯಾ ಇನ್ಸೂರೆನ್ಸ್ ಕಂಪನಿಯು ಚೆನೈನಿಂದ ಕಾರ್ಯನಿರ್ವಹಿಸುತ್ತದೆ. ಈಗಾಗಲೇ ಮುಂಬೈನಲ್ಲಿ ದಿ ನ್ಯೂ ಇಂಡಿಯಾ ಅಶ್ಯೂರೆನ್ಸ್ ಕಂಪನಿಯು ತನ್ನ ಮುಖ್ಯ ಕಚೇರಿಯಿಂದ ಕಾರ್ಯ ನಿರ್ವಹಿಸುತ್ತಿದೆ ಎಂದು ತಿಳಿಸಿದರು.
ಬೆಂಗಳೂರು ನಗರ ವ್ಯಾಪಾರೀಕರಣಕ್ಕೆ ಉತ್ತಮ ಸ್ಥಳವಾಗಿದೆ. ಪ್ರಪಂಚದಲ್ಲಿ 4ನೇ ದೊಡ್ಡ ಟೆಕ್ ಹಬ್ ಆಗಿ ಬೆಂಗಳೂರು ರೂಪಗೊಂಡಿರುವುದು ಮತ್ತು 2020ರ ವೇಳೆಗೆ ಪ್ರಪಂಚದ ನ.1 ಟೆಕ್ ಹಬ್ ಆಗಿ ಬೆಂಗಳೂರು ವಿಕಾಸಗೊಳ್ಳಲಿದೆ ಎಂದು ಅಂದಾಜಿಸಲಾಗಿದೆ. ಆದ್ದರಿಂದ ಈ ವಿಮಾ ಕಂಪನಿಯ ಕೇಂದ್ರ ಕಚೇರಿಯನ್ನು ಬೆಂಗಳೂರಿನಲ್ಲಿ ಸ್ಥಾಪಿಸಬೇಕು ಎಂದು ಮನವಿ ಮಾಡಿದರು.
