ಮೋದಿಯ ತಾಯಿ, ತಾತನ ಬಳಿ ಪೌರತ್ವ ದಾಖಲೆ ಇದೆಯೇ: ಝಮೀರ್ ಅಹ್ಮದ್ ಪ್ರಶ್ನೆ

ಬೆಂಗಳೂರು, ಜ.3: ಸಿಎಎ, ಎನ್‌ಆರ್‌ಸಿ ಪ್ರಕ್ರಿಯೆಯಿಂದ ತೊಂದರೆ ಇಲ್ಲ ಎನ್ನುವ ಪ್ರಧಾನಿ ನರೇಂದ್ರ ಮೋದಿ ಅವರ ತಾಯಿ, ತಾತನ(ಅಜ್ಜ) ಬಳಿ ಪೌರತ್ವ ದಾಖಲೆ ಇದೆಯೇ ಎಂದು ಮಾಜಿ ಸಚಿವ ಬಿ.ಝೆಡ್.ಝಮೀರ್ ಅಹ್ಮದ್ ಖಾನ್ ಪ್ರಶ್ನೆ ಮಾಡಿದರು.

ಶುಕ್ರವಾರ ನಗರದ ಚಾಮರಾಜಪೇಟೆಯ ಈದ್ಗಾ ಮೈದಾನದಲ್ಲಿ ಸಿಎಎ, ಎನ್‌ಆರ್‌ಸಿ ವಿರೋಧಿಸಿ ನಡೆದ ಪ್ರತಿಭಟನೆಯನ್ನುದ್ದೇಶಿಸಿ ಮಾತನಾಡಿದ ಅವರು, ಕೇಂದ್ರ ಸರಕಾರದ ಕಾಯ್ದೆಗಳ ವಿರುದ್ಧ ಯಾರು ಹೆದರುವ ಅಗತ್ಯ ಇಲ್ಲ ಎಂದರು.

ಚುನಾವಣೆ ವೇಳೆ ಪ್ರಧಾನಿ ಮೋದಿ ಅವರು ಮಾತು ಮಾತಿಗೂ ನಾನು ಚೌಕಿದಾರ್(ಕಾವಲುಗಾರ) ಎನ್ನುತ್ತಿದ್ದರು. ಆದರೆ, ಈಗ ಮನೆಯ ಮಾಲಕರಿಗೆ ನಿಮ್ಮ ದಾಖಲೆ ತೋರಿಸಿ ಎಂದು ಹೇಳುತ್ತಿದ್ದಾರೆ. ಹಳೇ ದಾಖಲೆ ಯಾರು ಇಟ್ಟುಕೊಳ್ಳಲು ಸಾಧ್ಯ ಎಂದು ಪ್ರಶ್ನಿಸಿದ ಅವರು, ಮೊದಲು ಅಮಿತ್ ಶಾ ಮತ್ತು ಪ್ರಧಾನಿ ನರೇಂದ್ರ ಮೋದಿ, ಅವರ ಕುಟುಂಬ ಸದಸ್ಯರ ದಾಖಲೆಗಳನ್ನು ಜನರ ಮುಂದೆ ಬಹಿರಂಗಪಡಿಸಲಿ ಎಂದು ಸವಾಲು ಹಾಕಿದರು.

ನರೇಂದ್ರ ಮೋದಿ ಪಾಕಿಸ್ತಾನದ ಪ್ರಧಾನಿ ಅಲ್ಲ, ಭಾರತದ ಪ್ರಧಾನಿ. ಈ ಬಗ್ಗೆ ಅವರಿಗೆ ಗಮನ ಇರಬೇಕು. ಪದೇ ಪದೇ ಪಾಕಿಸ್ತಾನದಲ್ಲಿ ದೌರ್ಜನ್ಯ ನಡೆಯುತ್ತಿದೆ ಎನ್ನುತ್ತಾರೆ. ಆದರೆ, ಉತ್ತರಪ್ರದೇಶ ಮತ್ತು ಕರ್ನಾಟಕದಲ್ಲಿಯೇ ಗೋಲಿಬಾರ್ ನಡೆಸಲಾಗಿದೆ. ಇದು ದೌರ್ಜನ್ಯವಲ್ಲವೇ ಎಂದು ಅವರು ಪ್ರಶ್ನೆ ಮಾಡಿದರು.

ಸಿಎಎ, ಎನ್‌ಆರ್‌ಸಿ ವಿರುದ್ಧ ದೇಶದಲ್ಲೆಡೆ ಭಾರೀ ಪ್ರತಿಭಟನೆ ನಡೆಯುತ್ತಿದ್ದು, ಇದರ ಬಿಸಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ತಟ್ಟಿದೆ. ಅವರು, ಈ ವಿವಾದಿತ ಕಾಯ್ದೆಗಳನ್ನು ಹಿಂಪಡೆಯುತ್ತಾರೆ ಎನ್ನುವ ಭರವಸೆ ನಮಗಿದೆ. ಒಂದು ವೇಳೆ, ಈ ಕಾಯ್ದೆ ಜಾರಿಯಾದರೆ, ಇದನ್ನು ತಿರಸ್ಕರಿಸುವ ಆಂದೋಲನ ರೂಪಿಸಲಾಗುವುದು ಎಂದು ಝಮೀರ್ ನುಡಿದರು.

ಎಲ್ಲಿಂದ ದಾಖಲೆ ತರಲಿ?

ನಾನು ಎರಡು ಬಾರಿ ಸಚಿವ, ನಾಲ್ಕು ಬಾರಿ ಶಾಸಕನಾಗಿದ್ದೇನೆ. ನನ್ನದೇ ದಾಖಲೆಗಳನ್ನು ಸರಿಪಡಿಸಲು ಬರೋಬ್ಬರಿ ನಾಲ್ಕು ತಿಂಗಳು ಬೇಕಾಯಿತು. ಇನ್ನು ಸಾಮಾನ್ಯ ಜನರು ಹೇಗೆ ದಾಖಲೆ ಜೋಡಿಸುವುದು ನೀವೇ ಹೇಳಿ?

-ಬಿ.ಝೆಡ್.ಝಮೀರ್ ಅಹ್ಮದ್ ಖಾನ್, ಮಾಜಿ ಸಚಿವ

‘ಒಂದು ದಿನ ಜೀವಿಸಿದರೆ ಸಾಕು’

ಪಾಕಿಸ್ತಾನದಲ್ಲಿ ನೂರು ವರ್ಷ ಜೀವಿಸುವ ಬದಲು, ಜಾತ್ಯತೀತ ತತ್ವಗಳಿರುವ ಭಾರತದಲ್ಲಿ ಒಂದು ದಿನ ಜೀವಿಸಿದರೆ ಸಾಕು ಎನ್ನುವ ಭಾವನೆ ನಮ್ಮಲಿದೆ. ಆದರೆ, ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವ ಅಮಿತ್ ಶಾ ಇಂತಹ ಭಾವನೆಗಳನ್ನು ಕೆರಳಿಸುತ್ತಿದ್ದಾರೆ. ಮುಂದೆ ಈ ಇಬ್ಬರು ನಾಯಕರು ಮನೆಗೆ ಸೇರುವುದು ನಿಶ್ಚಿತ.

-ಮೌಲಾನ ಪಿ.ಎಂ.ಮುಝಮ್ಮಿಲ್, ಫಾರೂಖೀಯಾ ಮಸೀದಿ ಗೋರಿಪಾಳ್ಯ