ಅನುದಾನ ಸಿಗದಿದ್ದಲ್ಲಿ ಚಂದಾ ಎತ್ತಿಯಾದರೂ ಚಿಕ್ಕಮಗಳೂರು ಜಿಲ್ಲಾ ಸಮ್ಮೇಳನ ಮಾಡುತ್ತೇವೆ

ಚಿಕ್ಕಮಗಳೂರು, ಜ.5: ಜಿಲ್ಲಾ ಸಾಹಿತ್ಯ ಸಮ್ಮೇಳನ ಸಂಬಂಧ ಸದ್ಯದ ಬೆಳವಣಿಗೆಯನ್ನು ನಿರೀಕ್ಷೆ ಮಾಡಿರಲಿಲ್ಲ. ಸಮ್ಮೇಳನಕ್ಕೆ ಅನುದಾನವನ್ನು ಕೇಂದ್ರ ಸಾಹಿತ್ಯ ಪರಿಷತ್ ನೀಡುತ್ತದೆ. ಆ ಅನುದಾನ ಬಾರದಿದ್ದಲ್ಲಿ ಸ್ವಂತ ಖರ್ಚಿನಿಂದಲೇ ಜಿಲ್ಲಾ ಸಾಹಿತ್ಯ ಸಮ್ಮೇಳವನ್ನು ಸರಳವಾಗಿ ನಡೆಸಲಾಗುವುದು ಎಂದು ಜಿಲ್ಲಾ ಕಸಾಪ ಅಧ್ಯಕ್ಷ ಕುಂದೂರು ಅಶೋಕ್ ಹೇಳಿದ್ದಾರೆ. 

ಈ ಸಂಬಂಧ ವಾರ್ತಾಭಾರತಿಯೊಂದಿಗೆ ಮಾತನಾಡಿರುವ ಅವರು, ಕನ್ನಡ ಮತ್ತು ಸಂಸ್ಕೃತಿ ಸಚಿವ ಸಿ.ಟಿ.ರವಿ ಅವರು ಶೃಂಗೇರಿಯಲ್ಲಿ ಆಯೋಜಿಸಿರುವ ಜಿಲ್ಲಾ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರನ್ನಾಗಿ ಕಲ್ಕುಳಿ ವಿಠಲ್ ಹೆಗ್ಡೆ ಅವರನ್ನು ನೇಮಿಸಿರುವುದಕ್ಕೆ ವಿರೋಧಗಳು ವ್ಯಕ್ತವಾಗುತ್ತಿರುವ ಹಿನ್ನೆಲೆಯಲ್ಲಿ ಸಮ್ಮೇಳನಕ್ಕೆ ಬರುವ 5 ಲಕ್ಷ ರೂ. ಅನುದಾನವನ್ನು ತಡೆ ಹಿಡಿಯಲು ಸೂಚಿದ್ದಾರೆಂಬ ಮಾಹಿತಿ ತಿಳಿದಿದೆ. ಆದರೆ ಸಾಹಿತ್ಯ ಸಮ್ಮೇಳನದ ವಿಚಾರದಲ್ಲಿ ಸಚಿವರು ಹೀಗೆ ಮಾಡಲು ಬರುವುದಿಲ್ಲ. ಆದರೂ ಸಮ್ಮೇಳನಕ್ಕೆ ಉದ್ದೇಶಪೂರ್ವಕ ತಡೆ ಹಾಕುವ ಪ್ರಯತ್ನವನ್ನು ಮಾಡಲಾಗುತ್ತಿದೆ. ಇದು ಸರಿಯಲ್ಲ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.

ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಭಿನ್ನಾಭಿಪ್ರಾಯಗಳು ಸಹಜ, ಭಿನ್ನಾಭಿಪ್ರಾಯಗಳನ್ನು ವ್ಯಕ್ತಪಡಿಸಲು ಅದರದ್ದೇ ಆದ ದಾರಿಗಳಿವೆ. ಆದರೆ ಯಾರೋ ನಾಲ್ಕು ಜನರ ವೈಯಕ್ತಿಕ ಧ್ವೇಷದಿಂದಾಗಿ ವಿಠಲ್ ಹಗ್ಡೆ ಸಮ್ಮೇಳನದ ಅಧ್ಯಕ್ಷರೆಂಬ ಕಾರಣಕ್ಕೆ ಸಮ್ಮೇಳನ ವಿರೋಧ ಈ ಪರಿಯ ವಿರೋಧ ಪ್ರಜಾಪ್ರಭುತ್ವ ವ್ಯವಸ್ಥೆ ಬಗೆದ ಅಪಚಾರವಾಗಿದೆ ಎಂದ ಅವರು, ಅನುದಾನದ ವಿಚಾರದಲ್ಲಿ ಕೇಂದ್ರ ಸಾಹಿತ್ಯ ಪರಿಷತ್ ಅಧ್ಯಕ್ಷರ ಬಳಿ ಮಾತನಾಡಿದ್ದೇನೆ, ಅವರು ಸಚಿವರಿಂದ ಪತ್ರ ತರಲು ಹೇಳಿದ್ದರು. ಪತ್ರಕ್ಕಾಗಿ ನಾವು ಸಚಿವ ಸಿ.ಟಿ.ರವಿ ಬಳಿ ಹೋದರೆ ಅವರು, ನಾನು ಸಮ್ಮೇಳಕ್ಕೆ ಬರುವುದಿಲ್ಲ ಎಂದು ಆಹ್ವಾನ ಪತ್ರಿಕೆಯನ್ನೂ ಸ್ವೀಕರಿಸಿಲ್ಲ. ಕನ್ನಡ ಸಾಹಿತ್ಯದ ವಿಚಾರದಲ್ಲಿ ಸಚಿವ ರವಿ ಅವರಿಂದ ಇಂತಹ ನಡವಳಿಕೆಯನ್ನು ನಿರೀಕ್ಷೆ ಮಾಡಿರಲಿಲ್ಲ ಎಂದರು.

ವಿಠಲ್ ಹೆಗ್ಡೆ ಅವರು ತನ್ನನ್ನೇ ಸಮ್ಮೇಳನದ ಅಧ್ಯಕ್ಷರನ್ನಾಗಿ ಮಾಡಿ ಎಂದು ನಮ್ಮನ್ನು ವಿನಂತಿಸಿಕೊಂಡಿರಲಿಲ್ಲ. ಅವರು ಕನ್ನಡ ಭಾಷೆಯಲ್ಲಿ ಮಾಡಿರುವ ಸಾಹಿತ್ಯ ಕೃಷಿಯನ್ನು ಸರಕಾರ ಹಾಗೂ ಕೇಂದ್ರ ಕಸಾಪ ಗುರುತಿಸಿ ಪ್ರಶಸ್ತಿ ನೀಡಿದೆ. ಮಂಗನಬೇಟೆ ಕೃತಿಯಲ್ಲಿ 300 ಪುಟಗಳಲ್ಲಿ ಮೂಲಕ ಅವರು ಮಲೆನಾಡಿನ ಸಾಂಸ್ಕೃತಿಕ ಜಗತ್ತನ್ನು ಪರಿಚಯಿಸಿದ್ದಾರೆ. ಜಿಲ್ಲೆಯಲ್ಲಿನ ಓರ್ವ ಗಟ್ಟಿ ಸಾಹಿತಿ ಅವರಾಗಿದ್ದಾರೆ. ಈ ಕಾರಣಕ್ಕೆ ಅವರನ್ನು ಕಸಪಾ ಕಾರ್ಯಕಾರಿಣಿ ಮಂಡಳಿ ಸರ್ವಾನುಮತದಿಂದ ಜಿಲ್ಲಾ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರನ್ನಾಗಿ ಆಯ್ಕೆ ಮಾಡಲಾಗಿದೆ. ಸಚಿವ ರವಿ ಅವರಿಗೆ ವಿಠಲ್ ಹೆಗ್ಡೆ ಅವರು ಸಾಹಿತಿ ಎಂಬ ವಿಚಾರದಲ್ಲಿ ಗೊಂದಲ ಇದ್ದಿದ್ದಲ್ಲಿ ಈ ಹಿಂದೆ ವಿಠಲ್‍ಹೆಗ್ಡೆ ಅವರಿಗೆ ಸರಕಾರ ಸಾಹಿತ್ಯ ಪರಿಷತ್ ಪ್ರಶಸ್ತಿ ನೀಡಿದ ಸಂದರ್ಭದಲ್ಲೇ ವಿರೋಧ ವ್ಯಕ್ತ ಮಾಡಬಹುದಿತ್ತು. ಈಗ ವಿರೋಧ ವ್ಯಕ್ತ ಮಾಡುತ್ತಿರುವುದು ಸರಿಯಲ್ಲ ಎಂದರು.

ಜಿಲ್ಲಾ ಸಾಹಿತ್ಯ ಸಮ್ಮೇಳನ ಜ.10-11ರಂದು ಶೃಂಗೇರಿ ಪಟ್ಟಣದಲ್ಲಿ ಅತ್ಯಂತ ಸರಳವಾಗಿ ನಡೆಯಲಿದೆ. ಸರಕಾರದ ಅನುದಾನ ಸಿಗದಿದ್ದಲ್ಲಿ ನಾವೇ ಜನರ ಬಳಿ ಚಂದಾ ಎತ್ತಿ ಸಮ್ಮೇಳನವನ್ನು ನಡೆಸುತ್ತೇವೆ. ಮಲೆನಾಡಿನಲ್ಲಿ ಈ ಬಾರಿ ಅತಿವೃಷ್ಟಿಯಿಂದ ಜನರು ಅತಂತ್ರ ಸ್ಥಿತಿಯಲ್ಲಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ಜನರಿಂದ ಚಂದಾ ಕೇಳುವುದಕ್ಕೆ ನಮಗೂ ಮನಸ್ಸಿನಲ್ಲ, ಆದರೆ ಸಮ್ಮೇಳನದ ಖರ್ಚು ಬರಿಸಲು ಸಾರ್ವಜನಿಕರ ಬಳಿಗೆ ಹೋಗುವುದು ಅನಿವಾರ್ಯವಾಗಿದೆ. ಸಣ್ಣ ವಿಚಾರವನ್ನು ದೊಡ್ಡದು ಮಾಡಿ ಸಮ್ಮೇಳನವನ್ನೇ ನಿಲ್ಲಿಸಲು ಸಂಚು ರೂಪಿಸುತ್ತಿರುವುದು ಕನ್ನಡ ಸಾಹಿತ್ಯಕ್ಕೆ ಮಾಡುವ ಅಪಚಾರವಾಗಿದೆ. ಇದರಿಂದ ಬೇಸರವೂ ಆಗಿದೆ. ಕನ್ನಡ ಸಾಹಿತ್ಯದ ಬಗ್ಗೆ ಒಲವಿರುವ ನೈಜ ಕನ್ನಡಾಭಿಮಾನಿಗಳಿಂದ ಈ ಸಮ್ಮೇಳನ ಯಶಸ್ವಿಯಾಗಲಿದೆ ಎಂಬ ನಂಬಿಕೆ ಇದೆ. ಸಮ್ಮೇಳನವನ್ನು ಮುಂದೂಡುವ, ಸಲ್ಲಿಸುವ ಅಥವಾ ಸಮ್ಮೇಳನದ ಅಧ್ಯಕ್ಷನ್ನು ಬದಲಾಯಿಸುವ ಪ್ರಶ್ನೆಯೇ ನಮ್ಮ ಮುಂದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದರು.