ರಾಜಸ್ಥಾನ, ಗುಜರಾತ್ ಆಸ್ಪತ್ರೆಗಳಲ್ಲಿ ಡಿಸೆಂಬರ್ ನಲ್ಲಿ 600ಕ್ಕೂ ಅಧಿಕ ಶಿಶುಗಳ ಸಾವು
ಜೈಪುರ, ಜ. 6: ಸರಕಾರಿ ವೈದ್ಯಕೀಯ ಸಂಸ್ಥೆಗಳಲ್ಲಿ ಜೀವರಕ್ಷಕ ಉಪಕರಣಗಳ ಕೊರತೆ ಆರೋಪಿಸಿ ಆಕ್ರೋಶ ವ್ಯಕ್ತವಾಗುತ್ತಿರುವ ನಡುವೆ ಗುಜರಾತ್ ಹಾಗೂ ರಾಜಸ್ಥಾನದ 6 ಪ್ರಮಖ ಆಸ್ಪತ್ರೆಯಲ್ಲಿ ಕಳೆದ ವರ್ಷ ಡಿಸೆಂಬರ್ನಲ್ಲಿ 600ಕ್ಕೂ ಅಧಿಕ ಮಕ್ಕಳು ಮೃತಪಟ್ಟಿವೆ ಎಂದು ವರದಿ ಹೇಳಿವೆ.
ಒಂದು ತಿಂಗಳ ಅವಧಿಯಲ್ಲಿ 100 ಮಕ್ಕಳು ಸಾವನ್ನಪ್ಪಿದ ಮೊದಲ ವರದಿ ರಾಜಸ್ಥಾನದ ಕೋಟಾದ ಜೆಕೆ ಲೋನ್ ಆಸ್ಪತ್ರೆಯಿಂದ ಹೊರಬಿದ್ದಿದೆ. ಇದಕ್ಕೆ ರಾಜಸ್ಥಾನದ ಆಡಳಿತಾರೂಢ ಕಾಂಗ್ರೆಸ್ ಸರಕಾರ ಕಾರಣ ಎಂದು ಬಿಜೆಪಿ ಆರೋಪಿಸಿದೆ. ಆದರೆ, ಗುಜರಾತ್ನಲ್ಲಿ ಇದೇ ರೀತಿ ಶಿಶುಗಳ ಸಾವು ಸಂಭವಿಸಿರುವುದು ಬಿಜೆಪಿಗೆ ಮುಜುಗರ ಉಂಟು ಮಾಡಿದೆ.
ಕೋಟಾದ ಜೆಕೆ ಲೋನ್ ಆಸ್ಪತ್ರೆಯಲ್ಲಿ 100ಕ್ಕೂ ಅಧಿಕ ಮಕ್ಕಳು ಸಾವನ್ನಪ್ಪಿರುವ ಬಗ್ಗೆ ವರದಿಯಾಗಿದೆ. ಈ ಬಗ್ಗೆ ರಾಜಸ್ಥಾನ ಸರಕಾರಕ್ಕೆ ನೋಟಿಸು ಕಳುಹಿಸಿರುವ ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗ, ಸಂಸ್ಥೆಯಲ್ಲಿರುವ ಶೇ. 50ರಷ್ಟು ಉಪಕರಣ ಉಪಯೋಗ ರಹಿತವಾಗಿರುವುದು ಪತ್ತೆಯಾಗಿದೆ ಎಂದಿದೆ.
ಮಕ್ಕಳ ಸಾವಿನ ಬಳಿಕ ಡಾ. ಜಗಜೀತ್ ಸಿಂಗ್ ಬದಲಾಗಿ ಡಾ. ಅಮೃತ್ ಲಾಲ್ ಬೈರವ ಅವರನ್ನು ಈ ಆಸ್ಪತ್ರೆಯ ಮಕ್ಕಳ ರೋಗ ವಿಭಾಗದ ಮುಖ್ಯಸ್ಥರನ್ನಾಗಿ ನಿಯೋಜಿಸಲಾಗಿದೆ. ನಾಲ್ಕು ಹೆಚ್ಚುವರಿ ಶಿಶು ರೋಗ ತಜ್ಞರನ್ನು ನೇಮಕ ಮಾಡಲಾಗಿದೆ. ನವಜಾತ ಶಿಶುಗಳ ತೀವ್ರ ನಿಗಾ ಘಟಕದಲ್ಲಿ 9 ಹಾಸಿಗೆಗಳನ್ನು ಹೆಚ್ಚಿಸಲಾಗಿದೆ. ಬಿಕೇನರ್ನ ಸರಕಾರಿ ಆಸ್ಪತ್ರೆಗಳಲ್ಲಿ ಡಿಸೆಂಬರ್ನಲ್ಲಿ 162 ಶಿಶುಗಳು ಸಾವನ್ನಪ್ಪಿವೆ.
‘‘ಈ ತಿಂಗಳು ನಾವು ವಿವಿಧ ಆಸ್ಪತ್ರೆಗಳ 2,219 ಮಕ್ಕಳನ್ನು ಇಲ್ಲಿ ದಾಖಲಿಸಿದ್ದೇವೆ. ಸಾವನ್ನಪ್ಪಿದ 162 ಶಿಶುಗಳಲ್ಲಿ ಯಾವುದು ಕೂಡ ಇಲ್ಲಿ ಜನಿಸಿಲ್ಲ’’ ಎಂದು ಎಸ್ಪಿ ವೈದ್ಯಕೀಯ ಕಾಲೇಜು, ಪಿಬಿಎಂ ಆಸ್ಪತ್ರೆಯ ಡಾ. ಎಚ್.ಎಸ್. ಕುಮಾರ್ ಹೇಳಿದ್ದಾರೆ. ಇದೇ ತಿಂಗಳಲ್ಲಿ ಜೋಧಪುರದ ಉಮೈದ್ ಹಾಗೂ ಎಂಡಿಎಂ ಆಸ್ಪತ್ರೆಗಳಲ್ಲಿ 145ಕ್ಕೂ ಅಧಿಕ ಮಕ್ಕಳ ಸಾವು ಸಂಭವಿಸಿದೆ. ಆದರೆ, ಇದು ಶಿಶು ಮರಣದ ಅಂತಾರಾಷ್ಟ್ರೀಯ ಮಟ್ಟ ಸೂಚಿಸಿದ ವ್ಯಾಪ್ತಿಯ ಒಳಗೆ ಬರುತ್ತದೆ ಎಂದು ಹಿರಿಯ ಅಧಿಕಾರಿಗಳು ಸಮಜಾಯಿಷಿ ನೀಡಿದ್ದಾರೆ.
‘‘2019ರಲ್ಲಿ ಈ ಎರಡು ಆಸ್ಪತ್ರೆಗಳಲ್ಲಿ ದಾಖಲಿಸಲಾದ ಒಟ್ಟು 47,815 ಮಕ್ಕಳಲ್ಲಿ 754 ಮಕ್ಕಳು ಮೃತಪಟ್ಟಿವೆ’’ ಎಂದು ಎಸ್ಎನ್ ವೈದ್ಯಕೀಯ ಕಾಲೇಜಿನ ಪ್ರಾಂಶುಪಾಲ ಎಸ್.ಎಸ್. ರಾಥೋಡ್ ತಿಳಿಸಿದ್ದಾರೆ.
ಆದರೆ, ಗುಜರಾತ್ನಲ್ಲಿ ಶಿಶುಗಳ ಸಾವು ಬಿಜೆಪಿ ಟೀಕೆಗೆ ಒಳಗಾಗುವಂತೆ ಮಾಡಿದೆ. ಡಿಸೆಂಬರ್ನಲ್ಲಿ ರಾಜಕೋಟ್ ಸರಕಾರಿ ಆಸ್ಪತ್ರೆಯಲ್ಲಿ 111 ಮಕ್ಕಳು ಸಾವನ್ನಪ್ಪಿವೆ. ಇದೇ ತಿಂಗಳು ಅಹ್ಮದಾಬಾದ್ನ ಸರಕಾರಿ ಆಸ್ಪತ್ರೆಗಳಲ್ಲಿ 85 ಮಕ್ಕಳು ಸಾವನ್ನಪ್ಪಿವೆ.
2019ರ ಕಳೆದ ಮೂರು ತಿಂಗಳಲ್ಲಿ ಚಿಕಿತ್ಸೆಯ ಸಂದರ್ಭ 269 ಮಕ್ಕಳು ಸಾವನ್ನಪ್ಪಿವೆ ಎಂದು ರಾಜ್ಕೋಟ್ ಸರಕಾರಿ ಆಸ್ಪತ್ರೆಯ ಅಧಿಕಾರಿಗಳು ತಿಳಿಸಿದ್ದಾರೆ.