ಜ.31, ಫೆ.1 ರಂದು ಕೊಡಗು ಜಿಲ್ಲಾ 14ನೇ ಕನ್ನಡ ಸಾಹಿತ್ಯ ಸಮ್ಮೇಳನ

ಮಡಿಕೇರಿ, ಜ.28 : ಕೊಡಗು ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ವತಿಯಿಂದ ಜಿಲ್ಲಾ ಮಟ್ಟದ 14ನೇ ಕನ್ನಡ ಸಾಹಿತ್ಯ ಸಮ್ಮೇಳನ ಜ.31 ಮತ್ತು ಫೆ.1 ರಂದು ಸೋಮವಾರಪೇಟೆ ತಾಲೂಕಿನ ನಿಡ್ತ ಗ್ರಾಮದಲ್ಲಿ ನಡೆಯಲಿದೆ. ಸಾಹಿತಿ ನಾಗೇಶ್ ಕಾಲೂರು ಅವರು ಸಮ್ಮೇಳನಾಧ್ಯಕ್ಷರಾಗಿರುವ 'ಕನ್ನಡ ಹಬ್ಬ' ನಿಡ್ತ ಸರಕಾರಿ ಹಿರಿಯ ಪ್ರಾಥಮಿಕ ಶಾಲಾ ಮೈದಾನದಲ್ಲಿ ನಡೆಯಲಿದೆ ಎಂದು ಕನ್ನಡ ಸಾಹಿತ್ಯ ಪರಿಷತ್ ಜಿಲ್ಲಾಧ್ಯಕ್ಷ ಲೋಕೇಶ್ ಸಾಗರ್ ತಿಳಿಸಿದ್ದಾರೆ. 

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಎರಡು ದಿನಗಳ ಕಾಲ ಬೆಸೂರು ನಂಜಣ್ಣ ಸಭಾಂಗಣದಲ್ಲಿ ಫೀಲ್ಡ್ ಮಾರ್ಷಲ್ ಕೆ.ಎಂ.ಕಾರ್ಯಪ್ಪ ವೇದಿಕೆಯಲ್ಲಿ ನಡೆಯುವ ಕಾರ್ಯಕ್ರಮಗಳ ಮಾಹಿತಿ ನೀಡಿದರು. ಜ.31 ರಂದು ಬೆಳಗ್ಗೆ 8 ಗಂಟೆಗೆ ರಾಷ್ಟ್ರಧ್ವಜ, ಪರಿಷತ್ತಿನ ಧ್ವಜ ಮತ್ತು ನಾಡ ಧ್ವಜವನ್ನು ಅರೋಹಣ ಮಾಡಲಾಗುವುದು. ಅಂದು ಬೆಳಗ್ಗೆ 8.30ಕ್ಕೆ ದಿ. ಎನ್ ಕೃಷ್ಣಮೂರ್ತಿ ದ್ವಾರ, ದಿ. ಅಶೋಕ ದ್ವಾರ, ದಿ.ಎನ್.ಬಿ.ಗುಂಡಪ್ಪ ದ್ವಾರ, ದಿ. ವಿ.ಎನ್.ಪುಟ್ಟಪ್ಪ ದ್ವಾರ, ದಿ.ಮಂಜಯ್ಯ ಮತ್ತು ಕೃಷ್ಣಯ್ಯ ದ್ವಾರ ಹಾಗೂ ದಿ.ಮಂಜುನಾಥಮೂರ್ತಿ ಮುಖ್ಯ ದ್ವಾರವನ್ನು ಉದ್ಘಾಟಿಸಲಾಗುವುದು.

ಬೆಳಗ್ಗೆ 9 ಗಂಟೆಗೆ ಮುಳ್ಳೂರು ವೃತ್ತದಿಂದ ಮಂಗಳವಾದ್ಯ, ಪೂರ್ಣ ಕುಂಭ, ವೈವಿದ್ಯಮಯ ಕಲಾ ತಂಡಗಳು, ಅಲಂಕೃತ ಸ್ತಬ್ಧ ಚಿತ್ರಗಳು, ವಿವಿಧ ಸಂಘ ಸಂಸ್ಥೆಗಳು, ವಿದ್ಯಾರ್ಥಿಗಳು ಸೇರಿದಂತೆ ಅನೇಕರ ಸಹಭಾಗಿತ್ವದೊಂದಿಗೆ ಸಮ್ಮೇಳನಾಧ್ಯಕ್ಷ ನಾಗೇಶ್ ಕಾಲೂರು ಅವರ ಮೆರವಣಿಗೆ ನಡೆಯಲಿದೆ. ಜಿಲ್ಲಾಧಿಕಾರಿ ಅನೀಸ್ ಕಣ್ಮಣಿ ಜಾಯ್ ಅವರು ಮೆರವಣಿಗೆ ಉದ್ಘಾಟಿಸಲಿದ್ದಾರೆ. ನಂತರ ದಿ. ಎನ್.ಸಿ. ಪುಟ್ಟಸ್ವಾಮಿ ಪುಸ್ತಕ, ವಸ್ತು ಪ್ರದರ್ಶನ ಮತ್ತು ಮಾರಾಟ ಮಳಿಗೆ ಹಾಗೂ ಕೊಡಗು ಚಂದ್ರಿಕೆ ಸುದ್ದಿಮನೆಯನ್ನು ಉದ್ಘಾಟಿಸಲಾಗುವುದು. ಬೆಳಗ್ಗೆ 11 ಗಂಟೆಗೆ ಬೆಸೂರು ನಂಜಣ್ಣ ಸಭಾಂಗಣವನ್ನು ಜಿ.ಪಂ ಉಪಾಧ್ಯಕ್ಷೆ ಲೋಕೇಶ್ವರಿ ಗೋಪಾಲ್ ಹಾಗೂ ಫೀಲ್ಡ್ ಮಾರ್ಷಲ್ ಕೆ.ಎಂ.ಕಾರ್ಯಪ್ಪ ವೇದಿಕೆಯನ್ನು ಜಿ.ಪಂ ಅಧ್ಯಕ್ಷ ಬಿ.ಎ.ಹರೀಶ್ ಉದ್ಘಾಟಿಸಲಿದ್ದಾರೆ.

ಅರಮೇರಿ ಕಳಂಚೇರಿ ಮಠದ ಶ್ರೀ ಶಾಂತಮಲ್ಲಿಕಾರ್ಜುನ ಸ್ವಾಮಿಜಿ ಅವರ ದಿವ್ಯ ಸಾನಿಧ್ಯದಲ್ಲಿ ನಡೆಯುವ ಸಮ್ಮೇಳನವನ್ನು ಮಡಿಕೇರಿ ಕ್ಷೇತ್ರದ ಶಾಸಕ ಎಂ.ಪಿ.ಅಪ್ಪಚ್ಚು ರಂಜನ್ ಉದ್ಘಾಟಿಸಲಿದ್ದಾರೆ. ಪುಸ್ತಕವನ್ನು ವಿರಾಜಪೇಟೆ ಶಾಸಕ ಕೆ.ಜಿ. ಬೋಪಯ್ಯ ಮತ್ತು ಸ್ಮರಣ ಸಂಚಿಕೆಯನ್ನು ವಿಧಾನ ಪರಿಷತ್ ಸದಸ್ಯ ಸುನಿಲ್ ಸುಬ್ರಮಣಿ ಅವರು ಬಿಡುಗಡೆ ಮಾಡಲಿದ್ದಾರೆ.

ಸಾಹಿತಿ ಡಾ. ನೀಲಗಿರಿ ತಳವಾರ್ ಮುಖ್ಯ ಭಾಷಣ ಮಾಡಲಿದ್ದು, ನಾಗೇಶ್ ಕಲೂರು ಅವರು ಸಮ್ಮೇಳನಾಧ್ಯಕ್ಷತೆಯ ಭಾಷಣ ಮಾಡಲಿದ್ದಾರೆ. ಮುಖ್ಯ ಅತಿಥಿಗಳಾಗಿ ಜಿಲ್ಲಾ ಉಸ್ತುವಾರಿ ಸಚಿವ ವಿ. ಸೋಮಣ್ಣ, ಸಂಸದ ಪ್ರತಾಪ್ ಸಿಂಹ, ವಿಧಾನ ಪರಿಷತ್ ಸದಸ್ಯರಾದ ವೀಣಾ ಅಚ್ಚಯ್ಯ ಮತ್ತಿತರರು ಪಾಲ್ಗೊಳ್ಳಲಿದ್ದಾರೆ. 

ಮಧ್ಯಾಹ್ನ 1 ಗಂಟೆಗೆ ಭಾವ ಸಂಗಮ ಕಾರ್ಯಕ್ರಮ ನಡೆಯಲಿದೆ. ನಂತರ ಕೃಷಿ ಮತ್ತು ಬದುಕು ವಿಚಾರ ಸಂಕಿರಣ ಸಾಹಿತಿ ಡಾ. ಜೆ. ಸೋಮಣ್ಣ ಅವರ ಅಧ್ಯಕ್ಷತೆಯಲ್ಲಿ ನಡೆಯಲಿದೆ. ಮಧ್ಯಾಹ್ನ 3.45 ರಿಂದ ಪುಸ್ತಕ ಅವಲೋಕನ ಕಾರ್ಯಕ್ರಮದಲ್ಲಿ ಸಮ್ಮೇಳನಾಧ್ಯಕ್ಷರ ಕೊಡವ ಭಾಷಿಕ ಜನಾಂಗಗಳ ಸಾಂಸ್ಕೃತಿಕ ಬದುಕು ಪುಸ್ತಕದ ಕುರಿತು ವಿಮರ್ಶೆ ನಡೆಯಲಿದೆ. ಜಿಲ್ಲಾ ಜಾನಪದ ಪರಿಷತ್ತಿನ ಅಧ್ಯಕ್ಷ ಬಿ.ಜಿ.ಅನಂತಶಯನ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಲಿದ್ದಾರೆ. ಸಂಜೆ 5 ಗಂಟೆಗೆ ನಡೆಯುವ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಹಿರಿಯ ಪತ್ರಕರ್ತ ಅನಿಲ್ ಹೆಚ್.ಟಿ. ಉದ್ಘಾಟಿಸಲಿದ್ದಾರೆ. 

ಫೆ. 1 ರಂದು ಜನಪದ ಕ್ರೀಡೋತ್ಸವ, ಕವಿಗೋಷ್ಠಿ, ಮಹಿಳಾ ಗೋಷ್ಠಿ, ಜನಪದ ಗೀತೆಗಳ ಕಾರ್ಯಕ್ರಮ, ಭಾವೈಕ್ಯತೆ ಮತ್ತು ಬದುಕು ವಿಚಾರ ಸಂಕಿರಣ ನಡೆಯಲಿದೆ. ಮಧ್ಯಾಹ್ನ 3.45ಕ್ಕೆ ಬಹಿರಂಗ ಅಧಿವೇಶನದಲ್ಲಿ ನಿರ್ಣಯಗಳನ್ನು ಮಂಡಿಸಲಾಗುವುದು. ಸಂಜೆ 4.15ಕ್ಕೆ ಸಮಾರೋಪ ಸಮಾರಂಭ ಮತ್ತು ಸಾಧಕರಿಗೆ ಸನ್ಮಾನ ಕಾರ್ಯಕ್ರಮ ಕಿರಿಕೊಡ್ಲಿ ಮಠದ ಶ್ರೀ ಸದಾಶಿವ ಸ್ವಾಮಿಜಿಗಳ ದಿವ್ಯ ಸಾನಿಧ್ಯದಲ್ಲಿ ನಡೆಯಲಿದೆ. ಶಾಸಕ ಅಪ್ಪಚ್ಚು ರಂಜನ್, ಮಾಜಿ ಸಚಿವ ಬಿ.ಎ. ಜೀವಿಜಯ, ರಂಗಾಯಣದ ನಿರ್ದೇಶಕ ಅಡ್ಡಂಡ ಕಾರ್ಯಪ್ಪ ಮತ್ತಿತರರು ಉಪಸ್ಥಿತರಿರುವರು. 

ಸನ್ಮಾನ
ಜಿಲ್ಲಾಧಿಕಾರಿ ಅನೀಸ್ ಕಾಣ್ಮಣಿ ಜಾಯ್ ಹಾಗೂ ಜಿಲ್ಲಾ ಪೊಲೀಸ್ ವರಿಷ್ಠಧಿಕಾರಿ ಸುಮನ್ ಡಿ. ಪಣ್ಣೇಕರ್ ಅವರನ್ನು ವಿಶೇಷವಾಗಿ ಸನ್ಮಾನಿಸಲಾಗುವುದು. ಸಾಹಿತ್ಯ ಕ್ಷೇತ್ರ ಡಿ.ಎಂ. ಕುಮಾರಪ್ಪ, ಸಮಾಜ ಸೇವೆ ಎನ್.ಬಿ. ನಾಗಪ್ಪ, ಎಸ್.ಪಿ. ಪ್ರಸನ್ನ, ಸೋಮವಾರಪೇಟೆಯ ಭಾರತೀಯ ಯುವಕ ಸಂಘ, ಕುಮಾರಿ ಫಿಲೋಮಿನಾ, ಸಂಗೀತ ಕ್ಷೇತ್ರದಲ್ಲಿ ಎಂ.ಜಿ. ಯಶವಂತ್, ಚಿತ್ರಕಲೆ ಐಮಂಡ ರೂಪೇಶ್ ನಾಣಯ್ಯ, ಶಿಕ್ಷಣ ಸುಬ್ಬಯ್ಯ, ರಾಷ್ಟ್ರ ಪ್ರಶಸ್ತಿ ಪುರಸ್ಕೃತ ಶಿಕ್ಷಕ ಸತೀಶ್, ಭಾಗಮಂಡಲದ ಶ್ರೀಧರ್, ಯುವ ಪ್ರತಿಭೆ ಎ.ಕೆ.ಹರ್ಷಿತ್, ಕುಮಾರಿ ಕೆ.ಎಸ್. ಸುರಕ್ಷ, ವೈದ್ಯಕೀಯ ಡಾ. ಪುಟ್ಟರಾಜು, ಸಹಕಾರ ಕ್ಷೇತ್ರ ಹೆಚ್.ಎಸ್. ಸುಬ್ಬಪ್ಪ, ಶೇಷದ್ರಿ, ಮಾಧ್ಯಮ ಹೆಚ್.ಆರ್. ಹರೀಶ್ ಕುಮಾರ್, ಕ್ರೀಡೆ ಅಭಿಶೇಕ್ ಗೌಡ, ಬುಡಕಟ್ಟು ಜನಪದ ಮಣಿ ಮುತ್ತಪ್ಪ, ಜಾನಪದ ಭರಮಣ್ಣ ಬೆಟ್ಟಗೇರಿ, ನ್ಯಾಯಾಂಗ ಸೇವೆ ಎಂ.ಆರ್. ದೇವಪ್ಪ, ಯಕ್ಷಗಾನ ಕೆ.ಡಿ. ಕುಶಾಲಪ್ಪ, ವಿಶೇಷ ಸಾಧನೆ ಎನ್.ಡಿ. ಕಿರಣ, ಮಲೆನಾಡು ಹಳ್ಳಿವಾದ್ಯ ಶಿವರಾಜು, ರಕ್ಷಣಾ ಸೇವೆ ಅನುಪ್‍ ಮಾದಪ್ಪ, ಅರಣ್ಯ ಸಂರಕ್ಷಣೆ ಎಂ.ಎಸ್. ಚಿಣ್ಣಪ್ಪ, ನಾಟಿ ವೈದ್ಯೆ ಜಿನತ್ ಶನಿವಾರಸಂತೆ, ಕರಾಟೆ ತರಬೇತಿ ಎನ್.ಎಸ್. ಅರುಣ, ತಾಂತ್ರಿಕ ಶಿಕ್ಷಣ ಸೇವೆ ಹೆಚ್.ವಿ. ಶಿವಪ್ಪ, ಹತ್ತನೆ ತರಗತಿಯಲ್ಲಿ ಪ್ರಥಮ ಸ್ಥಾನ ಪಡೆದು ಸಾಧನೆ ಮಾಡಿದ ಕು.ಹೆಚ್.ಹೆಚ್.ಆಷಿಕ, ಲೋಕಾಯುಕ್ತ ನಿವೃತ್ತ ಎಸ್‍ಪಿ. ಎಂ.ಎಸ್. ಶಿವಮೂರ್ತಿ, ಯೋಗಭ್ಯಾಸ ಕ್ಷೇತ್ರ ಜೈಚಂದನ್, ಕೆಎಸ್‍ಆರ್‍ಟಿಸಿ ಧನರಾಜ್, ಕೃಷಿ ಕ್ಷೇತ್ರದಲ್ಲಿ ಎಮ್.ಇ. ಸಣ್ಣಯ್ಯ, ಹೆಚ್.ಪಿ. ಸುರೇಶ, ಪುತ್ತಲಕೇರಿ ಬಸವರಾಜು ಹಾಗೂ ಡಿ.ಡಿ. ನಂಜಪ್ಪ ಅವರುಗಳನ್ನು ಸನ್ಮಾನಿಸಲಾಗುವುದೆಂದು ಲೋಕೇಶ್ ಸಾಗರ್ ತಿಳಿಸಿದರು. ಸಂಜೆ 5.45ಕ್ಕೆ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳು ಜರುಗಲಿವೆ ಎಂದರು.  

ಜಿ.ರಾಜೇಂದ್ರ ಅವರಿಗೆ ವಿಶೇಷ ಸನ್ಮಾನ
ಕೊಡಗಿನ ಹಿರಿಯ ಪತ್ರಕರ್ತರು ಹಾಗೂ ಶಕ್ತಿ ದಿನಪತ್ರಿಕೆಯ ಗೌರವ ಸಂಪಾದಕರಾದ ಜಿ.ರಾಜೇಂದ್ರ ಅವರನ್ನು ಗುಲ್ಬರ್ಗದಲ್ಲಿ ನಡೆಯುವ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಸನ್ಮಾನಿಸಿ ಗೌರವಿಸಲಾಗುವುದು ಎಂದು ಜಿಲ್ಲಾ ಕಸಾಪ ಅಧ್ಯಕ್ಷ ಲೋಕೇಶ್ ಸಾಗರ್ ತಿಳಿಸಿದರು.

ಅಖಿಲ ಭಾರತ ಸಾಹಿತ್ಯ ಸಮ್ಮೇಳನದಲ್ಲಿ ಜಿಲ್ಲೆಯ ಕವಿಗಳಾದ ಕಾಜೂರು ಸತೀಶ್ ಹಾಗೂ ವೈಲೇಶ್ ಅವರು ಪಾಲ್ಗೊಂಡು ಕವನಗಳನ್ನು ವಾಚಿಸಲಿದ್ದಾರೆ ಎಂದರು.

ಸುದ್ದಿಗೋಷ್ಟಿಯಲ್ಲಿ ಪರಿಷತ್‍ನ ಗೌರವ ಕಾರ್ಯದರ್ಶಿ ಕೆ.ಎಸ್.ರಮೇಶ್, ಕೋಶಾಧ್ಯಕ್ಷ ಮುರಳೀಧರ್, ನಿರ್ದೇಶಕ ಗಿರೀಶ್ ಕಿಗ್ಗಾಲು, ಸಮ್ಮೇಳನದ ಪ್ರಚಾರ ಸಮಿತಿ ಅಧ್ಯಕ್ಷ ಹೆಚ್.ಆರ್.ಹರೀಶ್ ಹಾಗೂ ಶನಿವಾರಸಂತೆ ಹೋಬಳಿ ಘಟಕದ ಕೋಶಾಧ್ಯಕ್ಷ ಡಿ.ಬಿ.ಸೋಮಪ್ಪ ಉಪಸ್ಥಿತರಿದ್ದರು.