ತಾನೇ ಸ್ಥಾಪಿಸಿದ ಕಂಪೆನಿಯ ಆಡಳಿತ ಮಂಡಳಿಯಿಂದ ಬಿ.ಆರ್. ಶೆಟ್ಟಿ ಹೊರಗೆ ?

ದುಬೈ (ಯುಎಇ), ಫೆ. 11: ಅನಿವಾಸಿ ಉದ್ಯಮಿ ಬಿ. ಆರ್. ಶೆಟ್ಟಿ ಯುಎಇಯಲ್ಲಿ ತಾನೇ ಸ್ಥಾಪಿಸಿರುವ ‘ಎನ್‌ಎಮ್‌ಸಿ ಹೆಲ್ತ್’ ಸಂಸ್ಥೆಯ ಬೋರ್ಡ್ ಡಿಸ್ಕಶನ್ಸ್‌ನ ಅಧ್ಯಕ್ಷತೆಯಿಂದ ವಜಾಗೊಳ್ಳುವ ಸಾಧ್ಯತೆಯನ್ನು ಎದುರಿಸುತ್ತಿದ್ದಾರೆ. ಸಂಸ್ಥೆಯಲ್ಲಿರುವ ತನ್ನ ಶೇರುಗಳ ಗಾತ್ರದ ಬಗ್ಗೆ ಅವರು ತಪ್ಪು ಮಾಹಿತಿ ನೀಡಿದರೆನ್ನಲಾದ ಕಾರಣಕ್ಕೆ ಅವರ ವಿರುದ್ಧ ಈ ಕ್ರಮ ತೆಗೆದುಕೊಳ್ಳಲಾಗುತ್ತಿದೆ ಎಂದು ಹೇಳಲಾಗಿದೆ.

ತನ್ನ ಶೇರುಗಳ ಗಾತ್ರದ ಬಗ್ಗೆ ಬಿ. ಆರ್. ಶೆಟ್ಟಿ ಕಾನೂನು ಸಮೀಕ್ಷೆಯನ್ನು ನಡೆಸುತ್ತಿದ್ದಾರೆ ಎಂದು ‘ಬ್ಲೂಮ್‌ಬರ್ಗ್’ನಲ್ಲಿ ಪ್ರಕಟವಾದ ವರದಿಯೊಂದು ತಿಳಿಸಿದೆ. ನಿಮ್ಮ ಯಾವುದೇ ಶೇರುಗಳನ್ನು ‘ಕೊಲೇಟರಲ್’ ಆಗಿ ನೀಡುವುದಾಗಿ ಮಾತು ಕೊಟ್ಟಿರುವಿರೇ ಎಂಬುದನ್ನು ಸ್ಪಷ್ಟಪಡಿಸುವಂತೆ ಕಂಪೆನಿಯು ತನ್ನ ಎಲ್ಲ ಶೇರುದಾರರನ್ನು ಕೋರಿದೆ ಎನ್ನಲಾಗಿದೆ.

ಕಳೆದ ವಾರ ಲಂಡನ್‌ನಲ್ಲಿ ಎನ್‌ಎಮ್‌ಸಿ ಹೆಲ್ತ್ ಕಂಪೆನಿಯ ಸ್ಟಾಕ್  ಮೌಲ್ಯವು ಬಹುತೇಕ ಅರ್ಧಕ್ಕೆ ಕುಸಿದಿತ್ತು.

ಎನ್‌ಎಮ್‌ಸಿಯು ಈ ವ್ಯವಹಾರಗಳನ್ನು ಸ್ವಲ್ಪ ಪ್ರಮಾಣದಲ್ಲಿ ಬಹಿರಂಗಪಡಿಸಿದೆ, ಬ್ಯಾಲನ್ಸ್ ಶೀಟ್‌ನಲ್ಲಿ ಹಸ್ತಕ್ಷೇಪ ನಡೆಸಿದೆ ಹಾಗೂ ತನ್ನ ಆಸ್ತಿ ಖರೀದಿ ಮೊತ್ತವನ್ನು ಹಿಗ್ಗಿಸಿದೆ ಎಂಬುದಾಗಿ ‘ಮಡ್ಡಿ ವಾಟರ್ಸ್ ಕ್ಯಾಪಿಟಲ್ ಎಲ್‌ಎಲ್‌ಸಿ’ ಆರೋಪಿಸಿದ ಬಳಿಕ, ಕಂಪೆನಿಯು ಸ್ವತಂತ್ರ ತಪಾಸಣೆಯೊಂದನ್ನು ನಡೆಸುತ್ತಿದೆ.

ಮಡ್ಡಿ ವಾಟರ್ಸ್‌ನ ವರದಿಯು 2019 ಡಿಸೆಂಬರ್‌ನಲ್ಲಿ ಹೊರಬಿದ್ದ ಬಳಿಕ ಎನ್‌ಎಮ್‌ಸಿಯ ಶೇರುಗಳ ಮೌಲ್ಯ 70 ಶೇಕಡಕ್ಕಿಂತಲೂ ಅಧಿಕ ಕುಸಿದಿದೆ. ಇದರೊಂದಿಗೆ ಕಂಪೆನಿಯ ಮಾರುಕಟ್ಟೆ ಮೌಲ್ಯವು 1.5 ಬಿಲಿಯ ಪೌಂಡ್‌ಗಿಂತಲೂ ಕೆಳಗೆ ಇಳಿದಿತ್ತು.

ಆದರೆ, ಮಡ್ಡಿ ವಾಟರ್ಸ್‌ನ ವರದಿಯಲ್ಲಿ ಮಾಡಲಾದ ಆರೋಪಗಳನ್ನು ಎನ್‌ಎಂಸಿ ನಿರಾಕರಿಸಿದೆ. ತನ್ನ ವಿರುದ್ಧ ಮಾಡಲಾಗಿರುವ ಆರೋಪಗಳು ಸುಳ್ಳು ಮತ್ತು ತಪ್ಪುದಾರಿಗೆಳೆಯುವಂಥವು ಎಂದು ಅದು ಹೇಳಿದೆ.

ಬಿ.ಆರ್. ಶೆಟ್ಟಿ ಮತ್ತು ಕಂಪೆನಿ ಉಪಾಧ್ಯಕ್ಷ ಖಲೀಫ ಉಮೈರ್  ಯೂಸುಫ್ ಅಹ್ಮದ್ ಅಲ್ ಮುಹೈರಿ ಅವರ ಶೇರುಗಳ ಗಾತ್ರ ಎಷ್ಟೆಂದು ಸ್ಪಷ್ಟವಾಗುವವರೆಗೆ ಯಾವುದೇ ಬೋರ್ಡ್ ಸಭೆಗಳಿಗೆ ಹಾಜರಾಗದಂತೆ ಕಂಪೆನಿಯು ಅವರಿಗೆ ಸೂಚಿಸಿದೆ. ಶೆಟ್ಟಿ ಮತ್ತು ಬುತ್ತಿ ಮಂಡಳಿಯ ನಿರ್ದೇಶಕರಾಗಿ ಉಳಿಯಬೇಕೇ, ಬೇಡವೇ ಎಂಬ ಬಗ್ಗೆ ನಿರ್ಧಾರವೊಂದನ್ನು ತೆಗೆದುಕೊಳ್ಳಲಾಗುವುದು ಎಂದು ಎನ್‌ಎಮ್‌ಸಿ ತಿಳಿಸಿದೆ.

ಪ್ರಸಕ್ತ ಯುನೈಟೆಡ್ ಅರಬ್ ಎಮಿರೇಟ್ಸ್‌ನ ಖಾಸಗಿ ವಲಯದ ಅತಿ ದೊಡ್ಡ ಆಸ್ಪತ್ರೆಯಾಗಿರುವ ಎನ್‌ಎಮ್‌ಸಿಯನ್ನು ಬಿ.ಆರ್. ಶೆಟ್ಟಿ 1970ರ ದಶಕದಲ್ಲಿ ಅಬುಧಾಬಿಯಲ್ಲಿ ಸ್ಥಾಪಿಸಿದ್ದಾರೆ.