ಗೊಮೆಲ್, ಸರ್ಫರಾಝ್ ಶತಕ, ಮುಂಬೈ 352/4

ಮುಂಬೈ, ಫೆ.12: ರಣಜಿ ಟ್ರೋಫಿಯ ಕ್ವಾರ್ಟರ್ ಫೈನಲ್ ತಲುಪುವ ಮುಂಬೈ ತಂಡದ ವಿಶ್ವಾಸ ಈಗಾಗಲೇ ಕಮರಿಹೋಗಿದೆ. ಬುಧವಾರ ಇಲ್ಲಿ ಆರಂಭವಾದ ಮಧ್ಯಪ್ರದೇಶ ವಿರುದ್ಧದ ರಣಜಿ ಟ್ರೋಫಿಯ ಅಂತಿಮ ಸುತ್ತಿನ ಗ್ರೂಪ್ ಪಂದ್ಯದಲ್ಲಿ ಸ್ಪೆಷಲಿಸ್ಟ್ ಓಪನಿಂಗ್ ಬ್ಯಾಟ್ಸ್‌ಮನ್ ಆಕರ್ಷಿತ್ ಗೊಮೆಲ್ ಶತಕ ಸಿಡಿಸಿ ಮಿಂಚಿದರು.

26ರ ಹರೆಯದ ಬಲಗೈ ಬ್ಯಾಟ್ಸ್‌ಮನ್ ಆಕರ್ಷಿತ್ ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಮೊದಲ ಶತಕ(122, 240 ಎಸೆತ, 11 ಬೌಂಡರಿ, 1 ಸಿಕ್ಸರ್)ಸಿಡಿಸಿದರು. ಮತ್ತೊಂದೆಡೆ ಟೂರ್ನಿಯಲ್ಲಿ ಭರ್ಜರಿ ಫಾರ್ಮ್‌ನಲ್ಲಿರುವ ಸರ್ಫರಾಝ್ ಖಾನ್ ಔಟಾಗದೆ 169 ರನ್ ಗಳಿಸಿ ಮುಂಬೈ ಮೊದಲ ದಿನದಾಟದಂತ್ಯಕ್ಕೆ 4 ವಿಕೆಟ್ ನಷ್ಟಕ್ಕೆ 352 ರನ್ ಗಳಿಸಲು ನೆರವಾದರು.

  ಒಂದು ಹಂತದಲ್ಲಿ 71 ರನ್‌ಗೆ 3 ವಿಕೆಟ್‌ಗಳನ್ನು ಕಳೆದುಕೊಂಡಿದ್ದ ಮುಂಬೈ ತಂಡಕ್ಕೆ ಆಕರ್ಷಿತ್ ಗೊಮೆಲ್ ಹಾಗೂ ಸರ್ಫರಾಝ್ 4ನೇ ವಿಕೆಟ್‌ಗೆ 275 ರನ್ ಜೊತೆಯಾಟ ನಡೆಸಿ ಆಸರೆಯಾದರು. 117 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ಗೊಮೆಲ್ 201 ಎಸೆತಗಳಲ್ಲಿ 101 ರನ್ ತಲುಪಿದರು.