ರಣಜಿ ಟ್ರೋಫಿ: ಕರ್ನಾಟಕ 206 ರನ್‌ಗೆ ಆಲೌಟ್

ಜಮ್ಮು, ಫೆ.22: ನಾಯಕ ಪರ್ವೇಝ್ ರಸೂಲ್ ನೇತೃತ್ವದ ಸಂಘಟಿತ ಬೌಲಿಂಗ್ ದಾಳಿಯ ಸಹಾಯದಿಂದ ಜಮ್ಮು-ಕಾಶ್ಮೀರ ತಂಡ ರಣಜಿ ಟ್ರೋಫಿಯ ಮೂರನೇ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಕರ್ನಾಟಕವನ್ನು ಮೊದಲ ಇನಿಂಗ್ಸ್ ನಲ್ಲಿ 206 ರನ್‌ಗೆ ಆಲೌಟ್ ಮಾಡಿದೆ.

ಮಳೆಯಿಂದಾಗಿ ಮೊದಲ ದಿನ 2 ವಿಕೆಟ್ ನಷ್ಟಕ್ಕೆ 14 ರನ್ ಗಳಿಸಿದ್ದ ಕರ್ನಾಟಕ ತಂಡಕ್ಕೆ 2ನೇ ದಿನ ಕೂಡ ಮಳೆಯಿಂದಾಗಿ ಒಂದೂ ಎಸೆತ ಆಡಲು ಸಾಧ್ಯವಾಗಿರಲಿಲ್ಲ. ಮೂರನೇ ದಿನವಾದ ಶನಿವಾರ ಮೊದಲ ಇನಿಂಗ್ಸ್ ಮುಂದುವರಿಸಿದ ಕರ್ನಾಟಕ ಒಂದು ಹಂತದಲ್ಲಿ 75 ರನ್‌ಗೆ 4 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಕೆ.ವಿ. ಸಿದ್ದಾರ್ಥ್(76, 189 ಎಸೆತ, 9 ಬೌಂಡರಿ), ಮನೀಷ್ ಪಾಂಡೆ(37, 26 ಎಸೆತ, 7 ಬೌಂಡರಿ) ಹಾಗೂ ಶರತ್(26, 91 ಎಸೆತ, 4 ಬೌಂಡರಿ)ಸಾಹಸದಿಂದ ಕರ್ನಾಟಕ 69.1 ಓವರ್‌ಗಳಲ್ಲಿ 206 ರನ್ ಗಳಿಸಿ ಆಲೌಟಾಯಿತು.

ನಾಯಕ ಕರುಣ್ ನಾಯರ್ ಔಟಾಗದೆ 4 ರನ್‌ನಿಂದ ಬ್ಯಾಟಿಂಗ್ ಮುಂದುವರಿಸಿದರೂ ಒಂದೂ ರನ್ ಸೇರಿಸದೇ ನಬಿಗೆ ವಿಕೆಟ್ ಒಪ್ಪಿಸಿದರು. ಆಗ ಜೊತೆಯಾದ ಸಿದ್ದಾರ್ಥ್ ಹಾಗೂ ಮನೀಷ್ ಪಾಂಡೆ 4ನೇ ವಿಕೆಟ್ ಜೊತೆಯಾಟದಲ್ಲಿ 61 ರನ್ ಸೇರಿಸಿ ತಂಡವನ್ನು ಆಧರಿಸಿದರು.

ಪಾಂಡೆ 37 ರನ್‌ಗೆ ಔಟಾದ ಬಳಿಕ ಶ್ರೀನಿವಾಸ್ ಶರತ್(26)ಜೊತೆ ಕೈಜೋಡಿಸಿದ ಸಿದ್ದಾರ್ಥ್ 5ನೇ ವಿಕೆಟ್‌ಗೆ 69 ರನ್ ಜೊತೆಯಾಟದಲ್ಲಿ ಭಾಗಿಯಾದರು. ಕೆ.ಗೌತಮ್, ಜೆ.ಸುಚಿತ್ ಹೆಚ್ಚು ಹೊತ್ತು ಕ್ರೀಸ್‌ನಲ್ಲಿ ನಿಲ್ಲಲಿಲ್ಲ. ಜಮ್ಮು-ಕಾಶ್ಮೀರದ ಪರವಾಗಿ ಅಖಿಬ್ ನಬಿ(3-45), ಮುಜ್ತಾಬ ಯೂಸುಫ್(3-45) ಹಾಗೂ ಪರ್ವೇಝ್ ರಸೂಲ್(3-36)ತಲಾ ಮೂರು ವಿಕೆಟ್‌ಗಳನ್ನು ಕಬಳಿಸಿದರು. ಮೊದಲ ಇನಿಂಗ್ಸ್ ಆರಂಭಿಸಿದ ಜಮ್ಮು-ಕಾಶ್ಮೀರ ತಂಡ ದಿನದಾಟದಂತ್ಯಕ್ಕೆ 34 ಓವರ್‌ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 88 ರನ್ ಗಳಿಸಿದೆ. ಶುಭಂ ಖಜುರಿಯ(ಔಟಾಗದೆ 39, 112 ಎಸೆತ,6 ಬೌಂಡರಿ) ಹಾಗೂ ಪುಂದಿರ್(ಔಟಾಗದೆ 16)ಕ್ರೀಸ್ ಕಾಯ್ದುಕೊಂಡಿದ್ದಾರೆ.

ಒಡಿಶಾ ವಿರುದ್ಧ ಬಂಗಾಳಕ್ಕೆ

ಮೊದಲ ಇನಿಂಗ್ಸ್ ಮುನ್ನಡೆ

ಭುವನೇಶ್ವರ, ಫೆ. 22: ಒಡಿಶಾ ವಿರುದ್ಧ ರಣಜಿ ಟ್ರೋಫಿಯ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಶಿಸ್ತುಬದ್ಧ ಬೌಲಿಂಗ್ ಸಂಘಟಿಸಿದ ಬಂಗಾಳ ತಂಡ ಮೊದಲ ಇನಿಂಗ್ಸ್‌ನಲ್ಲಿ ಮುನ್ನಡೆ ಪಡೆಯುವಲ್ಲಿ ಯಶಸ್ವಿಯಾಗಿದೆ.

  ತಮ್ಮಳಗೆ 9 ವಿಕೆಟ್‌ಗಳನ್ನು ಹಂಚಿಕೊಂಡ ತ್ರಿವಳಿ ವೇಗಿಗಳಾದ ಇಶಾನ್ ಪೊರೆಲ್(3-72), ನೀಲಕಂಠ ದಾಸ್(3-43) ಹಾಗೂ ಮುಕೇಶ್ ಕುಮಾರ್(3-51)ಒಡಿಶಾವನ್ನು ಮೊದಲ ಇನಿಂಗ್ಸ್‌ನಲ್ಲಿ 250 ರನ್‌ಗೆ ಆಲೌಟ್ ಮಾಡಿತು. ಈ ಮೂಲಕ 82 ರನ್‌ಗಳ ಇನಿಂಗ್ಸ್ ಮುನ್ನಡೆ ಸಾಧಿಸಿತು. ಸೆಮಿ ಫೈನಲ್‌ಗೆ ಒಂದು ಹೆಜ್ಜೆ ಇಟ್ಟಿತು.

 3ನೇ ದಿನದಾಟದಂತ್ಯಕ್ಕೆ ಬಂಗಾಳ 2 ವಿಕೆಟ್ ನಷ್ಟಕ್ಕೆ 79 ರನ್ ಗಳಿಸಿದ್ದು, ಒಟ್ಟು ಮುನ್ನಡೆಯನ್ನು 161ಕ್ಕೆ ಹೆಚ್ಚಿಸಿಕೊಂಡಿದೆ. ಅಭಿಷೇಕ್ ರಾಮನ್(4) ಹಾಗೂ ಹಿರಿಯ ಬ್ಯಾಟ್ಸ್‌ಮನ್ ಮನೋಜ್ ತಿವಾರಿ(3)ಕ್ರೀಸ್ ಕಾಯ್ದುಕೊಂಡಿದ್ದಾರೆ.

ಮೊದಲ ವಿಕೆಟ್‌ಗೆ 60 ರನ್ ಜೊತೆಯಾಟ ನಡೆಸಿದ್ದ ಒಡಿಶಾ ತಂಡ ನಾಯಕ ಅಭಿಮನ್ಯು ಈಶ್ವರನ್(30) ಹಾಗೂ ಕೌಶಿಕ್ ಘೋಷ್(41)ಅವರ ಬೇಜವಾಬ್ದಾರಿಯುತ ಬ್ಯಾಟಿಂಗ್‌ನಿಂದಾಗಿ 16 ರನ್‌ಗೆ 2 ವಿಕೆಟ್ ಕಳೆದುಕೊಂಡಿತು.

ಗೋವಾ ವಿರುದ್ಧ ಗುಜರಾತ್ ಸಂಪೂರ್ಣ ಪ್ರಾಬಲ್ಯ

ವಲ್ಸಾಡ್(ಗುಜರಾತ್), ಫೆ.22: ರಣಜಿ ಟ್ರೋಫಿ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಶನಿವಾರ ಗುಜರಾತ್ ತಂಡ ಗೋವಾದ ವಿರುದ್ಧ ಒಟ್ಟು 587 ರನ್ ಮುನ್ನಡೆ ಸಾಧಿಸುವುದರೊಂದಿಗೆ ಸಂಪೂರ್ಣ ಮೇಲುಗೈ ಸಾಧಿಸಿದೆ. ಮಧ್ಯಮ ವೇಗದ ಬೌಲರ್ ಚಿಂತನ್ ಗಜ ಐದು ವಿಕೆಟ್ ಗೊಂಚಲು ಪಡೆದು ಮಿಂಚಿದರು.

ಸರ್ದಾರ್ ಪಟೇಲ್ ಸ್ಟೇಡಿಯಂನಲ್ಲಿ ನಾಯಕ ಪಾರ್ಥಿವ್ ಪಟೇಲ್ ಹಾಗೂ ರೂಶ್ ಕಲಾರಿಯ ಶತಕದ ಸಹಾಯದಿಂದ ಗುಜರಾತ್ ಮೊದಲ ಇನಿಂಗ್ಸ್‌ನಲ್ಲಿ 8 ವಿಕೆಟ್ ನಷ್ಟಕ್ಕೆ 602 ರನ್ ಗಳಿಸಿತು. 25ರ ಹರೆಯದ ಗಜ(5-19) ದಾಳಿಗೆ ಸಿಲುಕಿದ ಗೋವಾ 57.5 ಓವರ್‌ಗಳಲ್ಲಿ ಕೇವಲ 173 ರನ್ ಗಳಿಸಿ ಆಲೌಟಾಯಿತು. ನಾಯಕ ಪಾರ್ಥಿವ್ ಗೋವಾಕ್ಕೆ ಫಾಲೋ-ಆನ್ ವಿಧಿಸದೆ ಎರಡನೇ ಇನಿಂಗ್ಸ್ ಆರಂಭಿಸಲು ನಿರ್ಧರಿಸಿದರು. ಗುಜರಾತ್ 3ನೇ ದಿನದಾಟದಂತ್ಯಕ್ಕೆ 2ನೇ ಇನಿಂಗ್ಸ್ ನಲ್ಲಿ 1 ವಿಕೆಟ್ ನಷ್ಟಕ್ಕೆ 158 ರನ್ ಗಳಿಸಿದೆ. ಸಮಿತ್ ಗೊಹೆಲ್(ಔಟಾಗದೆ 70)ಅರ್ಧಶತಕ ಗಳಿಸಿದ್ದಾರೆ. ಗುಜರಾತ್ ಒಟ್ಟು 587 ರನ್ ಮುನ್ನಡೆಯಲ್ಲಿದೆ. ಇನ್ನು ಎರಡು ದಿನಗಳ ಆಟ ಬಾಕಿ ಉಳಿದಿದ್ದು, ಸೋಲಿನಿಂದ ಪಾರಾಗಲು ಗೋವಾ ಪವಾಡವನ್ನೇ ಸೃಷ್ಟಿಸಬೇಕಾಗಿದೆ.