ಸಮಗ್ರ ಗ್ರಾಮೀಣ ಆಶ್ರಮಕ್ಕೆ ‘ವಿಶ್ವಸಂಸ್ಥೆ ಹ್ಯಾಬಿಟಾಟ್’ ಅಗ್ರಪ್ರಶಸ್ತಿ

ಉಡುಪಿ, ಫೆ.28: ಕರಾವಳಿಯ ಮೂಲನಿವಾಸಿಗಳಾದ ಕೊರಗರು ಸೇರಿದಂತೆ ರಾಜ್ಯದಲ್ಲಿ ಬುಡಕಟ್ಟು ಸಮುದಾಯಗಳ ಅಭಿವೃದ್ಧಿ, ಈ ಜನರು ಘನತೆ, ಗೌರವಗಳಿಂದ ಬದುಕಲು ಮತ್ತು ಅವರ ಮಾನವ ಹಕ್ಕುಗಳ ರಕ್ಷಣೆಗೆ ಶ್ರಮಿಸುತ್ತಿರುವ ಶಿರ್ವದ ಸಮಗ್ರ ಗ್ರಾಮೀಣ ಆಶ್ರಮ ಸ್ವಯಂಸೇವಾ ಸಂಸ್ಥೆಗೆ 2019ನೇ ಸಾಲಿನ ಪ್ರತಿಷ್ಠಿತ ‘ವಿಶ್ವಸಂಸ್ಥೆಯ ಹ್ಯಾಬಿಟ್ಯಾಟ್ ಚಿನ್ನದ ಪ್ರಶಸ್ತಿ’ ದೊರೆತಿದೆ ಎಂದು ಆಶ್ರಮದ ಅಧ್ಯಕ್ಷೆ ಶಂಕುತಳಾ ಹಾಗೂ ಸಂಯೋಜಕ ಅಶೋಕ್ ಶೆಟ್ಟಿ ಹೇರೂರು ತಿಳಿಸಿದ್ದಾರೆ.

ಉಡುಪಿಯಲ್ಲಿಂದು ಕರೆದ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ ಅವರು ಫೆ.11ರಂದು ಅಬುದಾಬಿಯಲ್ಲಿ ವಿಶ್ವಸಂಸ್ಥೆ ಆಯೋಜಿಸಿದ 10ನೇ ಅರ್ಬನ್ ಫಾರಂ ಕಾರ್ಯಕ್ರಮದಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಗಿದ್ದು, ಆಶ್ರಮಕ್ಕೆ ಹಾಲ್‌ಮಾರ್ಕ್ ಚಿನ್ನದ ಸ್ಮರಣಿಕೆ, 10 ಸಾವಿರ ಯೂರೋ (ಅಂದಾಜು 8 ಲಕ್ಷ ರೂ.) ಬಹುಮಾನ ನಿಧಿ ದೊರೆತಿದೆ ಎಂದವರು ತಿಳಿಸಿದರು.

ಇದರೊಂದಿಗೆ ಮುಂದಿನ ಒಂದು ವರ್ಷ ಕಾಲ ಬುಡಕಟ್ಟು ಜನಾಂಗ ವಿವಿಧ ಅಭಿವೃದ್ಧಿ ಕೆಲಸಗಳಿಗೆ 20 ಸಾವಿರ ಪೌಂಡ್ ಸಹಾಯಧನವೂ ಲಭ್ಯವಾಗಿದ್ದು, ಈ ಬಗ್ಗೆ ಕಾರ್ಯಯೋಜನಾ ವರದಿಯನ್ನು ತಯಾರಿಸಲಾಗುವುದು ಎಂದರು.

ಈ ಪ್ರಶಸ್ತಿಯು ಸಮುಗ್ರ ಗ್ರಾಮೀಣ ಆಶ್ರಮದೊಂದಿಗೆ ಅದರ ಸಹ ಸಂಘಟನೆಗಳಾದ ಉಡುಪಿ, ದಕ ಹಾಗೂ ಕಾಸರಗೋಡು ಕೊರಗಾಭಿವೃದ್ಧಿ ಸಂಘಗಳ ಒಕ್ಕೂಟ, ಕರ್ನಾಟಕ ಅರಣ್ಯಮೂಲ ಬುಡಕಟ್ಟು ಸಮುದಾಯಗಳ ಒಕ್ಕೂಟದೊಂದಿಗೆ ಬೆಂಗಳೂರಿನ ಆ್ಯಕ್ಷನ್ ಏಯ್ಡಿ ಇಂಡಿಯಾ ಸಂಸ್ಥೆಗಳಿಗೆ ಸಂಯುಕ್ತವಾಗಿ ದೊರೆಕಿದೆ ಎಂದು ಅಶೋಕ್ ಶೆಟ್ಟಿ ತಿಳಿಸಿದರು.

ಶಿರ್ವ ಪೆರ್ನಾಲಿನಲ್ಲಿ ಮುಖ್ಯ ಕಚೇರಿ ಹೊಂದಿರುವ ಸಮಗ್ರ ಗ್ರಾಮೀಣ ಆಶ್ರಮ 1987ರಲ್ಲಿ ಕೊರಗರ ಅಭಿವೃದ್ಧಿಯ ಮೂಲ ಉದ್ದೇಶ ದೊಂದಿಗೆ ಸ್ಥಾಪನೆಯಾಗಿದ್ದು, ಎರಡು ವರ್ಷಗಳ ಬಳಿಕ ಉಡುಪಿ, ದ.ಕ. ಕಾಸರಗೋಡು ಕೊರಗ ಅಭಿವೃದ್ಧಿ ಸಂಘಗಳ ಒಕ್ಕೂಟವನ್ನು ಪ್ರಾರಂಭಿಸಲಾಗಿತ್ತು ಎಂದವರು ವಿವರಿಸಿದರು.

ಪ್ರಾರಂಭದಿಂದ 2008ರವರೆಗೆ ಕರಾವಳಿಯಲ್ಲಿ ಕೊರಗ ಸಮುದಾಯದ ಏಳಿಗೆಗೆ ಹಲವು ಕಾರ್ಯಕ್ರಮಗಳನ್ನು ರೂಪಿಸಿ ಅನುಷ್ಠಾನಗೊಳಿಸಲು ಶ್ರಮಿಸಲಾಗಿತ್ತು. ನಮ್ಮ ಸತತ ಹೋರಾಟದ ಫಲವಾಗಿ 2000ನೇ ವರ್ಷದಲ್ಲಿ ಕರಾವಳಿಯಲ್ಲಿ ಆಗ ಚಾಲ್ತಿಯಲ್ಲಿದ್ದ ಅಮಾನುಷ ಅಜಲು ಪದ್ಧತಿಯನ್ನು ಸರಕಾರ ನಿಷೇಧಿಸಿು ಎಂದು ಅಶೋಕ್ ಶೆಟ್ಟಿ ತಿಳಿಸಿದರು.

2008ರ ಬಳಿಕ ಕೊರಗ ಸಮುದಾಯದ ಆಚೆಗೆ ಪಶ್ಚಿಮ ಘಟ್ಟದಾದ್ಯಂತ ಇರುವ ಅರಣ್ಯ ಮೂಲದ ಬುಡಕಟ್ಟು ಸಮುದಾಯದ ಪರವಾಗಿ ಕೆಲಸ ಮಾಡಲು ಕರ್ನಾಟಕ ಅರಣ್ಯಮೂಲ ಬುಡಕಟ್ಟು ಸಮುದಾಯಗಳ ಒಕ್ಕೂಟ ಅಸ್ತಿತ್ವಕ್ಕೆ ಬಂದಿದೆ. ಇದಕ್ಕೆ ಬೆಂಗಳೂರಿನ ಆ್ಯಕ್ಷನ್ ಏಯಿಡ್ ಇಂಡಿಯಾ ಸಂಸ್ಥೆ ಬೆಂಬಲ ನೀಡಿದೆ. ಆಶ್ರಮವು ಉಡುಪಿ, ದ.ಕ., ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಕೊಡಗು ಮತ್ತು ಮೈಸೂರು ಜಿಲ್ಲೆಗಳ ಕೊರಗ, ಹಸಲರು, ಗೊಂಡ, ಮಲೆಕುಡಿಯ, ಹಕ್ಕಿಪಿಕ್ಕಿ, ಜೇನು ಕುರುಬ, ಬೆಟ್ಟಕುರುಬ, ಎರವ, ಸೋಲಿಗ ಹಾಗೂ ಡೋಂಗ್ರಿಗರಸಿಯಾ ಸಮುದಾಯಗಳ ಬೆಳವಣಿಗೆಗೆ ಶ್ರಮಿಸುತ್ತಿದೆ ಎಂದವರು ವಿವರಿಸಿದರು.

ವಿಶ್ವದಲ್ಲಿರುವ ಬುಡಕಟ್ಟು ಜನಾಂಗದ ಪರವಾಗಿ ಕೆಲಸ ಮಾಡುವ ಸಂಸ್ಥೆಗಳನ್ನು ಪ್ರೋತ್ಸಾಹಿಸಲು ನೀಡಲಾಗುತ್ತಿರುವ ಹ್ಯಾಬಿಟಾಟ್ ಪ್ರಶಸ್ತಿಗೆ ಜಗತ್ತಿನ 195 ದೇಶಗಳ ಸುಮಾರು 3000 ಸಂಸ್ಥೆಗಳನ್ನು ಆಯ್ಕೆಗೆ ಪರಿಗಣಿಸಲಾಗಿತ್ತು. ಎರಡನೇ ಹಂತದಲ್ಲಿ 10 ಸಂಸ್ಥೆಗಳನ್ನು ಪರಿಗಣಿಸಲಾಗಿದ್ದು, ಅಂತಿಮವಾಗಿ ದಕ್ಷಿಣದಿಂದ ಸಮಗ್ರ ಗ್ರಾಮೀಣ ಆಶ್ರಮಕ್ಕೆ ಹಾಗೂ ಉತ್ತರದಿಂದ ಸ್ಪೈನ್ ದೇಶದ ಎಂಟಿಡೇಟ್ಸ್ ಸೋಶಿಯಾಲೀಸ್ ಸಂಸ್ಥೆಯನ್ನು ಅಗ್ರ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿತ್ತು ಎಂದವರು ಹೇಳಿದರು.

ಈ ಪ್ರಶಸ್ತಿ ಭಾರತಕ್ಕೆ ನಾಲ್ಕನೇ ಬಾರಿಗೆ ಲಭಿಸಿದ್ದು, ಕರ್ನಾಟಕಕ್ಕೆ ಮೊದಲ ಬಾರಿಗೆ ಬಂದಿದೆ. ಮುಂದೆ ಸಂಸ್ಥೆಯು ತನ್ನ ಕೆಲಸಗಳನ್ನು ಉತ್ತರ ಕನ್ನಡ ಮತ್ತು ಚಾಮರಾಜ ನಗರ ಜಿಲ್ಲೆಗಳ ಬುಡಕಟ್ಟು ಜನಾಂಗಗಳ ಅಭಿವೃದ್ಧಿಯತ್ತ ವಿಸ್ತರಿಸಲಿದೆ ಎಂದು ಅಶೋಕ್ ಶೆಟ್ಟಿ ತಿಳಿಸಿದರು.

ಆಶ್ರಮದ ಅಧ್ಯಕ್ಷೆ ಶಕುಂತಲಾ, ಕೊರಗಾಭಿವೃದ್ಧಿ ಸಂಘಗಳ ಒಕ್ಕೂಟ ಕರ್ನಾಟಕ-ಕೇರಳದ ಅಧ್ಯಕ್ಷೆ ಅಮ್ಮಣ್ಣಿ, ಸಮಗ್ರ ಗ್ರಾಮೀಣ ಆಶ್ರಮದ ಕಾರ್ಯದರ್ಶಿ ಕೆ. ಪುತ್ರ ಉಪಸ್ಥಿತರಿದ್ದರು.