ಕೊರೋನ ವೈರಸ್ ಪರಿಣಾಮ: ಶೂಟಿಂಗ್ ವಿಶ್ವಕಪ್ನಿಂದ ಭಾರತ ಹೊರಕ್ಕೆ
ಹೊಸದಿಲ್ಲಿ, ಫೆ.28: ಕೊರೋನ ವೈರಸ್ ವಿಶ್ವದಾದ್ಯಂತ ಕ್ರೀಡಾ ಕ್ಯಾಲೆಂಡರ್ಗಳ ಮೇಲೆ ವ್ಯತಿರಿಕ್ತ ಪರಿಣಾಮಬೀರುತ್ತಿದೆ. ಮಾರಾಣಾಂತಿಕ ಕೊರೋನ ವೈರಸ್ ಭೀತಿಯಿಂದಾಗಿ ಸೈಪ್ರಸ್ನಲ್ಲಿ ಮುಂದಿನ ತಿಂಗಳು ನಡೆಯಲಿರುವ ಶೂಟಿಂಗ್ ವಿಶ್ವಕಪ್ನಿಂದ ಭಾರತ ದೂರ ಉಳಿಯಲು ನಿರ್ಧರಿಸಿದೆ.
ಅಂತರ್ರಾಷ್ಟ್ರೀಯ ಶೂಟಿಂಗ್ ಸ್ಪೋಟ್ಸ್ ಫೆಡರೇಶನ್(ಐಎಸ್ಎಸ್ಎಫ್)ನಿಂದ ಗುರುತಿಸಲ್ಪಟ್ಟ ಶಾಟ್ಗನ್ ವಿಶ್ವಕಪ್ ನಿಕೊಸಿಯಾದಲ್ಲಿ ಮಾ.4ರಿಂದ 13ರ ತನಕ ನಿಗದಿಯಾಗಿತ್ತು.
ಸರಕಾರದ ಸಲಹೆಯ ಮೇರೆಗೆ ಭಾರತೀಯ ಶೂಟಿಂಗ್ ತಂಡ ಟೂರ್ನಮೆಂಟ್ನಿಂದ ಹಿಂದೆ ಸರಿದಿದೆ ಎಂದು ರಾಷ್ಟ್ರೀಯ ರೈಫಲ್ ಸಂಸ್ಥೆ ಮೂಲಗಳು ತಿಳಿಸಿವೆ.
‘‘ನಾವು ಟೂರ್ನಮೆಂಟ್ನಿಂದ ಹೊರಗುಳಿಯಲು ಕೊರೋನ ವೈರಲ್ ಏಕೈಕ ಕಾರಣವಾಗಿದೆ. ಕೇಂದ್ರೀಯ ಏಜೆನ್ಸಿಗಳು ಸಲಹೆಯನ್ನು ನೀಡಿವೆ. ಈಗಿನ ಪರಿಸ್ಥಿತಿಯಲ್ಲಿ ಇದೊಂದು ಸರಿಯಾದ ನಿರ್ಧಾರ. ನಮ್ಮ ಶೂಟರ್ಗಳು, ಸಹಾಯಕ ಸಿಬ್ಬಂದಿ ಹಾಗೂ ಅವರೊಂದಿಗಿರುವ ಅಧಿಕಾರಿಗಳನ್ನು ವೈರಸ್ಗೆ ಬಲಿಯಾಗುವ ಅಪಾಯಕ್ಕೆ ಸಿಲುಕಿಸಲು ಬಯಸುವುದಿಲ್ಲ’’ ಎಂದು ರಾಷ್ಟ್ರೀಯ ರೈಫಲ್ ಸಂಸ್ಥೆಯ ಅಧಿಕಾರಿಗಳು ತಿಳಿಸಿದ್ದಾರೆ.
ನಿಕೊಸಿಯಾದಲ್ಲಿ ನಡೆಯಲಿರುವ ಶೂಟಿಂಗ್ ವಿಶ್ವಕಪ್ನಲ್ಲಿ ಭಾರತವನ್ನು ಪ್ರತಿನಿಧಿಸಬೇಕಾಗಿದ್ದ ಇಬ್ಬರು ಶೂಟರ್ಗಳು ಈ ಕುರಿತು ಪ್ರತಿಕ್ರಿಯೆ ನೀಡಿದ್ದು, ನಾವು ಟೂರ್ನಿಯಿಂದ ಹಿಂದಕ್ಕೆ ಸರಿಯುವ ಕುರಿತ ವಿಚಾರವನ್ನು ಕೇಳಿದ್ದೇವೆ. ಆದರೆ ಈ ವಿಚಾರವನ್ನು ಅಧಿಕೃತವಾಗಿ ದೃಢಪಡಿಸಿಕೊಳ್ಳಲು ಎದುರು ನೋಡುತ್ತಿದ್ದೇವೆ ಎಂದಿದ್ದಾರೆ.
ಚೀನಾದ ವುಹಾನ್ನಲ್ಲಿ ಕಾಣಿಸಿಕೊಂಡಿರುವ ಮಾರಣಾಂತಿಕ ಕೊರೋನ ವೈರಸ್ 3,000ಕ್ಕೂ ಅಧಿಕ ಜನರನ್ನು ಬಲಿ ಪಡೆದುಕೊಂಡಿದ್ದು, ವಿಶ್ವದಲ್ಲಿ ಸುಮಾರು 80,000 ಮಂದಿ ಸೋಂಕಿಗೆ ತುತ್ತಾಗಿದ್ದಾರೆ.
ಭಾರತ ಮಾ.16ರಿಂದ 26ರ ತನಕ ಡಾ.ಕರ್ಣಿ ಸಿಂಗ್ ರೇಂಜ್ನಲ್ಲಿ ವಿಶ್ವಕಪ್ನ ಆತಿಥ್ಯವಹಿಸಿಕೊಂಡಿದೆ. ಶಾಟ್ಗನ್ ವಿಶ್ವಕಪ್ ಆತಿಥ್ಯದ ಹಕ್ಕು ಪಡೆದಿದ್ದ ಸೈಪ್ರಸ್ನಲ್ಲಿ ಈ ತನಕ ಕೊರೋನ ವೈರಸ್ ಪ್ರಕರಣ ಖಚಿತವಾಗಿಲ್ಲ. ಮುಂಜಾಗ್ರತಾ ಕ್ರಮವಾಗಿ ಶಂಕಿತ ದಂಪತಿಯ ಮೇಲೆ ನಿಗಾವಹಿಸಲಾಗಿದೆ.
ಕೊರೋನ ವೈರಸ್ ಭೀತಿಯಿಂದಾಗಿ ವಿಶ್ವದಾದ್ಯಂತ ಪ್ರಮುಖ ಕ್ರೀಡಾ ಸ್ಪರ್ಧೆಗಳನ್ನು ಒಂದೋ ಮುಂದೂಡಲಾಗುತ್ತಿದೆ ಅಥವಾ ರದ್ದುಪಡಿಸಲಾಗುತ್ತಿದೆ. ಜಪಾನ್ ಹಾಗೂ ಇಟಲಿ ಒಳಗೊಂಡಿರುವ ಹಲವು ಫುಟ್ಬಾಲ್ ಪಂದ್ಯಗಳು, ಬಾಕ್ಸಿಂಗ್ ಒಲಿಂಪಿಕ್ಸ್ ಕ್ವಾಲಿಫೈಯರ್, ಬ್ಯಾಡ್ಮಿಂಟನ್ ಟೂರ್ನಮೆಂಟ್ಗಳು ಹಾಗೂ ಆರ್ಚರಿ ಸ್ಪರ್ಧೆಗಳು ಕೊರೋನ ವೈರಸ್ ಭೀತಿಯಿಂದ ಬಾಧಿತವಾಗಿವೆ.
ಯುರೋಪ್ ಲೀಗ್ ಪಂದ್ಯಗಳು ಸಹಿತ ಇತರ ಟೂರ್ನಿಗಳನ್ನು ಮುಚ್ಚಿದ ಬಾಗಿಲಲ್ಲಿ ಆಡಲಾಗುತ್ತಿದೆ. ಬಾಕ್ಸಿಂಗ್ ಒಲಿಂಪಿಕ್ಸ್ ಕ್ವಾಲಿಫೈಯರ್ ಟೂರ್ನಿಯನ್ನು ವುಹಾನ್ನಿಂದ ಜೋರ್ಡಾನ್ಗೆ ಸ್ಥಳಾಂತರಿಸಲಾಗಿದೆ. ಹೊಸದಿಲ್ಲಿಯಲ್ಲಿ ನಡೆಯಲಿರುವ ಶೂಟಿಂಗ್ ವಿಶ್ವಕಪ್ ಮೇಲೆ ಕೊರೋನ ವೈರಸ್ ಬಾಧಿತವಾಗಿದ್ದು, ಸುಮಾರು ಏಳು ದೇಶಗಳು ಟೂರ್ನಿಯಿಂದ ಹಿಂದೆ ಸರಿದಿವೆ. ಈ ತಿಂಗಳಾರಂಭದಲ್ಲಿ ಭಾರತ ಸರಕಾರ ಚೀನಾದ ಕುಸ್ತಿಪಟುಗಳಿಗೆ ಏಶ್ಯನ್ ಕುಸ್ತಿ ಚಾಂಪಿಯನ್ಶಿಪ್ನಲ್ಲಿ ಭಾಗವಹಿಸಲು ವೀಸಾ ನಿರಾಕರಿಸಿತ್ತು.
ಸೈಪ್ರಸ್ನಲ್ಲಿ ನಿಗದಿಯಾಗಿರುವ ಶಾಟ್ಗನ್ ಟೂರ್ನಮೆಂಟ್ನಲ್ಲಿ ಭಾರತದ ಶೂಟಿಂಗ್ ತಂಡದಲ್ಲಿ ಮನ್ವಜಿತ್ ಸಿಂಗ್ ಸಂಧು, ಶ್ರೇಯಸಿ ಸಿಂಗ್, ಲಕ್ಷ ಶೆರೋನ್, ಅಂಗದ್ ವೀರ್ ಸಿಂಗ್ ಬಾಜ್ವಾ ಹಾಗೂ ಮೈರಾಜ್ ಅಹ್ಮದ್ ಖಾನ್ ಅವರಿದ್ದಾರೆ. ಭಾರತದ ಶೂಟರ್ಗಳು ಮಾ.2 ಹಾಗೂ 4ರಂದು ಸೈಪ್ರಸ್ಗೆ ತೆರಳುವ ಕಾರ್ಯಕ್ರಮವಿತ್ತು.
