ಶತಮಾನದಲ್ಲೊಮ್ಮೆ ಕಾಣಿಸಿಕೊಳ್ಳುವ ವೈರಸ್ ಕೊರೋನ: ಬಿಲ್ ಗೇಟ್ಸ್

ಶಿಕಾಗೊ (ಅಮೆರಿಕ), ಫೆ. 29: ಕೊರೋನವೈರಸ್ ಸೊಂಕು ಹರಡುವಿಕೆಯ ವೇಗವನ್ನು ತಗ್ಗಿಸಲು ಸಾಧ್ಯವಾಗುವಂತೆ, ಕಡಿಮೆ ಮತ್ತು ಮಧ್ಯಮ ಆದಾಯದ ದೇಶಗಳ ಆರೋಗ್ಯ ವ್ಯವಸ್ಥೆಯನ್ನು ಬಲಪಡಿಸುವುದಕ್ಕಾಗಿ ಆ ದೇಶಗಳಿಗೆ ನೆರವು ನೀಡುವಂತೆ ಮೈಕ್ರೋಸಾಫ್ಟ್ ಸ್ಥಾಪಕ ಬಿಲ್ ಗೇಟ್ಸ್ ಶ್ರೀಮಂತ ದೇಶಗಳಿಗೆ ಕರೆ ನೀಡಿದ್ದಾರೆ.

ಅದೇ ವೇಳೆ, ಕೊರೋನವೈರಸನ್ನು ಅವರು ‘ಶತಮಾನದಲ್ಲಿ ಒಮ್ಮೆ ಕಾಣಿಸಿಕೊಳ್ಳುವ’ ವೈರಸ್ ಎಂಬುದಾಗಿ ಬಣ್ಣಿಸಿದ್ದಾರೆ.

‘‘ಆಫ್ರಿಕ ಮತ್ತು ದಕ್ಷಿಣ ಏಶ್ಯದ ದೇಶಗಳಿಗೆ ನೆರವಾಗಿ. ಈ ಮೂಲಕ ಪ್ರಾಣಗಳನ್ನು ಉಳಿಸಲು ಹಾಗೂ ಜಾಗತಿಕ ಮಟ್ಟದಲ್ಲಿ ಕೊರೋನವೈರಸ್ ಹರಡುವುದನ್ನು ತಡೆಯಲು ನಾವು ಸಿದ್ಧರಾದಂತೆ ಆಗುತ್ತದೆ’’ ಎಂದು ಅವರು ‘ನ್ಯೂ ಇಂಗ್ಲೆಂಡ್ ಜರ್ನಲ್ ಆಫ್ ಮೆಡಿಸಿನ್’ನಲ್ಲಿ ಬರೆದ ಸಂಪಾದಕೀಯದಲ್ಲಿ ಹೇಳಿದ್ದಾರೆ.

ಚೀನಾದಲ್ಲಿ ಹುಟ್ಟಿಕೊಂಡಿರುವ ನೋವೆಲ್-ಕೊರೋನವೈರಸ್ ಈಗ 46 ದೇಶಗಳಿಗೆ ಹರಡಿದೆ. ಈ ಹಿಂದೆ ಕಾಣಿಸಿಕೊಂಡಿರುವ ಮರ್ಸ್ ಅಥವಾ ಸಾರ್ಸ್ ಎಂಬ ರೋಗಗಳಿಗೆ ಕಾರಣವಾಗುವ ವೈರಸ್‌ಗಳ ಕುಟುಂಬಕ್ಕೆ ನೋವೆಲ್-ಕೊರೋನವೈರಸ್ ಸೇರಿದೆಯಾದರೂ, ಅದನ್ನು ನಿಯಂತ್ರಣಕ್ಕೆ ತರುವುದು ತುಂಬಾ ಕಷ್ಟವಾಗಿದೆ ಎಂದು ಗೇಟ್ಸ್ ಬರೆದಿದ್ದಾರೆ.

ರೋಗದ ವಿರುದ್ಧ ಜಾಗತಿಕ ಮಟ್ಟದಲ್ಲಿ ಹೋರಾಡಲು ಬಿಲ್ ಆ್ಯಂಡ್ ಮೆಲಿಂಡಾ ಗೇಟ್ಸ್ ಫೌಂಡೇಶನ್ ಈಗಾಗಲೇ 100 ಮಿಲಿಯ ಡಾಲರ್ (ಸುಮಾರು 721 ಕೋಟಿ ರೂಪಾಯಿ) ದೇಣಿಗೆಯನ್ನು ಘೋಷಿಸಿದೆ.