ಯೂರೋಪ್, ಇಂಗ್ಲೆಂಡ್ನಲ್ಲೂ ಸಿಎಎ ವಿರೋಧಿ ಪ್ರತಿಭಟನೆ
ಲಂಡನ್ : ಭಾರತದಲ್ಲಿ ಜಾರಿಗೆ ತಂದಿರುವ ಪೌರತ್ವ ತಿದ್ದುಪಡಿ ಕಾಯ್ದೆ ರದ್ದತಿಗೆ ಆಗ್ರಹಿಸಿ ಇಂಗ್ಲೆಂಡ್ ಹಾಗೂ ಯೂರೋಪ್ನ ವಿವಿಧೆಡೆಗಳಲ್ಲಿ ದೊಡ್ಡ ಸಂಖ್ಯೆಯ ವಿದ್ಯಾರ್ಥಿಗಳು, ಮಾನವ ಹಕ್ಕು ಹೋರಾಟಗಾರರು ಮತ್ತು ಭಾರತೀಯ ಮೂಲದವರು ಭಾರತೀಯ ಹೈಕಮಿಷನ್ ಮುಂದೆ ಶನಿವಾರ ಬೃಹತ್ ಪ್ರತಿಭಟನೆ ನಡೆಸಿದರು.
ಸ್ಕೂಲ್ ಆಫ್ ಓರಿಯಂಟಲ್ ಮತ್ತು ಆಫ್ರಿಕನ್ ಸ್ಟಡೀಸ್ನಲ್ಲಿ ಭಾರತೀಯರು, ಸೌತ್ ಏಷ್ಯನ್ ಸ್ಟೂಡೆಂಟ್ಸ್ ಎಗೆನಿಸ್ಟ್ ಫ್ಯಾಸಿಸಂ ಮತ್ತು ಸೌತ್ ಏಷ್ಯಾ ಸಾಲಿಡಾರಿಟಿ ಗ್ರೂಪ್ ಸದಸ್ಯರು ದೆಹಲಿ ಹಿಂಸಾಚಾರ ಹಾಗೂ ಸಿಎಎ ಕಾಯ್ದೆ ವಿರುದ್ಧ ಹೋರಾಟಗಾರರು ಪ್ರತಿಭಟನೆ ನಡೆಸಿದರು.
ಲಂಡನ್ನಲ್ಲಿ ಮಾತ್ರವಲ್ಲದೇ ಯೂರೋಪ್ನಾದ್ಯಂತ ಸುಮಾರು 17 ನಗರಗಳಲ್ಲಿ ಪ್ರತಿಭಟನೆ ನಡೆಯಿತು. ಪ್ಯಾರೀಸ್, ಬರ್ಲಿನ್, ಬ್ರುಸ್ಸೆಲ್ಸ್, ಜಿನೀವಾ ಮತ್ತಿತರ ನಗರಗಳಲ್ಲಿ, "ದೆಹಲಿ ಹಿಂಸಾಚಾರದಲ್ಲಿ ಸಂತ್ರಸ್ತರಾದವರ ಬೆಂಬಲಕ್ಕೆ ನಾವು ನಿಲ್ಲುತ್ತೇವೆ" ಎಂಬ ಸಂದೇಶದೊಂದಿಗೆ ಬೃಹತ್ ಪ್ರತಿಭಟನೆಗಳನ್ನು ನಡೆಸಲಾಯಿತು.
"ವಿಶ್ವ ಇದನ್ನು ತಕ್ಷಣ ಗಮನಿಸಿ, ತುರ್ತಾರಿ ಸ್ಪಂದಿಸದಿದ್ದರೆ, ಇದರ ಪರಿಣಾಮಗಳು ಮಾರಕವಾಗಲಿವೆ" ಎಂದು ಎಸ್ಒಎಎಸ್ ಇಂಡಿಯನ್ ಸೊಸೈಟಿ ಪ್ರಕಟಣೆಯಲ್ಲಿ ಹೇಳಿದೆ.
ಪ್ರತಿಭಟನಾಕಾರರು ಭಾರತದ ಗೃಹ ಸಚಿವ ಅಮಿತ್ ಶಾ ಅವರ ರಾಜೀನಾಮೆಗೆ ಒತ್ತಾಯಿಸುವ ಘೋಷಣೆ ಕೂಗಿದರು. ರಾಜಧಾನಿಯಲ್ಲೇ ಶಾಂತಿ ಕಾಪಾಡಲು ವಿಫಲವಾದ ಗೃಹ ಸಚಿವರು ರಾಜೀನಾಮೆ ನೀಡಬೇಕು ಹಾಗೂ ದೆಹಲಿ ಹಿಂಸಾಚಾರಕ್ಕೆ ಕುಮ್ಮಕ್ಕು ನೀಡಿದ ಬಿಜೆಪಿ ಮುಖಂಡರನ್ನು ಬಂಧಿಸಬೇಕು ಎಂದು ಒತ್ತಾಯಿಸಿದರು. ದೆಹಲಿ ಘಟನೆಯನ್ನು ಖಂಡಿಸಿ ಬ್ರಿಟನ್ ಸರ್ಕಾರ ಹೇಳಿಕೆ ನೀಡಬೇಕು ಎಂದು ಹೇಳಿದರು.
