ಏಕದಿನ ಸರಣಿ: ಝಿಂಬಾಬ್ವೆ ವಿರುದ್ಧ ಕ್ಲೀನ್ ಸ್ವೀಪ್‌ಗೈದ ಬಾಂಗ್ಲಾದೇಶ

ಢಾಕಾ, ಮಾ.7: ಬಾಂಗ್ಲಾದೇಶ ತಂಡ ಝಿಂಬಾಬ್ವೆ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಕ್ಲೀನ್‌ಸ್ವೀಪ್ ಸಾಧಿಸಿದೆ. ಆರಂಭಿಕ ಬ್ಯಾಟ್ಸ್ ಮನ್ ಲಿಟನ್ ದಾಸ್ 176 ರನ್ ಸಿಡಿಸಿ ರಾಷ್ಟ್ರೀಯ ದಾಖಲೆ ನಿರ್ಮಿಸಿದ್ದಾರೆ.

  ಶುಕ್ರವಾರ ರಾತ್ರಿ ಇಲ್ಲಿ ನಡೆದ ಮಳೆಬಾಧಿತ ಮೂರನೇ ಹಾಗೂ ಅಂತಿಮ ಪಂದ್ಯದಲ್ಲಿ ಡಿ/ಎಲ್ ಪದ್ಧ್ದತಿಯ ಪ್ರಕಾರ ಬಾಂಗ್ಲಾದೇಶ 123 ರನ್‌ಗಳ ಅಂತರದ ಜಯ ಸಾಧಿಸಿತು. ದಾಸ್ ಹಾಗೂ ತಮೀಮ್ ಇಕ್ಬಾಲ್(ಔಟಾಗದೆ 128)ಮೊದಲ ವಿಕೆಟ್ ಜೊತೆಯಾಟದಲ್ಲಿ 292 ರನ್ ಸೇರಿಸಿ ಬಾಂಗ್ಲಾಕ್ಕೆ ಭದ್ರ ಬುನಾದಿ ಹಾಕಿಕೊಟ್ಟರು. ಈ ಇಬ್ಬರು ಬಾಂಗ್ಲಾದ ಪರ ಮೊದಲ ವಿಕೆಟ್‌ನಲ್ಲಿ ಗರಿಷ್ಠ ರನ್ ಸೇರಿಸಿದ ಸಾಧನೆ ಮಾಡಿದರು. ಬಾಂಗ್ಲಾದೇಶ 43 ಓವರ್‌ಗಳಲ್ಲಿ 3 ವಿಕೆಟ್‌ಗಳ ನಷ್ಟಕ್ಕೆ 322 ರನ್ ಗಳಿಸಿತು. ಮಳೆ ಬಾಧಿತ ಪಂದ್ಯದಲ್ಲಿ ಝಿಂಬಾಬ್ವೆಗೆ 43 ಓವರ್‌ಗಳಲ್ಲಿ 342 ರನ್ ಪರಿಷ್ಕೃತ ಗುರಿ ನೀಡಲಾಯಿತು. ಸತತ ನಾಲ್ಕನೇ ಬಾರಿ ಬಾಂಗ್ಲಾದೇಶ ವಿರುದ್ಧ ಕ್ಲೀನ್‌ಸ್ವೀಪ್ ತಪ್ಪಿಸಿಕೊಳ್ಳುವ ಗುರಿಯೊಂದಿಗೆ ರನ್ ಚೇಸಿಂಗ್‌ಗೆ ತೊಡಗಿದ್ದ ಝಿಂಬಾಬ್ವೆ 37.3 ಓವರ್‌ಗಳಲ್ಲಿ 218 ರನ್ ಗಳಿಸಲಷ್ಟೇ ಶಕ್ತವಾಯಿತು.

 143 ಎಸೆತಗಳನ್ನು ಎದುರಿಸಿದ ದಾಸ್ 16 ಬೌಂಡರಿ ಹಾಗೂ 8 ಸಿಕ್ಸರ್‌ಗಳ ಸಹಾಯದಿಂದ ಏಕದಿನ ಕ್ರಿಕೆಟ್‌ನಲ್ಲಿ ಮೂರನೇ ಹಾಗೂ ಸರಣಿಯಲ್ಲಿ ಎರಡನೇ ಶತಕ(176)ಸಿಡಿಸಿದರು. 176 ರನ್ ಗಳಿಸುವುದರೊಂದಿಗೆ ಮೂರು ದಿನಗಳ ಹಿಂದೆ ಬಾಂಗ್ಲಾದ ಪರ ಗರಿಷ್ಠ ವೈಯಕ್ತಿಕ ಸ್ಕೋರ್ ಗಳಿಸಿದ್ದ ಸಹ ಆಟಗಾರ ಇಕ್ಬಾಲ್(158)ದಾಖಲೆಯನ್ನು ದಾಸ್ ಮುರಿದರು.

ಇಕ್ಬಾಲ್ ಏಕದಿನ ಕ್ರಿಕೆಟ್‌ನಲ್ಲಿ 13ನೇ ಹಾಗೂ ಸರಣಿಯಲ್ಲಿ ಸತತ ಎರಡನೇ ಶತಕವನ್ನು ಕೇವಲ 109 ಎಸೆತಗಳಲ್ಲಿ ಪೂರೈಸಿದರು. ಔಟಾಗದೆ 128 ರನ್ ಗಳಿಸಿದ ಇಕ್ಬಾಲ್‌ರ ಇನಿಂಗ್ಸ್‌ನಲ್ಲಿ 7 ಬೌಂಡರಿ ಹಾಗೂ ಆರು ಸಿಕ್ಸರ್‌ಗಳಿದ್ದವು.

 34ನೇ ಓವರ್‌ನಲ್ಲಿ ಪಂದ್ಯಕ್ಕೆ ಮಳೆ ಅಡ್ಡಿಸಿದ್ದಾಗ ದಾಸ್ ಹಾಗೂ ಇಕ್ಬಾಲ್ 182 ರನ್ ಸೇರಿಸಿದ್ದರು. ಮಳೆ ನಿಂತ ಬಳಿಕ 7.3 ಓವರ್‌ಗಳಲ್ಲಿ ಇನ್ನೂ 110 ರನ್ ಗಳಿಸಿದರು. ಮಳೆ ಅಡ್ಡಿಪಡಿಸುವ ಮೊದಲೇ ದಾಸ್ ಶತಕ ಪೂರೈಸಿದರು. ದಾಸ್ 107 ರನ್ ಗಳಿಸಿದ್ದಾಗ ನೋ-ಬಾಲ್, 122 ಹಾಗೂ 144 ರನ್ ಗಳಿಸಿದ್ದಾಗ ಸಿಕಂದರ್ ರಾಝಾ ಹಾಗೂ ವೆಸ್ಲೆ ಮಧೆವೆರ್‌ರಿಂದ ಜೀವದಾನ ಪಡೆದಿದ್ದರು. ಕಾರ್ಲ್ ಮುಂಬಾ ಎಸೆತದಲ್ಲಿ ದಾಸ್ ಔಟಾದರು. ಇದರೊಂದಿಗೆ ಕೊನೆಗೂ ದೊಡ್ಡ ಜೊತೆಯಾಟವೊಂದು ಮುರಿದು ಬಿತ್ತು. ಏಕದಿನ ಕ್ರಿಕೆಟ್ ಇತಿಹಾಸದಲ್ಲಿ ದಾಸ್-ಇಕ್ಬಾಲ್ ಮೊದಲ ವಿಕೆಟ್‌ನಲ್ಲಿ ಮೂರನೇ ಶ್ರೇಷ್ಠ ಜೊತೆಯಾಟ ನಡೆಸಿದರು.

ಮುಂಬಾ ಅವರು ಮಹ್ಮೂದುಲ್ಲಾ(3)ಹಾಗೂ ಆರಿಫ್ ಹುಸೈನ್(7) ವಿಕೆಟ್ ಪಡೆದರು. 8 ಓವರ್‌ಗಳಲ್ಲಿ 69 ರನ್‌ಗೆ 3 ವಿಕೆಟ್ ಪಡೆದು ಯಶಸ್ವಿ ಬೌಲರ್ ಎನಿಸಿಕೊಂಡರು.

ಬಾಂಗ್ಲಾದೇಶ ಮೊದಲ ಏಕದಿನ ಪಂದ್ಯವನ್ನು ದಾಖಲೆ 169 ರನ್ ಅಂತರದಿಂದ ಗೆದ್ದುಕೊಂಡಿತ್ತು. ಎರಡನೇ ಪಂದ್ಯವನ್ನು 4 ರನ್‌ಗಳಿಂದ ಜಯಿಸಿದೆ.