ಮುಖ್ಯಮಂತ್ರಿ ಆಗುವ ಬಯಕೆ ನನಗಿಲ್ಲ: ರಜನೀಕಾಂತ್

ಚೆನ್ನೈ, ಮಾ.12: ‘‘ನಾನು ಎಂದಿಗೂ ಮುಖ್ಯಮಂತ್ರಿಯಾಗುವ ಬಯಕೆ ಹೊಂದಿರಲಿಲ್ಲ. ರಾಜಕೀಯದಲ್ಲಿ ಬದಲಾವಣೆ ತಂದು, ಹೊಸ ನಾಯಕರುಗಳನ್ನು ಬೆಳೆಸುವುದೇ ನನ್ನ ಬಯಕೆಯಾಗಿತ್ತು'' ಎಂದು ದಕ್ಷಿಣ ಭಾರತದ ಖ್ಯಾತ ನಟ ರಜನೀಕಾಂತ್ ಗುರುವಾರ ಅಭಿಮಾನಿಗಳನ್ನು ಉದ್ದೇಶಿಸಿ ಮಾತನಾಡುತ್ತಾ ಹೇಳಿದ್ದಾರೆ.

‘‘ನಾನು ಸಿಎಂ ಆಗಲು ಬಯಸಿದ್ದರೆ, 1996ರಲ್ಲಿ ಆಗುತ್ತಿದ್ದೆ. ನನಗೆ ಸಿಎಂ ಆಗುವ ಬಯಕೆ ಇಲ್ಲ ಎಂದು ಮೊದಲ ಬಾರಿ ನಾನು ಹೇಳುತ್ತಿಲ್ಲ. 2017ರ ಡಿಸೆಂಬರ್ 31ರಂದು ಇದೇ ಮಾತನ್ನು ಹೇಳಿದ್ದೇನೆ’’ ಎಂದು ಚೆನ್ನೈ ಹೊಟೇಲ್‌ನ ಹೊರಗೆ ಸುದ್ದಿಗಾರರಿಗೆ ರಜನೀಕಾಂತ್ ತಿಳಿಸಿದರು.

 "ನಾನು ಪಕ್ಷದ ಮುಖ್ಯಸ್ಥನಾಗುವೆ. ಆದರೆ, ಸಿಎಂ ಆಗುವುದಿಲ್ಲ ಎಂದು ನನ್ನ ಎಲ್ಲ ಹಿತೈಷಿಗಳು ಹಾಗೂ ಸ್ನೇಹಿತರಿಗೆ ನಾನು ಮಾಹಿತಿ ನೀಡಿರುವೆ. ಜನರು ಇದನ್ನು ಸ್ವೀಕರಿಸುವುದಿಲ್ಲ. ನೀವು ಇತರ ಪಕ್ಷಗಳಿಗೆ ಹೋಗಿ ಎಂದು ಕೆಲವು ಅಭಿಮಾನಿಗಳು ಎಚ್ಚರಿಕೆಯ ಸಂದೇಶ ನೀಡಿದರು. ಇತರ ಪಕ್ಷದೊಂದಿಗೆ ಕೆಲಸ ಮಾಡಲು ನನಗಿಷ್ಟವಿಲ್ಲ. ನಾನು ರಾಜಕೀಯದಲ್ಲಿ ಬದಲಾವಣೆ ಮಾಡಲು ಬಯಸಿದ್ದೇನೆ. ಹೊಸ ನಾಯಕರುಗಳನ್ನು ಸೃಷ್ಟಿಸಿ, ಜನರಲ್ಲಿ ವಿಶ್ವಾಸ ಮೂಡಿಸಲು ಬಯಸಿದ್ದೇನೆ’’ ಎಂದರು.