ಸದನದಲ್ಲಿ 28 ಗಂಟೆ ‘ನಮ್ಮ ಸಂವಿಧಾನ ನಮ್ಮ ಹೆಮ್ಮೆ’ ಚರ್ಚೆ: ಸ್ಪೀಕರ್ ಕಾಗೇರಿ

ಬೆಂಗಳೂರು, ಮಾ.16: ನಮ್ಮ ದೇಶವು ಸಂವಿಧಾನವನ್ನು ಸಮರ್ಪಿಸಿಕೊಂಡು 70 ವರ್ಷಗಳು ಪೂರೈಸಿರುವ ಶುಭ ಸಂದರ್ಭದಲ್ಲಿ ಸಂವಿಧಾನದ ಕುರಿತು ನಾವು ಹಮ್ಮಿಕೊಂಡಿರುವ ‘ನಮ್ಮ ಸಂವಿಧಾನ ನಮ್ಮ ಹೆಮ್ಮೆ’ ವಿಶೇಷ ಚರ್ಚೆಯಲ್ಲಿ 47 ಸದಸ್ಯರು ಸುಮಾರು 28 ಗಂಟೆಗಳ ಕಾಲ ಚರ್ಚೆ ನಡೆಸಿದ್ದಾರೆ ಎಂದು ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ತಿಳಿಸಿದ್ದಾರೆ.

ಸೋಮವಾರ ವಿಧಾನಸಭೆಯಲ್ಲಿ ನಡೆದ ಸಂವಿಧಾನದ ಮೇಲಿನ ವಿಶೇಷ ಚರ್ಚೆಯ ಸಮಾರೋಪ ಭಾಷಣ ಮಾಡಿದ ಅವರು, ರಾಜ್ಯದ ಇತಿಹಾಸದಲ್ಲಿ 15ನೆ ವಿಧಾನಸಭೆಯ 6ನೆ ಅಧಿವೇಶನವು ಸುವರ್ಣಾಕ್ಷರಗಳಲ್ಲಿ ಬರೆದಿಡಬಹುದಾದ್ದೆಂದು ನಾವೆಲ್ಲರೂ ಭಾವಿಸಿದ್ದೇವೆ ಎಂದರು.

ಈ ಸಂದರ್ಭದಲ್ಲಿ ಸದನದ ಸದಸ್ಯರು ವ್ಯಕ್ತಪಡಿಸಿರುವ ಭಾವನೆ ಹಾಗೂ ಅಭಿಪ್ರಾಯಗಳು ಮುಂದಿನ ದಿನಗಳಿಗೆ ಅನುಕೂಲವಾಗುವಂತವುಗಳಾಗಿವೆ. ತಮ್ಮ ಸಲಹೆ, ಸೂಚನೆಗಳನ್ನು ಕ್ರೋಡೀಕರಿಸಿ ರಾಷ್ಟ್ರಪತಿ, ಪ್ರಧಾನಮಂತ್ರಿ, ಲೋಕಸಭಾಧ್ಯಕ್ಷರು ಹಾಗೂ ನ್ಯಾಯಾಂಗ ಸೇರಿದಂತೆ ಎಲ್ಲ ಸಂವಿಧಾನಾತ್ಮಕ ಸಂಸ್ಥೆಗಳಿಗೆ ತಲುಪಿಸಲು ಅಗತ್ಯ ಕ್ರಮ ಕೈಗೊಳ್ಳಲಾಗುವುದು ಎಂದು ಸ್ಪೀಕರ್ ಹೇಳಿದರು.

ಭಾರತದ ಆಧುನಿಕ ಚರಿತ್ರೆಯ ಅಧ್ಯಾಯದಲ್ಲಿ ಸ್ವಾತಂತ್ರ್ಯ ಹೋರಾಟ, ಸ್ವಾತಂತ್ರ್ಯ ಗಳಿಕೆ ಹಾಗೂ ಸಂವಿಧಾನ ರಚನೆ ಬಹು ಮುಖ್ಯವಾದವು. ಸ್ವಾತಂತ್ರ್ಯ ಹೋರಾಟಗಾರರ ತ್ಯಾಗ, ಬಲಿದಾನಗಳಿಂದ ಸ್ವಾತಂತ್ರಗಳಿಸಿ ರಾಜ್ಯ ನೀತಿಜ್ಞರ ಮುಂದಾಲೋಚನೆಯಿಂದ ಆಡಳಿತಕ್ಕಾಗಿ ‘ ಸಂವಿಧಾನ’ವನ್ನು ರಚಿಸಿಕೊಟ್ಟಿದ್ದಾರೆ ಎಂದು ಅವರು ತಿಳಿಸಿದರು.

ಸಂವಿಧಾನಶಿಲ್ಪಿ ಡಾ.ಬಾಬಾ ಸಾಹೇಬ್ ಅಂಬೇಡ್ಕರ್ ನೇತೃತ್ವದಲ್ಲಿ ರಚಿತವಾದ ‘ಸಂವಿಧಾನ’ವು ಇರುವುದರಿಂದ ನಾವಿದ್ದೇವೆ ಎನ್ನುವುದು ನನ್ನ ಪ್ರಾಮಾಣಿಕ ತಿಳುವಳಿಕೆ, ಸಂವಿಧಾನದಿಂದಾಗಿ ಶಾಸಕಾಂಗ, ಕಾರ್ಯಾಂಗ ಮತ್ತು ನ್ಯಾಯಾಂಗಗಳು ತಮ್ಮ ಕರ್ತವ್ಯಗಳನ್ನು ನಿರ್ವಹಿಸುವಂತಾಗಿದೆ ಎಂದು ಸ್ಪೀಕರ್ ಹೇಳಿದರು.

ಈ ನಿಟ್ಟಿನಲ್ಲಿ ನಾವು ಶಿಕ್ಷಣ, ಆರೋಗ್ಯ, ಆಡಳಿತ, ನ್ಯಾಯ ವಿತರಣಾ ವ್ಯವಸ್ಥೆ, ರಾಜಕೀಯ ಶಿಕ್ಷಣ, ಮೀಸಲಾತಿ ನೀತಿ ಮೊದಲಾದವುಗಳನ್ನು ರೂಪಿಸಿಕೊಂಡಿದ್ದೇವೆ. ಇಂತಹ ಶಿಸ್ತುಬದ್ಧ ವ್ಯವಸ್ಥೆ ರೂಪುಗೊಂಡಿರುವುದು ನಮ್ಮ ಸಂವಿಧಾನದ ಸದಾಶಯಗಳಾದ ನ್ಯಾಯ, ಸಮಾನತೆ ಮತ್ತು ಸ್ವಾತಂತ್ರಗಳಿಂದ ಹಾಗೂ ಸಂವಿಧಾನದ 448 ವಿಧಿಗಳ ನೀತಿಗಳಿಂದ ಎಂದರೆ ಅಶಿಶಯೋಕ್ತಿಯಲ್ಲ ಎಂದು ಕಾಗೇರಿ ತಿಳಿಸಿದರು.

ಸೌರಮಂಡಲದ ನವಗ್ರಹಗಳಿದ್ದಂತೆ ಸಂವಿಧಾನ ಒಂಭತ್ತು ಆದರ್ಶಗಳಾದ ಸಾರ್ವಭೌಮ, ಸಮಾಜವಾದಿ, ಸರ್ವಧರ್ಮ ಸಮಭಾವ, ಪ್ರಜಾಸತ್ತಾತ್ಮಕ, ಗಣರಾಜ್ಯ, ನ್ಯಾಯ, ಸ್ವಾತಂತ್ರ್ಯ, ಸಮಾನತೆ ಹಾಗೂ ಭ್ರಾತೃಭಾವನೆಗಳಿವೆ ಎಂದು ಅವರು ಹೇಳಿದರು.

ಸಂವಿಧಾನ ಹೇಳಿರುವ ಆದರ್ಶ ಮತ್ತು ಮೌಲ್ಯಗಳಿಂದಾಗಿ ನಾವು ಸಾಗಬೇಕಾದ ದಾರಿ ಇನ್ನೂ ಇದೆ. ನಮ್ಮ ಜನತೆಯ ಜೀವನಾಡಿಯಾಗಿರುವ ಕೃಷಿ ಕ್ಷೇತ್ರದ ಬೆಳವಣಿಗೆಗೆ ಆದ್ಯತೆ, ಗ್ರಾಮೀಣ ಹಾಗೂ ನಗರಾಭಿವೃದ್ಧಿ, ಪ್ರತಿ ಪ್ರಜೆಗೂ ಶಿಕ್ಷಣವನ್ನು ನೀಡಬೇಕಾದ ಜವಾಬ್ದಾರಿ, ಸೂರಿಲ್ಲದ ನಾಗರಿಕನಿಗೆ ಸೂರು ಒದಗಿಸಬೇಕಾದ ಹೊಣೆಗಾರಿಕೆ, ಅಪೌಷ್ಠಿಕತೆಯಿಂದ ಬಳಲುತ್ತಿರುವ ಜನತೆಗೆ ಪೌಷ್ಠಿಕಾಂಶವನ್ನು ತಲುಪಿಸಬೇಕಾದ ಕರ್ತವ್ಯ ಎಂದು ಅವರು ತಿಳಿಸಿದರು.

ನಿರುದ್ಯೋಗದೊಂದಿಗೆ ಹಸನಾದ ಬದುಕಿಗೆ ಶ್ರಮಿಸುತ್ತಿರುವ ಯುವಜನತೆಗೆ ಉದ್ಯೋಗದ ನೆರವನ್ನು ಕೊಡ ಮಾಡಬೇಕಾಗಿದೆ. ಇಂತಹ ಅನೇಕ ಹೊಣೆಗಾರಿಕೆಗಳನ್ನು ನಿರ್ವಹಿಸಬೇಕಾದ ಕರ್ತವ್ಯ ಮತ್ತು ಜವಾಬ್ದಾರಿ 15ನೆ ವಿಧಾನಸಭೆಯ ಸದಸ್ಯರಾದ ನಮ್ಮೆಲ್ಲರ ಮೇಲಿದೆ ಎಂದು ಸ್ಪೀಕರ್ ಹೇಳಿದರು.

1949ರ ನವೆಂಬರ್ 26ರಂದು ಸಂವಿಧಾನವನ್ನು ಸಮರ್ಪಿಸಿಕೊಂಡಂತೆ ಸಮಾಜದ ಕಟ್ಟಕಡೆಯ ವ್ಯಕ್ತಿಗೂ ಸಂವಿಧಾನದ ಮೂಲಭೂತ ಕರ್ತವ್ಯ ಮತ್ತು ಮೂಲಭೂತ ಹಕ್ಕುಗಳನ್ನು ತಲುಪಿಸುತ್ತೇವೆ ಎನ್ನುವ ಪ್ರಾಮಾಣಿಕ ಭರವಸೆಯನ್ನು ರಾಜ್ಯದ ಜನತೆಗೆ ನಾವೆಲ್ಲರೂ ನೀಡೋಣ ಎಂದು ಸ್ಪೀಕರ್ ತಿಳಿಸಿದರು.

ಪಕ್ಷಭೇದ ಮರೆತು ‘ ಸಂವಿಧಾನದ ಆಶಯಗಳೆ ನಮ್ಮ ಆದರ್ಶಗಳು, ಸಂವಿಧಾನದ ತಿರುಳೆ ನಮ್ಮ ಮಂತ್ರ, ಸಂವಿಧಾನದ ವಿಧಿಗಳೆ ನಮ್ಮ ಮಾರ್ಗಸೂಚಿಗಳು’ ಎಂದು ವಿಧಾನಸಭೆಯ ಸದಸ್ಯರಾದ ನಾವು ಈ ದಿವಸ ಪ್ರತಿಜ್ಞೆ ಮಾಡೋಣ ಎಂದು ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ಹೇಳಿದರು.

ಭಾವುಕರಾದ ಸ್ಪೀಕರ್

ಸಂವಿಧಾನದ ಮೇಲಿನ ಚರ್ಚೆಯ ಸಮಾರೋಪ ಭಾಷಣ ಪೂರ್ಣಗೊಳಿಸಿದ ಬಳಿಕ ಸದನದಲ್ಲಿ ನಡೆದ ಅರ್ಥಪೂರ್ಣ ಚರ್ಚೆ ಕುರಿತು ಮಾತನಾಡುವ ವೇಳೆ ಕೆಲಕಾಲ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ಭಾವುಕರಾದರು.