ಕೊರೋನಾ ವೈರಸ್ ಭೀತಿ: ಮನಪಾದಿಂದ ಹಲವು ಸಲಹಾ ಸೂಚನೆಗಳು, ತರಬೇತಿ
ಮಂಗಳೂರು, ಮಾ.18: ಕೊರೋನಾ ವೈರಸ್ ಭೀತಿ ಹಿನ್ನೆಲೆಯಲ್ಲಿ ಜನಸಾಮಾನ್ಯರು, ಪೇಯಿಂಗ್ ಗೆಸ್ಟ್/ ಹಾಸ್ಟೆಲ್ಗಳು, ಹೊಟೇಲ್ಗಳು, ಪಾರ್ಕ್-ಜಿಮ್ಗಳು, ವಸತಿ ಸಮುಚ್ಚಯಗಳ ಅಸೋಸಿಯೇಶನ್ಗಳಿಗೆ ಮಂಗಳೂರು ಮಹಾನಗರ ಪಾಲಿಕೆಯ ವತಿಯಿಂದ ಕೆಲವೊಂದು ನಿರ್ದಿಷ್ಟ ಸಲಹೆ ಸೂಚನೆಗಳನ್ನು ನೀಡಲಾಗಿದ್ದು, ಅದರ ಪ್ರತಿಗಳನ್ನು ಮೇಯರ್ ದಿವಾಕರ್ ಇಂದು ಬಿಡುಗಡೆಗೊಳಿಸಿದರು.
ಪಾಲಿಕೆಯ ಮಂಗಳಾ ಸಭಾಂಗಣದಲ್ಲಿ ಸದಸ್ಯರು ಹಾಗೂ ಸಿಬ್ಬಂದಿಗೆ ಅಗತ್ಯ ಮುಂಜಾಗೃತಾ ಕ್ರಮಗಳು, ಜನರಿಗೆ ಮಾಹಿತಿ ನೀಡುವ ನಿಟ್ಟಿನಲ್ಲಿ ಕೈಗೊಳ್ಳಬೇಕಾದ ಕ್ರಮಗಳ ಕುರಿತಂತೆ ಆಯೋಜಿಸಲಾದ ತರಬೇತಿ ಕಾರ್ಯಕ್ರಮದಲ್ಲಿ ಈ ಭಿತ್ತಿ ಪತ್ರಗಳನ್ನು ಬಿಡುಗಡೆ ಗೊಳಿಸಲಾಯಿತು. ತರಬೇತಿಯ ಬಳಿಕ ಮೇಯರ್ ಅವರ ವಾಹನ ಸೇರಿದಂತೆ ನಗರದ ಸಿಟಿ ಬಸ್ಸುಗಳಿಗೆ ಕೊರೊನಾ ವೈರಸ್ ಬಗ್ಗೆ ಜಾಗೃತಿ ಮೂಡಿಸುವ ಪೋಸ್ಟರ್ಗಳನ್ನು ಸಾಂಕೇತಿಕವಾಗಿ ಅಂಟಿಸಲಾಯಿತು.
ಮನಪಾದಿಂದ ವಾರ್ಡ್ ಮಟ್ಟದಲ್ಲಿ ತಂಡದಿಂದ ಜಾಗೃತಿ
ಮಂಗಳೂರು ಮಹಾನಗರ ಪಾಲಿಕೆಯ ವತಿಯಿಂದ ಆಯಾ ವಾರ್ಡ್ಗಳ ಸದಸ್ಯರ ನೇತೃತ್ವದಲ್ಲಿ ಮನಪಾ ಕಾರ್ಯನಿರ್ವಾಹಕ ಇಂಜನಿಯರ್, ಆರೋಗ್ಯ- ಕಂದಾಯ ಅಧಿಕಾರಿಗಳನ್ನು ಒಳಗೊಂಡ ತಂಡ ಮಾ. 18ರ ಮಧ್ಯಾಹ್ನದಿಂದ ವಾರ್ಡ್ ಮಟ್ಟದಲ್ಲಿ ಮನೆ ಮನೆ ಭೇಟಿ ಮೂಲಕ ಜಾಗೃತಿ ಮೂಡಿಸುವ ಕೆಲಸ ಮಾಡಲಿದೆ ಎಂದು ಮನಪಾ ಜಂಟಿ ಆಯುಕ್ತ ಡಾ. ಸಂತೋಷ್ ಕುಮಾರ್ ಮಾಹಿತಿ ನೀಡಿದರು.
ಮನಪಾ ವತಿಯಿಂದ ನೀಡಲಾದ ಪ್ರಮುಖ ಸಲಹೆ ಮತ್ತು ಸೂಚನೆಗಳ ಕುರಿತಂತೆ ಪಾಲಿಕೆ ಆಯುಕ್ತ ಶಾನಾಡಿ ಅಜಿತ್ ಹೆಗ್ಡೆಯವರು ಮಾಹಿತಿ ನೀಡಿದರು.
ಪೇಯಿಂಗ್ ಗೆಸ್ಟ್ ಅಥವಾ ಹಾಸ್ಟೆಲ್ ಗಳಲ್ಲಿ ವಾಸಿಸುವ ವಿದ್ಯಾರ್ಥಿಗಳಿಗೆ ಅವರ ಶಿಕ್ಷಣ ಸಂಸ್ಥೆಗಳು ರಜಾದಿನಗಳನ್ನು ಘೋಷಿಸಿದ್ದರೆ ಮನೆಗೆ ತೆರಳಲು ಸೂಚಿಸುವುದು.
ಹಾಸ್ಟೆಲ್ / ಪಿಜಿಯಲ್ಲಿ ಉಳಿಯಲು ನಿರ್ಧರಿಸಿದರೆ, ಸರ್ಕಾರದ ಸಲಹೆಯಂತೆ ವೈಯಕ್ತಿಕ ನೈರ್ಮಲ್ಯ ಕ್ರಮಗಳ ಬಗ್ಗೆ ಅವರಿಗೆ ಅರಿವು ಮೂಡಿ ಸಲು ಕ್ರಮ ಕೈಗೊಳ್ಳುವುದು ಹಾಗೂ ಸ್ವಚ್ಚತೆ ಕಾಪಡಿಕೊಳ್ಳುವುದು ಆಯಾ ಸಂಸ್ಥೆಗಳ ಮಾಲೀಕರು / ವ್ಯವಸ್ಥಾಪಕರ ಕಡ್ಡಾಯ ಜವಾಬ್ದಾರಿಯಾಗಿದೆ.
110 ಚದರ ಅಡಿ ವಾಸಿಸುವ ಕೋಣೆಗಳಲ್ಲಿ (ಅಡಿಗೆ, ಶೌಚಾಲಯ / ಸ್ನಾನಗೃಹ ಹೊರತುಪಡಿಸಿ), 2 ಕ್ಕಿಂತ ಹೆಚ್ಚು ನಿವಾಸಿಗಳಿಗೆ ಅವಕಾಶ ನೀಡಬಾರದು. ಪೇಯಿಂಗ್ ಗೆಸ್ಟ್ ಅಥವಾ ಹಾಸ್ಟೆಲ್ ಮಾಲೀಕರು / ವ್ಯವಸ್ಥಾಪಕರು ಪರ್ಯಾಯ ವಸತಿ ಸೌಕರ್ಯಗಳನ್ನು ನೋಡಲು ಸೂಕ್ತ ಸಮಯವನ್ನು ನೀಡದೆ ಮೇಲಿನ ಕಾರಣವನ್ನು ಉಲ್ಲೇಖಿಸಿ ನಿವಾಸಿಗಳನ್ನು ಬಲವಂತವಾಗಿ ಹೊರಹಾಕುವಂತಿಲ್ಲ.
ಹೊಟೇಲ್ಗಳಲ್ಲಿ ಗ್ರಾಹಕರಿಗೆ ಕುಡಿಯಲು ಕಡ್ಡಾಯವಾಗಿ ಬಿಸಿ ನೀರು ಒದಗಿಸುವುದು. ಸಿಬ್ಬಂದಿಗಳು ಹ್ಯಾಂಡ್ ಗ್ಲೌಸ್, ಮಾಸ್ಕ್ ಧರಿಸುವುದು ಹಾಗು ವೈಯಕ್ತಿಕ ಶುಚಿತ್ವ ಕಾಪಾಡಿಕೊಳ್ಳುವುದು. ವ್ಯಕ್ತಿಯು ಸ್ಪರ್ಶಿಸಬಹುದಾದ ಯಾವುದೇ ಮೇಲ್ಮೈಯನ್ನು ಸೋಡಿಯಂ ಹೈಪೋಕ್ಲೋರೈಟ್, ಬ್ಲೀಚಿಂಗ್ ಪೌಡರ್ ಅಥವಾ ಇನ್ನಾವುದೇ ಪರಿಣಾಮಕಾರಿ ಸೋಂಕು ನಿವಾರಕದಿಂದ ನಿಯತಕಾಲಿಕವಾಗಿ ಸ್ವಚ್ಚ ಗೊಳಿಸಬೇಕು.
ವಸತಿ ಸಮುಚ್ಚಯಗಳ ಆವರಣದಲ್ಲಿ ಎಲ್ಲಾ ರೀತಿಯ ಸಾಮೂಹಿಕ ಸಭೆಗಳನ್ನು ಕಡ್ಡಾಯವಾಗಿ ನಿಷೇಧಿಸಲಾಗಿದೆ. ಜಿಮ್ಗಳು, ಈಜು ಕೊಳಗಳು, ಮನರಂಜನಾ ಕ್ಲಬ್ ಹಾಗೂ ಇತರ ಕ್ರೀಡಾ ಸೌಲಭ್ಯಗಳನ್ನು ನಿರ್ದಿಷ್ಟ ಅವಧಿಗೆ ಮುಚ್ಚಬೇಕು. ಬೇಸಿಗೆ ಶಿಬಿರದ ಚಟುವಟಿಕೆಗಳು ಹಾಗೂ ಹೊರಾಂಗಣ ಚಟುವಟಿಕೆಗಳನ್ನು ನಿಷೇಧಿಸಲಾಗಿದೆ. ಲಿಫ್ಟ್ಗಳು ಹಾಗೂ ಮುಚ್ಚಿದ ಸ್ಥಳಗಳು ಸಾಂಕ್ರಾಮಿಕ ರೋಗದ ಮೂಲವಾದ್ದ ರಿಂದ ನಿಯತವಾಗಿ ಸ್ವಚ್ಛಗೊಳಿಸಬೇಕು.
ಮಕ್ಕಳು - ಹಿರಿಯ ನಾಗರಿಕರ ಬಗ್ಗೆ ಹೆಚ್ಚಿನ ಗಮನ ನೀಡಿ
ವೈರಸ್ಗಳು ವ್ಯಕ್ತಿಯಿಂದ ವ್ಯಕ್ತಿಗೆ ಹರಡಿ ಕೆಮ್ಮು, ನೆಗಡಿ, ಜ್ವರ ಹಾಗೂ ಉಸಿರಾಟದ ತೊಂದರೆ ಕಾಣಿಸಿಕೊಳ್ಳುವುದರಿಂದ ಪ್ರತಿಯೊಬ್ಬರು ಕೈತೊಳೆಯುತ್ತಿರುವ ಜತೆಗೆ ಮನೆಯಲ್ಲಿನ ಮಕ್ಕಳು ಹಾಗೂ ಹಿರಿಯ ನಾಗರಿಕರ ಆರೋಗ್ಯದ ಬಗ್ಗೆ ಹೆಚ್ಚಿನ ಕಾಳಜಿ ವಹಿಸಬೇಕು ಎಂದು ಪಾಲಿಕೆ ಆಯುಕ್ತ ಶಾನಾಡಿ ಅಜಿತ್ ಹೆಗ್ಡೆ ನಾಗರಿಕರಿಗೆ ಸಲಹೆ ನೀಡಿದ್ದಾರೆ.
ಮುಖ ಕವಚ ಎಲ್ಲರೂ ಧರಿಸಬೇಕಾಗಿಲ್ಲ. ನೆಗಡಿ, ಕೆಮ್ಮು ಪೀಡಿತರು ತಮ್ಮ ಸೋಂಕು ಇತರರಿಗೆ ಹರಡದಂತೆ ಇರಲು ಇದನ್ನು ಧರಿಸುವುದು ಸೂಕ್ತ. ಮುಖ ಕವಚವನ್ನು ಒಂದು ಬಾರಿ ಎಂಟು ಗಂಟೆ ಉಪಯೋಗಿಸಿದ ಬಳಿಕ ಮತ್ತೆ ಉಪಯೋಗಿಸಬಾರದು. ಅದಕ್ಕಾಗಿ ಸ್ವಚ್ಛವಾದ ಕರವಸ್ತ್ರವನ್ನು ಕೆಮ್ಮುವಾಗ, ಸೀನುವಾಗ ಉಪಯೋಗಿಸಬೇಕು. ಪೌಷ್ಠಿಕರ ಆಹಾರ ಸೇವನೆಯಿಂದ ರೋಗ ನಿರೋಧಕ ಶಕ್ತಿ ಹೆಚ್ಚಾಗುತ್ತದೆ. ಹಾಗಾಗಿ ಮನೆಯಲ್ಲಿಯೇ ಆಹಾರ ತಯಾರಿಸಿ, ಬಿಸಿಯಾಗಿಯೇ ಸೇವಿಸಬೇಕು. ಜನಜಂಗುಳಿಯಿಂದ ದೂರವಿದ್ದು, ಕುದಿಸಿ ಆರಿಸಿದ ನೀರನ್ನೇ ಕುಡಿುಬೇಕು ಎಂದು ಅವರು ಹೇಳಿದ್ದಾರೆ.
