ಆರ್ಥಿಕತೆ ರಕ್ಷಣೆಗಾಗಿ ಪಾಶ್ಚಿಮಾತ್ಯ ದೇಶಗಳಿಂದ ಟ್ರಿಲಿಯ ಡಾಲರ್ ಯೋಜನೆ

ರೋಮ್ (ಇಟಲಿ), ಮಾ. 19: "ನೋವೆಲ್-ಕೊರೋನ ವೈರಸ್ ಸಾಂಕ್ರಾಮಿಕ ರೋಗದ ವಿರುದ್ಧ ನಾವು ನಮ್ಮನ್ನು ಯುದ್ಧೋಪಾದಿಯಲ್ಲಿ ತೊಡಗಿಸಿಕೊಂಡಿದ್ದು, ಜಾಗತಿಕ ಆರ್ಥಿಕತೆಯ ರಕ್ಷಣೆಗಾಗಿ ಸುಮಾರು ಒಂದು ಟ್ರಿಲಿಯ ಡಾಲರ್ (ಸುಮಾರು 75 ಲಕ್ಷ ಕೋಟಿ ರೂಪಾಯಿ) ಮೊತ್ತವನ್ನು ಬಿಡುಗಡೆ ಮಾಡಲಾಗಿದೆ" ಎಂದು ಪಾಶ್ಚಿಮಾತ್ಯ ದೇಶಗಳು ಹೇಳಿವೆ.

ಸಾಂಕ್ರಾಮಿಕ ಉದ್ಭವಿಸಿದ ಚೀನಾದಲ್ಲಿ ಪರಿಸ್ಥಿತಿ ಸುಧಾರಿಸುತ್ತಿದ್ದರೆ, ಯುರೋಪ್, ಅಮೆರಿಕ ಮತ್ತು ಇತರ ದೇಶಗಳಲ್ಲಿ ಪರಿಸ್ಥಿತಿ ದಿನದಿಂದ ದಿನಕ್ಕೆ ಹದಗೆಡುತ್ತಿದೆ.

ಇಟಲಿಯಲ್ಲಿ ಒಂದೇ ದಿನದಲ್ಲಿ 475 ಮಂದಿ ಮೃತಪಟ್ಟಿದ್ದು ಅಲ್ಲಿನ ಪರಿಸ್ಥಿತಿಯ ಭೀಕರತೆಯನ್ನು ತೋರಿಸಿದೆ. ಇದು ಆ ದೇಶದ ಅತ್ಯಧಿಕ ದೈನಂದಿನ ಸಾವಿನ ಸಂಖ್ಯೆಯಾಗಿದೆ.

ಕೊರೋನವೈರಸ್‌ನಿಂದಾಗಿ ಪಾತಾಳಕ್ಕೆ ಕುಸಿದಿರುವ ಜಾಗತಿಕ ಆರ್ಥಿಕತೆಯನ್ನು ಮೇಲೆತ್ತುವುದಕ್ಕಾಗಿ ಜಾಗತಿಕ ನೀತಿನಿರೂಪಕರು ಹಲವಾರು ಕ್ರಮಗಳನ್ನು ಈ ವಾರ ಘೋಷಿಸಿದ್ದಾರೆ.

 ಯುರೋಪಿಯನ್ ಸೆಂಟ್ರಲ್ ಬ್ಯಾಂಕ್ ಬುಧವಾರ 750 ಬಿಲಿಯ ಯುರೋ ಬಾಂಡ್ ಖರೀದಿ ಯೋಜನೆಯನ್ನು ಪ್ರಕಟಿಸಿದೆ. ಇದಕ್ಕೂ ಕೆಲವು ದಿನಗಳ ಮೊದಲು, ಇದೇ ಬ್ಯಾಂಕ್ ಬಿಗ್-ಬ್ಯಾಂಕ್ ಉತ್ತೇಜಕ ಪ್ಯಾಕೇಜೊಂದನ್ನು ಘೋಷಿಸಿತ್ತು. ಆದರೆ, ಆತಂಕಿತ ಮಾರುಕಟ್ಟೆಗಳನ್ನು ತಣಿಸಲು ಅದು ವಿಫಲವಾಗಿತ್ತು.

ಆಸ್ಟ್ರೇಲಿಯದ ಸೆಂಟ್ರಲ್ ಬ್ಯಾಂಕ್ ದಾಖಲೆ ಪ್ರಮಾಣದಲ್ಲಿ ಬಡ್ಡಿ ದರಗಳನ್ನು ಕಡಿಮೆ ಮಾಡಿದೆ.

ನಾನು ಯುದ್ಧಕಾಲೀನ ಅಧ್ಯಕ್ಷ: ಟ್ರಂಪ್

‘‘ನಾನು ಒಂದು ರೀತಿಯಲ್ಲಿ ನನ್ನನ್ನು ಯುದ್ಧಕಾಲೀನ ಅಧ್ಯಕ್ಷ ಎಂಬುದಾಗಿ ಪರಿಗಣಿಸುತ್ತೇನೆ. ನಾನೀಗ ಅದೇ (ಯುದ್ಧಕಾಲೀನ ಅಧ್ಯಕ್ಷನ) ಕೆಲಸವನ್ನು ಮಾಡುತ್ತಿದ್ದೇನೆ’’ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬುಧವಾರ ಹೇಳಿದರು.

ಇದೇ ಸಂದರ್ಭದಲ್ಲಿ, ದೇಶದಲ್ಲಿ ಕೊರೋನವೈರಸ್ ರೋಗಿಗಳ ಸಂಖ್ಯೆ ಭಾರೀ ಪ್ರಮಾಣದಲ್ಲಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಸಾಂಕ್ರಾಮಿಕವನ್ನು ನಿಯಂತ್ರಿಸಲು ಸೇನಾ ಆಸ್ಪತ್ರೆ ನೌಕೆಗಳನ್ನು ನಿಯೋಜಿಸಿದ್ದೇನೆ ಎಂದು ಅವರು ಹೇಳಿದರು.

ಅಮೆರಿಕ: 100 ಬಿಲಿಯ ಡಾಲರ್ ತುರ್ತು ನೆರವು

 ಕೊರೋನವೈರಸ್ ಬಿಕ್ಕಟ್ಟಿನಿಂದ ಆರ್ಥಿಕವಾಗಿ ಕಂಗೆಟ್ಟಿರುವ ಅಮೆರಿಕನ್ನರಿಗೆ ನೆರವು ನೀಡುವುದಕ್ಕಾಗಿ ಘೋಷಿಸಲಾಗಿರುವ 100 ಬಿಲಿಯ ಡಾಲರ್ (ಸುಮಾರು 7.50 ಲಕ್ಷ ಕೋಟಿ ರೂಪಾಯಿ) ಪ್ಯಾಕೇಜ್‌ಗೆ ಸೆನೆಟ್ ಬುಧವಾರ ಅಂಗೀಕಾರ ನೀಡಿದೆ.

ಈ ಪ್ಯಾಕೇಜ್ ಮೂಲಕ ಜನರಿಗೆ ಉಚಿತ ಕೊರೋನವೈರಸ್ ಪರೀಕ್ಷೆ ನಡೆಸಲಾಗುವುದು, ಕಾಯಿಲೆ ವೇತನ (ಕಾಯಿಲೆ ಅವಧಿಯಲ್ಲಿ ಮಾಡುವ ರಜೆಗೆ ವೇತನ) ನೀಡಲಾಗುವುದು ಮತ್ತು ಕುಟುಂಬದೊಂದಿಗೆ ಇರಲು ವೇತನಸಹಿತ ರಜೆ ನೀಡಲಾಗುವುದು.