ಕೊರೋನ ವೈರಸ್ ಹರಡುವಿಕೆ ತಡೆ ಆದೇಶ ಉಲ್ಲಂಘಿಸುವವರ ವಿರುದ್ಧ ಕಠಿಣ ಕ್ರಮ: ಜಿಲ್ಲಾಧಿಕಾರಿ ಜಗದೀಶ್

ಉಡುಪಿ, ಮಾ.19: ಕೊರೋನ ವೈರಸ್ ಹರಡುವಿಕೆಯನ್ನು ತಡೆಯುವ ನಿಟ್ಟಿನಲ್ಲಿ ಸರಕಾರ ಹಾಗೂ ಜಿಲ್ಲಾಡಳಿತಗಳ ಆದೇಶಗಳನ್ನು ಉಲ್ಲಂಘಿಸುವವರ ವಿರುದ್ಧ ಕಠಿಣ ಕ್ರಮಗಳನ್ನು ಕೈಗೊಳ್ಳುವುದಾಗಿ ಉಡುಪಿ ಜಿಲ್ಲಾಧಿಕಾರಿ ಜಿ.ಜಗದೀಶ್ ಎಚ್ಚರಿಸಿದ್ದಾರೆ.

ಜಿಲ್ಲಾಧಿಕಾರಿ ಕಚೇರಿಯಲ್ಲಿಂದು ಕರೆದ ಸುದ್ದಿಗೋಷ್ಠಿಯಲ್ಲಿಂದು ಮಾತನಾಡಿದ ಅವರು, ಜಿಲ್ಲಾಡಳಿತದಿಂದ ಎಪಿಡೆಮಿಕ್ ಡಿಸೀಸ್ ಕಾನೂನಿನ್ವಯ ಕೈಗೊಂಡಿರುವ ಮುಂಜಾಗ್ರತಾ ಕ್ರಮ ಹಾಗೂ ನಿನ್ನೆಯಿಂದ ಜಿಲ್ಲೆಯಾದ್ಯಂತ ಜಾರಿಗೊಳಿಸಿರುವ ಸಿಆರ್‌ಪಿಸಿ 144)3)ರನ್ವಯ ನಿಷೇಧಾಜ್ಞೆಯಿಂದ ಐದಕ್ಕಿಂತ ಹೆಚ್ಚು ಜನ ಸೇರುವ ಯಾವುದೇ ಸಮಾರಂಭ, ಕಾರ್ಯಕ್ರಮಗಳನ್ನು ನಡೆಸುವಂತಿಲ್ಲ. ಇದು ಮುಂದಿನ ಆದೇಶ ಬರುವವರೆಗೂ ಜಾರಿಯಲ್ಲಿರುತ್ತದೆ ಎಂದರು.

ಹೀಗಾಗಿ ಜಿಲ್ಲೆಯಲ್ಲಿ ಇನ್ನು ಯಾವುದೇ ಸಂತೆ, ಜಾತ್ರೆ, ಧಾರ್ಮಿಕ ಕಾರ್ಯಕ್ರಮ, ಹರಕೆಯ ಆಟವಾಗಲಿ, ಯಕ್ಷಗಾನ ಬಯಲಾಟಗಳಾಗಲಿ ನಡೆಯುವಂತಿಲ್ಲ. ಇಂದೇ ರಾತ್ರಿ ಯಾರಾದರೂ ಯಕ್ಷಗಾನ ಆಟ ನಡೆಸಿರುವುದು ಗೊತ್ತಾದರೆ ನಾಳೆಯೇ ಅವರಿಗೆ ನೋಟೀಸು ಜಾರಿಗೊಳಿಸಿ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಸ್ಪಷ್ಟವಾದ ಮಾತು ಗಳಲ್ಲಿ ತಿಳಿಸಿದರು.

ದೇವಸ್ಥಾನ, ಮಠಗಳಲ್ಲೂ ಯಾವುದೇ ಧಾರ್ಮಿಕ ಕಾರ್ಯಕ್ರಮವನ್ನಾಗಲೀ, ಉಪನ್ಯಾಸ ಕಾರ್ಯಕ್ರಮವನ್ನಾಗಲಿ ಏರ್ಪಡಿಸುವಂತಿಲ್ಲ. ಆದೇಶ ಉಲ್ಲಂಘಿಸಿ ಏನಾದರೂ ನಡೆದರೆ ಕ್ರಮ ಖಂಡಿತ. ಈ ಬಗ್ಗೆ ಪೊಲೀಸ್ ಇಲಾಖೆಗೆ ಸ್ಪಷ್ಟ ಸೂಚನೆ ನೀಡಲಾಗಿದೆ. ಸರಕಾರದ ಕಾಯ್ದೆ, ಕಾನೂನನ್ನು ಉಲ್ಲಂಘಿಸಲು, ಸಾರ್ವಜನಿಕರ ಆರೋಗ್ಯದೊಂದಿಗೆ ಆಟವಾಡಲು ಯಾರಿಗೂ ಅವಕಾಶ ನೀಡುವುದಿಲ್ಲ ಎಂದರು.

13 ಮಂದಿ ಮೇಲೆ ನಿಗಾ: ಇತ್ತೀಚೆಗೆ ಕೊಲ್ಲಿ ರಾಷ್ಟ್ರದಿಂದ ಬಂದು ಕೊರೋನ ವೈರಸ್ ಸೋಂಕು ಪತ್ತೆಯಾಗಿರುವ ಕಾಸರಗೋಡಿನ ವ್ಯಕ್ತಿಯೊಂದಿಗೆ ಅದೇ ವಿಮಾನದಲ್ಲಿ ಬಂದವರಲ್ಲಿ 13 ಮಂದಿ ಉಡುಪಿಯವರಿದ್ದು, ಅವರೆಲ್ಲರ ಮಾಹಿತಿಗಳನ್ನು ಕಲೆಹಾಕಿ ಅವರ ಮೇಲೆ ತೀವ್ರ ನಿಗಾ ಇರಿಸಲಾಗಿದೆ. ಆದರೆ ಇವರ್ಯಾರಲ್ಲೂ ಸೋಂಕಿನ ಲಕ್ಷಣ ಈವರೆಗೆ ಕಂಡುಬಂದಿಲ್ಲ ಎಂದು ಡಿಎಚ್‌ಒ ಡಾ.ಸುಧೀರ್‌ ಚಂದ್ರ ಸೂಡ ತಿಳಿಸಿದರು.

ಸಂತೆ ಬಂದ್: ನಿನ್ನೆ ನಿಷೇಧಾಜ್ಞೆ ವಿಧಿಸಿದ್ದರೂ, ಶಿರೂರಿನಲ್ಲಿ ಇಂದು ಸಂತೆ ನಡೆಯಲು ಅವಕಾಶ ನೀಡಿದ ಅಲ್ಲಿನ ಪಿಡಿಓಗೆ ನೋಟೀಸು ಜಾರಿಗೊಳಿಸಲಾಗಿದೆ. ಹಾಗೂ ಸುದ್ದಿ ತಿಳಿದ ತಕ್ಷಣ ತಹಶೀಲ್ದಾರ್‌ರನ್ನು ಕಳುಹಿಸಿ ಸಂತೆಯನ್ನು ನಿಲ್ಲಿಸಲಾಗಿದೆ. ಕೊರೋನ ವೈರಸ್ ಕುರಿತಂತೆ ಯಾರೇ ಆದರೂ ಸಾಮಾಜಿಕ ಜಾಲತಾಣ ಗಳಲ್ಲಿ ಸುಳ್ಳು ಸುದ್ದಿಗಳನ್ನು ಪ್ರಚಾರ ಮಾಡಿದರೆ ಅಂತಹವರ ವಿರುದ್ಧ ಹಾಗೂ ಕಾನೂನು ಉಲ್ಲಂಘಿಸುವವರ ವಿರುದ್ಧ ಕ್ರಮ ಜರಗಿಸುತ್ತೇವೆ. ಇವುಗಳಿಗೆ ಯಾರೂ ಕೂಡಾ ಆಸ್ಪದ ನೀಡಬಾರದು ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ವಿಷ್ಣುವರ್ಧನ್ ತಿಳಿಸಿದರು.

ಸಮಿತಿ ರಚನೆ: ಕೊರೋನ ವೈರಸ್ ಸಮಸ್ಯೆಯನ್ನು ನಿರ್ವಹಿಸಲು ಜಿಲ್ಲಾಧಿಕಾರಿ ಅಧ್ಯಕ್ಷತೆಯಲ್ಲಿ ಜಿಲ್ಲಾ ಸರ್ವೇಕ್ಷಣಾ ಸಮನ್ವಯ ಸಮಿತಿಯನ್ನು ರಚಿಸಲಾಗಿದೆ. ಇದರಲ್ಲಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳು, ಸಿಇಓ, ಡಿಎಚ್‌ಓಗಳಿದ್ದು, ಸಮಿತಿ ತುರ್ತು ಸಭೆಗಳನ್ನು ನಡೆಸಿ ಈ ಕುರಿತು ಕೈಗೊಳ್ಳ ಬೇಕಾದ ಅಗತ್ಯ ಕ್ರಮಗಳ ಕುರಿತು ಪರಿಶೀಲಿಸುತ್ತದೆ ಎಂದರು.

ಕಂಟ್ರೋಲ್‌ರೂಮ್:  ಜಿಲ್ಲೆಯ ಎಲ್ಲಿಂದಲೇ ಆಗಲಿ ಕೊರೋನ ಶಂಕಿತರನ್ನು ಕರೆತರಲು ದಿನದ 24 ಗಂಟೆಗಳ ಕಾಲವೂ ಕಾರ್ಯನಿರ್ವಹಿಸುವ ಅಂಬ್ಯುಲೆನ್ಸ್ ಒಂದನ್ನು ಸನ್ನದ್ಧ ಸ್ಥಿತಿಯಲ್ಲಿರಿಸಲಾಗಿದೆ. ತುರ್ತು ಕರೆಗಳಿಗೆ ಸ್ಪಂಧಿಸಲು ಕಂಟ್ರೋಲ್ ರೂಮ್‌ನ್ನು ತೆರೆಯಲಾಗಿದ್ದು, ಅಗತ್ಯವುಳ್ಳವರು ದೂರವಾಣಿ ಸಂಖ್ಯೆ: 9663957222, 9663950222 ಹಾಗೂ ಆರೋಗ್ಯ ಸಹಾಯವಾಣಿ 104ಕ್ಕೂ ಕರೆ ಮಾಡಬಹುದಾಗಿದೆ ಎಂದರು.

ಜಿಲ್ಲಾ ಸರ್ವೇಕ್ಷಣಾ ಘಟಕದಲ್ಲಿ ಅಗತ್ಯವಿರುವ ಪ್ರಯೋಗಶಾಲಾ ಸಲಕರಣೆ ಗಳನ್ನು, ಮಾಸ್ಕ್, ಪಿಪಿಇ ಇತ್ಯಾದಿಗಳನ್ನು ದಾಸ್ತಾನು ಇರಿಸಲಾಗಿದೆ. ಕೊರೋನ ಸೋಂಕಿನ ಕುರಿತಂತೆ ಮಣಿಪಾಲ ಮಾಹೆಯ ಸ್ಟುಡೆಂಟ್ ಅಫೇರ್ಸ್ ಸಮಿತಿಯಯೊಂದಿಗೆ ನಿರಂತರ ಸಂಪರ್ಕ ದಲ್ಲಿದ್ದು ಸೂಕ್ತ ನಿರ್ದೇಶನಗಳನ್ನು ನೀಡಲಾಗುತ್ತಿದೆ. ವೈದ್ಯಕೀಯ ಸ್ನಾತಕೋತ್ತರ ವಿದ್ಯಾರ್ಥಿಗಳನ್ನು ಹೊರತು ಪಡಿಸಿದರೆ ಉಳಿದೆಲ್ಲಾ ವಿದ್ಯಾರ್ಥಿಗಳನ್ನು ಮನೆಗೆ ಕಳುಹಿಸಲು, ಹಾಸ್ಟೆಲ್‌ಗಳನ್ನು ಮುಚ್ಚಲು ತಿಳಿಸಲಾಗಿದೆ ಎಂದರು.

ಮಾಸ್ಕ್ ಅಥವಾ ಸೆನೆಟೈಸರ್‌ಗಳನ್ನು ಎಂಆರ್‌ಪಿಗಿಂತ ಅಧಿಕ ಬೆಲೆಗೆ ಮಾರಾಟ ಮಾಡಿದರೆ ಜನರು ದೂರು ನೀಡಬಹುದಾಗಿದೆ. ಪ್ರತಿದಿನ ವಿದೇಶಗಳಿಂದ ಬರುವ ಪ್ರಯಾಣಿಕರ ಮೇಲೆ ನಿಗಾ ಇರಿಸಲಾಗಿದೆ. ಈವರೆಗೆ 237 ಮಂದಿ ಹೀಗೆ ಬಂದಿದ್ದು, ಇವರಲ್ಲಿ 27 ಮಂದಿ ಮನೆಯಲ್ಲಿ ನಿಗಾವಣೆ ಅವಧಿಯನ್ನು ಪೂರ್ಣಗೊಳಿಸಿದ್ದಾರೆ ಎಂದರು.

ಜಿಲ್ಲೆಯಲ್ಲಿ ಹಕ್ಕಿ ಜ್ವರ ಪತ್ತೆಯಾಗಿಲ್ಲ. ಆದರೆ ಹೊರಜಿಲ್ಲೆಯಿಂದ ಕೋಳಿಗಳನ್ನು ತರಿಸದಂತೆ ತಿಳಿಸಲಾಗಿದೆ. ಜನರು ಮಾಂಸವನ್ನು ಚೆನ್ನಾಗಿ ಬೇಯಿಸಿ ತಿನ್ನುವಂತೆ ಅವರು ಸಲಹೆ ನೀಡಿದರು. ಜಿಲ್ಲಾಸ್ಪತ್ರೆಯಲ್ಲಿ ರಕ್ತದ ಸಾಕಷ್ಟು ದಾಸ್ತಾನಿದೆ ಎಂದೂ ಅವರು ಹೇಳಿದರು.

ತುರ್ತು ಕೆಲಸವಿಲ್ಲದೇ ಸರಕಾರಿ ಕಚೇರಿಗೆ ಬರಬೇಡಿ

ಸಾರ್ವಜನಿಕರು ತುರ್ತು ಕೆಲಸವಿಲ್ಲದೇ ಸರಕಾರಿ ಕಚೇರಿಗಳಿಗೆ ಬರಲೇಬೇಡಿ ಎಂದು ಮನವಿ ಮಾಡಿದ ಜಿಲ್ಲಾಧಿಕಾರಿ, ತುರ್ತು ಕಾರ್ಯಗಳ ಕುರಿತು ಕಚೇರಿಯ ಮುಖ್ಯಸ್ಥರು ನಿರ್ಧರಿಸಲಿದ್ದಾರೆ. ಸಾಮಾನ್ಯ ಕಾರ್ಯಗಳಿಗೆ ಕಚೇರಿ ಭೇಟಿಯನ್ನು ಕಡಿಮೆಗೊಳಿಸುವಂತೆ ತಿಳಿಸಿದ ಅವರು, ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಅಗತ್ಯ ಕೆಲಸವಿಲ್ಲದ ಯಾರನ್ನೂ ಒಳಗೆ ಬಿಡದಂತೆ ಸೂಚಿಸುವುದಾಗಿ ಜಿ.ಜಗದೀಶ್ ತಿಳಿಸಿದರು.

ಆದರೆ ಸರಕಾರಿ ಅಧಿಕಾರಿಗಳು, ನೌಕರರು ಹಾಗೂ ಸಿಬ್ಬಂದಿಗಳು ಕಡ್ಡಾಯವಾಗಿ ಕಚೇರಿಗೆ ಆಗಮಿಸಬೇಕಾಗಿದೆ ಎಂದರು. ಅಗತ್ಯವಿದ್ದರೆ ದೂರವಾಣಿ, ವಾಟ್ಸ್‌ಅಪ್ ಮೂಲಕ ನಿಮ್ಮ ಕೆಲಸ ಮಾಡಿಕೊಡಲಾಗುವುದು ಎಂದರು.

ಉಡುಪಿ ಜಿಲ್ಲೆಗೆ ಹೊರಜಿಲ್ಲೆ ಹಾಗೂ ಹೊರರಾಜ್ಯಗಳ ಪ್ರವಾಸಿಗರು ಸದ್ಯಕ್ಕೆ ಬರದಂತೆ ಮನವಿ ಮಾಡಿದ ಅವರು, ಇಲ್ಲಿನ ದೇವಸ್ಥಾನ, ಮಠಗಳಿಗೂ ಹೆಚ್ಚು ಹೋಗದಂತೆ ತಿಳಿಸಿದರು. ಆಸ್ಪತ್ರೆಗಳಿಗೂ ತುರ್ತು ಚಿಕಿತ್ಸೆಯ ಅಗತ್ಯವಿದ್ದರೆ ಮಾತ್ರ ಭೇಟಿ ನೀಡಿ, ಚೆಕ್‌ಅಪ್, ಸಲಹೆಗಳಿಗೆ ಸದ್ಯ ಆಸ್ಪತ್ರೆಗೆ ತೆರಳುವ ಅಗತ್ಯವಿಲ್ಲ ಎಂದರು.

ಪರಿಸ್ಥಿತಿ ಗಂಭೀರವಾದರೆ ಜಿಲ್ಲೆಯ ಗಡಿಭಾಗದಲ್ಲಿ ಚೆಕ್‌ಪೋಸ್ಟ್‌ಗಳನ್ನು ಬಿಗುಗೊಳಿಸಿ ಹೊರ ಜಿಲ್ಲೆಗಳಿಂದ ಆಗಮಿಸುವವರನ್ನು ಪರಿಶೀಲಿಸಿ ಬಿಡುವ ಕ್ರಮಕ್ಕೆ ಮುಂದಾಗುತ್ತೇವೆ ಎಂದು ಜಿ.ಜಗದೀಶ್ ತಿಳಿಸಿದರು.