ತಬ್ಲೀಗ್ ಜಮಾಅತ್ ಕೇಂದ್ರದ ಮೇಲೆ ನಿರಾಧಾರ ಆರೋಪ: ಯುನಿವೆಫ್ ಖಂಡನೆ
ಮಂಗಳೂರು,ಎ.1:ಕೇಂದ್ರ ಸರಕಾರವು ದೇಶಾದ್ಯಂತ ಯಾವುದೇ ಮುನ್ಸೂಚನೆ ನೀಡದೆ ಲಾಕ್ಡೌನ್ ಘೋಷಣೆ ಮಾಡಿದಾಗ ದೆಹಲಿಯ ತಬ್ಲೀಗ್ ಜಮಾಅತ್ನ ಕೇಂದ್ರ ಸ್ಥಳವಾದ ನಿಝಾಮುದ್ದೀನ್ನಲ್ಲಿ ಸಾವಿರಾರು ಮಂದಿ ಸಿಲುಕಿಕೊಂಡಿದ್ದರು. ಕೆಲವರು ತಮ್ಮ ವಾಹನಗಳಲ್ಲಿ ಹಿಂತಿರುಗಿದರೂ ಸಾರ್ವಜನಿಕ ವಾಹನ ಸಂಚಾರ ಹಠಾತ್ ನಿಲುಗಡೆಯ ಕಾರಣ ನೂರಾರು ಮಂದಿಗೆ ತಮ್ಮ ಊರುಗಳಿಗೆ ಮರಳಲು ಸಾಧ್ಯವಾಗಲಿಲ್ಲ ಎಂಬ ತಬ್ಲೀಗ್ ಜಮಾಅತ್ನ ಪ್ರಮುಖರ ಸ್ಪಷ್ಟೀಕರಣದ ಬಳಿಕವೂ, ಲಾಕ್ಡೌನ್ನ ಕಾರಣದಿಂದ ಉಂಟಾಗಿರುವ ಗೊಂದಲವನ್ನು ಹಾಗೂ ಜನರ ಸಮಸ್ಯೆಗಳನ್ನು ಬೇರೆಡೆಗೆ ತಿರುಗಿಸಲು, ಕೊರೋನಾ ವೈರಸ್ಸನ್ನು ಈ ಕೇಂದ್ರದಲ್ಲಿರುವವರು ಇತರರಿಗೆ ಪಸರಿಸುತ್ತಿದ್ದಾರೆ ಎಂಬ ಆರೋಪ ಅತ್ಯಂತ ಖೇದಕರವಾಗಿದೆ ಎಂದು ಯುನಿವೆಫ್ ಕರ್ನಾಟಕ ರಾಜ್ಯ ಘಟಕ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಇತರ ಪೂಜಾ ಕೇಂದ್ರಗಳಲ್ಲಿ ಆಶ್ರಯ ಪಡೆದಿರುವವರನ್ನು ಸಿಲುಕಿರುವವರು ಎಂದೂ ನಿಝಾಮುದ್ದೀನ್ನಲ್ಲಿ ಉಳಿದಿರುವವರನ್ನು ಅಡಗಿಕೊಂಡಿರುವವರು ಎಂದೂ ಬಿತ್ತರಿಸುವ ಮಾಧ್ಯಮಗಳು ದ್ವಿಮುಖ ಧೋರಣೆಯನ್ನು ತೋರುತ್ತಿವೆ. ಪ್ರಸಕ್ತ ಸಂದಿಗ್ಧ ಪರಿಸ್ಥಿತಿಯಲ್ಲಿ ದೇಶದ ಆರೋಗ್ಯವನ್ನೂ ಮತ್ತು ದೇಶವಾಸಿಗಳನ್ನೂ ಸಂರಕ್ಷಿಸಬೇಕಾದ ಸಂದರ್ಭದಲ್ಲಿ ಕೋಮುಧ್ರುವೀಕರಣದ ಮೂಲಕ ಸಮಸ್ಯೆಯನ್ನು ಜಟಿಲಗೊಳಿಸುತ್ತಿರುವುದನ್ನು ಖಂಡಿಸಿರುವ ಯುನಿವೆಫ್ ಕರ್ನಾಟಕ ಅಧ್ಯಕ್ಷ ರಫೀಉದ್ದೀನ್ ಕುದ್ರೋಳಿ ಈ ದೇಶದಲ್ಲಿ ಸರ್ವರಿಗೂ ಏಕರೂಪದ ನ್ಯಾಯ ಒದಗಿಸಬೇಕು ಎಂದು ಆಗ್ರಹಿಸಿದ್ದಾರೆ.
