ವಾಟ್ಸ್ಯಾಪ್ ನಲ್ಲಿ ಕೊರೋನ ಕುರಿತ ಸಂದೇಶಕ್ಕೆ ನಿರ್ಬಂಧ, ಕಠಿಣ ಕ್ರಮ: ವೈರಲ್ ಸಂದೇಶದ ಹಿಂದಿನ ಸತ್ಯವೇನು?

ಹೊಸದಿಲ್ಲಿ: ಕೊರೋನ ವೈರಸ್ ಹಾವಳಿ ಹಾಗೂ ಲಾಕ್‍ ಡೌನ್ ಹಿನ್ನೆಲೆಯಲ್ಲಿ ವಾಟ್ಸ್ಯಾಪ್ ಗ್ರೂಪ್ ಅಡ್ಮಿನ್‍ ಗಳು ಎರಡು ದಿನ ಗ್ರೂಪ್‍ ಗಳನ್ನು ಮುಚ್ಚಬೇಕು ಎಂದು ಮನವಿ ಮಾಡುವ ಸಂದೇಶವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ವೈರಸ್ ಕುರಿತಂತೆ ಯಾರಾದರೂ ಜೋಕ್ ಪ್ರಕಟಿಸಿದರೆ ಸೆಕ್ಷನ್ 68, 140 ಹಾಗೂ 188 ಪೊಲೀಸರು ವಾಟ್ಸ್ಯಾಪ್ ಅಡ್ಮಿನ್‍ ಗಳ ಹಾಗೂ ಗ್ರೂಪ್ ಸದಸ್ಯರ ವಿರುದ್ಧ ಕ್ರಮ ಕೈಗೊಳ್ಳುವ ಸಾಧ್ಯತೆಯಿರುವುದರಿಂದ ಗ್ರೂಪ್‍ ಗಳನ್ನು ಮುಚ್ಚಬೇಕೆಂದೂ ಸಂದೇಶದಲ್ಲಿ ಹೇಳಲಾಗಿದೆ.

ಇಂದು (ಎಪ್ರಿಲ್ 7) ಮಧ್ಯರಾತ್ರಿಯಿಂದ ವಿಪತ್ತು ನಿರ್ವಹಣಾ ಕಾಯಿದೆ ಜಾರಿಯಾಗಿದೆ ಹಾಗೂ  ಯಾವುದೇ ಕೊರೋನ ವೈರಸ್ ಕುರಿತಾದ ಸಂದೇಶವನ್ನು ಶೇರ್ ಮಾಡಲು ಸಾಧ್ಯವಿಲ್ಲ ಎಂದೂ ಅದರಲ್ಲಿ  ಬರೆಯಲಾಗಿತ್ತಲ್ಲದೆ  ಜತೆಗೆ “Centre Seeks SC Direction That No Media Should Publish COVID-19 News Without First Ascertaining Facts With Govt” ಎಂದು ಬರೆದು Livelaw.inನ ಲಿಂಕ್ ಒಂದನ್ನು ಲಗತ್ತಿಸಲಾಗಿತ್ತು.

ಹಲವರು ಈ ಸಂದೇಶವನ್ನು ಶೇರ್ ಮಾಡಿದ್ದಾರೆ.

ವಿಪತ್ತು ನಿರ್ವಹಣಾ ಕಾಯಿದೆಯಲ್ಲಿ ಸೆಕ್ಷನ್ 68 ಇದೆಯಾದರೂ ಅದು ನಕಲಿ ಸುದ್ದಿಗಳ ಕುರಿತು ಏನನ್ನೂ ಹೇಳಿಲ್ಲ. ಅದರಲ್ಲಿ ಸೆಕ್ಷನ್ 140 ಹಾಗೂ 188 ಇಲ್ಲವೇ ಇಲ್ಲ. ಆದುದರಿಂದ ಇದೊಂದು ನಕಲಿ ಸಂದೇಶ ಎಂಬುದು ಸ್ಪಷ್ಟ.

ಕೇಂದ್ರ ಸರಕಾರ ವಿಪತ್ತು ನಿರ್ವಹಣಾ ಕಾಯಿದೆ 2005 ಅನ್ನು ಮಾರ್ಚ್ 23ರಂದೇ, ಲಾಕ್ ಡೌನ್ ಘೋಷಿಸಿದಾಗಲೇ ಜಾರಿಗೊಳಿಸಿತ್ತು. ಮತ್ತೆ ಇಂದಿನಿಂದ ಜಾರಿಗೊಳಿಸುವ ಪ್ರಶ್ನೆ ಉದ್ಭವವಾಗುವುದಿಲ್ಲ.

ಸಂದೇಶದ ಜತೆಗೆ ಲಗತ್ತಿಸಲಾದ ಲೈವ್ ಲಾ ಲೇಖನದ ಕುರಿತಂತೆ ಹೇಳುವುದಾದರೆ  ಇದು ಮಾದ್ಯಮಗಳು ಪ್ರಸಾರ ಮಾಡುತ್ತಿರುವ ಕೋವಿಡ್-19 ಕುರಿತಾದ ಮಾಹಿತಿಯ ಬಗ್ಗೆಯಾಗಿದೆಯೇ ಹೊರತು ಇದಕ್ಕೂ ಆ ವೈರಲ್ ಸಂದೇಶಕ್ಕೂ ಸಂಬಂಧವಿಲ್ಲವಾಗಿದೆ. ಒಟ್ಟಾರೆಯಾಗಿ ಈ ಸಂದೇಶ ನಕಲಿ ಎಂಬುದು ಸ್ಪಷ್ಟ.