ಒಂಟಿ ಮಹಿಳೆ-ವಯೋವೃದ್ಧರಿಗೆ ದ.ಕ.ಜಿಲ್ಲಾ ಪೊಲೀಸ್ ಇಲಾಖೆ ಸಹಾಯಹಸ್ತ

ಮಂಗಳೂರು, ಎ.8: ದ.ಕ. ಜಿಲ್ಲಾ ಪೊಲೀಸ್ ಇಲಾಖೆಯ ವ್ಯಾಪ್ತಿಯಲ್ಲಿ ವಾಸವಿರುವ ಒಂಟಿ ಮಹಿಳೆಯರಿಗೆ ಮತ್ತು ವಯೋವೃದ್ದರಿಗೆ ಕೊರೋನ ವೈರಸ್‌ನ ಬಗ್ಗೆ ಸೂಕ್ತ ಮಾಹಿತಿ ನೀಡಲು ಹಾಗೂ ಅವರ ಆರೋಗ್ಯ/ಕುಂದುಕೊರತೆಗಳನ್ನು ಆಲಿಸುವ ದೃಷ್ಟಿಯಿಂದ ಅವರುಗಳಿಗೆ ಕರೆಮಾಡಿ ಸಂಪರ್ಕಿಸುವ ವಿನೂತನ ಕಾರ್ಯಕ್ರಮವನ್ನು ಜಿಲ್ಲಾ ಪೊಲೀಸ್ ಇಲಾಖೆ ಹಮ್ಮಿಕೊಂಡಿದೆ.

ಅದರಂತೆ ಜಿಲ್ಲಾ ಪೊಲೀಸ್ ಘಟಕದ ವ್ಯಾಪ್ತಿಯಲ್ಲಿ ವಾಸವಿರುವ 37,579 ವಯೋವೃದ್ದರ ಹಾಗೂ ಒಬ್ಬಂಟಿಯಾಗಿ ವಾಸಿಸುತ್ತಿರುವ 268 ಮಹಿಳೆಯರ ಮಾಹಿತಿ ಕಲೆಹಾಕಿ ಅವರನ್ನು ನೇರವಾಗಿ ಜಿಲ್ಲಾ ಪೊಲೀಸ್ ಕಚೇರಿಯಿಂದ ಸಂಪರ್ಕಿಸುವ ಕಾರ್ಯ ನಡೆಯುತ್ತಿದೆ. ಈಗಾಗಲೇ ಒಬ್ಬಂಟಿಯಾಗಿ ವಾಸಿಸುತ್ತಿರುವ ಎಲ್ಲಾ ಮಹಿಳೆಯರನ್ನು ಸಂಪರ್ಕಿಸುವ ಕಾರ್ಯಪೂರ್ಣಗೊಂಡಿದ್ದು, ಈವರೆಗೆ 3,571 ವಯೋವೃದ್ದರನ್ನು ಸಂಪರ್ಕಿಸಲಾಗಿದೆ. ಈ ವೇಳೆ ಅವರ ಕುಂದುಕೊರತೆಗಳನ್ನು ಆಲಿಸಿ ಅದನ್ನು ಪರಿಹರಿಸುವ ನಿಟ್ಟಿನಲ್ಲಿ ಪ್ರಾಮಾಣಿಕ ಪ್ರಯತ್ನ ನಡೆಯುತ್ತಿದೆ.

ಇವರುಗಳನ್ನು ಹೊರತುಪಡಿಸಿ ಒಬ್ಬಂಟಿಯಾಗಿ ವಾಸಿಸುತ್ತಿರುವ ವಯೋವೃದ್ಧರಿದ್ದಲ್ಲಿ ಅವರ ಮಾಹಿತಿಯನ್ನು ಪೊಲೀಸ್ ಕಂಟ್ರೋಲ್ ರೂಂ: 0824-2220508ಗೆ ನೀಡಬಹುದು ಎಂದು ದ.ಕ.ಜಿಲ್ಲಾ ಎಸ್ಪಿಯ ಪ್ರಕಟನೆ ತಿಳಿಸಿದೆ.