ಕೇಂದ್ರದಿಂದ ಮಾರ್ಗಸೂಚಿ ಪ್ರಕಟ: ಸಾರ್ವಜನಿಕ ಸ್ಥಳಗಳಲ್ಲಿ ಮಾಸ್ಕ್ ಕಡ್ಡಾಯ,ಉಗುಳಿದರೆ ದಂಡ ಗ್ಯಾರಂಟಿ

ಹೊಸದಿಲ್ಲಿ,ಎ.15: ಕೊರೋನ ವೈರಸ್ ಸಾಂಕ್ರಾಮಿಕ ಪಿಡುಗನ್ನು ನಿಯಂತ್ರಿಸಲು ದೇಶಾದ್ಯಂತ ಘೋಷಿಸಲಾಗಿರುವ ಎರಡನೇ ಹಂತದ ಲಾಕ್‌ಡೌನ್ ಅವಧಿಗಾಗಿ ನಿರ್ದೇಶಗಳನ್ನು ಕೇಂದ್ರ ಗೃಹ ಸಚಿವಾಲಯವು ಬುಧವಾರ ಬಿಡುಗಡೆಗೊಳಿಸಿದೆ. ಇವುಗಳನ್ನು ವಿವಿಧ ಸಚಿವಾಲಯಗಳು ಮತ್ತು ರಾಜ್ಯ ಸರಕಾರಗಳು ಅನುಷ್ಠಾನಿಸಲಿವೆ. ಪ್ರಧಾನಿ ನರೇಂದ್ರ ಮೋದಿ ಅವರು ಮಂಗಳವಾರ ರಾಷ್ಟ್ರವನ್ನುದ್ದೇಶಿಸಿ ಮಾಡಿದ್ದ ಭಾಷಣದಲ್ಲಿ ಎ.14ರವರೆಗೆ ನಿಗದಿಯಾಗಿದ್ದ ದೇಶವ್ಯಾಪಿ ಲಾಕಡೌನ್ ಅನ್ನು ಮೇ 3ರವರೆಗೆ ವಿಸ್ತರಿಸಿ ಘೋಷಿಸಿದ್ದರು.

ಜನರು ಕೆಲಸದ ಸ್ಥಳಗಳು ಸೇರಿದಂತೆ ಸಾರ್ವಜನಿಕ ಸ್ಥಳಗಳಲ್ಲಿ ಮಾಸ್ಕ್ ಧರಿಸುವುದನ್ನು ಕೇಂದ್ರವು ಕಡ್ಡಾಯಗೊಳಿಸಿದೆ. ಸಾರ್ವಜನಿಕ ಸ್ಥಳಗಳು,ಕೆಲಸದ ಸ್ಥಳಗಳು ಮತ್ತು ಸಾರಿಗೆ ಸೌಲಭ್ಯಗಳ ಉಸ್ತುವಾರಿ ಹೊಂದಿರುವವರು ಸಾಮಾಜಿಕ ಅಂತರ ನಿಯಮ ಪಾಲನೆ ಯಾಗುವಂತೆ ಮತ್ತು ಐದಕ್ಕಿಂತ ಹೆಚ್ಚು ಜನರು ಸೇರದಂತೆ ನೋಡಿಕೊಳ್ಳಬೇಕೆಂದು ಕೇಂದ್ರದ ನಿರ್ದೇಶಗಳಲ್ಲಿ ಸೂಚಿಸಲಾಗಿದೆ.

ಎಲ್ಲ ಮದುವೆಗಳು ಮತ್ತು ಅಂತ್ಯಸಂಸ್ಕಾರಗಳ ನಿರ್ವಹಣೆಯನ್ನು ಸಂಬಂಧಿಸಿದ ಜಿಲ್ಲಾಧಿಕಾರಿಗಳು ನಿಯಂತ್ರಿಸಬೇಕು ಎಂದು ನಿರ್ದೇಶ ನೀಡಿದೆ. ಗುಟ್ಕಾ,ತಂಬಾಕು ಉತ್ಪನ್ನಗಳು ಮತ್ತು ಮದ್ಯ ಮಾರಾಟವನ್ನು ನಿಷೇಧಿಸಲಾಗಿದೆ.ಜನರು ಸಾರ್ವಜನಿಕ ಸ್ಥಳಗಳಲ್ಲಿ ಉಗುಳುವುದನ್ನು ನಿಷೇಧಿಸಲಾಗಿದ್ದು,ಇದನ್ನು ಉಲ್ಲಂಘಿಸುವವರಿಗೆ ದಂಡ ವಿಧಿಸಲಾಗುವುದು.

 ಕೆಲಸದ ಸ್ಥಳಗಳಲ್ಲಿ ಥರ್ಮಲ್ ಇಮೇಜಿಂಗ್ ಸಾಧನಗಳು ಮತ್ತು ಸ್ಯಾನಿಟೈಸರ್‌ಗಳ ಸಾಕಷ್ಟು ವ್ಯವಸ್ಥೆಗಳನ್ನು ಮಾಡಬೇಕು. ಸಾಮಾಜಿಕ ಅಂತರವನ್ನು ಕಾಯ್ದುಕೊಳ್ಳಲು ಪಾಳಿಗಳ ನಡುವೆ ಒಂದು ಗಂಟೆಯ ವಿರಾಮವಿರಬೇಕು ಮತ್ತು ಸಿಬ್ಬಂದಿಗಳ ಊಟದ ವಿರಾಮವನ್ನು ಬೇರೆ ಬೇರೆ ಸಮಯಗಳಲ್ಲಿ ವ್ಯವಸ್ಥೆಗೊಳಿಸಬೇಕು. ಎಲ್ಲ ಸಂಸ್ಥೆಗಳು ಪಾಳಿಗಳ ನಡುವೆ ತಮ್ಮ ಕೆಲಸದ ಸ್ಥಳಗಳನ್ನು ಸ್ಯಾನಿಟೈಸ್ ಮಾಡಬೇಕು ಎಂದು ತಿಳಿಸಿರುವ ಸಚಿವಾಲಯವು,ಬೃಹತ್ ಸಭೆಗಳನ್ನು ನಿಷೇಧಿಸಿದೆ.

 65 ವರ್ಷಕ್ಕಿಂತ ಹೆಚ್ಚಿನ ಪ್ರಾಯದ ವ್ಯಕ್ತಿಗಳು,ಇತರ ಅನಾರೋಗ್ಯ ಗಳನ್ನು ಹೊಂದಿರುವವರು ಮತ್ತು ಐದು ವರ್ಷಕ್ಕಿಂತ ಕಡಿಮೆ ಪ್ರಾಯದ ಮಕ್ಕಳ ಹೆತ್ತವರು ಮನೆಯಿಂದಲೇ ಕೆಲಸ ನಿರ್ವಹಿಸಲು ಉತ್ತೇಜಿಸಬೇಕು ಎಂದು ನಿರ್ದೇಶಗಳಲ್ಲಿ ತಿಳಿಸಿಲಾಗಿದೆ.

ಉತ್ಪಾದನಾ ಘಟಕಗಳಲ್ಲಿ ಎಲ್ಲ ಮೇಲ್ಮೈಗಳನ್ನು ಆಗಾಗ್ಗೆ ಸ್ವಚ್ಛಗೊಳಿಸುತ್ತಿರಬೇಕು ಮತ್ತು ಕೈಗಳನ್ನು ತೊಳೆದುಕೊಳ್ಳುವುದನ್ನು ಕಡ್ಡಾಯಗೊಳಿಸಬೇಕು ಎಂದು ತಿಳಿಸಿದೆ.

ಕೃಷಿ ಮತ್ತು ತೋಟಗಾರಿಕೆ ಚಟುವಟಿಕೆಗಳು ಹಾಗೂ ಕೃಷಿ ಉತ್ಪನ್ನಗಳ ಖರೀದಿಗೆ ಎ.20ರಿಂದ ಅವಕಾಶವನ್ನು ಕಲ್ಪಿಸಲು ಸರಕಾರವು ನಿರ್ಧರಿಸಿದೆ.

ಎ.20ರಿಂದ ನೀಡಲಾಗಿರುವ ವಿನಾಯಿತಿಗಳು ಕೋವಿಡ್-19 ಹಾಟ್‌ಸ್ಪಾಟ್‌ಗಳು/ನಿಯಂತ್ರಣ ವಲಯಗಳಿಗೆ ಅನ್ವಯಿಸುವುದಿಲ್ಲ ಮತ್ತು ರಾಜ್ಯ/ಕೇಂದ್ರಾಡಳಿತ ಪ್ರದೇಶಗಳು ಈ ಮಾರ್ಗಸೂಚಿ ಗಳನ್ನು ಯಾವುದೇ ರೀತಿಯಲ್ಲಿಯೂ ದುರ್ಬಲಗೊಳಿಸುವಂತಿಲ್ಲ, ಆದರೆ ಸ್ಥಳೀಯ ಅಗತ್ಯಗಳಿಗೆ ತಕ್ಕಂತೆ ಹೆಚ್ಚು ಕಟ್ಟುನಿಟ್ಟಿನ ಕ್ರಮಗಳನ್ನು ಹೇರಬಹುದಾಗಿದೆ ಎಂದು ಗೃಹ ಸಚಿವಾಲಯವು ಸ್ಪಷ್ಟಪಡಿಸಿದೆ.

ಎ.20ರಿಂದ ಏನೇನು ಇರುತ್ತದೆ....?

ವಿಶೇಷ ಆರ್ಥಿಕ ವಲಯಗಳು,ಕೈಗಾರಿಕಾ ಪ್ರದೇಶಗಳು ಮತ್ತು ಟೌನ್‌ಶಿಪ್‌ಗಳಲ್ಲಿಯ ತಯಾರಿಕೆ ಮತ್ತು ಕೈಗಾರಿಕೆ ಘಟಕಗಳು,ರಫ್ತು ಉದ್ದೇಶದ ಉತ್ಪಾದನಾ ಘಟಕಗಳು ಎ.20ರಿಂದ ಕಾರ್ಯಾರಂಭ ಮಾಡಲಿವೆ

ಹೆದ್ದಾರಿ ಬದಿಯ ಧಾಬಾಗಳು,ಟ್ರಕ್ ರಿಪೇರಿ ಗ್ಯಾರೇಜ್‌ಗಳು, ಸರಕಾರಿ ಚಟುವಟಿಕೆಗಳಿಗಾಗಿ ಕಾಲ್ ಸೆಂಟರ್‌ಗಳು

ಔಷಧಿಗಳು ಮತ್ತು ವೈದ್ಯಕೀಯ ಸಾಧನಗಳ ತಯಾರಿಕೆ ಘಟಕಗಳು,ಆ್ಯಂಬುಲನ್ಸ್‌ಗಳ ತಯಾರಿಕೆ ಸೇರಿದಂತೆ ವೈದ್ಯಕೀಯ ಮೂಲಸೌಕರ್ಯ ನಿರ್ಮಾಣ ಕ್ಷೇತ್ರ

ದಿನಸಿ,ಹಣ್ಣುಗಳು,ತರಕಾರಿ ಅಂಗಡಿಗಳು/ಕೈಗಾಡಿಗಳು,ಹಾಲಿನ ಬೂತ್‌ಗಳು,ಪೌಲ್ಟ್ರಿ ಉತ್ಪನ್ನಗಳು,ಮಾಂಸ ಮತ್ತು ಮೀನು ಮಾರಾಟದ ಅಂಗಡಿಗಳು

ಸ್ವ-ಉದ್ಯೋಗಿಗಳಾದ ಇಲೆಕ್ಟ್ರಿಷಿಯನ್‌ಗಳು,ಐಟಿ ದುರಸ್ತಿ ತಜ್ಞರು,ಪ್ಲಂಬರ್‌ಗಳು,ಮೋಟರ್ ಮೆಕ್ಯಾನಿಕ್‌ಗಳು ಮತ್ತು ಬಡಗಿಗಳಿಗೆ ತಮ್ಮ ವೃತ್ತಿ ನಿರ್ವಹಿಸಲು ಮುಕ್ತ ಅವಕಾಶ

ಏನೇನು ಇರುವುದಿಲ್ಲ...?

ಎಲ್ಲ ಶಿಕ್ಷಣ ಮತ್ತು ತರಬೇತಿ ಸಂಸ್ಥೆಗಳು,ಟಾಕ್ಸಿ,ಆಟೋರಿಕ್ಷಾ,ಸೈಕಲ್ ರಿಕ್ಷಾ ಹಾಗೂ ಕ್ಯಾಬ್ ಅಗ್ರಿಗೇಟರ್‌ಗಳ ಸೇವೆಗಳು,ಸಿನೆಮಾ ಮಂದಿರಗಳು,ಮಾಲ್‌ಗಳು,ಶಾಪಿಂಗ್/ಸ್ಪೋರ್ಟಿಂಗ್ ಸಂಕೀರ್ಣಗಳು, ಜಿಮ್ ಮತ್ತು ಈಜುಗೊಳಗಳು, ಥಿಯೇಟರ್‌ಗಳು ಮತ್ತು ಬಾರ್‌ಗಳು

ಸಾಮಾಜಿಕ,ರಾಜಕೀಯ,ಕ್ರೀಡಾ ಮತ್ತು ಧಾರ್ಮಿಕ ಸಮಾರಂಭಗಳು

ಮೇ 3ರವರೆಗೆ ದೇವಸ್ಥಾನಗಳು,ಮಸೀದಿಗಳು ಮತ್ತು ಚರ್ಚ್‌ಗಳು ಬಂದ್