ಕೊರೋನಾ ನಿಧಿ ಸಂಗ್ರಹಕ್ಕಾಗಿ ಆನ್ಲೈನ್ ಚೆಸ್ ಟೂರ್ನಿ
ಉಡುಪಿ, ಎ.27: ರಾಜ್ಯ ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ, ಯುನೈಟೆಡ್ ಕರ್ನಾಟಕ ಚೆಸ್ ಅಸೋಸಿಯೇಶನ್ ಮತ್ತು ಮೊಬೈಲ್ ಗೇಮಿಂಗ್ ಪ್ಲಾಟ್ಫೋರಂ, ಮೊಬೈಲ್ ಪ್ರೀಮಿಯರ್ ಲೀಗ್(ಎಂಪಿಎಲ್) ಇವುಗಳ ಸಂಯುಕ್ತ ಆಶ್ರಯದಲ್ಲಿ ಕೋವಿಡ್-19 ಪರಿಹಾರ ನಿಧಿ ಸಂಗ್ರಹಕ್ಕಾಗಿ ಆನ್ಲೈನ್ ಚೆಸ್ ಟೂರ್ನಿಯನ್ನು ಏರ್ಪಡಿಸಲಾಗಿದೆ.
ಈ ಟೂರ್ನಿ ಮೇ 2 ಹಾಗೂ ಮೇ 3ರಂದು ಎಂಪಿಎಲ್ ಆ್ಯಪ್ ಮೂಲಕ ನಡೆಯಲಿದೆ. ಈ ಟೂರ್ನಿಯಿಂದ ಬಂದ ಎಲ್ಲ ಹಣವನ್ನು ಕರ್ನಾಟಕದಲ್ಲಿ ಕೋವಿಡ್-19 ಪರಿಹಾರಕ್ಕಾಗಿ ಮುಖ್ಯಮಂತ್ರಿಗಳ ಪರಿಹಾರ ನಿಧಿಗೆ ನೀಡ ಲಾಗುತ್ತದೆ. ಈ ಚೆಸ್ ಟೂರ್ನಿಯಲ್ಲಿ ಎಲ್ಲ ಭಾರತೀಯರಿಗೆ ಭಾಗವಹಿಸಲು ಮುಕ್ತ ಅವಕಾಶ ನೀಡಲಾಗಿದೆ.
ಆಸಕ್ತರು 50 ರೂ. ಪ್ರವೇಶ ಶುಲ್ಕ ಪಾವತಿಸಿ ಹೆಸರು ನೋಂದಾಯಿಸಿಕೊಳ್ಳ ಬಹುದು. ಒಟ್ಟು 10 ಲಕ್ಷ ರೂ. ಬಹುಮಾನ ಮೊತ್ತದ ಈ ಟೂರ್ನಿಯಲ್ಲಿ ಪ್ರಥಮ ಬಹುಮಾನವಾಗಿ 1 ಲಕ್ಷ ರೂ. ನೀಡಲಾಗುವುದು. ದೇಶದಲ್ಲಿ ಎಂಪಿಎಲ್ ಪ್ರಸ್ತುತ 40 ದಶಲಕ್ಷಕ್ಕೂ ಹೆಚ್ಚು ಬಳಕೆದಾರರನ್ನು ಹೊಂದಿದ್ದು, ದೊಡ್ಡ ಸಂಖ್ಯೆಯ ಸ್ಪರ್ಧಿಗಳು ಇದರಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆ ಇದೆ.
ಈ ಟೂರ್ನಿಗೆ ನೋಂದಣಿ ಎಂಪಿಎಲ್ ಆ್ಯಪ್ನಲ್ಲಿ ಮುಕ್ತವಾಗಿರುತ್ತದೆ. ಈ ಆ್ಯಪನ್ನು ಸುರಕ್ಷಿತವಾಗಿ ಎಂಪಿಎಲ್ ವೆಬ್ಸೈಟ್www.mto.oive ನಿಂದ ಡೌನ್ಲೌಡ್ ಮಾಡಿಕೊಳ್ಳಬಹುದು ಎಂದು ಸಂಘಟಕರ ಪ್ರಕಟಣೆ ತಿಳಿಸಿದೆ.
