ಈ ವಲಯಗಳಲ್ಲಿ ಕ್ಷೌರದಂಗಡಿಗಳಿಗೂ ಲಾಕ್ಡೌನ್ನಿಂದ ವಿನಾಯಿತಿ ಭಾಗ್ಯ
ಹೊಸದಿಲ್ಲಿ,ಮೇ 2: ಕೊರೋನ ವೈರಸ್ ಸೋಂಕು ಹರಡುವಿಕೆಯನ್ನು ತಡೆಯಲು ಸೋಮವಾರದಿಂದ ಆರಂಭಗೊಳ್ಳುವ ಮೂರನೇ ಹಂತದ ಲಾಕ್ಡೌನ್ ಅವಧಿಯಲ್ಲಿ ಗ್ರೀನ್ ಮತ್ತು ಆರೆಂಜ್ ವಲಯಗಳಲ್ಲಿ ಕ್ಷೌರದಂಗಡಿಗಳು ಮತ್ತು ಸೆಲೂನ್ಗಳನ್ನು ತೆರೆಯಲು ಅವಕಾಶ ನೀಡಲಾಗುವುದು ಎಂದು ಕೇಂದ್ರ ಗೃಹ ಸಚಿವಾಲಯವು ಶನಿವಾರ ಸ್ಪಷ್ಟಪಡಿಸಿದೆ. ಜೊತೆಗೆ ಇ-ಕಾಮರ್ಸ್ ವೇದಿಕೆಗಳ ಮೂಲಕ ಅತ್ಯಗತ್ಯವಲ್ಲದ ಸರಕುಗಳ ಮಾರಾಟಕ್ಕೂ ಅವಕಾಶ ದೊರೆಯಲಿದೆ.
ಮೇ 3ಕ್ಕೆ ಅಂತ್ಯಗೊಳ್ಳಬೇಕಾಗಿದ್ದ ಎರಡನೇ ಹಂತದ ಲಾಕ್ಡೌನ್ ಅನ್ನು ಶುಕ್ರವಾರ ಮೇ 17ರವರೆಗೆ ಇನ್ನೂ ಎರಡು ವಾರಗಳ ಕಾಲ ವಿಸ್ತರಿಸಿದ್ದ ಗೃಹ ಸಚಿವಾಲಯವು, ಗ್ರೀನ್ ಮತ್ತು ಆರೆಂಜ್ ವಲಯಗಳಲ್ಲಿನ ಹಲವಾರು ನಿರ್ಬಂಧಗಳನ್ನು ಹಿಂದೆಗೆದುಕೊಂಡಿತ್ತು.
ಗ್ರೀನ್ ಮತ್ತು ಆರೆಂಜ್ ವಲಯಗಳಲ್ಲಿ ಇ-ಕಾಮರ್ಸ್ ವೇದಿಕೆಗಳಿಂದ ಅತ್ಯಗತ್ಯವಲ್ಲದ ಸರಕುಗಳ ಮಾರಾಟಕ್ಕೆ ನಿರ್ಬಂಧವಿಲ್ಲ ಮತ್ತು ಈ ವಲಯಗಳಲ್ಲಿ ಕ್ಷೌರದಂಗಡಿ ಮತ್ತು ಸೆಲೂನ್ಗಳನ್ನು ತೆರೆಯಲು ಅನುಮತಿ ನೀಡಲಾಗಿದೆ ಎಂದು ಗೃಹ ಸಚಿವಾಲಯದ ಹಿರಿಯ ಅಧಿಕಾರಿಯೋರ್ವರು ತಿಳಿಸಿದರು.
ರೆಡ್ ಝೋನ್ಗಳಲ್ಲಿ ಅಗತ್ಯ ವಸ್ತುಗಳನ್ನು ಮಾತ್ರ ಮಾರಾಟ ಮಾಡಲು ಇ-ಕಾಮರ್ಸ್ ಕಂಪನಿಗಳಿಗೆ ಅವಕಾಶ ನೀಡಲಾಗಿದೆ.
ಕ್ಷೌರದಂಗಡಿಗಳು ಮತ್ತು ಸೆಲೂನ್ಗಳು ಸರಕುಗಳಾಗಿರದೆ ಸೇವೆಗಳಾಗಿರುವುದರಿಂದ ರೆಡ್ ಝೋನ್ಗಳಲ್ಲಿ ಇವುಗಳನ್ನು ತೆರೆಯಲು ಅವಕಾಶ ನೀಡಲಾಗಿಲ್ಲ.
ರೆಡ್ ಝೋನ್ಗಳಲ್ಲಿ ಮನೆಗೆಲಸದಾಳುಗಳಿಗೆ ಕೆಲಸಕ್ಕೆ ಅವಕಾಶ ನೀಡುವ ಕುರಿತಂತೆ ಗೃಹ ಸಚಿವಾಲಯದ ಅಧಿಕಾರಿ,ಹೊರಗಿನವರ ಚಲನವಲನಗಳಿಗೆ ಅವಕಾಶ ನೀಡುವ ಕುರಿತು ಅಪಾರ್ಟ್ಮೆಂಟ್ಗಳ ರೆಸಿಡೆಂಟ್ಸ್ ವೆಲ್ಫೇರ್ ಅಸೋಸಿಯೇಷನ್ (ಆರ್ಡಬ್ಲುಎ)ಗಳು ತೀರ್ಮಾನ ಕೈಗೊಳ್ಳಬೇಕು. ಮನೆಗೆಲಸದಾಳುಗಳು ಮತ್ತು ಮಾಲಿಕರು ಆರೋಗ್ಯ ಶಿಷ್ಟಾಚಾರಗಳನ್ನು ಪಾಲಿಸಬೇಕು. ಏನಾದರೂ ಅವಘಡಗಳು ಸಂಭವಿಸಿದರೆ ಹೊಣೆಗಾರಿಕೆ ಮನೆಗೆಲಸದಾಳನ್ನು ನೇಮಿಸಿಕೊಂಡಿರುವ ವ್ಯಕ್ತಿಯದ್ದಾಗಿರುತ್ತದೆ ಎಂದು ಸ್ಪಷ್ಟಪಡಿಸಿದರು.
ಕೋವಿಡ್-19 ಅಪಾಯ ಮಟ್ಟಗಳನ್ನು ಆಧರಿಸಿ ದೇಶವ್ಯಾಪಿ ಜಿಲ್ಲೆಗಳನ್ನು ರೆಡ್,ಆರೆಂಜ್ ಮತ್ತು ಗ್ರೀನ್ ವಲಯಗಳನ್ನಾಗಿ ವರ್ಗೀಕರಿಸಲಾಗಿದೆ. ಈವರೆಗೆ ಯಾವುದೇ ದೃಢೀಕೃತ ಕೊರೋನ ವೈರಸ್ ಪ್ರಕರಣ ಇಲ್ಲದಿದ್ದರೆ ಅಥವಾ ಕಳೆದ 21 ದಿನಗಳಲ್ಲಿ ಯಾವುದೇ ಹೊಸ ಪ್ರಕರಣ ವರದಿಯಾಗಿರದಿದ್ದರೆ ಆ ಜಿಲ್ಲೆಯನ್ನು ಗ್ರೀನ್ ವಲಯವೆಂದು ಪರಿಗಣಿಸಲಾಗುತ್ತದೆ.
ಮೇ 17ರವರೆಗೆ ವಿಮಾನಯಾನ ಸ್ಥಗಿತ
ಗೃಹ ಸಚಿವಾಲಯವು ದೇಶವ್ಯಾಪಿ ಲಾಕ್ಡೌನ್ ಅನ್ನು ಮೇ 4ರಿಂದ ಇನ್ನೂ ಎರಡು ವಾರಗಳ ಅವಧಿಗೆ ವಿಸ್ತರಿಸಿರುವ ಹಿನ್ನೆಲೆಯಲ್ಲಿ ನಾಗರಿಕ ವಾಯುಯಾನ ಮಹಾನಿರ್ದೇಶನಾಲಯ(ಡಿಜಿಸಿಎ)ವು ಮೇ 17ರವರೆಗೆ ಎಲ್ಲ ದೇಶಿಯ ಮತ್ತು ಅಂತರರಾಷ್ಟ್ರೀಯ ವಾಣಿಜ್ಯ ವಿಮಾನಯಾನಗಳನ್ನು ಅಮಾನತುಗೊಳಿಸಿ ಶನಿವಾರ ಸುತ್ತೋಲೆಯನ್ನು ಹೊರಡಿಸಿದೆ.
ಆದರೆ,ಈ ನಿರ್ಬಂಧವು ಡಿಜಿಸಿಎ ಅನುಮತಿಯೊಂದಿಗೆ ಕಾರ್ಯಾಚರಿಸುವ ಅಂತರರಾಷ್ಟ್ರೀಯ ಸರಕು ಸಾಗಣೆ ವಿಮಾನಯಾನಗಳಿಗೆ ಅನ್ವಯಿಸುವುದಿಲ್ಲ.
