ಮದ್ಯದ ಅಂಗಡಿಗಳನ್ನು ಬಂದ್ ಮಾಡಿ ಪ್ರಾರ್ಥನಾ ಕೇಂದ್ರಗಳನ್ನು ತೆರೆಯಿರಿ: ಡಾ. ಬೆಳಗಾಮಿ ಮುಹಮ್ಮದ್ ಸಾದ್

ಬೆಂಗಳೂರು, ಮೇ 4: ಲಾಕ್‍ಡೌನ್ ಸಂದರ್ಭದಲ್ಲಿ ಸಂಪೂರ್ಣ ಮದ್ಯ ಮಾರಾಟವನ್ನು ನಿಷೇಧಿಸಿದ್ದ ರಾಜ್ಯ ಸರಕಾರವು ಪರಿಸ್ಥಿತಿಯು ಇನ್ನೇನೊ ಸ್ವಲ್ಪ ಮಟ್ಟಿಗೆ ಹತೋಟಿಗೆ ಬರುತ್ತಿರುವ ಈ ಹೊತ್ತಿನಲ್ಲಿಯೇ ಮತ್ತೆ ಮದ್ಯ ಮಾರಾಟಕ್ಕೆ ಮುಕ್ತ ಅವಕಾಶ ನೀಡಿರುವುದು ನಿಜಕ್ಕೂ ಖಂಡನೀಯವಾದ ಕ್ರಮ ಎಂದು ಜಮಾಅತೆ ಇಸ್ಲಾಮೀ ಹಿಂದ್ ರಾಜ್ಯಾಧ್ಯಕ್ಷ ಡಾ. ಬೆಳಗಾಮಿ ಮುಹಮ್ಮದ್ ಸಾದ್ ತಿಳಿಸಿದ್ದಾರೆ.

ಕಳೆದ ನಲ್ವತ್ತು ದಿನಗಳಿಂದ ಮದ್ಯವನ್ನು ನಿಷೇಧಿಸಲು ನಮ್ಮ ಸರಕಾರಕ್ಕೆ ಸಾಧ್ಯವಾಗಿದೆ ಎಂದಾದರೇ ಮುಂಬರುವ ದಿನಗಳಲ್ಲಿಯೂ ಈ ನಿಷೇಧವನ್ನು ಮುಂದುವರೆಸಲು ಯಾಕೆ ಸಾಧ್ಯವಾಗುತ್ತಿಲ್ಲ. ಮದ್ಯದಿಂದಾಗಿ ಈಗಾಗಲೇ ಅನೇಕ ಕುಟುಂಬಗಳು ಸರ್ವನಾಶವಾಗುತ್ತಿದ್ದು ಇದರ ನೇರ ಪರಿಣಾಮವು ಅನುಭವಿಸುತ್ತಿರುವುದು ಕುಟುಂಬದಲ್ಲಿರುವ ಅಮಾಯಕ ಹೆಣ್ಣು ಮತ್ತು ಚಿಕ್ಕ ಮಕ್ಕಳಾಗಿದ್ದಾರೆ ಎಂದು ಅವರು ಹೇಳಿದ್ದಾರೆ.

ಒಂದೆಡೆ ಸರಕಾರವು ಆರೋಗ್ಯ ಇಲಾಖೆಯ ಅಡಿಯಲ್ಲಿ ಜನರನ್ನು ರೋಗದಿಂದ ರಕ್ಷಿಸಲು ಕೋಟಿಗಟ್ಟಲೆ ಹಣ ಸುರಿಯುತ್ತಿದ್ದು, ಮತ್ತೊಂದೆಡೆ ಮದ್ಯವನ್ನು ಮುಕ್ತವಾಗಿಸಿ ಜನರನ್ನು ಅನಾರೋಗ್ಯ ಪೀಡಿತರನ್ನಾಗಿಸುತ್ತಿರುವ ತನ್ನ ವಿರೋಧಾಭಾಸ ನೀತಿ ಹಾಗೂ ಬೂಟಾಟಿಕೆಯು ನಿಜಕ್ಕೂ ಆತಂಕಾರಿಯಾಗಿದೆ ಎಂದು ಮುಹಮ್ಮದ್ ಸಾದ್ ಅಭಿಪ್ರಾಯಪಟ್ಟಿದ್ದಾರೆ.

ಕೊರೋನ ರೋಗವು ಹರಡದಂತೆ ತಡೆಗಟ್ಟಲು ಸರಕಾರವು ಈಗಾಗಲೇ ಅನೇಕ ಕ್ರಮಗಳನ್ನು ಕೈಗೊಂಡು ಒಂದು ಹಂತದ ವರೆಗೆ ಸಫಲತೆಯನ್ನು ಕಾಣುತ್ತಿರುವ ಈ ಹೊತ್ತಿನಲ್ಲಿಯೆ ಮದ್ಯವನ್ನು ಮುಕ್ತವನ್ನಾಗಿಸುವುದರ ಮೂಲಕ ಪರೋಕ್ಷವಾಗಿ ಈ ರೋಗಕ್ಕೆ ಕರೆ ನೀಡುತ್ತ ಮತ್ತಷ್ಟು ಅಪಾಯಗಳನ್ನು ತನ್ನ ಮೈಮೇಲೆ ಎಳೆದುಕೊಳ್ಳುವಂತಾಗುತ್ತಿದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.

ರಾಜ್ಯದಲ್ಲಿ ಈಗಾಗಲೇ ಬಡತನ, ಹಸಿವು ಹಾಗೂ ನಿರುದ್ಯೋಗದ ಸಮಸ್ಯೆಗಳು ತಾಂಡವವಾಡುತ್ತಿದ್ದು ಸರಕಾರ ಇವುಗಳನ್ನು ನಿಯಂತ್ರಿಸುವಲ್ಲಿ ವಿಶೇಷ ಗಮನ ಹರಿಸಬೇಕಾಗಿರುವುದು ಅತ್ಯವಶ್ಯಕವಾಗಿದೆ. ಮದ್ಯಸೇವನೆ ಮತ್ತು ಅಪರಾಧ ಚಟುವಟಿಕೆಗಳಿಗೆ ನೇರ ಸಂಬಂಧವಿದ್ದು ಸರಕಾರ ಮದ್ಯವನ್ನು ಕೇವಲ ಆದಾಯದ ಮೂಲವಾಗಿ ಮಾತ್ರ ನೋಡುತ್ತಿದೆ, ಇದಲ್ಲದೇ ಮದ್ಯದಿಂದಾಗಿ ಅಪಘಾತಗಳು, ಅನೇಕ ರೋಗಗಳು, ಆರೋಗ್ಯವು ಹದಗೆಡುವುದರ ಜೊತೆಗೆ ಸಾಮಾಜಿಕ ಮತ್ತು ಆರ್ಥಿಕ ನಷ್ಟವು ಉಂಟಾಗುವುದು ಎಂದು ಮುಹಮ್ಮದ್ ಸಾದ್ ಹೇಳಿದ್ದಾರೆ,

ಮದ್ಯಮುಕ್ತ ಸಮಾಜದಿಂದ ಆಗುವ ಅನುಕೂಲಗಳು ಅಂದಾಜು ಮಾಡಲು ಆಗದಷ್ಟು ಅಗಾಧವಾಗಿರುತ್ತದೆ, ಒಂದು ಸ್ವಸ್ತ ಸಮಾಜವನ್ನು ರೋಗಗ್ರಸ್ತರನ್ನಾಗಿಸುತ್ತಿರುವ ಮದ್ಯದ ವ್ಯವಹಾರಕ್ಕೆ ವಿರಾಮ ಹಾಕಬೇಕು. ರಾಜ್ಯ ಸರಕಾರವು ರಾಜ್ಯದಲ್ಲಿ ಸಂಪೂರ್ಣ ಪಾನ ನಿಷೇಧ ಮಾಡಬೇಕು. ಇಲ್ಲವೆಂದಾದರೇ ಒಂದು ಆರೋಗ್ಯ ಪೂರ್ಣವಾದ ಸಂಸಾರವನ್ನು ಸರಕಾರವೇ ನೇರವಾಗಿ ಹಾಳು ಮಾಡಿದ ಅಪವಾದವನ್ನು ಹೊರಬೇಕಾಗುತ್ತದೆ. ಈ ನಡುವೆ ಸರಕಾರದ ಈ ಕ್ರಮವನ್ನು ಅನೇಕ ಧಾರ್ಮಿಕ ಮುಖಂಡರು ಖಂಡಿಸಿರುವುದು ಸ್ವಾಗತಾರ್ಹ ಎಂದು ಅವರು ಹೇಳಿದ್ದಾರೆ.

ಇನ್ನಾದರೂ ಸರಕಾರವು ಎಚ್ಚೆತ್ತುಕೊಂಡು ಮದ್ಯ ಮಾರಾಟದ ಯೋಜನೆಯನ್ನು ಕೈಬಿಟ್ಟು ಒಂದು ಆರೋಗ್ಯಪೂರ್ಣ ಸಮಾಜದ ನಿರ್ಮಾಣದತ್ತ ಮುನ್ನಡೆಯಲಿ. ಕುಟುಂಬಗಳ ಕಣ್ಣೀರಿನಿಂದ ಬರುವ ಹಣದಿಂದ ಆಗುವ ಅಭಿವೃಧಿ ನಮಗೆ ಬೇಕಾಗಿಲ್ಲ ಎಂದು ಅವರು ಹೇಳಿದ್ದಾರೆ.

ಮುಜರಾಯಿ ಇಲಾಖೆಯ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಕೊರೋನ ಭೀತಿಯಿಂದಾಗಿ ಮುಚ್ಚಿರುವ ರಾಜ್ಯದ ದೇಗುಲಗಳ ಬಾಗಿಲುಗಳನ್ನು ತೆರೆಯುವ ಬಗ್ಗೆ ನಿರ್ಧಾರ ಕೈಗೊಳ್ಳಲಾಗುವುದು ಎಂದು ಹೇಳಿಕೆ ನೀಡಿರುವುದಾಗಿ ಮಾಧ್ಯಮಗಳಲ್ಲಿ ಪ್ರಕಟಗೊಂಡಿದೆ. ಇದೇ ವೇಳೆ ಮಸೀದಿ, ಚರ್ಚ್‍ಗಳನ್ನೊಳಗೊಂಡಂತೆ ರಾಜ್ಯದ ಎಲ್ಲ ಪ್ರಾರ್ಥನಾ ಸ್ಥಳಗಳನ್ನು ತೆರೆಯುವ ಅವಕಾಶವನ್ನು ನೀಡಿ, ಅಲ್ಲಿ ಕಟ್ಟುನಿಟ್ಟಿನ ಮಾರ್ಗದರ್ಶನದೊಂದಿಗೆ ಭಕ್ತರಿಗೆ ಪ್ರಾರ್ಥನೆ ನಿರ್ವಹಿಸಲು ಸರಕಾರವು ಅನುವು ಮಾಡಿಕೊಡಬೇಕು ಎಂದು ಅವರು ಮನವಿ ಮಾಡಿದ್ದಾರೆ.

ರಮಝಾನ್ ತಿಂಗಳಿನ ಕೊನೆಯಲ್ಲಿ  ಆಚರಿಸುವ ಈದುಲ್ ಫತ್ರ್ ಹಬ್ಬದ ದಿನ ನಿರ್ವಹಿಸಲ್ಪಡುವ ಸಾಮೂಹಿಕ ಪ್ರಾರ್ಥನೆಗೂ ರಾಜ್ಯ ಸರಕಾರ ನೀಮಾನುಸಾರ ಅನುವು ಮಾಡಿಕೊಡಬೇಕೆಂದು ಬೆಳಗಾಮಿ ಮುಹಮ್ಮದ್ ಸಾದ್ ಪ್ರಕಟಣೆಯಲ್ಲಿ ಆಗ್ರಹಿಸಿದ್ದಾರೆ.