ಕೊರೋನ ವೈರಸ್ ಮರುಸೋಂಕಿಗೆ ಒಳಗಾದ ವ್ಯಕ್ತಿಯಿಂದ ಸೋಂಕು ಹರಡುವುದಿಲ್ಲ

ಸಿಯೋಲ್ (ದಕ್ಷಿಣ ಕೊರಿಯ), ಮೇ 20: ಒಮ್ಮೆ ಕೊರೋನ ವೈರಸ್ ಸೋಂಕಿಗೆ ಒಳಗಾಗಿ ಚೇತರಿಸಿಕೊಂಡ ಬಳಿಕ, ವ್ಯಕ್ತಿಯೊಬ್ಬ ಇನ್ನೊಮ್ಮೆ ಅದೇ ವೈರಸ್‌ನ ಸೋಂಕಿಗೆ ಒಳಗಾದರೂ ಸೋಂಕು ಹರಡುವ ಸಾಮರ್ಥ್ಯ ಅವರಲ್ಲಿರುವುದಿಲ್ಲ ಎಂದು ಸಂಶೋಧಕರು ಹೇಳುತ್ತಿದ್ದಾರೆ. ಬಹುಶಃ ಅವರ ದೇಹದಲ್ಲಿ ಈಗಾಗಲೇ ಉತ್ಪತ್ತಿಯಾಗಿರುವ ಪ್ರತಿಕಾಯ (ಆ್ಯಂಟಿ ಬಾಡಿ)ಗಳು ಅವರು ಮತ್ತೆ ಕಾಯಿಲೆಗೆ ಒಳಗಾಗದಂತೆ ತಡೆಯುತ್ತಿರಬಹುದು ಎಂದು ಅವರು ಭಾವಿಸಿದ್ದಾರೆ.

ಕೊರೋನ ವೈರಸ್ ಸೋಂಕು ಕಾಣಿಸಿಕೊಂಡು ಸಂಪೂರ್ಣ ಗುಣಮುಖರಾದ ಬಳಿಕ ಇನ್ನೊಮ್ಮೆ ಸೋಂಕಿಗೆ ಒಳಗಾದ 285 ಮಂದಿಯ ಬಗ್ಗೆ ಕೊರಿಯ ರೋಗ ನಿಯಂತ್ರಣ ಮತ್ತು ತಡೆ ಕೇಂದ್ರದ ವಿಜ್ಞಾನಿಗಳು ಅಧ್ಯಯನ ನಡೆಸಿದರು. ಎರಡನೇ ಬಾರಿಗೆ ಸೋಂಕಿಗೆ ಒಳಗಾದ ಈ ರೋಗಿಗಳು ಸೋಂಕು ಹರಡುವುದು ಪತ್ತೆಯಾಗಲಿಲ್ಲ ಹಾಗೂ ಅವರಿಂದ ಪಡೆಯಲಾದ ವೈರಸ್ ಮಾದರಿಗಳನ್ನು ಕೃತಕವಾಗಿ ಬೆಳೆಸಲು ಸಾಧ್ಯವಾಗಲಿಲ್ಲ. ಅಂದರೆ ರೋಗಿಗಳು ಸೋಂಕು ಹಬ್ಬಿಸದ ಅಥವಾ ಮೃತ ವೈರಸ್‌ಗಳನ್ನು ಹೊರಸೂಸುತ್ತಿದ್ದರು.

ಈ ಸಂಶೋಧನಾ ವರದಿಯು ಸೋಮವಾರ ಪ್ರಕಟಗೊಂಡಿದ್ದು, ಆರ್ಥಿಕ ಚಟುವಟಿಕೆಗಳನ್ನು ಪುನರಾರಂಭಿಸಲು ಎದುರು ನೋಡುತ್ತಿರುವ ದೇಶಗಳಿಗೆ ಶುಭ ಸುದ್ದಿಯಾಗಿ ಪರಿಣಮಿಸಿವೆ.

ಸುರಕ್ಷಿತ ಅಂತರವನ್ನು ಕಾಪಾಡಿಕೊಳ್ಳಬೇಕೆನ್ನುವ ನಿಯಮವನ್ನು ದೇಶಗಳು ಸಡಿಲಗೊಳಿಸುವಾಗ, ಕೋವಿಡ್-19ರಿಂದ ಈಗಾಗಲೇ ಗುಣ ಹೊಂದಿರುವ ಜನರು ಇನ್ನೊಮ್ಮೆ ರೋಗದ ಸೋಂಕಿಗೆ ಒಳಗಾದರೂ ಬೇರೆಯವರಿಗೆ ಸೋಂಕು ಹರಡಲು ಶಕ್ತರಾಗುವುದಿಲ್ಲ ಎನ್ನುವುದನ್ನು ದಕ್ಷಿಣ ಕೊರಿಯದ ಸಂಶೋಧಕರ ಈ ಅಧ್ಯಯನವು ಖಚಿತಪಡಿಸುತ್ತದೆ.

ಹಾಗಾಗಿ, ಈಗಾಗಲೇ ಸೋಂಕಿಗೆ ಒಳಗಾಗಿ ಚೇತರಿಸಿಕೊಂಡಿರುವ ಜನರು ಸಾರ್ವಜನಿಕರಿಗೆ ಯಾವುದೇ ರೀತಿಯ ಬೆದರಿಕೆಯನ್ನು ಒಡ್ಡುವುದಿಲ್ಲ ಎಂಬ ನಿರ್ಧಾರಕ್ಕೆ ದಕ್ಷಿಣ ಕೊರಿಯದ ಅಧಿಕಾರಿಗಳು ಬಂದಿದ್ದಾರೆ.