ಲಾಕ್ಡೌನ್ನಿಂದ ನಲುಗಿದ ಸಾವಿರಾರು ಸುಣ್ಣಗಾರರ ಬದುಕು
ಬೆಂಗಳೂರು, ಮೇ 21: ತಲ ತಲಮಾರುಗಳಿಂದ ಸುಣ್ಣ ಉತ್ಪಾದನೆ ಮಾಡಿ ಊರೂರು ಅಲೆದು ಸುಣ್ಣ ಮಾರಿ ಬದುಕು ಕಟ್ಟಿಕೊಂಡಿದ್ದ ಸಾವಿರಾರು ಜನರ ಬದುಕು ಲಾಕ್ಡೌನ್ನಿಂದ ನಲುಗಿ ಹೋಗಿದ್ದು, ಅವರ ಬದುಕೇ ಕಮರಿ ಹೋದಂತಾಗಿದೆ.
ರಾಜ್ಯದಲ್ಲಿ ಗ್ರಾಮೀಣ ಪ್ರದೇಶದಲ್ಲಿ ಸಾವಿರಾರು ಜನರು ತಮ್ಮ ಕುಲ ಕಸಬು ನಂಬಿಕೊಂಡು ಜೀವನ ನಡೆಸುವವರಿದ್ದಾರೆ. ಆದರೆ, ಸರಕಾರ ಕೊರೋನ ನಿಯಂತ್ರಣಕ್ಕಾಗಿ ಘೋಷಿಸಿರುವ ಲಾಕ್ಡೌನ್ನಿಂದ ಅವರ ಬದುಕಿನ ಮೇಲೆ ಗಾಢವಾದ ಪರಿಣಾಮ ಬೀರಿದೆ. ಇದರಿಂದ ಅವರು ಚೇತರಿಸಿಕೊಳ್ಳಲು ಇನ್ನೂ ಸಾಕಷ್ಟು ಸಮಯ ಬೇಕಾಗುತ್ತದೆ.
ಹಲವಾರು ಕುಟುಂಬಗಳು ಸುಣ್ಣ ಮಾರುವ ಉದ್ಯಮವನ್ನೇ ನಂಬಿಕೊಂಡು ಜೀವನ ನಡೆಸುತ್ತಿವೆ. ದಿನನಿತ್ಯ ಅದರಿಂದ ಬರುವ ಆದಾಯದಲ್ಲಿಯೇ ಬದುಕು ಕಟ್ಟಿಕೊಂಡಿದ್ದರು. ಆದರೆ, ಒಂದು ದಿನ ವ್ಯಾಪಾರವಿಲ್ಲದಿದ್ದರೂ ಉಪವಾಸದಿಂದ ಕಾಲ ದೂಡಬೇಕಾದ ಪರಿಸ್ಥಿತಿ ಇವರದ್ದು. ಅಂತಹುದರಲ್ಲಿ ಸುಮಾರು ಎರಡು ತಿಂಗಳ ಕಾಲ ಲಾಕ್ಡೌನ್ನ ಪರಿಣಾಮದಿಂದಾಗಿ ಸಂಪೂರ್ಣ ಆದಾಯ ಕಡಿತವಾಗಿದೆ.
ಆದಾಯವಿಲ್ಲದೇ ಈ ಕುಟುಂಬಗಳು ಅಸಹಾಯಕರಾಗಿ ಜೀವನ ನಡೆಸಲು ಕಷ್ಟ ಪಡಬೇಕಾದ ಸ್ಥಿತಿ ನಿರ್ಮಾಣವಾಗಿದೆ. ಮೊದಲಿಗೆ ಇದ್ದದ್ದರಲ್ಲಿಯೇ ಸರಿದೂಗಿಸಿಕೊಂಡು ಜೀವನ ನಡೆಸುತ್ತಿದ್ದೆವು. ಅನಂತರ ಕೆಲವು ದಿನಗಳಾದ ಮೇಲೆ ಒಂದಷ್ಟು ಜನರ ಬಳಿ ಸಾಲ ಮಾಡಿಕೊಂಡು ಜೀವನ ನಡೆಸಿದೆವು. ಆದರೆ, ಇದೀಗ ಬದುಕು ಬಹಳ ದುಸ್ತರವಾಗಿದೆ. ಈಗ ಅಂಗಡಿಗಳನ್ನು ತೆರೆಯಲು ಅನುವು ಮಾಡಿಕೊಟ್ಟಿದ್ದರೂ ಎಳ್ಳಷ್ಟು ವ್ಯಾಪಾರವಾಗುತ್ತಿಲ್ಲ. ಆದಾಯವಿಲ್ಲದೆ, ಬೇರೆ ಕೆಲಸವೂ ಇಲ್ಲದೇ ಪರದಾಡುವಂತಾಗಿದೆ ಎಂದು ಸುಣ್ಣ ವ್ಯಾಪಾರಿ ರಾಮನ್ನ ನೊಂದು ನುಡಿದರು.
ನಮಗೆ ಏಕಿಲ್ಲ ನೆರವು: ಕುಲಕಸುಬು ನಂಬಿಕೊಂಡು ಬದುಕುತ್ತಿರುವವರಿಗೆ ಸರಕಾರದ ಯಾವುದೇ ಸೌಲಭ್ಯಗಳು ಸಿಗುತ್ತಿಲ್ಲ. ಚುನಾವಣೆ ಸಂದರ್ಭದಲ್ಲಿ ಬರುವ ರಾಜಕಾರಣಿಗಳು ಈಗ ಯಾರೂ ನಮ್ಮ ಕಷ್ಟವನ್ನು ನೋಡುತ್ತಿಲ್ಲ. ಯಾವುದೇ ಸಂಘ ಸಂಸ್ಥೆಗಳಿಂದಲೂ ನೆರವು ಸಿಕ್ಕಿಲ್ಲ. ಸುಣ್ಣದಂತೆಯೇ ನಮ್ಮ ಬದುಕು ಸುಟ್ಟಂತಾಗಿದೆ ಎಂದು ಸುಣ್ಣ ವ್ಯಾಪಾರಿ ಅಂಗಡಿ ಮಾಲಕ ವೆಂಕಟರಾಯಪ್ಪ ಅಸಹಾಯಕತೆ ವ್ಯಕ್ತಪಡಿಸಿದ್ದಾರೆ.
ಡೋಲಾಯಮಾನವಾದ ಬದುಕು: ಸಾವಿರಾರು ರೂಪಾಯಿ ವೆಚ್ಚದಲ್ಲಿ ಕಲ್ಲು ತಂದು ಐನೂರು ರೂಪಾಯಿಗಳಿಗೆ ಒಂದು ಚೀಲ ಇದ್ದಿಲು ತಂದು ಬೆಳಗ್ಗೆಯಿಂದ ಸಂಜೆ ತನಕ ಭಟ್ಟಿ ತುಂಬಿ ಇಡೀ ರಾತ್ರಿ ಸುಟ್ಟ ಸುಣ್ಣವನ್ನು ಮಾರಿ ಬಂದ ಹಣದಲ್ಲಿ ಜೀವನ ನಡೆಯಬೇಕು. ಆದರೆ ಕೊರೋನ ವೈರಸ್ನ ಹೊಡೆತಕ್ಕೆ ಇಡೀ ಉದ್ಯಮ ತಲ್ಲಣಗೊಂಡಿದೆ. ಎಲ್ಲೆಡೆ ಕೆಂಪು, ಹಳದಿ ವಲಯವನ್ನಾಗಿ ವಿಂಗಡಿಸಲಾಗಿದೆ. ಅಲ್ಲಿ ಅಂಗಡಿಗಳಿಗೆ ಜನರು ಬರಲು ಭಯ ಪಡುತ್ತಿದ್ದಾರೆ.
ಲಾಕ್ಡೌನ್ನಿಂದಾಗಿ ಎರಡು ತಿಂಗಳಿನಿಂದ ಭಟ್ಟಿ ಶುರು ಮಾಡಿಲ್ಲ. ಸುಣ್ಣ ಮಾರಿದರೆ ಮಾತ್ರ ನಮ್ಮ ಜೀವನ ನಡೆಯೋದು. ಇಲ್ಲದಿದ್ದರೆ ಕಷ್ಟ ಆಗುತ್ತದೆ. ಆದರೆ, ಕೊರೋನದಿಂದ ರಕ್ಷಿಸಲು ಲಾಕ್ಡೌನ್ ಮಾಡಿದ್ದಾರೆ. ಈಗ ಅದಕ್ಕೆ ಸಡಿಲಿಕೆ ನೀಡಿದ್ದಾರೆಯಾದರೂ, ಯಾರೂ ಅಂಗಡಿಗೆ ಬರುತ್ತಿಲ್ಲ. ಸರಕಾರ ಎಲ್ಲರಿಗೂ ಪರಿಹಾರ ನೀಡಿದೆ. ನಮ್ಮ ಬದುಕಿನ ಬಗ್ಗೆ ಯಾರೂ ತಲೆ ಕೆಡಿಸಿಕೊಂಡಿಲ್ಲ. ನಾವೇನು ಪಾಪ ಮಾಡಿದ್ದೇವೆ.
-ಸುಬ್ಬಣ್ಣ, ಸುಣ್ಣ ತಯಾರಕ
