ಮೈಸೂರು: ಕೆಆರ್​ಎಸ್ ಮುಂಭಾಗ ವಿಶ್ವೇಶ್ವರಯ್ಯ ಪ್ರತಿಮೆ ನಿರ್ಮಾಣ ವಿರೋಧಿಸಿ ಪ್ರತಿಭಟನೆ

ಮೈಸೂರು,ಜೂ.8: ಕೃಷ್ಣರಾಜಸಾಗರ ಅಣೆಕಟ್ಟೆ ಮುಂಭಾಗ ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರ ಪ್ರತಿಮೆ ಪಕ್ಕದಲ್ಲಿ ಸರ್.ಎಂ ವಿಶ್ವೇಶ್ವರಯ್ಯನವರ ಪ್ರತಿಮೆಯನ್ನು ನಿರ್ಮಾಣ ಮಾಡಬಾರದು ಎಂದು ಒತ್ತಾಯಿಸಿ ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರ ಏಕಪ್ರತಿಮೆ ಹೋರಾಟ ಸಮಿತಿ ವತಿಯಿಂದ ಪ್ರತಿಭಟನೆ ನಡೆಸಲಾಯಿತು.

ನಗರದ ಜಿಲ್ಲಾಧಿಕಾರಿಗಳ ಕಚೇರಿ ಬಳಿ ಸೋಮವಾರ ಪ್ರತಿಭಟನೆ ನಡೆಸಿದ ಹೋರಾಟ ಸಮಿತಿ ಸದಸ್ಯರು, ನಮ್ಮೆಲ್ಲರನ್ನೂ ಸಾಮಾನ್ಯ ಜನರನ್ನು ಹಿಂದುಳಿದವರನ್ನು, ಶೋಷಿತರನ್ನು, ದೀನ ದಲಿತರನ್ನು ತಮ್ಮ ಮಕ್ಕಳಂತೆ ಅಪಾರ ವಾತ್ಸಲ್ಯದಿಂದ ಪೋಷಿಸಿ, ಬೆಳೆಸಿ ಸಮಾಜದಲ್ಲಿ ಸರ್ವಸಮಾನರಂತೆ ರೂಪಿಸಿ ಅವರಲ್ಲಿ ಸ್ವಾಭಿಮಾನ ಮತ್ತು ಆತ್ಮಗೌರವದ ಚೈತನ್ಯವನ್ನು ತುಂಬಿದ ಮಹಾನ್ ದೊರೆಗಳು ನಮ್ಮ ಮಹಾರಾಜ ನಾಲ್ವಡಿ ಕೃಷ್ಣರಾಜ ಒಡೆಯರ್ ಎಂದು ಬಣ್ಣಿಸಿದರು.

ಮಾಜಿ ಮೇಯರ್, ದಲಿತ ಮುಖಂಡ ಪುರುಷೋತ್ತಮ್ ಮಾತನಾಡಿ, ಜಾತಿ ಆಧಾರದ ಮೇಲೆ ನಾವು ವಿಶ್ವೇಶ್ವರಯ್ಯ ಅವರನ್ನು ವಿರೋಧ ಮಾಡುತ್ತಿಲ್ಲ, ಅವರು ನಾಲ್ವಡಿ ಅವರ ಆಡಳಿತದಲ್ಲಿ ಸಾಮಾಜಿಕ ನ್ಯಾಯ ಮತ್ತು ಸಮಾನತೆಯಡಿಯಲ್ಲಿ ನಡೆದುಕೊಳ್ಳಲಿಲ್ಲ, ಹಿಂದುಳಿದವರಿಗೆ ಮೀಸಲಾತಿ ನೀಡುವುದನ್ನು ವಿರೋಧಿಸಿದರು. ದಲಿತರು ಅಲ್ಪಸಂಖ್ಯಾತರ ಬಗ್ಗೆ ಕೀಳರಿಮೆ ಹೊಂದಿದ್ದರು. ಹಾಗಾಗಿ ಅವರನ್ನು ವಿರೋಧಿಸುತ್ತಿದ್ದೇವೆ ಎಂದು ಹೇಳಿದರು.

ನಾಲ್ವಡಿ ಅವರ ಆಡಳಿತದಲ್ಲಿ ಕೆಆರ್​ಎಸ್ ಕಟ್ಟಲು ವಿಶ್ವೇಶ್ವರಯ್ಯ ಒಂದು ವರ್ಷ ಮಾತ್ರ ಕೆಲಸ ಮಾಡಿದ್ದರು. ನಂತರ ದಿವಾನರಾಗಿ ಕೆಲಸ ಮಾಡಿದರು. ಇನ್ನುಳಿದ ಅವಧಿಯಲ್ಲಿ 7 ಜನ ಮುಖ್ಯ ಇಂಜಿನಿಯರ್ ಆಗಿ ಕೆಲಸ ಮಾಡಿದ್ದಾರೆ. ಹಾಗಿದ್ದ ಮೇಲೆ ಅವರೆಲ್ಲರ ಪ್ರತಿಮೆಯನ್ನು ನಿರ್ಮಾಣ ಮಾಡಲಾಗುತ್ತದೆಯೇ ಎಂದು ಪ್ರಶ್ನಿಸಿದರು.

ನೂರಾರು ವರ್ಷಗಳ ಹಿಂದೆ ನಮಗೆ ಶಿಕ್ಷಣ ಇಲ್ಲದೆ ತಿಳುವಳಿಕೆ ಇರಲಿಲ್ಲ. ಹಾಗಾಗಿ ಮನುವಾದಿಗಳ ಕುತಂತ್ರದಿಂದ ವಿಶ್ವೇಶ್ವರಯ್ಯ ಕನ್ನಂಬಾಡಿ ಕಟ್ಟಿದರು ಎಂದು ನಂಬಿದ್ದೆವು. ಕಳೆದ 20 ವರ್ಷಗಳ ಹಿಂದೆ ಬೆಂಗಳೂರಿಗೆ ಬಂದಿದ್ದ ಬಿಎಸ್ಪಿ ನಾಯಕ ಕಾನ್ಶಿರಾಮ್ ಬೆಂಗಳೂರಿಗೆ ಬಂದ ವೇಳೆ ನಾಲ್ವಡಿ ಅವರು ದಲಿತರು ಹಿಂದುಳಿದವರ ಬಗ್ಗೆ ಹೊಂದಿದ್ದ ಕಾಳಜಿ ಮತ್ತು ಮೀಸಲಾತಿ ಜಾರಿ ಮಾಡಿದ್ದನ್ನು ತಿಳಿಸಿಕೊಟ್ಟರು. ಆಗ ನಾವುಗಳು ನಾಲ್ವಡಿ ಅವರ ಬಗ್ಗೆ ತಿಳಿದುಕೊಂಡು ಇತಿಹಾಸದ ದಾಖಲೆಯನ್ನು ನೋಡಿದೆವು ಎಂದು ಹೇಳಿದರು.

ಸರ್.ಎಂ.ವಿಶ್ವೇಶ್ವರಯ್ಯ ಅವರು ಸರ್ಕಾರಿ ಹುದ್ದೆಗೆ ಅರ್ಹತೆ ಅಂದರೆ ಮೆರಿಟ್ ಒಂದೇ ಮಾನದಂಡ ಎಂದು ಹೇಳುತ್ತಾ ಹಿಂದುಳಿದವರನ್ನು ಖಾಯಂ ಹಿಂದುಳಿದವರನ್ನಾಗಿ ಹಾಗೂ ಮುಂದುವರಿದ ಸಮುದಾಯದವರನ್ನು ಮಾತ್ರ ಖಾಯಂ ಮುಂದುವರಿದವರನ್ನಾಗಿ ಪರಿಗಣಿಸಿ ರಾಜ್ಯದ ಪ್ರಜೆಗಳ ನಡುವೆ ತಾರತಮ್ಯದ ಗೋಡೆ ನಿಲ್ಲಿಸಲು ಪ್ರಯತ್ನಿಸಿದರು ಎಂದು ತಿಳಿಸಿದರು.

ಪ್ರತಿಭಟನೆಯಲ್ಲಿ ಇತಿಹಾಸ ತಜ್ಞ ಪ್ರೊ.ಪಿ.ವಿ.ನಂಜರಾಜೇ ಅರಸ್, ಚೋರನಹಳ್ಳಿ ಶಿವಣ್ಣ, ಸೋಸಲೆ ಸಿದ್ದರಾಜು, ಶಿವಕುಮಾರ್, ದೇವನೂರು ಪುಟ್ಟನಂಜಯ್ಯ, ಸಿಪಿಎಂ ಬಸವರಾಜು, ನೆಲೆ ಹಿನ್ನಲೆ ಗೋಪಾಲಕೃಷ್ಣ, ಕುರುಬೂರು ಶಾಂತಕುಮಾರ್, ದ್ಯಾವಪ್ಪ ನಾಯಕ, ಅರವಿಂದ ಶರ್ಮಾ, ಧನಪಾಲ್ ಕುರುಬಾರಹಳ್ಳಿ, ಹೊಸಕೋಟೆ ಬಸವರಾಜು, ಮರಿದೇವಯ್ಯ, ಕೆ.ದೀಪಕ್, ಸೇರಿದಂತೆ ಹಲವರು ಪಾಲ್ಗೊಂಡಿದ್ದರು. 

ವಿಶ್ವೇಶ್ವರಯ್ಯ ಅವರ ಪ್ರತಿಮೆ ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರ ಪಕ್ಕದಲ್ಲಿ ನಿರ್ಮಾಣ ಮಾಡಬೇಕು ಎಂದು ಹೇಳುತ್ತಿರುವವರು ಇತಿಹಾಸ ಗೊತ್ತಿಲ್ಲದ ಮೂರ್ಖರು. ಇತಿಹಾಸ ಗೊತ್ತಿಲ್ಲದ ಕೆಲವರು ವಿಶ್ವೇಶ್ವರಯ್ಯ ಅವರ ಪ್ರತಿಮೆ ನಿರ್ಮಾಣ ಆಗಬೇಕು ಎಂದು ಹೇಳುತ್ತಿದ್ದಾರೆ. ಒಡೆಯರ್ ಅವರ ಪ್ರತಿಮೆ ಪಕ್ಕದಲ್ಲಿ ವಿಶ್ವೇಶ್ವರಯ್ಯ ಅವರ ಪ್ರತಿಮೆ ಬೇಡ ಎಂದಷ್ಟೇ ಹೇಳುತ್ತಿದ್ದೇವೆ. ಅವರಿಗೆ ವಿಶ್ವೇಶ್ವರಯ್ಯ ಅವರ ಬಗ್ಗೆ ಅಷ್ಟೊಂದು ಪ್ರೀತಿ ಇದ್ದರೆ ಬೇರೆ ಕಡೆ ನಿರ್ಮಾಣ ಮಾಡಲಿ. ಒಡೆಯರ್ ಅವರ ಮುಂದೆ ವಿಶ್ವೇಶ್ವರಯ್ಯ ಏನೇನು ಅಲ್ಲ, ಅವರು ನಾಲ್ವಡಿ ಅವರ ಬಳಿ ಕೆಲಸಕ್ಕೆ ಇದ್ದವರು. ಅವರು ಇದ್ದಷ್ಟು ದಿನ ಸಂಬಳ ಪಡೆದಿದ್ದಾರೆ. ನಾಲ್ವಡಿ ಅವರ ಸಾಮಾಜಿ ನ್ಯಾಯವನ್ನು ವಿರೋಧಿಸಿದ್ದವರು. ದಿವಾನರಾಗಿ ಎಲ್ಲರನ್ನು ಒಳಗೊಳ್ಳುವ ಕೆಲಸ ಮಾಡಬೇಕಿದ್ದ ಇವರು ಮೇಲ್ವರ್ಗದ ಪರ ಕೆಲಸ ಮಾಡುತ್ತಿದ್ದರು. ವಿಶ್ವೇಶ್ವರಯ್ಯ ಪ್ರತಿಮೆ ಬೇಕು ಎಂದು ಹೇಳುವವರು ಚರ್ಚೆಗೆ ಬರಲಿ

-ಪುರುಷೋತ್ತಮ್, ಮಾಜಿ ಮೇಯರ್

ಬಹಿರಂಗ ಚರ್ಚೆಗೆ ಬರಲಿ: ನಂಜರಾಜೇ ಅರಸ್

ಇತಿಹಾಸ ಗೊತ್ತಿಲ್ಲದವರು ಬಾಯಿಗೆ ಬಂದಂತೆ ಹೇಳಿಕೆಗಳನ್ನು ಕೊಡುತ್ತಿದ್ದಾರೆ. ನಾಲ್ವಡಿ ಅವರ ಬಗ್ಗೆ ಗೊತ್ತಿದ್ದರೆ ಬಹಿರಂಗ ಚರ್ಚೆಗೆ ಬರಲಿ. ನಾವು ಹೇಳುವುದು ಸುಳ್ಳು ಎನ್ನುವುದಾದರೆ ನಮ್ಮ ಹೋರಾಟವನ್ನು ಹಿಂಪಡೆಯುತ್ತೇವೆ ಎಂದು ಇತಿಹಾಸ ತಜ್ಞ ಪ್ರೊ.ಪಿ.ವಿ.ನಂಜರಾಜೇ ಅರಸ್ ಸವಾಲು ಹಾಕಿದರು.

ನಗರದ ಜಿಲ್ಲಾಧಿಕಾರಿಗಳ ಕಚೇರಿ ಮುಂಭಾಗ ಸೋಮವಾರ ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರ ಏಕಪ್ರತಿಮೆ ಹೋರಾಟ ಸಮಿತಿ ವತಿಯಿಂದ ನಡೆದ ಪ್ರತಿಭಟನಾ ಧರಣಿಯಲ್ಲಿ ಭಾಗವಹಿಸಿ ನಂತರ ಮಾಧ್ಯಮದವರೊಂದಿಗೆ ಮಾತನಾಡಿದರು. ಇತಿಹಾಸ ಗೊತ್ತಿಲ್ಲದವರು ರವಿವಾರ ಪತ್ರಿಕಾಗೋಷ್ಠಿ ನಡೆಸಿ ವಿಶ್ವೇಶ್ವರಯ್ಯ ಅವರ ಪ್ರತಿಮೆ ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರ ಪಕ್ಕದಲ್ಲಿ ನಿರ್ಮಾಣ ಮಾಡಬೇಕು ಎಂದು ಹೇಳುತ್ತಿದ್ದಾರೆ. ಅವರಿಗೆ ನಿಜವಾಗಲು ಇತಿಹಾಸ ಗೊತ್ತಿದ್ದರೆ ಚರ್ಚೆಗೆ ಬರಲಿ. ನಮ್ಮದು ಸುಳ್ಳು ಎನ್ನುವುದಾದರೆ ನಾವು ಹೋರಾಟದಿಂದ ಹಿಂದೆ ಸರಿಯುತ್ತೇವೆ ಎಂದು ಹೇಳಿದರು.

ಹೋಟೆಲ್ ನಡೆಸುವವರು, ಬಾರ್ ಮಾಲಕರು ವಿಶ್ವೇಶ್ವರಯ್ಯ ಅವರನ್ನು ಸಮರ್ಥಿಸಿಕೊಳ್ಳುತಿದ್ದಾರೆ. ನಾಲ್ವಡಿ ಅವರ ಮುಂದೆ ವಿಶ್ವೇಶ್ವರಯ್ಯ ಏನೇನೂ ಇಲ್ಲ. ನಾಲ್ವಡಿ ಅವರ ದೂರದೃಷ್ಟಿಯಿಂದ ಇಂದು ಕೋಟ್ಯಂತರ ಜನ ಜೀವನ ನಡೆಸುತ್ತಿದ್ದಾರೆ. ಇತಿಹಾಸವನ್ನು ಕೆಲವರು ತಿರುಚಿ ಕನ್ನಂಬಾಡಿಯನ್ನು ವಿಶ್ವೇಶ್ವರಯ್ಯ ಕಟ್ಟಿದರು ಎಂದು ಸಮರ್ಥಿಸಿಕೊಂಡು ಸುಳ್ಳನ್ನು ವೈಭವೀಕರಿಸಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ವಿಶ್ವೇಶ್ವರಯ್ಯ ದಿವಾನರಾಗಿದ್ದ ವೇಳೆ ಲ್ಯಾಟಿನ್ ಬೆಳಕಿನಲ್ಲಿ ಓದುತ್ತಿದ್ದರು ಎಂದು ಹೇಳುತ್ತಾರೆ. ವಿಶ್ವೇಶ್ವರಯ್ಯ 1912 ನಂತರ ದಿವಾನರಾಗಿದ್ದರು. ನಾಲ್ವಡಿ ಅವರ ಪರಿಶ್ರಮದಿಂದ ಶಿಂಷಾದಲ್ಲಿ ವಿದ್ಯುತ್ ತಯಾರು ಘಟಕ 1902 ರಲ್ಲಿ ಪ್ರಾರಂಭವಾಯಿತು. ಬೆಂಗಳೂರಿಗೆ 1905 ರಲ್ಲಿ ವಿದ್ಯುತ್ ಬಂತು. ಮೈಸೂರಿಗೆ 1907 ರಲ್ಲಿ ವಿದ್ಯುತ್ ಬಂತು. ಹಾಗಿದ್ದ ಮೇಲೆ ದಿವಾನರಾಗಿದ್ದ ವಿಶ್ವೇಶ್ವರಯ್ಯ ಇನ್ನೂ ಲ್ಯಾಟಿನ್ ಬೆಳಕಿನಲ್ಲೇ ಓದುತ್ತಿದ್ದರೇ ಎಂದು ಪ್ರಶ್ನಿಸಿದರು.

ನಾವು ಜಿಲ್ಲಾಧಿಕಾರಿಗಳ ಮೂಲಕ ಮುಖ್ಯಮಂತ್ರಿಗಳಿಗೆ ಮನವಿ ಸಲ್ಲಿಸಿದ್ದೇವೆ. ನಾವು ಮಾಡಿರುವ ಮನವಿ ಸುಳ್ಳು ಎಂದಾದರೆ ನಮ್ಮ ಹೋರಾಟವನ್ನು ನಿಲ್ಲಿಸುತ್ತೇವೆ ಎಂದ ಅವರು, ಮುಖ್ಯಂತ್ರಿಗಳನ್ನು ಭೇಟಿ ಮಾಡಿ ಸತ್ಯವನ್ನು ತಿಳಿಸುವ ಕೆಲಸವನ್ನು ಮಾಡುತ್ತೇವೆ. ಸಹಕಾರ ಹಾಗೂ ಮೈಸೂರು ಜಿಲ್ಲಾ ಉಸ್ತುವಾರಿ ಸಚಿವ ಎಸ್.ಟಿ.ಸೋಮಶೇಖರ್ ಮುಖ್ಯಂತ್ರಿಗಳ ಭೇಟಿಗೆ ಕಾಲಾವಕಾಶ ಕೊಡಿಸುವುದಾಗಿ ಹೇಳಿದ್ದಾರೆ ಎಂದು ತಿಳಿಸಿದರು.