ನವಜಾತ ಶಿಶುವಿನ ಚಿಕಿತ್ಸೆಗಾಗಿ ಆಸ್ಪತ್ರೆಗಳ ಮೆಟ್ಟಿಲೇರಿದ ಫುಟ್ಬಾಲ್ ಆಟಗಾರ!

ಕೋಲ್ಕತಾ, ಜೂ.9: ಮಹಾನಗರದ ಹೆಚ್ಚಿನ ಆಸ್ಪತ್ರೆಗಳು ಕೋವಿಡ್-19 ರೋಗಿಗಳ ಚಿಕಿತ್ಸೆ ನೀಡುವಲ್ಲಿ ನಿರತವಾಗಿದ್ದು, ಕೋಲ್ಕತಾ ಮೂಲದ ಲೈಬೀರಿಯಾ ಫುಟ್ಬಾಲ್ ಪಟು ಅಂಶುಮನ್ ಕ್ರೋಮಾ ಹಾಗೂ ಅವರ ಪತ್ನಿ ಅನಾರೋಗ್ಯ ಪೀಡಿತ ನವಜಾತ ಶಿಶುವಿಗೆ ಚಿಕಿತ್ಸೆ ಕೊಡಿಸಲು ಹಲವು ಆಸ್ಪತ್ರೆಗಳ ಮೆಟ್ಟಿಲೇರಿರುವ ಘಟನೆ ನಡೆದಿದೆ.

ಒಂದು ವಾರದ ಹೆಣ್ಣು ಮಗು ಬಿಂದೂ ಇದೀಗ ಚೇತರಿಸಿಕೊಂಡಿದ್ದು, ಪಾರ್ಕ್ ಸ್ಟ್ರೀಟ್ ಆಸ್ಪತ್ರೆಯ ನಿಗಾದಲ್ಲಿದೆ ಎಂದು ಕ್ರೋಮಾ ಅವರ ಪತ್ನಿ ಪೂಜಾ ಹೇಳಿದ್ದಾರೆ.

ಕಳೆದ ವರ್ಷ ಪಿಯರ್‌ಲೆಸ್ ಎಸ್‌ಸಿ ತಂಡ ಐತಿಹಾಸಿಕ ಕೋಲ್ಕತಾ ಫುಟ್ಬಾಲ್ ಲೀಗ್ ಪ್ರೀಮಿಯರ್ ಡಿವಿಜನ್ ಪ್ರಶಸ್ತಿ ಜಯಿಸಲು ತಂಡದ ನಾಯಕತ್ವ ವಹಿಸಿದ್ದ ಕ್ರೋಮಾ ಬುಧವಾರ ಹೆಣ್ಣುಮಗುವಿನ ತಂದೆಯಾಗಿದ್ದರು. ಕ್ರೋಮಾ ಅವರ ನವಜಾತ ಶಿಶುವಿಗೆ ಶನಿವಾರ ಜಾಂಡೀಸ್‌ನ ಲಕ್ಷಣ ಕಾಣಿಸಿಕೊಂಡಿತ್ತು. ಹೆರಿಗೆ ಮಾಡಿಸಿದ್ದ ಶ್ಯಾಮ್ ಬಝಾರ್ ನರ್ಸಿಂಗ್ ಹೋಮ್‌ಗೆೆ ಮೊದಲಿಗೆ ಮಗುವನ್ನು ಕರೆದೊಯ್ಯಲಾಗಿತ್ತು. ಆಸ್ಪತ್ರೆಯಲ್ಲಿ ಬೆಡ್‌ಗಳು ಖಾಲಿ ಇಲ್ಲ ಎಂಬ ಕಾರಣ ನೀಡಿ ಮಗುವನ್ನು ದಾಖಲಿಸಿಕೊಳ್ಳಲು ನರ್ಸಿಂಗ್ ಹೋಮ್‌ನವರು ನಿರಾಕರಿಸಿದರು.

ಆ ಬಳಿಕ ಎರಡು ಮಲ್ಟಿ-ಸ್ಪೆಷಾಲಿಟಿ ಖಾಸಗಿ ಆಸ್ಪತ್ರೆಗಳ ಬಾಗಿಲು ಬಡಿದ ಕ್ರೋಮಾ-ಪೂಜಾ ದಂಪತಿ ಕೊನೆಗೂ ಪೊಲೀಸರ ಮಧ್ಯಪ್ರವೇಶದಿಂದ ರವಿವಾರ ರಾತ್ರಿ ವಿಭಿನ್ನ ವ್ಯವಸ್ಥೆಯಿರುವ ಆಸ್ಪತ್ರೆಗೆ ಮಗುವನ್ನು ದಾಖಲಿಸಿದರು.

''ನಾನು ಸಂಪೂರ್ಣ ಹತಾಶನಾಗಿದ್ದೇನೆ. ಬಿಂದೂ ನಮ್ಮ ಮೊದಲ ಮಗು ಹಾಗೂ ಮಧ್ಯರಾತ್ರಿಯಲ್ಲಿ ನಮಗಾಗಿರುವ ಅನುಭವ ದುಸ್ವಪ್ನದಂತಿತ್ತು. ನಾನು ಮಧ್ಯರಾತ್ರಿ ವೇಳೆ ಅನಾರೋಗ್ಯಕ್ಕೀಡಾದ ಮಗುವನ್ನು ಎತ್ತಿಕೊಂಡು ಒಂದು ಆಸ್ಪತ್ರೆಯಿಂದ ಮತ್ತೊಂದು ಆಸ್ಪತ್ರೆಗೆ ಅಲೆದಾಡಿದ್ದೆ. ಆದರೆ ಯಾರೂ ಕೂಡ ನಮ್ಮ ಸಹಾಯಕ್ಕೆ ಬರಲಿಲ್ಲ. ನಮ್ಮಲ್ಲಿ ಕೋವಿಡ್-19 ರೋಗಿಗಳಿಗೆ ಮಾತ್ರ ವಿಭಾಗವಿದೆ ಎಂದು ಒಂದು ಆಸ್ಪತ್ರೆಯವರು ಹೇಳಿದ್ದರು. ಇನ್ನೊಬ್ಬರು ಬೆಡ್‌ಗಳೇ ಇಲ್ಲ ಎಂದು ಹೇಳಿದ್ದರು''ಎಂದು ತನಗಾದ ನೋವನ್ನು ಕ್ರೋಮಾ ಹೇಳಿದ್ದಾರೆ.

 ''ಕೊರೋನ ವೈರಸ್‌ನಿಂದಾಗಿ ನಮಗೆಲ್ಲರಿಗೂ ತುಂಬಾ ಕಷ್ಟವಾಗಿದೆ. ನನ್ನ ಮಗುವನ್ನು ಕರೆದುಕೊಂಡು ಮೂರು ಆಸ್ಪತ್ರೆಗಳಿಗೆ ಹೋಗಿದ್ದೆ. ಒಂದು ಆಸ್ಪತ್ರೆಯವರು ಮೂರು ಗಂಟೆ ಕುಳ್ಳಿರಿಸಿ, ಬಳಿಕ ಮಗುವನ್ನು ದಾಖಲಿಸಿಕೊಳ್ಳಲು ನಿರಾಕರಿಸಿದರು. ಸರಕಾರ ಈ ಸಮಸ್ಯೆಯತ್ತ ಗಮನಹರಿಸಲೇಬೇಕಾಗಿದೆ. ಇತರ ಕಾಯಿಲೆಯಿರುವ ರೋಗಿಗಳಿಗೆ ಇದರಿಂದ ತುಂಬಾ ಕಷ್ಟವಾಗುತ್ತದೆ. ಇದೀಗ ನನ್ನ ಮಗಳು ಚೇತರಿಸಿಕೊಂಡಿದ್ದಕ್ಕೆ ಸಂತೋಷವಾಗಿದೆ''ಎಂದು ಕ್ರೋಮಾ ಹೇಳಿದ್ದಾರೆ.

ಸೋಮವಾರ ಬೆಳಗ್ಗೆ ಕ್ರೋಮಾ ಅವರ ಪುತ್ರಿಯ ಆರೋಗ್ಯ ಸ್ಥಿತಿ ಬಿಗಡಾಯಿಸಿತ್ತು. ಮಗುವಿಗೆ ರಕ್ತ ವರ್ಗಾವಣೆಯ ತುರ್ತು ಅಗತ್ಯವಿತ್ತು. ಆದರೆ ಮಗುವಿನ ರಕ್ತದ ಗುಂಪು ಅಪರೂಪದ 'ಎಬಿ 'ಪಾಸಿಟಿವ್ ಆಗಿತ್ತು.

''ವೈದ್ಯರು ಈಗ ರಕ್ತ ವರ್ಗಾವಣೆಯ ಅಗತ್ಯವಿಲ್ಲ ಎಂದು ಹೇಳಿದ್ದಾರೆ. ಒಂದೆರಡು ದಿನಗಳ ಕಾಲ ನಿಗಾದಲ್ಲಿಡಲು ವೈದ್ಯರು ಬಯಸಿದ್ದಾರೆ. ಬಳಿಕ ಅವರು ನಿರ್ಧರಿಸುತ್ತಾರೆ. ಮಗುವಿಗೆ ಈಗ ಲಘು ಚಿಕಿತ್ಸೆ ನೀಡಲಾಗುತ್ತಿದೆ. ಇದೀಗ ಮಗುವಿನ ಆರೋಗ್ಯ ಸ್ವಲ್ಪ ಸುಧಾರಿಸಿದೆ''ಎಂದು ಕ್ರೋಮಾ ಅವರ ಪತ್ನಿ ಪೂಜಾ ಹೇಳಿದ್ದಾರೆ.

  ಕ್ರೋಮಾ ಅವರು ಪಿಯರ್‌ಲೆಸ್ ಕ್ಲಬ್ ಐತಿಹಾಸಿಕ ಸಿಎಫ್‌ಎಲ್ ಪ್ರಶಸ್ತಿ ಜಯಿಸಲು ನಾಯಕತ್ವವಹಿಸಿದ್ದರು. 1958ರ ಬಳಿಕ ಮೊದಲ ಬಾರಿ ಮೋಹನ್ ಬಗಾನ್, ಈಸ್ಟ್ ಬಂಗಾಳ ಹಾಗೂ ಮೊಹಮ್ಮದನ್ ಸ್ಪೋರ್ಟಿಂಗ್ ಹೊರತುಪಡಿಸಿದ ತಂಡವೊಂದು ಈ ಪ್ರತಿಷ್ಠಿತ ಪ್ರಶಸ್ತಿ ಬಾಚಿಕೊಳ್ಳಲು ಸಮರ್ಥವಾಗಿತ್ತು. ಕ್ರೋಮಾ 13 ಗೋಲುಗಳನ್ನು ಗಳಿಸಿ ಅಗ್ರ ಸ್ಕೋರರ್ ಎನಿಸಿಕೊಂಡಿದ್ದರು. ಈ ಸಾಹಸಕ್ಕೆ ಕ್ರೋಮಾ ಕಳೆದ ಋತುವಿನಲ್ಲಿ ಐಲೀಗ್‌ನಲ್ಲಿ ಈಸ್ಟ್ ಬಂಗಾಳ ತಂಡದಲ್ಲಿ ಸ್ಥಾನ ಪಡೆದಿದ್ದರು.

​