ಲಾಕ್ಡೌನ್ ಸಂದರ್ಭ ದಾಖಲೆ ಮಾರಾಟವಾದ ‘ಪಾರ್ಲೆ ಜಿ’ ಬಿಸ್ಕಿಟ್
ಹೊಸದಿಲ್ಲಿ, ಜೂ.10: ಜನಸಾಮಾನ್ಯರು ಚಹಾಸೇವನೆಯ ಸಂದರ್ಭ ಸವಿಯಲು ಇಷ್ಟಪಡುವ ಪಾರ್ಲೆ-ಜಿ ಬಿಸ್ಕಿಟ್ ಕೊರೋನ ವೈರಸ್ ಕಾರಣದ ಲಾಕ್ಡೌನ್ ಸಂದರ್ಭ ಅತ್ಯಧಿಕ ಮಾರಾಟವಾಗಿ ದಾಖಲೆ ಬರೆದಿದೆ ಎಂದು ಸಂಸ್ಥೆಯ ಮೂಲಗಳು ತಿಳಿಸಿವೆ.
ಈ ವರದಿಯನ್ನು ಟ್ವಿಟರ್ನಲ್ಲಿ ಹಲವರು ಸ್ವಾಗತಿಸಿದ್ದಾರೆ. ರಂಗಭೂಮಿಯ ದಿನದಿಂದಲೂ ನನ್ನ ವೃತ್ತಿಜೀವನಕ್ಕೆ ಚಹಾ ಮತ್ತು ಪಾರ್ಲೆ -ಜಿ ಬಿಸ್ಕಿಟ್ ಶಕ್ತಿ ತುಂಬುತ್ತಾ ಬಂದಿದೆ. ಪಾರ್ಲೆ-ಜಿ ತನ್ನ ಪ್ಯಾಕಿಂಗ್ ಅನ್ನು ಪರ್ಯಾಯ ಜೈವಿಕ ವಿಭಜನೀಯ(ಕೊಳೆಯುವ) ವಸ್ತುವಾಗಿ ಬದಲಾಯಿಸಿದರೆ ಪ್ಲಾಸ್ಟಿಕ್ ತ್ಯಾಜ್ಯ ಎಷ್ಟು ಕಡಿಮೆ ಇರುತ್ತದೆ ಎಂಬುದನ್ನು ನಿಮ್ಮಿಂದ ಕಲ್ಪಿಸಿಕೊಳ್ಳಲು ಸಾಧ್ಯವೇ ಎಂದು ನಟ ರಣದೀಪ್ ಹೂಡಾ ಟ್ವೀಟ್ ಮಾಡಿದ್ದಾರೆ. ಕಂಪೆನಿಯು ಪರಿಸರಸ್ನೇಹೀ ಪ್ಯಾಕೇಜಿಂಗ್ ವ್ಯವಸ್ಥೆ ಅಳವಡಿಸಿಕೊಳ್ಳಬೇಕು ಎಂದು ಅಫ್ರೋಝ್ ಶಾ ಸೇರಿದಂತೆ ಹಲವು ಪರಿಸರವಾದಿಗಳು ಹಾಗೂ ಕಾರ್ಯಕರ್ತರು ಟ್ವೀಟ್ ಮಾಡಿದ್ದಾರೆ.
ಪಾರ್ಲೆ-ಜಿ ಬಿಸ್ಕಿಟ್ನೊಂದಿಗಿನ ತಮ್ಮ ಸವಿಸಮಯವನ್ನು ಹಲವರು ಟ್ವಿಟರ್ನಲ್ಲಿ ಹಂಚಿಕೊಂಡಿದ್ದಾರೆ. ವಿವಿಧ ಬ್ರಾಂಡ್ಗಳ ಹಾಗೂ ಜಾಹೀರಾತಿನ ಅಬ್ಬರದ ಮಧ್ಯೆ ಬಹುತೇಕ ಕಳೆದುಹೋಗಿದ್ದ ಪಾರ್ಲೆ ಜಿ ಬಿಸ್ಕಿಟ್ ಮೂರು ತಿಂಗಳಾವಧಿಯ ಲಾಕ್ಡೌನ್ ಸಂದರ್ಭ ದಿಢೀರಾಗಿ ಜನಪ್ರಿಯಗೊಂಡಿದೆ. ಲಾಕ್ಡೌನ್ ಅವಧಿಯಲ್ಲಿ ಬಡವರಿಗೆ ಮತ್ತು ವಲಸೆ ಕಾರ್ಮಿಕರಿಗೆ ಹಲವು ಸಂಘಸಂಸ್ಥೆಗಳು ಹಾಗೂ ವ್ಯಕ್ತಿಗಳು ಒದಗಿಸಿದ ಆಹಾರ ಸಾಮಾಗ್ರಿಯ ಕಿಟ್ನಲ್ಲಿ ಪಾರ್ಲೆ-ಜಿ ಬಿಸ್ಕಿಟ್ಗಳನ್ನು ಒದಗಿಸಿದ್ದರಿಂದ ಬೇಡಿಕೆ ಹೆಚ್ಚಿದೆ.
ಅಲ್ಲದೆ ಕೊರೋನ ವೈರಸ್ನ ಸೋಂಕು ಹೆಚ್ಚಿದ್ದ ಸಂದರ್ಭದಲ್ಲಿ, 3 ಕೋಟಿ ಪ್ಯಾಕ್ನಷ್ಟು ಪಾರ್ಲೆ-ಜಿ ಬಿಸ್ಕಿಟ್ಗಳನ್ನು ದೇಣಿಗೆ ನೀಡುವುದಾಗಿ ಸಂಸ್ಥೆ ತಿಳಿಸಿತ್ತು. ಲಾಕ್ಡೌನ್ ಸಂದರ್ಭ ಪಾರ್ಲೆ ಜಿ ಅನೇಕರಿಗೆ ಉತ್ತಮ ಹಾಗೂ ಸುಲಭ ಆಹಾರವಾಗಿತ್ತು ಎಂದು ಸಂಸ್ಥೆ ತಿಳಿಸಿದೆ.
