ನಕಲಿ ನೋಟು ಜಾಲ ಬೇಧಿಸಿದ ಪೊಲೀಸರು: ರೂ. 87 ಕೋಟಿ ಮುಖಬೆಲೆಯ ನೋಟುಗಳು ವಶ
ಸೇನಾ ಜವಾನ ಸಹಿತ ಆರು ಮಂದಿ ಬಂಧನ
ಪುಣೆ: ಮಿಲಿಟರಿ ಗುಪ್ತಚರ ದಳದ ಅಧಿಕಾರಿಗಳು ಹಾಗೂ ಪುಣೆ ನಗರ ಪೊಲೀಸರು ಬುಧವಾರ ಜಂಟಿ ಕಾರ್ಯಾಚರಣೆಯೊಂದರಲ್ಲಿ ಒಟ್ಟ ರೂ. 87 ಕೋಟಿ ಮುಖಬೆಲೆಯ ಆಟಿಕೆ ಕರೆನ್ಸಿ ನೋಟುಗಳ ಸಹಿತ ನಕಲಿ ಭಾರತೀಯ ಹಾಗೂ ವಿದೇಶಿ ಕರೆನ್ಸಿ ನೋಟುಗಳನ್ನು ವಶಪಡಿಸಿಕೊಂಡಿದ್ದಾರೆ. ಈ ಸಂಬಂಧ ಸೇನಾ ಜವಾನನೊಬ್ಬ ಹಾಗೂ ಇತರ ಐದು ಮಂದಿಯನ್ನು ಬಂಧಿಸಲಾಗಿದೆ. ವಶಪಡಿಸಿಕೊಳ್ಳಲಾದ ನಕಲಿ ನೋಟುಗಳಲ್ಲ ಚಿಲ್ಡ್ರನ್ಸ್ ಬ್ಯಾಂಕ್ ಆಫ್ ಇಂಡಿಯಾ ಎಂದು ಬರೆದಿರುವ ನೋಟುಗಳೂ ಒಳಗೊಂಡಿದ್ದವು. ನಗರದ ವಿಮಾನ ನಗರ್ ಪ್ರದೇಶದಲ್ಲಿರುವ ಬಂಗಲೆಯಲ್ಲಿ ಈ ನೋಟುಗಳು ಪತ್ತೆಯಾಗಿವೆ.
ಕರೆನ್ಸಿ ವಿನಿಮಯ ವ್ಯವಹಾರಗಳಲ್ಲಿ ಅಸಲಿ ನೋಟುಗಳ ಬದಲು ನಕಲಿ ನೋಟುಗಳು ಚಲಾವಣೆಯಾಗುವಂತೆ ಇವರು ಮಾಡುತ್ತಿದ್ದರೆನ್ನಲಾಗಿದೆ. ಆರೋಪಿಗಳು ಅಸಲಿ ನೋಟುಗಳನ್ನು ಪಡೆದು ಅವುಗಳ ಬದಲು ಕೆಲವು ಅಸಲಿ ನೋಟುಗಳು, ಉತ್ತಮ ಗುಣಮಟ್ಟದ ನಕಲಿ ನೋಟುಗಳು ಹಾಗೂ ಕೆಲ ಆಟಿಕೆ ನೋಟುಗಳನ್ನು ನೀಡುತ್ತಿದ್ದರೆನ್ನಲಾಗಿದೆ.
ಮಾರುವೇಷದ ಪೊಲೀಸರ ಒಂದು ತಂಡ ನಕಲಿ ನೋಟುಗಳಿಗೆ ಬೇಡಿಕೆಯಿರಿಸಿ ಆರೋಪಿಗಳನ್ನು ಸಂಪರ್ಕಿಸಿತ್ತಲ್ಲದೆ ಅವರೊಂದಿಗೆ ವ್ಯವಹಾರ ಕುದುರಿಸಿತ್ತು. ನಂತರ ಖಚಿತ ಮಾಹಿತಿ ಪಡೆದು ದಾಳಿ ನಡೆಸಿದಾಗ ರೂ. 2000 ಹಾಗೂ ರೂ. 500 ಮುಖಬೆಲೆಯ ನೋಟಿನ ರಾಶಿಯೇ ಅಲ್ಲಿ ಪತ್ತೆಯಾಗಿತ್ತು. ಆರೋಪಿಗಳಿಂದ ನಕಲಿ ಏರ್ ಗನ್, ಸ್ಪೈ ಕ್ಯಾಮರಾ, ಕೆಲ ಫೋರ್ಜರಿ ಮಾಡಿದ ದಾಖಲೆಗಳು ಸೆಲ್ ಫೋನ್ ಹಾಗೂ ಕೆಲ ಇಲೆಕ್ಟ್ರಾನಿಕ್ ಸಾಧನಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಈ ಪ್ರಕರಣ ಸಂಬಂಧ ಬಂಧಿತ ಜವಾನನನ್ನು ಲಾನ್ಸ್ ನಾಯಕ್ ಶ್ರೇಣಿಯ ಶೇಖ್ ಆಲಿಂ ಗುಲಾಬ್ ಖಾನ್ ಎಂದು ಗುರುತಿಸಲಾಗಿದೆ. ಆತ ಸೇನೆಯ ಪುಣೆ ಘಟಕದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ. ಇತರ ಆರೋಪಿಗಳನ್ನು ಅಬ್ದುಲ್ ಘನಿ ಖಾನ್, ರಿತೇಶ್ ರತ್ನಾಕರ್, ಸುನಿಲ್ ಸರ್ದ, ತುಹೌಲ್ ಅಹ್ಮದ್ ಇಶಾಖ್ ಖಾನ್ ಎಂದು ಗುರುತಿಸಲಾಗಿದೆ.