ನಾನಿನ್ನೂ ಉತ್ತಮವಾಗಿ ಆಡಿಲ್ಲ: ಸವಿತಾ

ಬೆಂಗಳೂರು, ಜೂ.16:ಭಾರತೀಯ ಮಹಿಳಾ ಹಾಕಿ ತಂಡದ ಗೋಲ್ ಕೀಪರ್ ಸವಿತಾ ಅವರು ತನ್ನ ಅತ್ಯುತ್ತಮ ಆಟ ಇನ್ನೂ ಬರಬೇಕಿದೆ ಮತ್ತು ಟೋಕಿಯೊ ಕ್ರೀಡಾಕೂಟದಲ್ಲಿ ಇತಿಹಾಸವನ್ನು ರಚಿಸುವ ಮೂಲಕ ರಿಯೋ ಒಲಿಂಪಿಕ್ಸ್ ನಲ್ಲಿ ಆಗಿರುವ ವೈಫಲ್ಯವನ್ನು ಮರೆಮಾಚಲು ನಿರ್ಧರಿಸಿದ್ದಾರೆ.

  ಭಾರತದ ಮಹಿಳಾ ಹಾಕಿ ತಂಡವು 36 ವರ್ಷಗಳ ಅಂತರದ ನಂತರ 2016ರ ರಿಯೋ ಒಲಿಂಪಿಕ್ಸ್ ಅರ್ಹತೆ ಪಡೆದಿತ್ತು. ಆದರೆ ಗುಂಪು ಹಂತದಲ್ಲಿಯೇ ನಿರ್ಗಮಿಸಿತು.

     ‘‘ಟೋಕಿಯೋ ಒಲಿಂಪಿಕ್ಸ್‌ನಲ್ಲಿ ನನ್ನ ತಂಡಕ್ಕಾಗಿ ಅಸಾಧಾರಣ ಪ್ರದರ್ಶನ ನೀಡುವುದು ನನ್ನ ಗುರಿ. ರಿಯೋ ಒಲಿಂಪಿಕ್ಸ್‌ನಲ್ಲಿ ಆಗಿರುವ ವೈಫಲ್ಯವನ್ನು ಸರಿಪಡಿಸುವ ವಿಶ್ವಾಸ ನನಗಿದೆ ’’ ಎಂದು ಸಿರ್ಸಾ ಮೂಲದ ಸವಿತಾ ಹೇಳಿದ್ದಾರೆ. ಅವರ ಹೇಳಿಕೆಯನ್ನು ಹಾಕಿ ಇಂಡಿಯಾ ಬಿಡುಗಡೆ ಮಾಡಿದೆ.

 ‘‘ಆ ಸಮಯದಲ್ಲಿ ನಮ್ಮ ತಂಡವು ನಿಜವಾಗಿಯೂಹೆಚ್ಚಿನ ಅನುಭವ ಹೊಂದಿರಲಿಲ್ಲ ಎಂದು ನಾನು ಭಾವಿಸುತ್ತೇನೆ ಮತ್ತು ನಾವು ಕೆಲವು ತಪ್ಪುಗಳನ್ನು ಮಾಡಿದ್ದೇವೆ. ಆದಾಗ್ಯೂ, ಟೋಕಿಯೋದಲ್ಲಿ 2021 ಖಂಡಿತವಾಗಿಯೂ ನಮ್ಮ ತಂಡಕ್ಕೆ ಇತಿಹಾಸ ನಿರ್ಮಿಸಲು ಉತ್ತಮ ಅವಕಾಶವಾಗಿದೆ ’’ ಎಂದು ಸವಿತಾ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಎಫ್‌ಐಎಚ್ ವಿಶ್ವ ಶ್ರೇಯಾಂಕದಲ್ಲಿ ಭಾರತದ ಹಾಕಿ ತಂಡ ಒಂಭತ್ತನೇ ಸ್ಥಾನದಲ್ಲಿದೆ.

 ಕಳೆದ 12 ವರ್ಷಗಳಿಂದ ಭಾರತೀಯ ತಂಡಕ್ಕೆ ಹಿಂಭಾಗದಲ್ಲಿ ಬಂಡೆಯಂತೆ ನಿಲ್ಲುವ ಸವಿತಾ, ತಮ್ಮ ವೃತ್ತಿಜೀವನದ ಆರಂಭಿಕ ಹಂತದಲ್ಲಿ ಆತ್ಮ ವಿಶ್ವಾಸದ ಕೊರತೆ ಇತ್ತು ಎಂದು ಹೇಳಿದರು.

‘‘ನಾನು ಮೊದಲು ವೃತ್ತಿಬದುಕು ಪ್ರಾರಂಭಿಸಿದಾಗ, ಇತರರೊಂದಿಗೆ ಹೋಲಿಸಿದರೆ ನನ್ನ ಆತ್ಮ ನಂಬಿಕೆ ಮತ್ತು ಕ್ರೀಡೆಯ ಬಗೆಗಿನ ಉತ್ಸಾಹ ನಿಜವಾಗಿಯೂ ಕಡಿಮೆಯಾಗಿದೆ ಎಂಬುದು ಒಂದು ತಮಾಷೆಯ ವಿಷಯ. ಹೇಗಾದರೂ, ಸಮಯದೊಂದಿಗೆ, ನಾನು ಕ್ರೀಡೆಯನ್ನು ಪ್ರೀತಿಸಲು ಪ್ರಾರಂಭಿಸಿದೆ, ಮತ್ತು ನನ್ನಿಂದ ಉತ್ತಮವಾದ ಆಟ ಇನ್ನೂ ಬರಬೇಕಿದೆ ಎಂದು ನಾನು ಈಗ ನಂಬುತ್ತೇನೆ’’ ಎಂದು ಅವರು ಹೇಳಿದರು.

ಬೆಂಗಳೂರಿನ ಕ್ರೀಡಾ ಪ್ರಾಧಿಕಾರ (ಸಾಯ್) ಕ್ಯಾಂಪಸ್‌ನಲ್ಲಿ ಬೀಡು ಬಿಟ್ಟಿರುವ ಭಾರತದ ಹಾಕಿ ತಂಡಗಳು ಇತ್ತೀಚೆಗೆ ಕೊರೋನ ವೈರಸ್ ಲಾಕ್‌ಡೌನ್ ತೆರವಾದ ನಂತರ ತರಬೇತಿಯನ್ನು ಪುನರಾರಂಭಿಸಿವೆ.

  ಲಾಕ್‌ಡೌನ್ ಸಮಯದಲ್ಲಿ ಕಳೆದ ಸಮಯವನ್ನು ಇತರ ತಂಡಗಳ ಆಟವನ್ನು ವಿಶ್ಲೇಷಿಸಲು ತಂಡವು ಬಳಸಿಕೊಂಡಿದೆ ಎಂದು ಭಾರತದ ಗೋಲ್ ಕೀಪರ್ ಹೇಳಿದ್ದಾರೆ.

 ‘‘ನಾವು ಕಳೆದ ಎರಡು ತಿಂಗಳುಗಳಿಂದ ನಮ್ಮ ಹೋಮ್ ವರ್ಕ್‌ನ್ನು ಮಾಡುತ್ತಿದ್ದೇವೆ, ಅಲ್ಲಿ ನಾವು ನಮ್ಮ ಮತ್ತು ನಮ್ಮ ವಿರೋಧಿಗಳ ಆಟದ ವಿವಿಧ ಅಂಶಗಳನ್ನು ಅಧ್ಯಯನ ಮಾಡುತ್ತಿದ್ದೇವೆ ಮತ್ತು ವಿಶ್ಲೇಷಿಸುತ್ತಿದ್ದೇವೆ ’’ ಎಂದು ಅವರು ಹೇಳಿದರು.

 ವಿರಾಮವು ತನಗೆ ತಾಳ್ಮೆಯನ್ನು ಕಲಿಸಿದೆ ಮತ್ತು ಜೀವನದ ಸಣ್ಣ ಕ್ಷಣಗಳನ್ನು ಮೌಲ್ಯೀಕರಿಸಲು ಹೆಚ್ಚಿನ ಒತ್ತು ನೀಡಿದೆ ಎಂದು ಸವಿತಾ ಹೇಳಿದರು.

 ಲಾಕ್‌ಡೌನ್ ಸಮಯದಲ್ಲಿ ನಾವು ಕಳೆದ ಸಮಯವು ನನ್ನ ತಾಳ್ಮೆ ಮಟ್ಟವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ದಿದೆ ಎಂದು ನಾನು ನಂಬುತ್ತೇನೆ ’’ ಎಂದು 29ರ ಹರೆಯದ ಸವಿತಾ ಹೇಳಿದರು.

​