ರಾಣಾಗೆ ಜಾಮೀನು ನೀಡಿದರೆ ಭಾರತ-ಅಮೆರಿಕ ಸಂಬಂಧದ ಮೇಲೆ ಪರಿಣಾಮ

ವಾಶಿಂಗ್ಟನ್, ಜೂ. 21: ಮರುಬಂಧನಕ್ಕೊಳಗಾಗಿರುವ ಮುಂಬೈ ಭಯೋತ್ಪಾದಕ ದಾಳಿಯ ಸಂಚುಕೋರ ಹಾಗೂ ಪಾಕಿಸ್ತಾನ ಮೂಲದ ಕೆನಡ ಉದ್ಯಮಿ ತಹವ್ವರ್ ರಾಣಾನಿಗೆ ಜಾಮೀನು ನೀಡಿದರೆ ಆತ ವಿದೇಶಕ್ಕೆ ಪರಾರಿಯಾಗಬಹುದು ಎಂದು ಹೇಳಿರುವ ಅಮೆರಿಕವು, ಆತನನ್ನು ಜಾಮೀನಿನ ಮೇಲೆ ಬಿಡುಗಡೆ ಮಾಡುವುದನ್ನು ವಿರೋಧಿಸಿದೆ.

ಅವನು ಕೆನಡಕ್ಕೆ ಪರಾರಿಯಾಗುವಲ್ಲಿ ಯಶಸ್ವಿಯಾದರೆ, ಅವನು ಭಾರತದಲ್ಲಿ ಮರಣದಂಡನೆಗೆ ಗುರಿಯಾಗುವ ಸಾಧ್ಯತೆಯಿಂದ ತಪ್ಪಿಸಿಕೊಳ್ಳಬಹುದು ಎಂಬ ಆತಂಕವನ್ನು ಅದು ವ್ಯಕ್ತಪಡಿಸಿದೆ.

‘‘ಪರಿಸ್ಥಿತಿಗಳನ್ನು ಗಮನಿಸಿದರೆ, ಅವನಿಗೆ ಯಾವುದೇ ಮೊತ್ತದ ಜಾಮೀನು ನೀಡಿದರೂ ಅವನು ನ್ಯಾಯಾಲಯದಲ್ಲಿ ಮತ್ತೆ ಹಾಜರಾಗುವ ಸಾಧ್ಯತೆ ತೀರಾ ಕಡಿಮೆಯಿದೆ. ಅವನಿಗೆ ಜಾಮೀನು ಲಭಿಸಿದರೆ, ವಿದೇಶ ವ್ಯವಹಾರಗಳ ನಿಭಾವಣೆಯಲ್ಲಿ ಅಮೆರಿಕ ಎಡವಿದೆ ಎಂಬ ಕಾರಣಕ್ಕಾಗಿ ಅದು ಅಂತರ್‌ರಾಷ್ಟ್ರೀಯ ಮಟ್ಟದಲ್ಲಿ ಮುಜುಗರಕ್ಕೀಡಾಗಬಹುದು ಹಾಗೂ ಭಾರತದೊಂದಿಗಿನ ಅದರ ಸಂಬಂಧದ ಮೇಲೆ ಪರಿಣಾಮ ಬೀರಬಹುದು’’ ಎಂದು ಸಹಾಯಕ ಅಮೆರಿಕ ಅಟಾರ್ನಿ ಜಾನ್ ಜೆ. ಲೂಲ್‌ ಜಿಯನ್ ಕಳೆದ ವಾರ ಲಾಸ್ ಏಂಜಲಿಸ್‌ನ ನ್ಯಾಯಾಲಯವೊಂದರಲ್ಲಿ ವಾದಿಸಿದರು.

ಉಗ್ರ ಹಫೀಝ್ ಸಯೀದ್ ನೇತೃತ್ವದ ಪಾಕಿಸ್ತಾನದ ಲಷ್ಕರೆ ತಯ್ಯಬ ಭಯೋತ್ಪಾದಕ ಸಂಘಟನೆಯು 2008 ನವೆಂಬರ್‌ನಲ್ಲಿ ಮುಂಬೈ ಮೇಲೆ ನಡೆಸಿದ ಭೀಕರ ದಾಳಿಯಲ್ಲಿ 166 ಮಂದಿ ಮೃತಪಟ್ಟಿದ್ದಾರೆ. ಈ ಕೃತ್ಯದಲ್ಲಿ ರಾಣಾ ಸಹಸಂಚುಕೋರನಾಗಿದ್ದನು.

ಆತನನ್ನು ಅಮೆರಿಕದ ಶಿಕಾಗೊ ನಗರದಲ್ಲಿ 2009ರಲ್ಲಿ ಬಂಧಿಸಲಾಗಿತ್ತು. ಅವನ ವಿರುದ್ಧದ ಡೆನ್ಮಾರ್ಕ್‌ನಲ್ಲಿ ಭಯೋತ್ಪಾದನೆಗೆ ಸಲಕರಣೆಗಳನ್ನು ಪೂರೈಸಿದ ಹಾಗೂ ಲಷ್ಕರೆ ತಯ್ಯಬಕ್ಕೆ ಸಲಕರಣೆಗಳನ್ನು ಪೂರೈಸಿದ ಎರಡು ಆರೋಪಗಳು ನ್ಯಾಯಾಲಯದಲ್ಲಿ ಸಾಬೀತಾದವು. ಆದರೆ, ಭಾರತದಲ್ಲಿ ಭಯೋತ್ಪಾದನೆಗೆ ವಸ್ತು ರೂಪದಲ್ಲಿ ಬೆಂಬಲ ನೀಡಿರುವ ಆರೋಪದಲ್ಲಿ ನ್ಯಾಯಾಲಯವು ಆತನನ್ನು ದೋಷಮುಕ್ತಿಗೊಳಿಸಿತ್ತು.

59 ವರ್ಷದ ತಹವ್ವರ್ ರಾಣಾನನ್ನು ಇತ್ತೀಚೆಗೆ ಜೈಲಿನಿಂದ ಅನುಕಂಪದ ಆಧಾರದಲ್ಲಿ ಬಿಡುಗಡೆ ಮಾಡಲಾಗಿತ್ತು. ಅವನನ್ನು ಗಡಿಪಾರು ಮಾಡುವಂತೆ ಭಾರತ ಮಾಡಿರುವ ಮನವಿಯ ಮೇರೆಗೆ ಅವನನ್ನು ಜೂನ್ 10ರಂದು ಲಾಸ್ ಏಂಜಲಿಸ್‌ನಲ್ಲಿ ಮತ್ತೆ ಬಂಧಿಸಲಾಯಿತು.

1997ರಲ್ಲಿ ಸಹಿ ಹಾಕಲಾದ ದ್ವಿಪಕ್ಷೀಯ ಗಡಿಪಾರು ಒಪ್ಪಂದದಂತೆ ತಹವ್ವರ್ ರಾಣಾನನ್ನು ಬಂಧಿಸಿ ಗಡಿಪಾರು ಮಾಡುವಂತೆ ಭಾರತ ಸರಕಾರವು ಮನವಿ ಸಲ್ಲಿಸಿದೆ ಎಂದು ಜಾನ್ ಜೆ. ಲುಲಿಜಿಯನ್ ನ್ಯಾಯಾಲಯಕ್ಕೆ ಹೇಳಿದರು.

ಕೊಲೆಗೆ ಸಂಚು ರೂಪಿಸಿರುವುದು ಸೇರಿದಂತೆ ಆತನ ವಿರುದ್ಧ ಭಾರತದಲ್ಲಿ ಹಲವಾರು ಅಪರಾಧ ಪ್ರಕರಣಗಳು ದಾಖಲಾಗಿವೆ.