ಐಸಿಸಿ ಎಲೆಟ್ ಪ್ಯಾನಲ್ ಗೆ ಭಾರತದ ಅಂಪೈರ್ ನಿತಿನ್ ಮೆನನ್ ಆಯ್ಕೆ

ಮುಂಬೈ, ಜೂ.29: ಅಂತರ್‌ರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ ನಡೆಸಿದ ವಾರ್ಷಿಕ ಪರಿಶೀಲನೆ ಮತ್ತು ಆಯ್ಕೆ ಪ್ರಕ್ರಿಯೆಯಲ್ಲಿ 2020-21ರ ಋತುವಿನಲ್ಲಿ ಎಮಿರೇಟ್ಸ್ ಐಸಿಸಿ ಎಲೈಟ್ ಪ್ಯಾನೆಲ್ ಆಫ್ ಅಂಪೈರ್‌ಗಳಲ್ಲಿ ಸೇರ್ಪಡೆಯಾದ ವಿಶ್ವದ ಅತ್ಯಂತ ಕಿರಿಯ ಸದಸ್ಯ ಎಂಬ ಹೆಗ್ಗಳಿಕೆಗೆ ಭಾರತದ ನಿತಿನ್ ಮೆನನ್ ಪಾತ್ರರಾಗಿದ್ದಾರೆ.

ಇಂಗ್ಲೆಂಡ್‌ನ ಮೈಕಲ್ ಗಾಫ್ (40 ವರ್ಷ) ಅವರ ಹೆಸರಲ್ಲಿದ್ದ ದಾಖಲೆಯನ್ನು ಮೆನನ್ ತಮ್ಮ ಹೆಸರಿಗೆ ವರ್ಗಾಯಿಸಿಕೊಂಡಿದ್ದಾರೆ. 36ರ ಹರೆಯದ ಮೆನನ್ ಮೂರು ಟೆಸ್ಟ್, 24 ಏಕದಿನ ಮತ್ತು 16 ಟ್ವೆಂಟಿ 20 ಪಂದ್ಯಗಳಲ್ಲಿ ಅಂಪೈರ್ ಆಗಿ ಕಾರ್ಯ ನಿರ್ವಹಿಸಿದ್ದಾರೆ. ಶ್ರೀನಿವಾಸ್ ವೆಂಕಟರಾಘವನ್ ಮತ್ತು ಸುಂದರಂ ರವಿ ನಂತರ ಪ್ರತಿಷ್ಠಿತ ಗ್ರೂಪ್‌ನ್ನು ಸೇರಿಕೊಂಡ ಮೆನನ್ ಭಾರತ ದೇಶದಿಂದ ಮೂರನೇಯವರಾಗಿದ್ದಾರೆ ’’ಎಂದು ಐಸಿಸಿ ಪತ್ರಿಕಾ ಪ್ರಕಟಣೆ ತಿಳಿಸಿದೆ.

    ಐಸಿಸಿ ಜನರಲ್ ಮ್ಯಾನೇಜರ್ - ಕ್ರಿಕೆಟ್, ಜೆಫ್ ಅಲಾರ್ಡಿಸ್ (ಅಧ್ಯಕ್ಷರು), ಮಾಜಿ ಆಟಗಾರ ಮತ್ತು ವೀಕ್ಷಕ ವಿವರಣೆಗಾರ ಸಂಜಯ್ ಮಾಂಜ್ರೇಕರ್ ಮತ್ತು ಮ್ಯಾಚ್ ರೆಫರಿ ರಂಜನ್ ಮದುಗಲೆ ಮತ್ತು ಡೇವಿಡ್ ಬೂನ್ ಅವರನ್ನೊಳಗೊಂಡ ಸಮಿತಿಯು ಈ ಆಯ್ಕೆಯನ್ನು ಮಾಡಿದೆ. ಎಲೈಟ್ ಪ್ಯಾನಲ್‌ನಲ್ಲಿ ಸೇರಿರುವ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಮೆನನ್ ‘‘ ನನಗೆ ಇದು ದೊಡ್ಡ ಗೌರವ ಮತ್ತು ಹೆಮ್ಮೆಯ ವಿಷಯವಾಗಿದೆ. ವಿಶ್ವದ ಪ್ರಮುಖ ಅಂಪೈರ್‌ಗಳು ಮತ್ತು ರೆಫರಿಗಳೊಂದಿಗೆ ಕಾರ್ಯ ನಿರ್ವಹಿಸುವುದು ನನ್ನ ಕನಸಾಗಿತ್ತು’’ ಎಂದು ಹೇಳಿದ್ದಾರೆ.

  ಈ ಹಿಂದೆ ಎಮಿರೇಟ್ಸ್ ಐಸಿಸಿ ಇಂಟರ್‌ನ್ಯಾಶನಲ್ ಪ್ಯಾನಲ್ ಆಫ್ ಅಂಪೈರ್ಸ್‌ನ ಭಾಗವಾಗಿದ್ದ ಮೆನನ್, ಈಗಾಗಲೇ ಟೆಸ್ಟ್, ಏಕದಿನ ಮತ್ತು ಟ್ವೆಂಟಿ-20 ಮತ್ತು ಐಸಿಸಿ ಈವೆಂಟ್‌ಗಳಲ್ಲಿ ಕಾರ್ಯನಿರ್ವಹಿಸಿರುವುದರಿಂದ ಕರ್ತವ್ಯದ ಜೊತೆಗೆ ಬರುವ ದೊಡ್ಡ ಜವಾಬ್ದಾರಿಯನ್ನು ನಾನು ಅರ್ಥಮಾಡಿಕೊಂಡಿದ್ದೇನೆ. ಅದಕ್ಕಾಗಿ ನಾನು ಎದುರು ನೋಡುತ್ತಿದ್ದೇನೆ. ನಾನು ಪಡೆಯುವ ಪ್ರತಿಯೊಂದು ಸವಾಲುಗಳಲ್ಲಿ ನನ್ನ ಕೈಲಾದಷ್ಟು ಸಹಾಯ ಮಾಡುತ್ತೇನೆ. ಭಾರತೀಯ ಅಂಪೈರ್‌ಗಳನ್ನು ಮುಂದೆ ಕರೆದೊಯ್ಯುವುದು ಮತ್ತು ನನ್ನ ಅನುಭವಗಳನ್ನು ಹಂಚಿಕೊಳ್ಳುವ ಮೂಲಕ ಅವರಿಗೆ ಸಹಾಯ ಮಾಡುವುದು ನನ್ನ ಜವಾಬ್ದಾರಿಯಾಗಿದೆ ಎಂದು ನಾನು ಭಾವಿಸುತ್ತೇನೆ’’ ಎಂದು ಹೇಳಿದರು.

ಐಸಿಸಿ ಹಿರಿಯ ವ್ಯವಸ್ಥಾಪಕ ಆಡ್ರಿಯನ್ ಗ್ರಿಫಿತ್, ಅಂಪೈರ್‌ಗಳು ಮತ್ತು ತೀರ್ಪುಗಾರರು ಮೆನನ್‌ರನ್ನು ಮಂಡಳಿಯಲ್ಲಿ ಸ್ವಾಗತಿಸಿ, ಭಾರತೀಯ ಅಂಪೈರ್ ನಮ್ಮ ಪಾಥ್‌ವೇ ಸಿಸ್ಟಮ್ ಮೂಲಕ ಅತ್ಯಂತ ಸ್ಥಿರವಾದ ಪ್ರದರ್ಶನಗಳೊಂದಿಗೆ ಬಂದಿದ್ದಾರೆ ಎಂದು ಹೇಳಿದರು.

ಎಮಿರೇಟ್ಸ್ ಐಸಿಸಿ ಎಲೈಟ್ ಪ್ಯಾನೆಲ್ ಆಫ್ ಅಂಪೈರ್ಸ್‌ನ ಇತರ ಸದಸ್ಯರ ವಿವರ ಇಂತಿವೆ. ಅಲೀಂ ದಾರ್, ಕುಮಾರ್ ಧರ್ಮಸೇನ, ಮಾರೈಸ್ ಎರಾಸ್ಮಸ್, ಕ್ರಿಸ್ ಗಫಾನೆ, ಮೈಕೆಲ್ ಗೌಫ್, ರಿಚರ್ಡ್ ಇಲಿಂಗ್ವರ್ತ್, ರಿಚರ್ಡ್ ಕೆಟಲ್ಬರೋ, ಬ್ರೂಸ್ ಆಕ್ಸೆನ್‌ಫೋರ್ಡ್, ಪಾಲ್ ರೀಫೆಲ್, ರಾಡ್ ಟಕರ್ ಮತ್ತು ಜೋಯಲ್ ವಿಲ್ಸನ್.